1-2. Nkaambo nzi Banakristo boonse ncobeelede kububikkila maano bubuke bwakujulu?

BANTU banji ibabelekela Jehova lino bajisi bulangizi bwakuyoopona kukabe kutamani anyika. Nokuba boobo, Banakristo bananike basyeede balangila kuyoobusyilwa kubuumi bwakujulu. Bananike aaba balayandisisya kuzyiba buumi bwabo bwakumbele mbobuyooba, pele ino mbuti kujatikizya baabo ibajisi bulangizi bwakuyoopona anyika? Mubwenya mbotutiibone, bubuke bwakujulu buyooleta zilongezyo akuli baabo ibajisi bulangizi bwakuyoopona anyika kukabe kutamani. Aboobo kufwumbwa naa tujisi bulangizi bwakuyoopona kujulu naa anyika, tweelede kububikkila maano bubuke bwakujulu.

² Leza wakasololela basikwiiya ba Jesu bamwi mumwaanda wamyaka wakusaanguna kuti balembe kujatikizya bulangizi bwakujulu. Mwaapostolo Johane wakapandulula kuti: “Tuli bana ba Leza, pele takunayubununwa pe mbotuyooba kumbele. Tulizyi kuti aakuyubununwa tuyooba mbuli nguwe.” (1Joh. 3:2) Banakristo bananike tabazyi mbobayooba ciindi baakubusyilwa kubuumi bwakujulu kabajisi mibili yamuuya. Nokuba boobo, bayoomubona Jehova ciindi baakupegwa bulumbu bwabo. Bbaibbele talyaambi makani oonse aajatikizya bubuke bwakujulu, pele mwaapostolo Paulo wakaamba makani amwi kujatikizya bubuke oobu. Bananike banooli antoomwe a Kristo ‘baakunyonyoona mfwulumende zyoonse abweendelezi boonse alimwi anguzu zyoonse.’  Eeci cilabikkilizya ‘asinkondo wamamanino uuyoonyonyoonwa, ilufwu.’ Mpoonya, Jesu abalelinyina ‘bayoolibombya alimwi akubombya zintu zyoonse kuli Jehova.’ (1Kor. 15:24-28) Eelo kaka eeci cinooli ciindi cikkomanisya! *

3. Kweelana alugwalo lwa 1 Bakorinto 15:30-32, ino lusyomo ndwaakajisi Paulo mububuke lwakamugwasya kucita nzi?

³ Lusyomo ndwaakajisi Paulo mububuke lwakamugwasya kuliyumya mumasunko aayindene-indene. (Amubale 1 Bakorinto 15:30-32.) Wakalembela bana Korinto kuti: “Abuzuba ndijanika muntenda yalufwu.” Alimwi wakalemba kuti: “Ndakalwana abanyama babutambo ku Efeso.” Ambweni wakali kupandulula kuti wakalwana abanyama beni ibakali mubbuwa lyazisobano mu Efeso. (2Kor. 1:8; 4:10; 11:23) Naa ambweni wakali kupandulula kukazyigwa aba Juda alimwi abamwi ibakali mbuli “banyama babutambo.” (Mil. 19:26-34; 1Kor. 16:9) Kufwumbwa naa cakali buti, Paulo wakali muntenda. Pele wakazumanana kusyoma kuti uyooba abuumi bukkomanisya kumbele.—2Kor. 4:16-18.

4. Mbuti bulangizi bwabubuke mbobubayumya Banakristo mazuba aano? (Amubone cifwanikiso icili aacivwumbyo.)

⁴ Tupona muziindi zikatazya kapati. Bakwesu bamwi balajanika mumapenzi aaletwa azigwebenga. Bamwi bakkala mumasena muli nkondo, aboobo tabajisi lwaanguluko. Mumasi aamwi, bantu ba Jehova tabajisi lwaanguluko lwakukambauka, pele balamubelekela Jehova nokuba kuti balakonzya kubikkwa muntolongo naa kujaigwa akaambo kakucita boobo. Nokuba boobo, bakwesu abacizyi aaba bazumanana kumukomba Jehova alimwi nzikozyanyo zibotu kapati kulindiswe. Tabayoowi nkaambo balizyi kuti nokuba kuti bafwa aciindi ecino, Jehova ubasyomezya kuyoobapa cintu cimwi iciinda kubota, kumbele.

5. Ino nkuyeeya kuli buti kutaluzi kukonzya kunyonganya lusyomo ndotujisi mububuke?

⁵ Paulo wakacenjezya bakwesu kujatikizya kuyeeya kutaluzi nkobakajisi bamwi kwakuti: “Ikuti bafwu tabakabusyigwi, nkokuti ‘atulye akunywa, nkaambo kayi juunza tuyoofwa.’” Oobu mbobakali kuyeeya bantu nociba ciindi kaatanasika mazuba aa Paulo. Ambweni Paulo wakali kuzubulula majwi aali kulugwalo lwa Isaya 22:13, aalo aapandulula mbobakali kuyeeya bana Israyeli. Muciindi cakuba acilongwe a Leza, balo bakali kuyandisya kulikkomanisya. Mubwini, bana Israyeli aaba bakali kuyeeya kuti “atukkomane lino, nkaambo tulakonzya kufwa kufwumbwa ciindi,” ikuyeeya kudumide amazuba aano. Nokuba boobo, Bbaibbele lilaamba kujatikizya zintu zibyaabi izyakacitikila bana Israyeli akaambo kakuyeeya kutaluzi.—2Mak. 36:15-20.

6. Mbuti bulangizi bwabubuke mbobweelede kutujatikizya ciindi notusala balongwe?

⁶ Mbwaanga tulizyi kuti Jehova uyoobabusya bafwide, eeci ceelede kutupa kusala kabotu balongwe. Bakwesu baku Korinto bakeelede kubatantamuka aabo ibakali kukazya kuti kunyina bubuke. Kuli ncotwiiya mazuba aano kuzwa kuli ceeci: Ikuti katuyanzana kapati bantu ibatabikkili maano kujatikizya ciyoocitika kumbele alimwi ibayandisya buyo kulikkomanisya, balakonzya kutunyonganya. Ikuti Munakristo wakasimpe kayanzana kapati abantu bali boobu, inga waba amizeezo iitaluzi. Alimwi inga camupa ikuba abukkale ibukonzya kumupa kucita cintu Leza ncatayandi, icibi. Aboobo Paulo wakakulwaizya  kuti: “Amusinsimuke munzila yabululami alimwi mutabi nimucita cibi.”—1Kor. 15:33, 34.

7. Kweelana alugwalo lwa 1 Bakorinto 15:35-38, mubuzyo nzi uujatikizya bubuke ngobakajisi bamwi?

⁷ Amubale 1 Bakorinto 15:35-38. Muntu iwakali kuyanda kupa kuti bamwi batalike kubudooneka bubuke wakali kukonzya kubuzya kuti: “Ino bafwu bayoobusyigwa buti?” Inga catugwasya kuyeeya bwiinguzi mbwaakapa Paulo nkaambo bantu banji mazuba aano bajisi mizeezo iindene kujatikizya icicitika ciindi muntu naafwa. Pele ino ncinzi Bbaibbele ncoliyiisya?

8. Ncikozyanyo nzi cikonzya kutugwasya kumvwisya bubuke bwakujulu?

⁸ Ciindi muntu naafwa, mubili wakwe ulabola. Pele Ooyo iwakalenga bubumbo ibwatakaliko aciindi cimwi ulakonzya kumubusya muntu ooyo, akumupa mubili uumweelede. (Matl. 1:1; 2:7) Paulo wakabelesya cikozyanyo kutondezya kuti Leza takayandiki kubusya muntu amubili nguwenya ngwaakajisi. Amuyeeye kujatikizya nseke yacisyango. Ciindi nseke eeyo noyasyangwa ilamena akukomena kuba cisyango. Cisyango eeco inga ciliindene anseke iyakasyangwa. Paulo wakabelesya cikozyanyo eeci kutondezya kuti Mulengi wesu ulakonzya kupa “mubili mbuli mbwayanda.”

9. Ncinzi lugwalo lwa 1 Bakorinto 15:39-41 ncolwaamba kujatikizya mibili iindene-indene?

⁹ Amubale 1 Bakorinto 15:39-41. Paulo wakaamba kuti Leza kunyina naakalenga mibili yoonse munzila iikozyenye. Mucikozyanyo, kuli mibili iindene-indene, mbuli mubuli waŋombe, wabayuni alimwi awanswi. Wakaamba kuti kujulu, tulabona kwiindana kuliko akati kazuba alimwi amwezi. Alimwi wakaamba kuti “nyenyeezi imwi aimwi iliindene kunyenyeezinyina kubulemu.” Aaya masimpe nokuba kuti tatukonzyi kulubona lwiindano luliko ameso eesu. Pele basayaansi batwaambila kuti kuli nyenyeezi ziindene-indene, zimwi  nzipati, zimwi nzisyoonto, zimwi zilasubila, zimwi zilatuba mpoonya zimwi nzyayelo. Alimwi Paulo wakaamba kuti “kuli mibili yakujulu amibili yaanyika.” Ino ncinzi ncaakali kupandulula? Wakali kupandulula kuti anyika, tujisi mibili yanyama, pele kujulu kuli mibili yamuuya, mbuli njobajisi bangelo.

10. Ino aabo ibabusyilwa kubuumi bwakujulu banooli aamibili iili buti?

¹⁰ Amubone alimwi ncaakaamba Paulo: “Mbobubede oobo abubuke bwabafwu. Mubili wazikkwa ulabola; pele wabusyigwa tauciboli limbi pe.” Nokuba boobo, tulizyi kuti ciindi muntu naafwa, mubili wakwe ulabola akujokela kubulongo. (Matl. 3:19) Aboobo ino caamba nzi kuti mubili “wabusyigwa tauciboli limbi pe”? Paulo tanaakali kwaamba mubili wamuntu iwabusyilwa kubuumi bwaanyika, mbuli baabo mbaakabusya Elija, Elisha alimwi a Jesu. Pele wakali kwaamba muntu iwabusyigwa amubili wakujulu, nkokuti, “mubili wamuuya.”—1Kor. 15:42-44.

11-12. Ino nkucinca kuli buti kwakamucitikila Jesu ciindi naakabusyigwa, kwalo ikubacitikila abalo bananike?

¹¹ Ciindi Jesu naakali anyika, wakajisi mubili wanyama. Pele naakabusyigwa, “wakaba muuya uupa buumi” akujokela kujulu. Mbubwenya buyo, abalo Banakristo bananike balabusyigwa amibili yamuuya. Paulo wakaamba kuti: “Mbwaanga tuli mucinkozya cayooyo wakabumbwa abulongo, mbubonya buyo tuyooba mucinkozya cayooyo wakazwa kujulu.”—1Kor. 15:45-49.

¹² Cilayandika kapati kuyeeya kuti Jesu tanaakabusyigwa amubili wanyama. Aboobo ciindi Paulo naakali afwaafwi kumanizya mubandi wakwe, wakapandulula ncocili boobo ciindi naakati: “Mubili wanyama abulowa taukonzyi kunjila mu Bwami bwa Leza” kujulu. (1Kor. 15:50) Baapostolo alimwi abananike bamwi tiibakali kukonzya kubusyilwa kubuumi bwakujulu amibili yanyama alimwi abulowa iikonzya kubola. Ndilili nobakali kuyoobusyigwa? Paulo wakaamba kuti  bakali kuyoobusyigwa kumbele, ikutali mpeena aawo mbobafwida buyo. Ciindi Paulo naakalemba lugwalo lwa 1 Bakorinto, basikwiiya bamwi bakali ‘koona mulufwu,’ mbuli mwaapostolo Jakobo. (Mil. 12:1, 2) Baapostolo alimwi abananike bambi bakali ‘kuyakoona mulufwu’ kumbele.—1Kor. 15:6.

13. Nzintu nzi izyakali kuyoocitika kuciindi cakubako kwa Jesu?

¹³ Jesu alimwi a Paulo bakasinsima kujatikizya ciindi cakumbele cilibedelede, nkokuti ciindi cakubako kwa Kristo. Kuciindi eeco, kwakali kuyooba nkondo, mizuzumo yanyika, zilwazi alimwi azintu zimwi zibyaabi. Twabubona businsimi bwamu Bbaibbele oobu kabuzuzikizyigwa kuzwa mu 1914. Kwakali kuyooba acibeela cimbi iciyandika kapati cacitondezyo eeco. Jesu wakaamba kuti makani mabotu aakuti Bwami bwa Leza bulalela akali kuyookambaukwa “munyika yoonse kuti bukabe bumboni kumasi oonse, mpoonya mamanino ayoosika.” (Mt. 24:3, 7-14) Paulo wakaamba kuti “kuciindi cakubako kwa Mwami” bananike “iboona mulufwu” abalo bakali kuyoobusyigwa kubuumi bwakujulu.”—1Tes. 4:14-16; 1Kor. 15:23.

14. Ncinzi cicitika ku Banakristo bananike ibafwa kuciindi cakubako kwa Kristo?

¹⁴ Banakristo bananike ibafwa lino balabusyigwa mukulaba kwaliso kubuumi bwakujulu. Kaambo aaka kalasinizyigwa mumajwi aa Paulo aalembedwe kulugwalo lwa 1 Bakorinto 15:51, 52 aakuti: “Tatukooni toonse mulufwu pe, pele toonse tuyoosandulwa, mukaindi kaniini buyo, mukulaba kwaliso, muciindi cakulila kwamweembo wamamanino.” Majwi aa Paulo aaya alimukuzuzikizyigwa lino! Ciindi nobabusyigwa, banabokwabo Kristo aaba  balakkomana kapati; ‘bayookkala a Mwami lyoonse.’—1Tes. 4:17.

15. Mulimo nzi ngobayoocita aabo ibasandulwa “mukulaba kwaliso”?

¹⁵ Ibbaibbele lilatwaambila mulimo ngobayoocita kujulu aabo ‘ibabusyigwa mukulaba kwaliso.’ Kujatikizya mbabo, Jesu wakaamba boobu: “Ooyo uuzunda akucita milimo yangu mane kusikila kumamanino, ndiyoomupa nguzu zyakweendelezya masi, alimwi bantu uyoobeembela ankoli yabutale cakuti bayoopwayaulwa mbuli mbozipwayaulwa zibelesyo zyabulongo, mbubonya andime mbondatambula kuzwa kuli Taata.” (Ciy. 2:26, 27) Bayootobela Mweendelezi wabo mumulimo ooyu, nkokuti kweembela masi ankoli yabutale.—Ciy. 19:11-15.

16. Mbuti bantu banji mbobayooluzunda lufwu?

¹⁶ Cakutadooneka, bananike bayooluzunda lufwu. (1Kor. 15:54-57) Kubusyigwa kwabo kuyoopa kuti bagwasyilizye mukugwisya bubi boonse lyankondo ya Amagedoni. Mamiliyoni aabamaalumi alimwi abamakaintu Banakristo bayoozwa “mumapenzi mapati” akunjila munyika mpya. (Ciy. 7:14) Aabo ibayoofwutuka anyika bayoolibonena kuzundwa kwalufwu kumbi, nkokuti kubusyigwa kwamabbiliyoni aabantu ibafwide. Amuyeeye buyo mbotuyookkomana ciindi zintu eezyi noziyoocitika! (Mil. 24:15) Alimwi boonse aabo ibasyomeka kuli Jehova cakumaninina abalo bayooluzunda lufwu ndotwakakona kuli Adamu. Bayoopona kukabe kutamani.

17. Ino lugwalo lwa 1 Bakorinto 15:58 lutukulwaizya kucita nzi lino?

¹⁷ Banakristo boonse ibapona lino beelede kulumba kumajwi aawumbulizya aayo Paulo ngaakalembela bana Korinto aajatikizya bubuke. Tulijisi twaambo tubotu itweelede kutupa kutobela lulayo lwa Paulo akucita kufwumbwa ncotukonzya lino “mumulimo wa Mwami.” (Amubale 1 Bakorinto 15:58.) Ikuti lyoonse katubeleka kusikila mpotugolela mumulimo ooyu, tulakonzya kulangila kuyooba abuumi bukkomanisya kapati kumbele. Buumi oobo bunooli bubotu kapati kwiinda mbotubuyeeyela. Eeci ciyoosinizya kuti kubeleka kwesu nkotumubelekela Mwami takuli kwabuyo pe.