1, 2. ¿Tuku xlakata lu xlakaskinka xpalakatakan kstalaninanin Cristo nakatsikgo xlakata talakastakwanat kʼakgapun?

PUTUM xlakskujnin Jehová tlakg katsiputunaw xlakata talakastakwanat kʼakgapun. Xatalaksakni tiku lamakgolhku kKatiyatni lu katsiputunkgo xlakata uma, xlakata xlakan anta nalatamakgo. Chu tiku kgalhkgalhikgo nalatamakgo kKatiyatni, na katsiputunkgo xlakata xtalakastakwanatkan tiku xatalaksakni, xlakata wa tuku nakalimini lhuwa tasikulunalin.

² Dios kalimaklakaskilh makgapitsi xtamakgalhtawakgen Jesús xalak pulana siglo xlakata natsokgwilikgo xpalakata talakastakwanat kʼakgapun. Apóstol Juan lichuwinalh: «Maski xkamanan Dios litaxtuyaw, nina kinkamakatsinikanan tuku nalitaxtuyaw. Katsiyaw pi akxni xla nalimasiya xlitliwakga, nalitaxtuyaw chuna la xla» (1 Juan 3:2). Wa xlakata, tiku xatalaksakni ni katsikgo la nalatamakgo kʼakgapun chu ni katsikgo la kgalhikan akgtum makni xaʼespiritual. Tuku katsikgo wa pi akxni namakglhtinankgo xtatlajakan naʼakxilhkgo Jehová. Biblia ni putum lichuwinan xlakata talakastakwanat kʼakgapun pero wi tuku lichuwinan. Akgtum liʼakxilhtit, apóstol Pablo lichuwinalh pi tiku xatalaksakni akxtum natatawilakgo Cristo akxni xla nakamalakgsputu «putum tiku mapakgsinankgo chu putum tiku lakapuxkunankgo», chu «xa’awatiya kintalamakgasitsinkan, [...] linin». Alistalh, Jesús  chu tiku natamapakgsinankgo natapakgsinikgo chu natlawakgo pi putum tuku anan wa natapakgsinikgo Jehová (1 Cor. 15:24-28). ¡Uma lu tlan nawan! *

3. Chuna la wan 1 Corintios 15:30-32, ¿tuku tlan tlawalh Pablo xlakata xkgalhini takanajla talakastakwanat?

³ Takanajla nema Pablo xkgalhini talakastakwanat makgtayalh natayani taputsastalanit (kalikgalhtawakga 1 Corintios 15:30-32). Kawanilh tiku xalak Corinto: «Chali chali ktatalakastuka linin». Chu wampa pi xkatalatlawanit «xalakluku animales kʼÉfeso». Max xwamputun pi xkatalatlawanit animales anta niku xwilakgolh kʼuma kachikin (2 Cor. 1:8; 4:10; 11:23). O max wa xkilhchanima la xputsastalanikgo judíos chu amakgapitsin xtalamakgasitsin tiku xlitaxtukgo xtachuna la «xalakluku animales» (Hech. 19:26-34; 1 Cor. 16:9). Maski chuna, Pablo ankgalhin tayanilh tuku tuwa chu nikxni taxlajwanilh (2 Cor. 4:16-18).

4. ¿La kamatliwakglha takgalhkgalhin xlakata talakastakwanat lhuwa kstalaninanin Cristo xala uku? (Kaʼakxilhti xmakni revista).

⁴ Akinin nachuna lamaw kkakilhtamaku niku lu katuwa. Makgapitsin kinatalankan ni xaʼakgstitum kalikatsinikanit. Makgapitsin lamakgolh niku katuwa wilikgo xlatamatkan xlakata anan guerras. Chu kmakgapitsin kachikinin, malakgachokgokanit o ni mastakan talakaskin nakakninaniyaw Dios, chu kinatalankan katuwa wilikgo xlatamatkan xlakata naskujnanikgo Jehová. Maski chuna, putum umakgolh natalan chuntiya kakninanimakgolh Jehová chu kinkawilinikgoyan akgtum lanka liʼakxilhtit. Ni pekuankgo xlakata katsikgo pi, maski nanikgo, Jehová malaknu pi nakamaxki tuku tlakg xatlan.

5. ¿Tuku talakapastakni max xmaxlajwanilh takanajla nema kgalhiyaw xlakata talakastakwanat?

⁵ Pablo kawanilh xnatalan pi makgapitsin xkgalhikgo akgtum nixatlan talakapastakni: «Komo tiku nikgonita ni katikamalakastakwanika, “kawayaw chu kakgotnaw, xlakata chali naniyaw”». Uma talakapastakni makgasa xʼanan. Chu asta max Pablo xlichuwinama tuku wan Isaías 22:13, niku talichuwinan pi israelitas kajwatiya xlipaxuwakgo xlatamatkan nixawa naskujnanikgo Dios. Xtachuna la lhuwa latamanin la uku, umakgolh israelitas xlakpuwankgo: «Kapaxuwa, xlakata latamat nasputa». Pero katsiyaw tuku lu nitlan kitaxtunilh kachikin Israel (2 Crón. 36:15-20).

6. ¿La nakinkamakgtayayan takanajla nema kgalhiniyaw talakastakwanat akxni nalaksakaw tiku akxtum nakatalalinaw?

⁶ Takanajla nema kgalhiniyaw talakastakwanat talakaskin pi wa tuku nakinkapulalinan akxni nalaksakaw tiku akxtum nakatalalinaw. Kstalaninanin Cristo xalak Corinto xkalitamakgatlinitkan xwanit tiku ni xkanajlanikgo talakastakwanat. ¿Tuku kinkamasiyaniyan uma? Pi akxtum katalalinkan latamanin tiku kajwatiya lipaxuwaputunkgo latamat ni tlan kitaxtu. Komo akxtum nakatalalinaw natlawa pi nalakgmakganaw xalaktlan tastakyaw chu xalaktlan talismanin. Asta max nakinkamatlawikgoyan tuku Dios xkajni. Wa xlakata, Pablo mastalh uma tastakyaw: «Liwana kalakapastaknantit chu katlawatit tuku tlan chu ni kalismanitit natlawayatit talakgalhin» (1 Cor. 15:33, 34).

7. Chuna la wan 1 Corintios 15:35-38, ¿tuku max nakinkakgalhskinkgoyan makgapitsin xlakata talakastakwanat?

⁷ (Kalikgalhtawakga 1 Corintios 15:35-38). Tiku tlawaputun pi nialh nakanajlaniyaw  talakastakwanat max nakinkakgalhskinan: «¿La nalakastakwanankgo tiku nikgonita? Chuna, ¿tuku makni nakgalhikgo?». Lu tlan komo naʼakxilhaw takgalhtin nema mastalh Pablo, xlakata lhuwa latamanin tanu tanu tuku lakpuwankgo xlakata tuku kinkaʼakgspulayan akxni niyaw. Pero, ¿tuku masiya Biblia?

8. ¿Tuku liʼakxilhtit kinkamakgtayayan liwana naʼakgatekgsaw la nawan talakastakwanat kʼakgapun?

⁸ Akxni wi tiku niy, xtiyatliwa tsuku lakla. Pero Jehová, tiku malakatsukilh putum tuku anan, tlan namalakastakwani uma lataman chu namaxki makni nema maklakaskin (Gén. 1:1; 2:7). Pablo maklakaskilh akgtum liʼakxilhtit xlakata nalichuwinan pi Dios ni masta watiya makni, wata tlan nakamaxki chatunu chatunu lataman «akgtum xmakni chuna la xla lakgatinit». Xla lichuwinalh «akgtum talhtsi» nema chankan kkatiyatni chu staka akgtum kiwi. Uma kiwi ni xtachuna la akgtum aktsu talhtsi.

9. ¿Tuku lichuwinan 1 Corintios 15:39-41 xlakata ni lakxtum makni anan?

⁹ (Kalikgalhtawakga 1 Corintios 15:39-41). Pablo lichuwinalh la xlitipalhuwa anan tuku kamalakatsukikanit. Akgtum liʼakxilhtit, xmaknikan animales, tsiktsi chu skiti ni lakxtum. Nachuna lichuwinalh pi Chichini chu Papaʼ ni lakxtum, chu pi «asta akgatunu staku talakgpali chuna la makgxkgakganankgo». Uma xlikana maski kilakgastapukan nila akxilha la talakgpalikgo akgatunu staku. Lakgskgalalan lakchixkuwin wankgo pi anan tanu tanu staku, makgapitsin nema lu laklanka, atanu nema tlakg laktsu, makgapitsi nema xalakspinini, xalaksnapapa, chu xalaksmukuku staku, chuna la Chichini. Pablo na lichuwinalh pi «putum tuku anan kʼakgapun tanu xmakni kgalhikgo chu putum tuku anan kkatiyatni tanu xmakni kgalhikgo». ¿Tuku xwamputun? Tiku lamaw kKatiyatni tasiya kimaknikan, pero tiku wilakgolh kʼakgapun kgalhikgo xmaknikan xaʼespiritual, chuna la ángeles.

10. ¿La nawan xmaknikan tiku nalakastakwanankgo kʼakgapun?

 ¹⁰ Pablo nachuna wa: «Nachuna nakitaxtu xpalakatakan tiku nakamalakastakwanikan kkalinin. Makni nema niy, masa, pero makni nema malakastakwanikan nila masa». Xlikana, akxni wi tiku niy, xmakni lakla o masa chu pokgxni wampara (Gén. 3:19). Wa xlakata, ¿la tlan nalakastakwanan akgtum makni chu “nila namasa”? Pablo ni wa xlichuwinama chatum lataman tiku nalakastakwanan kKatiyatni, chuna la latamanin tiku kamalakastakwanikgolh Elías, Eliseo chu Jesús. Wata wa xkakilhchanima tiku nakgalhikgo akgtum makni xaʼespiritual akxni nalakastakwanankgo (1 Cor. 15:42-44).

11, 12. ¿Tuku lalh akxni Jesús lakastakwanalh, chu tuku tlan nawanaw xpalakatakan tiku xatalaksakni?

¹¹ Akxni Jesús xlama kKatiyatni, xkgalhi akgtum makni nema xtasiya. Pero akxni lakastakwanalh, «litaxtulh espíritu nema masta latamat» chu taspitli kʼakgapun. Xtachuna la uma, tiku xatalaksakni nalakastakwanankgo chuna la espíritus. Pablo lichuwinalh: «Akinin xtachuna uma chixku tiku Dios litlawalh pokgxni, wa xlakata nawanaw xtachuna la uma chixku tiku alh kʼakgapun» (1 Cor. 15:45-49).

¹² Xlakaskinka nalakapastakaw pi akxni Jesús lakastakwanalh ni kgalhilh akgtum tiyatliwa chuna la xla chatum lataman. Pablo liwana lichuwinalh: «Liwa chu kgalhni nila tanukgo kxTamapakgsin Dios» o kʼakgapun (1 Cor. 15:50). Apóstoles chu amakgapitsin tiku xatalaksakni ni xkgalhikgolh akgtum tiyatliwa akxni xʼankgolh kʼakgapun, nema tlan masa. Pero, ¿tuku kilhtamaku xʼamakgolh lakastakwanankgo? Pablo liwana lichuwinalh pi talakastakwanat xʼama kgantaxtu kkilhtamaku nema aku xʼama min, ni akxni tunkun xnikgolh. Pero akxni Pablo tsokgli 1 Corintios, makgapitsin kstalaninanin Cristo, chuna la apóstol Santiago, “xnikgonita”, chu makgapitsin apóstoles chu amakgapitsin tiku xatalaksakni na xʼamakgolh nikgo (1 Cor. 15:6; Hech. 12:1, 2).

13. ¿Tuku xʼama la akxni Jesús xkinkatatawilan?

¹³ Jesús chu Pablo lichuwinankgolh xlakata akxni Cristo xkinkatatawilan, kilhtamaku akxni xʼama anan lhuwa guerras, xʼama tachiki tiyat, xʼama anan lhuwa tajatat chu lhuwa tuku atanu xʼama kgantaxtu. Uma tuku xlichuwinankanit, nema tsukulh kgantaxtu lata kkata 1914, atanu la kgantaxtu. Jesús lichuwinalh pi xalaktlan tamakatsinin xla Tamapakgsin xʼama talichuwinan «kxlilakgatum katiyatni xlakata natamakatsininan kputum laklanka kachikinin», chu alistalh xʼama min lisputni (Mat. 24:3, 7-14). Pablo wa pi akxni «kinkatawilan nawan Malana» xatalaksakni kstalaninanin Cristo tiku xnikgonita nalakastakwanankgo kʼakgapun (1 Tes. 4:14-16; 1 Cor. 15:23).

14. ¿Tuku kaʼakgspula tiku xatalaksakni nema nikgo akxni kinkatawilan Cristo?

¹⁴ La uku, kstalaninanin Cristo tiku xatalaksakni tiku nikgo tunkun lakastakwanankgo kʼakgapun. ¿Tuku likatsiyaw? Xlakata tuku wa Pablo nema lichuwinan 1 Corintios 15:51, 52: «Ni putum katilhtataw kkalinin, pero Dios kimputumkan nakinkalakgpaliyan, kaj xalakapala, xtachuna la akxni tsim lakpiwankan. Uma chuna nala akxni namatasikan xaʼawatiya trompeta». Umakgolh tachuwin kgantaxtuma la uku. Akxni lakastakwanankgo, umakgolh xnatalan Cristo kgalhikgo xatakgatsin tapaxuwan; ankgalhin akxtum natatawilakgo «Malana» (1 Tes. 4:17).

15. ¿Tuku natlawakgo kʼakgapun tiku «kaj xalakapala» kalakgpalikan?

¹⁵ Biblia lichuwinan tuku natlawakgo kʼakgapun tiku «kaj xalakapala» kalakgpalikan. Jesús kawani: «Tiku natlajanan chu chuntiya natlawan kkintiji asta klisputni, nakmaxki limapakgsin xlakata nakamapakgsi kachikinin, chu xla nalimaklakaskin lixtokgo  xla likan xlakata nakamapakgsi latamanin. Nakamalakgsputukan xtachuna la kalakgpakglhmikan vasos xatiyat» (Apoc. 2:26, 27). Xlakan nastalanikgo xPuxkukan chu nakalipulalinkgo kachikinin «lixtokgo xalikan» (Apoc. 19:11-15).

16. ¿La namakgatlajakgo linin lhuwa millón latamanin?

¹⁶ Xlikana, xatalaksakni namakgatlajakgo linin (1 Cor. 15:54-57). Xtalakastakwanatkan nakamaxki talakaskin namaskulunkikgo Katiyatni chu namapanukgo tuku nitlan anta kʼArmagedón. Lhuwa atanu kstalaninanin Cristo nalakgtaxtukgo akxni lama nawan lhuwa tapatin chu natanukgo kxasasti kakilhtamaku (Apoc. 7:14). Umakgolh lakchixkuwin chu lakpuskatin naʼakxilhkgo atanu la namakgatlajakan linin: akxni nalakastakwanankgo lhuwa millón latamanin tiku xnikgonita makgasa kilhtamaku. ¡Uma lu lipaxuw nawan! (Hech. 24:15). Chu putum tiku ni katimakgxtakgkgolh Jehová nachuna namakgatlajakgo linin nema kinkamatitaxtinin Adán chu nalatamakgo xliputum kilhtamaku.

17. ¿Tuku wan 1 Corintios 15:58 pi kilitlawatkan?

¹⁷ Putum kstalaninanin Cristo tiku lamaw la uku lu paxtikatsiniyaw Jehová xlakata laktlan tachuwin nema Pablo katsokgnanilh tiku xalak Corinto. Anan lhuwa tuku xlakata tlan nakgalhakgaxmataw xtastakyaw Pablo xlakata ankgalhin namalhuwiyaw tuku kilitlawatkan «kxtaskujut Malana» (kalikgalhtawakga 1 Corintios 15:58). Komo ni katimakgxtakgwi Jehová chu ankgalhin natlawayaw putum tuku matlaniyaw kʼuma taskujut, nakgalhiyaw akgtum lu xalipaxuw latamat kkilhtamaku nema aku namin, nixawa la lakpuwanaw. Chu naʼakxilhaw pi kintaskujutkan ni kaj paxkat lama.