1-2. Nagnino ro toko’e hahaliagne ty Kristiana iaby ty miomba ty famelomagne i aze ho an-dagnitse agne rey?

MITAMÀ hiaigne nainai’e ambone tane eto ty ankamaroa o mpanompo i Jehovah-o. Faie misy Kristiana ka mitamà fa hovelomegne mba hiaigne an-dagnitse agne. Tsy ampe avao iareo sady i Jehovah ty nijobogne iareo. Tena tea o Kristiana voahosotse rehoe ty hahafantatse tie hanao akore ty fiaigna iareo an-dagnitse agne. Faie nagnino zay ro toko’e hahaliagne ze hiaigne ambone tane eto? Hotreantika ato fa hinday fitahiagne hoahy ze ndaty mitamà hiaigne nainai’e ambone tane eto i aze hovelomegne mba hiaigne an-dagnitse agne rey. Tena toko’e hahaliagne antika ty miomba ty famelomagne o ndaty ho an-dagnitse agne reo, ndra hiaigne ambone tane etoy tika ndra ho an-dagnitse agne.

² Nitarihe i fagnahy masigney ty mpiana i Jesosy ila’e tamy ty taonjato voaloha’e mba hanoratse miomba ty famelomagne ty mate an-dagnitse agne. Izao ohatse ty raha nirehafe i apostoly Jaona: “Anan’Andrianagnahare tika hinane zao, faie mbe tsy natoro antika tie hanao akore tika. Izao ty fantatikagne: Hanahake aze tika naho fa hatoro reke, satria ho treantika tie manao akore reke.” (1 Jaona 3:2) Tsy fanta o Kristiana voahosotseo areke tie hanao akore ze o managne vatagne ara-pagnahy zao naho fa hovelomegne iareo. Faie tena hahatrea maso i Jehovah iareo naho fa hahazo i valesoa iareoy. Tsy rehafe ty Baiboly amy ty pitsopitso’e ty miomba ty famelomagne o aze ho an-dagnitse agne reo. Faie nisy raha ila’e avao nirehafe  i apostoly Paoly. Hiarake amy i Kristy o Kristiana voahosotse reo naho fa hamoagne “ty fitondragne naho ty fahefàgne vaho ty hery iaby” reke, agnisa izay o ‘fahafatezagneo, i fahavalo fara’ey.’ Amy ty fara’e, le hagneke i Jehovah ty Jesosy naho o hiara-manjaka ama’e reo. Fa aloha izay, le hasaegne hagneke i Jesosy hey ze kila raha. (1 Kor. 15:24-28) Tena ho soa ty amy izay! *

3. Nagnampe i Paoly hahavita inogne ty finoa’e ty famelomagne ty mate, naho henteagne ty 1 Korintianina 15:30-32?

³ Nagnampe i Paoly hiaretse ty raha sarotse nanjò aze ty finoa’e miomba ty famelomagne ty mate. (Vakio ty 1 Korintianina 15:30-32.) Nirehake tamo o Korintianao reke fa nisy loza natahora’e hahafate aze isan’andro. Hoe ka reke: ‘Nialy tamy ty bibihako raho ta Efesosy agne.’ Va’e ireke nialy tamy ty biby tamy ty toeragne fihisagne ta Efesosy agney ty tea’e ho rehafegne amy io. (2 Kor. 1:8; 4:10; 11:23) Ndra va’e ho ty fanoheragne natao o Jiosio naho ty ndaty hafa manahake o “biby masiakeo.” (Asa. 19:26-34; 1 Kor. 16:9) Faie ndra biby ara-bakiteny io ndra agn’ohatse, le azo antoke fa tena nimafe tama’e ty niatreke aze. Faie ndra tie teo zay, le nifantoke avao tamy i raha nitamae’ey reke.—2 Kor. 4:16-18.

4. Nagnino ty fanantenagne miomba ty famelomagne ty mate ro magnatanjake antika? (Henteo ty sare amy ty fogno ty gazete toy.)

⁴ Tsy mora ka ty raha iaignantika amy izao. Ampijalegne zao ty rahalahy naho ty rahavaventikagne ila’e. Ty ila’e mitoboke amy ty tane misy aly, le matahotse. Ty ila’e ka mitoboke amy ty toeragne andraragne ty asantikagne agne. Faie ndra tie eo zay, le mbe mitory avao iareo, ndra tie va’e ho gadraegne naho ho vonoegne aza. Sambe tsy mivalike amy i Jehovah o rahalahy naho o rahavaventika rehoe, le tena modely ho antika amy ty fiaretagne. Tsy matahotse iareo satria matoky fa ndra tie mate aza amy izao, le mbe misy raha fanjaka ampitamae i Jehovah iareo.

5. Ino ty toe-tsaigne raty va’e hampihegne ty finoantika miomba ty famelomagne ty mate?

⁵ Nampitao o mpiharo finoagne ama’eo ty Paoly mba tsy hanagne ty toe-tsaigne nanagna o ndatio tamy izay toy: “Naho tsy hovelomegne ty mate, ‘le andao tika hihinagne naho hinogne, fa ho mate naho maray.’” Fa nanagne ze toe-tsaigne zay ndra ty ndaty nivelogne taloha i Paoly. Va’e i rehake amy Isaia 22:13 aoy o nirehafe i Paoly iohoe, satria fa nanagne ze toe-tsaigne raty zay o Israelitao. Ndra aleo iareo nanao ze raha hahafalefale iareo avao toe izay hanao raha hahavy iareo hifandrambe soa amy i Jehovah. Tena mitovy amy ze toe-tsay o Israelitao zay ty toe-tsay ty ndaty amy izao, le tihoe: ‘Anò ze hahafale azo satria tsy hai’o rehe tie ho mate naho hamaray.’ Faie haintika soa fa niraty ty fiafarà o Israelitao noho iareo nanagne ze toe-tsaigne raty zay.—2 Tan. 36:15-20.

6. Nagnino ty finoagne ty famelomagne ty mate ro toko’e hisy voka’e amy ty ndaty jobognentika hatao ragnetse?

⁶ Tena mino tika fa hovelomegne vata’e ty mate. Faie inogne ty toko’e ho voka izay amantika? Toko’e handrisike antika hahay hijobogne ty ndaty hataontika ragnetse zay. Nila nitao zao ty Kristiana ta Korinto tagne mba tsy hifagnosehose amy ty ndaty tsy mino ty famelomagne ty mate. Ino ty lesogne ho antika? Ho raty ty voka’e naho ohatse ndaty tsy mino ty raha ampitamaen’Agnahare sady tsy mieretseretse naho tsy ze raha hahafalefale aze avao ro mifagnosehose amantika mateteke. Ho simba ty toe-tsay ty Kristiana raike naho ty fahazaragne soa anagna’e naho ndaty  hoe izay ty atao’e ragnetse. Va’e hahavy aze hanota aman’Andrianagnahare aza zay. Izay ty nahavy i Paoly nandily iareo tie: “Mifohaza soa nareo, le ko zatse manota sasa.”​—1 Kor. 15:33, 34.

7. Naho henteagne ty 1 Korintianina 15:35, ino ty raha va’e nagnontenea o ndatio miomba ty famelomagne ty mate?

⁷ Vakio ty 1 Korintianina 15:35. Nisy ndaty te hampisalasala ty ndaty hafa miomba ty famelomagne ty mate tie taloha, le nagnontane hoe izao: “Hatao akore ty ho famelomagne o ndaty fa nimateo?” Tena mahasoa antika ty mandineke ty vale izay satria sambe managne ty heve’e miomba ty mate ty ankamaroa o ndatio. Faie inogne ty ampianare ty Baiboly?

8. Ino ty fagnoharagne raike magnampe antika hahatrea fa vitan’Andrianagnahare ty magnomey vatagne hafa o ndaty hovelomegneo, arake ty 1 Korintianina 15:36-38?

⁸ Vakio ty 1 Korintianina 15:36-38. Simba ty vata o ndatio naho fa mate reke. Faie tsy ho sarotse amy i namorogne ze kila rahay ty hamelogne aze indraike, satria vita’e ty hagnomey vatagne mete amy i ndatỳ. (Gen. 1:1; 2:7) Nisy raha natao i Paoly naho fa nirehake miomba ty famelomagne ty mate o aze ho an-dagnitse agne reo. Nampiasa fagnoharagne reke mba hampisehoagne fa tsy voatere hitovy amy i vatagne nanagna i ndatỳ ty homein’Andrianagnahare aze naho fa hovelome’e reke. Eretsereto ohatse o “tabirio.” Mitiry rey naho fa ambolegne. Faie tsy tena mitovy tanterake amy i tabiry nambolegney o tiri’e iohoe. Nampiasa o fagnoharagne iohoe ty Paoly mba hampisehoagne fa vita i Mpamorogney ty magnomey ‘vatagne ty ndaty raike arake ze iteava’e aze.’

9. Ino ty raha rehafe ty 1 Korintianina 15:39-41 miomba ty tsy fitoviza o vatagneo?

⁹ Vakio ty 1 Korintianina 15:39-41. Nirehafe i Paoly fa tsy mitovy ze kila raha namboaren’Andrianagnahare. Tsy mitovy ohatse ty vata o raha managn’aigneo, agnisa izay o agnombeo, o vorogneo naho o fiagneo. Nirehake ka reke fa tsy mitovy ty raha amy i lagnitsey  ey, agnisa izay i masoandroy naho i volagney. Nirehake aza reke, fa “sambe managne ty voninahi’e o vasiagneo.” Tena maregne zay ndra tie hoe mitovy avao aza ty fahatreavantikagne i vasiagne rey. Ty anto’e, rehafe o mpahay siansao fa bey ty ila’e amo o vasiagneo, fa ty ila’e kidikidy. Ty ila’e mena, ty ila’e foty, le ty ila’e vogne ndra mavògne manahake i masoandroy. Nirehake ka ty Paoly fa ‘tsy mitovy ty vata ze an-dagnitse agne naho ty vata ze an-tane etoy.’ Fa nagnino? Satria nofotse ty vata ze an-tane etoy, fa fagnahy manahake o anjelio ze an-dagnitse agne.

10. Ino ty ho vata ze ndaty hovelomegne hiaigne an-dagnitse agne?

¹⁰ Mareho ty raha nirehafe i Paoly magnarake toy. Hoe reke: “Hoe izay ka ty famelomagne ty mate. Vatagne mete momoke reke naho fa tongisegne, faie ho vatagne tsy mete momoke reke naho fa hovelomegne.” Haintika soa fa mihasimba ty vata o ndatio naho fa mate, le miheregne ho lemboke. (Gen. 3:19) Akore areke ty hampitombegne i tihoey tie ‘tsy ho mete momoke reke naho fa hovelomegne’? Tsy i ndaty nivelomegne tan-tane etoy rey ty tea i Paoly ho rehafegne, agnisa izay i ndaty nivelome i Elia naho i Elisa vaho i Jesosy rey. O ndaty hovelomegne an-dagnitse agne reo ty tea’e ho rehafegne satria hanjare fagnahy iareo.—1 Kor. 15:42-44.

11-12. Mbe nofotse vao ty Jesosy naho fa nivelomegne tamy ty mate? Hanao akore ka ty vata o Kristiana voahosotseo naho fa hovelomegne?

¹¹ Nofotse ty Jesosy tamy ie tan-tane etoỳ. Faie “nanjare fagnahy” reke naho fa nivelomegne tamy ty mate mba hahafaha’e hiheregne an-dagnitse agne. Hoe izay ka ty raha hiseho amo o Kristiana voahosotseo mba hahafaha iareo hiaigne an-dagnitse agne. Hoe ty Paoly: “Manahake ty indesantikagne ty vinta i aze namboaregne tamy ty lembokey ro hindesantikagne ka ty vinta i aze hirike an-dagnitse agney.”​—1 Kor. 15:45-49.

¹² Soa ho tadidientika fa tsy nofotse sasa ty Jesosy naho fa nivelomegne tamy ty mate. Naho fa ho namaragne i fagnazava’ey ty  Paoly, le nirehafe’e ty anto izay. Hoe reke: “Tsy afake mandova ty Fanjakàn’Andrianagnahare o nofotse naho o liò.” (1 Kor. 15:50) Naho fa hovelomegne mba hiaigne an-dagnitse agne ka o Kristiana voahosotseo, le tsy ho nofotse naho lio sasa ty vata iareo. Ombia ty hamelomagne iareo amy ty mate? Nirehafe i Paoly fa tsy afara kede ty ifateza iareo zay ro hiseho fa mbe ho afara agne. Fa nimate ty apostoly ila’e tamy ty fotoagne nanorata i Paoly ty 1 Korintianina, agnisa izay ty apostoly Jakoba. (Asa. 12:1, 2) “Nimate” ka ty apostoly ila’e naho ty Kristiana voahosotse ila’e naho fa tafara tatoy.​—1 Kor. 15:6.

13. Ino iaby ty famantaragne tie fa “magnatreke” ty Jesosy?

¹³ Sambe nirehake ty raha miambake hiseho amy ty fagnatreha i Kristy ty Paoly naho i Jesosy. Intoa iaby ty raha hisy hoe iareo: Aly, horohoron-tane, aretegne manjamagne, naho ty raha raty hafa hiseho magneran-tane. Haintika fa nitanterake o raha rehoe nanomboke tamy 1914. Nisy raha lahibey hafa ka nirehafe i Jesosy fa ho agnisa ty famantaragne ty fagnatreha’e. Hoe reke: “Hotoriegne magneran-tane ty talily soa i Fanjakagney toy, ho vavolombelogne amy ty firenena iaby, vaho izay ho avy ty fara’e.” (Mat. 24:3, 7-14) Nirehake ty Paoly fa agnate i fotoagne agnatreha i Tompoy ty hamelomagne o voahosotseo.​—1 Tes. 4:14-16; 1 Kor. 15:23.

14. Hatao akore ze Kristiana voahosotse mate agnate ty fotoagne agnatreha i Kristy?

¹⁴ Faie akore ze Kristiana voahosotse mate amy izao? Le avy le hovelomegne mba hiaigne an-dagnitse agne iareo. Magnamafe izay ty reha i Paoly amy 1 Korintianina 15:51, 52 ao toy. Hoe reke: “Tsy ho mate iaby tika, fa itika  iaby le hovagne agnate ty fotoagne fohe, naho fa magneno i trompetra fara’ey.” Tanterake amy izao o reha i Paoly iohoe. Tena ho fale o rahalahy i Kristy rehoe naho fa hovelomegne, satria “hiarake amy i Tompo nainai’e” iareo.​—1 Tes. 4:17.

15. Ino ty asa mandigne o Kristiana voahosotse hovelomegne mba hiaigne an-dagnitse agne reo?

¹⁵ Inogne ty asa mandigne o Kristiana voahosotse hovelomegne mba hiaigne an-dagnitse agne reo? Hoe ty Jesosy amy iareo: “Ze mandrese naho magnatanterake ty asako hatrake am-para’e, le homeako fahefàgne amo o firenenao. Le hifehe o ndatio amy ty doda vigne reke, le ho demodemoke manahake o valagne tane lietseo rey. Eka, homeako fahefàgne reke, manahake i nirambeseko taman-dRaekoy.” (Apok. 2:26, 27) Hiarake amy i Jesosy hifehe o firenenao amy ty doda vigne areke iareo.​—Apok. 19:11-15.

16. Amy ty fomba akore ty handresea ty ankamaroa o ndatio o fateo?

¹⁶ Handrese o fateo o voahosotseo naho fa hovelomegne an-dagnitse agne. (1 Kor. 15:54-57) Sady naho tsy velomegne amy ty mate ka iareo, le tsy ho afake hiarake amy i Jesosy hagnafake ze kila raha raty amy i aly Hara-magedonay. An-tapetrisa’e ty Kristiana ho votso-belogne amy i haoreagne lahibeỳ, le hiaigne amy i tontolo vaovaoy ao. (Apok. 7:14) O ndaty ho votso-belogne rehoe, le ho vavolombelogne hahatrea ka fa ho rese o fateo, satria hahatrea ty hamelomagne ty ndaty agnarivo tapetrisa’e fa nimate. Mba alao sare an-tsaigne hey ty ho hafaleantika amy ze fotoagne zay! (Asa. 24:15) Handrese i fate nilovagne tamy i Adamay ze tsy mivalike amy i Jehovah sady lelia’e hovelogne nainai’e.

17. Mandrisike antika hanao ino ty 1 Korintianina 15:58?

¹⁷ Inogne areke ty azontika tsikiraidraike atao? Toko’e hankasitrake i rehake mampahery nisorate i Paoly hoahy o Korintianao miomba ty famelomagne ty matey tika. Maro ka ty anto’e mahavy antika toko’e hagnorike ty torohevetse nimey i Paoly manao tihoe toy: ‘Mikezaha ho bey atao lognandro amy ty asa i Tompo.’ (Vakio ty 1 Korintianina 15:58.) Naho manao ze fara’e soa vitantika amo o asa i Tompo iohoe tika, le afake mitamà ty hiaigne nainai’e amy i tontolo vaovaoy ao. Tena ho soa ty fiaignagne amy izay, sady ho soa mandikoatse ze eretseretentika amy izao aza. Tena tsy montso antoke areke ty kezake ataontika mba hanoagne ty asa i Tompo amy izao.