1, 2. ¿Andisï xáni jukaparhakue eskaksï iámindu kristianuecha jorhenguarhiaka tsíntskueri ambe enga auandarhu úkuarhiaka?

IÁMINDU Jeobaeri marhuarichachi uékasïnga sánderu ambe míteni na enga úkuarhiaka tsíntskua auandarhu. Erakukatecha engaksï útasï Echerirhu pakarani jaka uékasïndiksï míteni íri ambe jimbokaksï ini ambe erokuarhixaka para sánderu orhepani. Ka ístuksï imecha engaksï erokuarhini jaka Echerirhu irekani —engaksï sánderu uánikueka—, jimbokaksï ini tsíntskua jimbo uánikua kóntperatechani intsïnhauaka.

² Tata Diosï imeri espiritu santuni úraparini, úspti eskaksï máru Jesusiri chúxapaticha karapiringa eska jauaka tsíntskua jini auandarhu. Apostuli Juanu uandaspti: “Diosïri uájpe[skachi], ka útasï nótki xarharasïndi ambe engachi jindeuaka, peru míteskachi eska jimajkani enga ima junguaka, jucha terukukuntaaka imani” (1 Juanu 3:2). Ísï jimbo, erakukatechaksï no mítesti nénaksï irekaa jini auandarhu ka kuerpu espiritueri ma jingoni. Joperu ambe engaksï kʼóru míteka jindesti eska engaksï intsïnhakia kóntperatani exeakaksï Jeobani. Biblia máru ambejkusï uandajti na enga úkuarhiaka tsíntskua auandarhu. Por ejemplu, apostuli Pablu uandaspti eskaksï erakukatecha tata Jesukristu jingoni jauaka jiáni enga ima kʼamajkuauaka “iámindu juramutichani ka iámindu imechani engaksï kánikua uinhapikua ka juramukua jatsika”, ka ístu últimu ikiatspitini enga jindeeka uarhikua. Últimu, Jesusi ka imecha engaksï imani jingoni juramuaka ka iámindu máteru ambe, Jeobaeri juramukua jimboksï jauati (1 Kor. 15:24-28). ¡Xáni ambakiti ambe enga úkuarhiaka! *

3. Eska na arhijka 1 Korintu 15:30-32, ¿néna jarhuataspi Pabluni enga jakajkuenga eska japiringa tsíntskua?

 ³ Enga Pablu jakajkuenga tsíntskuani jarhuataspti para tekaantani iámindu járhati tsʼéjkukuechani (arhinta je 1 Korintu 15:30-32). Arhiaspti Korintu anapuechani: “Pauani pauani [sáno] uarhisïnga”. Ka ístu uandaspti: “Uarhipe[ska] apejpitichani jingoni ireta Efesu”. Jamberi arhikuekendi uarhipeni animalicha jingoni engaksï sirkuecharhu japka indeni ireta jimbo (2 Kor. 1:8; 4:10; 11:23). O jamberi arhikuekani japti na engaksï xáni no sési kámenga judiuecha ka máteru ikiatspiticha engaksï ísïpka komueska animali apejpiticha (Uku. 19:26-34; 1 Kor. 16:9). Nájkiruka Pablu no sési ambe nitamakuarhienga, méntkisï tsípikua jingoni mintsikasïrendi eska jatsipiringa ambakiti erokuarhikua ma (2 Kor. 4:16-18).

4. ¿Néna uinhaperantaasïni iásï uánikua kristianuechani engaksï mintsikani jaka eska jauaka tsíntskua? (Exe je fotu enga uénakuarhu jaka).

⁴ Juchajtuchi irekaxaka ini jurhiatikuecha jimbo enga xáni no sési ambe úkuarhijka. Máru juchari erachichaksï no sési ambe úminhasïndi. Máruksï jimesïsï irekasti enga no sáni segurueka jimboka guerra ambe úkuarhisïnga. Ka máru lugaricharhuksï Jeobaeri marhuarichani no jiárhetaasïndi para aianhpini, joperuksï juchari erachicha marhuakuxati Jeobani, nájkirukaksï uáka ónhanhani o uándikunhani. Ka i erachichaksï seguirixati kómarhini Jeobani ka jorhendasïndijtsïni parachi juchajtu májkueni úni. Nóksï chésïndi jimbokaksï míteska eska nájkirukaksï uarhiaka, Jeoba aiakuaxaka eska uáka sánderu ambakiti ambe íntsaani.

5. ¿Na jásï eratsekua úpirini eskachi nóteru xáni mintsikapiringuia eska jauaka tsíntskua?

⁵ Pablu arhiaspti erachichani eskaksï jingontku jámapiringa imecha jingoni engaksï imani ambe eratsenga enga no sési jaka: ‘Engaksï uarhiricha no tsíntaaka, jauechkanderu tʼireni ka itsïmani jimbokachi pauani uarhiaka’. Máru kʼuiripuechaksï tʼuini ísï eratsesïrendia. Jamberi Pablu imani ambe uandani japti ambe enga Isaías 22:13 arhijka, jimini uandasïndi eskaksï israelitecha sánderu tsitisïrenga tsípikuarhini ka eska Tata Diosïni andarhierani. Ísï eska iásï anapu kʼuiripuecha, israelitechaksï uandasïrendi: “Tsípikuarhi, jimboka ma no ióni irekasïnga”. Joperuchi míteska eska ireta Israeli kánikua no sési kʼamarhukuspka (2 Crón. 36:15-20).

6. ¿Nénajtsïni jarhuata mintsikani eska jauaka tsíntskua sési erakuni né jingoni kúnguarhini?

⁶ Mintsikani eska jauaka tsíntskua, jarhuataatijtsïni para exeni né jingonchi kúnguarhia. Korintu anapu kristianuechaksï no jatsispti para imechani kúrhiani engaksï no jakajkuenga tsíntskuani. ¿Ambejtsïni jorhendasïni i ambe? Eskajtsïni no ma ambe marhuachiaka imani kʼuiripuechani kúrhiani engaksï no uandanhiajka ambe enga úkuarhiaka sánderu orhepani ka soluksï uékani tsípikuarhini. I járhati kʼuiripuechani kúrhiani uáti eskachi jurajkuaka úni imani ambe enga sési jaka. Jamberichi niáraaka imani ambe úni enga Tata Diosï kurhunhijka. Jimbosï Pablu arini konseju íntspipti: “Jingontku je parajtsï jurhimbitku jámani ka nóterujtsï pekadu úni” (1 Kor. 15:33, 34).

7. Eska na arhijka 1 Korintu 15:35-38, TDU, ¿ambejtsïni úpirini kurhamarhini máru kʼuiripuecha tsíntskueri ambe?

⁷ (Arhinta je 1 Korintu 15:35-38, TDU). Nema enga uékapiringa parachi nóteru jakajkunia tsíntskuani, úpirindijtsïni kurhamarhini: “¿Nénaksï tsíntaa uarhiricha? ¿Ka nénaksï járhati ménderu jungua?”. Uákachi exeni ambe enga Pablu mókuntapka,  jimbokaksï uánikua kʼuiripuecha mámaru ambe jakajkusïnga ambe enga úkuarhijka enga nema uarhijkia. Joperu, ¿ambe jorhentpisïni Biblia?

8. ¿Náki ejemplujtsïni jarhuatasïni sánderu sési kurhanguni na engaksï tsítanhantaaka imecha engaksï auandarhu niuaka?

⁸ Enga nema uarhijka, imeri kuerpu teresïndi. Joperu Jeoba enga úka unibersuni no ma ambe jimbo, uáti tsítantani imani kʼuiripuni ka ménderu íntskuntani kuerpu ma (Gén. 1:1; 2:7). Pablu ejemplu ma úraspti para uandani eska Tata Diosï no imani mismu kuerpu jingoni tsítantaasïnga, sino eska úsïnga íntskuantani kuerpu ma mándani arhini “eska ima na uékaaka”. Ima uandaspti semiieri ma enga jatsinhantajka echerirhu ka jimbanhi planta ma andarani. I planta kánikua ménderueni jáxesïndi ka eska ima sapichitu semiia.

9. ¿Ambe arhisïni 1 Korintu 15:39-41, mámaru járhati kuerpuecheri engaksï jaka?

⁹ (Arhinta je 1 Korintu 15:39-41). Pablu uandaspti na enga xáni mámaru jásï ambe jaka kueraakata. Por ejemplu, kuerpu uákasïri, pájaruecheri ka kurucheri kánikuaksï ménderueni járhasti. Ístu uandaspti eska jurhiata ka luna kánikuaksï ménderueni jáxeska ka eskaksï “no májku jásï meremerejkusïnga jóskuecha”. I ambe ísïsti, nájkirukachi jucha no újka exeni, imecha engaksï mítekuka íri ambe, uandasïndiksï eskaksï mámaru járhati jóskuecha jarhaska máru kʼératicha, sapirhaticha, máru charapiticha, urapiticha, tsïpambiticha ísï eska Jurhiata. Pablu ístu uandaspti eskaksï jarhaska “auandarhu anapu kuerpuecha ka parhakpini anapu kuerpuecha”. ¿Ambe arhikuekaxapi? Eska juchari kuerpu engachi Echerirhu irekaka kʼuiripiteriska, joperu imecheri kuerpu engaksï auandarhu irekaka espiritueska, komueska ánjelicheri.

10. ¿Na jásï kuerpu máeua imecheri engaksï auandarhu tsíntaaka?

¹⁰ Pablu seguirispti uandani. “Ísïuati engaksï tsíntaaka uarhiricha. Kuerpu jatsinhantasïndi  para tereni, peru tsíntaati para nóteru méni tereni”. Ísïsti, enga nema uarhijka imeri kuerpu teresïndi ka tʼupuri úkuarhintani (Gén. 3:19). Jiáni, ¿néna jimbo niára tsíntani kuerpu ma para nóteru méni terenia? Pablu no arhikuekaxapti kʼuiripuni ma enga Echerirhu tsíntaaka, komu ima kʼuiripuecha enga Eliasi, Eliseu ka Jesusi tsítantaapka. Sánderu sési, imechani arhikuekaaxapti engaksï kuerpu espiritueri ma jingoni tsíntaaka (1 Kor. 15:42, 43; 1 Kor. 15:44, TNM).

11, 12. ¿Ambe mójtakurhispi enga Jesusi tsíntapka ka néna májkueni úkuarhisïni erakukatecha jingoni?

¹¹ Enga Jesusi Echerirhu japka imeri kuerpu kʼuiripiterispti. Joperu enga na tsíntapkia jindesptia espiritu ma “enga tsípikua íntspijka” ka kʼuanhatsentaspti auandarhu. Májkueni, erakukatechaksï tsíntaati komueska espiritu ma. Pablu uandaspti: “Jucha engachi terukukuntajka imani enga tʼupuririka, tambientuksï terukukuntaaka imani enga auandarhu anapueka” (1 Kor. 15:45-48, TDU; 1 Kor. 15:49).

¹² Kánikua jukaparhakuesti eskachi miáuaka eska Jesusi no kuerpu kʼuiripiteri ma jingoni tsíntaska. Enga Pablu na kʼamarani japkia ini ambe uandantani, uandaspti eska “kʼuiripita ka iurhiri no úsïnga Diosïri juramukuarhu anapueni” jini auandarhu (1 Kor. 15:50). Apostulicha ka máteru erakukatechaksï ístu no úpirindi auandarhu nirani kuerpu ma jingoni enga kʼuiripiteripiringa ka úniri engaksï terejka. Joperu, ¿kánksï tsíntapirini? Pablu uandaspti eska i tsíntskua sánderu orhepani úkuarhipiringa, no jiájkani engaksï na uarhipiringuia. Enga Pablu karapka 1 Korintu, máru Jesusiri chúxapaticha —komu apostuli Santiagu— uarhisptiksïa ka ísï tátsekuaksï uarhipirindia máteru apostulicha ka máteru erakukatecha (1 Kor. 15:6; Uku. 12:1, 2).

13. ¿Ambe xáni úkuarhini japirini enga Jesusi juramuni japiringuia auandarhu?

¹³ Jesusi ka Pablu, uandasptiksï ambe enga úkuarhipiringa enga Jesusi juramuni  japiringuia auandarhu, jurhiatikuecha enga guerra ambe japiringa, jenchekua ambe, pʼamenchakuecha ka máteru ambe enga úkuarhini japiringa parhakpinirhu. Exeskachi eska i profesia 1914 uératini uénaska kumplirikuarhini, ístu úkuarhini japirindi máteru ambe enga jukaparhakueka enga i profesia uandenga. Jesusi uandaspti eska ambakiti ambe Reinueri aianhpinhapiringa “iápuru parhakpinirhu paraka iápuru anapu kʼuiripuecha mítetinksï” jarhani ka jimajkani kʼamajkunhaati parhakpini anapu ambe (Mat. 24:3, 7-14). Pablu uandaspti eska jiájkani enga Jesusi juramuni japiringuia auandarhu, erakukatecha engaksï uarhipkia tsíntapirindiksï auandarhu (1 Tes. 4:14-16, TNM; 1 Kor. 15:23).

14. ¿Ambeksï úkuarhinchasïni erakukatecha engaksï ini jurhiatikuecha jimbo uarhijka enga Jesusi juramuni jakaia auandarhu?

¹⁴ Ini jurhiatikuecha jimbo engaksï erakukatecha uarhijka jirejiresïksï tsíntasïndi auandarhu. ¿Nénachi míteski? Imani ambe jimbo enga Pablu uandapka ixú 1 Korintu 15:51, 52: Nóchi “iáminduecha uarhiaka, peru iáminduechachi ménderueni jáxentaaka. Ka ma repentkueuati i ambe, méntku eska ma na xáni kókani eskantajka, jimajkani enga kústanhaaka últimu trompeta”. Íksï uandakuecha iásï kumplirikuarhixati. Engaksï na tsíntaakia, i Kristueri ermanuechaksï kʼéri tsípikuarhita jatsiati; méntkisïksï ‘Tata jingoni’ jauati (1 Tes. 4:17).

15. ¿Ambeksï uá auandarhu imecha engaksï méntku ménderueni jáxentajka xáni kókani eska ma na sóntku eskantajka?

¹⁵ Biblia uandasïndi ambe engaksï uáka imecha engaksï méntku ménderueni jáxentajka ísï “eska ma na xáni kókani eskantajka”. Jesusi arhiasïndi: “Ima enga andapiti uéraaka ka patsaani juchiti mandamientuechani asta  kʼamarhutani jamberi, ji íntsauaka sésikua juramukuani kʼuiripuechani májku jásï eskani ji na juramukua intsïnhaka juchiti Tátini jimbo, ka juramukuauati tsirikuarhita tiámueri jimbo, ka ísï xereantauati komueska ma tsuntsu echeri[ri]” (Jaŋ. 2:26, 27). Chúngumaatiksï imeri orhejtsïkutini ka orherukuauatiksï iretechani bara “tiámueri jingoni” (Jaŋ. 19:11-15).

16. ¿Nénaksï andaa uarhikuani xáni uánikua kʼuiripuecha?

¹⁶ Ísïsti, erakukatechaksï andaati uarhikuani (1 Kor. 15:54-57). Engaksï tsíntaakia jarhuajpiatiksï paraksï kʼamajkuni iámindu no sési jásï ambe Armajedonirhu, enga axuterku jakaia. Uánikua máteru kristianuechaksï tsípiti pakaraati kʼéri miskuarhitarhu ka irekaatiksï jimbanhi parhakpinirhu (Jaŋ. 7:14). Íksï kʼuiripuecha uáti exeni na enga andanhaaka uarhikua: engaksï tsíntaaka xáni uánikua kʼuiripuecha engaksï ióntki uarhikia. ¡Kʼéri tsípikuarhita máeuati! (Uku. 24:15). Ka iámindu imecha engaksï no méni jurajkuaka Jeobani, ístuksï andaati uarhikuani enga Adani jimbo juka ka uátiksï irekani para méntkisï.

17. Eska na arhijka 1 Korintu 15:58, ¿ambechi jatsiski para úni?

¹⁷ Iámindu kristianuecha engachi iásï tsípiti jaka, kánikuachi jukaparharasïnga na engajtsïni xáni uinhaperantajka ambe enga Pablueri karakuapka Korintu anapuechani tsíntskueri ambe. Ambakiti ambe jarhasti engachi jimbo jatsika parachi ísï úni eskajtsïni Pablu na arhijka: “Méntku jauena je úni Diosïri úkuani” (arhinta je 1 Korintu 15:58). Engachi no méni jurajkuska Jeobani ka jánguarhintanchi na engachi xáni uáka úni ini ánchikuarhitani, tsípikua jingonchi irekaaka sánderu orhepani, iauani sánderu sési ka eskachi na eranhaskajka. Jiájkani, exeakachi eska no ískueska na engachi xáni ánchikuarhijka Tata Diosïni jimbo.