1-2. Habwaki Abakristaayo boona basemeriire kwegaho okuhumbuuka okw’okugenda omu iguru?

ABANTU abarukukira obwingi abarukuheereza Yahwe omu kasumi kanu baine okunihira okw’okwikara omu nsi habw’ebiro n’ebiro. Baitu Abakristaayo abake Yahwe abasesereho amagita nibaija kuhumbuuka bagende kwikara omu iguru. Abakristaayo banu abasesererweho amagita baine ekihika eky’amaani eky’okumanya nk’oku obwomeezi bwabo buliba obubalingenda omu iguru, baitu habwaki naabo abaine okunihira okw’okwikara omu nsi basemeriire kwegaho okuhumbuuka okw’okugenda omu iguru? Nk’oku turarora, okuhumbuuka okw’okugenda omu iguru nikwija kuleetera emigisa naabo abaine okunihira okw’okwikara omu nsi ebiro n’ebiro. Nahabweki katube twine okunihira okw’okugenda omu iguru rundi okwikara omu nsi itwena tusemeriire kugonza kumanya ebirukukwata ha kuhumbuuka okw’okugenda omu iguru.

² Ruhanga akaterekeza abamu h’abegeswa ba Yesu ab’omu kyasa eky’okubanza kuhandiikaho okuhumbuuka okw’okugenda omu iguru. Omukwenda Yohana akasoborra ati: “Abarukugonzebwa hati bunu tuli bana ba Ruhanga, kandi tikikamanyisiibwe okutuliba. Tumanyire ngu obwalimanyisibwa, tulisisana nkauwe.” (1 Yoh. 3:2) Nahabweki Abakristaayo abaseserweho amagita tibamanyire obwomeezi nk’oku buliba obubalihumbuuka bakatandika kwikara omu iguru. Baitu nibaija kurora Yahwe maiso ha maiso, obubalitunga empeera yabo. Baibuli tetugambira buli kimu kyona ekirukukwata ha kuhumbuuka okw’okugenda omu iguru. Baitu omukwenda Paulo, akatugambiraho  ebimu ebirukukwata ha kuhumbuuka oku. Abaseserweho amagita nibaija kuba bali na Kristo obwalimaraho “okulema kwona, nobusobozi bwona, namani gona.” Eki nikitwarramu “omunyanzigwa owa ha mpero . . . nukwo kufa.” Ha kumalirra, ebintu byona obubirimara kuteekwa hansi ya Yesu, uwe ali hamu naabo abaralema na uwe, naija kweteeka hansi ya Yahwe. (1 Kol. 15:24-28) Ako nikaija kuba kasumi akarukusemeza muno! *

3. Nk’oku kyolekererwe omu 1 Abakolinso 15:30-32, Paulo kwikiririza omu kuhumbuuka kikamukonyera kukora ki?

³ Paulo habw’okwikiririza omu kuhumbuuka kikamukonyera kugumira ebirengo eby’embaganiza. (Soma 1 Abakolinso 15:30-32.) Paulo akagambira Abakolinso ngu buli kiro yatangatangana okufa. Paulo akongera yagamba ati: ‘Nkarwanira Efeso n’enyamaiswa.’ Obundi akaba n’abazaaho kurwana n’enyamaiswa zonyini omu kizaniro ekiri Efeso. (2 Kol. 1:8; 4:10; 11:23) Obundi n’asobora kuba akaba n’abazaaho Abayudaaya abamuhiganizaaga hamu n’abantu abandi abaali bali ‘nk’enyamaiswa.’ (Eng. 19:26-34; 1 Kol. 16:9) Paulo akaraba omu kabi akamaani, baitu akagumizaamu naikiriza ngu omu busumi obw’omu maiso akaba n’agenda kutunga okusemererwa.​—2 Kol. 4:16-18.

4. Okunihira okw’okuhuumubuka kugumize kuta Abakristaayo omu kasumi kanu? (Rora ekisisani ekya ha kyesweko.)

⁴ Tuli omu bwire obw’akabi. Ab’oruganda abamu bahikirweho ebizibu ebiretwa obucwi bw’ebiragiro. Abandi baikara omu biikaro ebirumu obulemu ekibaletera kwikara beralikiriire. Abandi bali omu mahanga nambere omulimo gwaitu gutangirwe, baitu bateeka obwomeezi bwabo rundi obugabe bw’abo omu kabi kusobora kuheereza Yahwe. Eki n’obukiraaba nukwo kiri ab’oruganda na banyaanya itwe banu bagumizeemu kuramya Yahwe kandi batuteriireho ekyokurorraho ekirungi. Tibarukutiina habwokuba bakimanyire ngu n’obubakufa Yahwe n’araganiza kubaha obwomeezi orukukira oburungi omu kasumi ak’omu maiso.

5. Entekereza ki embi esobora kucekya okwikiriza kwaitu omu kuhumbuuka?

⁵ Paulo akahabura Abakristaayo bagenzi be kwerinda entekereza ey’akabi abamu ei bakaba baine erukugamba ngu: “Tulye, tunywe, baitu turafa nyenkya.” Abantu bakaba baine entekereza enu na Paulo atakazairwe. Kandi n’asobora kuba akaba n’ajuliza Isaya 22:13, orukubazaaho entekereza eya Abaisaleri. Omu kiikaro ky’okwirra haihi na Ruhanga bagonzaaga muno kwesemeza. Abaisaleri abo, bakaba baine entekereza “leka twegonze hati habwokuba obwire bwona nitusobora kufa.” Kandi entekereza egi ejanjaire omu kasumi kanu. Baitu Baibuli n’etugambira ebizibu ebyahikireho ihanga erya Isaleri habw’entekereza yabo egi etahikire.​—2 Byom. 36:15-20.

6. Okunihira kwaitu omu kuhumbuuka kusemeriire kutukwataho kuta obuturukuba nitukoma abanywani?

⁶ Tukimanyire ngu Yahwe nagenda kuhumbuura abantu. Nahabweki eki kisemeriire kutukwataho obuturukuba nitukoma abanywani. Abakristaayo omu Kolinso baali basemeriire kwerinda kuganjana n’abantu abahakanizaaga okuhumbuuka. Kinu nikitwegesa isomo omu kasumi kanu ngu tikiri kirungi kumara obwire bwingi n’abanywani abaine entekereza erukugamba ngu katwegonze hati habwokuba nitusobora kufa akaire koona. Kwikara n’abantu nk’abo nikisobora kusiisa entekereza n’engeso z’Omukristaayo. Nibasobora n’okumuleetera kukora ebintu  Ruhanga arukunoba. Nahabweki, Paulo akatererra ati: “Musisimuke hali okuhikirra, muleke okusisa.”​—1 Kol. 15:33, 34.

7. Nk’oku kyolekerwe omu 1 Abakolinso 15:35-38, kikaguzo ki abamu ekibasobora kuba bakaguzaaga ekirukutwata ha kuhumbuuka?

⁷ Soma 1 Abakolinso 15:35-38. Omuntu ayabaga nagonza kuletera abantu okugurukyagurukya okuhumbuuka n’asobora kuba yakaguzaaga ati: “Abafu bahumburwa bata?” Kirungi kutekerezaaho ekigarukwamu kya Paulo habwokuba abantu baingi omu kasumi kanu, baine entekereza yabo ha kiki ekibaho hanyuma y’okufa. Baitu kiki Baibuli eky’eyegesa?

8. Kyokurorraho ki ekisobora kutukonyera kwetegereza okuhumbuuka okw’okugenda omu iguru?

⁸ Omuntu obw’afa omubiri gwe gujunda. Baitu Omuhangi w’ebintu byona n’asobora kuhumbuura omuntu, kandi amuhe omubiri ogumusemeriire. (Kub. 1:1; 2:7) Paulo akakozesa ekyokurorraho ekirukwoleka ngu Ruhanga tarukwetaaga kuhumbuura omuntu n’omubiri oguyafiire nagwo. Tekerezaaho “embibo,” obw’ogibyara emera kandi efooka kimera kihyaka. Ekimera ekirugamu nikyahukanira kimu n’embibo entaito ei w’abyaire. Paulo akakozesa ekyokurorraho kinu kwoleka nk’oku Omuhangi waitu nasobora kuha omuntu “omubiri nkokwayenda.”

9. Kusigikirra ha 1 Abakolinso 15:39-41 emibiri n’eyahukana eta?

⁹ Soma 1 Abakolinso 15:39-41. Paulo n’agamba ati Ruhanga atahange ebintu byona nibisisana. Ekyokurorraho, haroho emibiri erukwahukana, ey’ente, ebinyonyi, hamu n’encu. Akagamba ati omu mwanya niturora embaganiza hagati y’izooba n’okwezi. Kandi akakyetegereza ngu “enyunyuzi emu terukuingana nenyunyuzi endi ekitinisa.” Ganu mananu n’obukiraaba ngu titurukusobora kurora embaganiza enu n’amaiso gaitu, abanyasayansi nibatugambira ngu haroho enyunyuzi  ez’embaganiza, ezimu nkooto, ezindi ntaito, ezindi nizitukura, ezindi nizera, kandi ezindi za kyenju nk’izooba lyaitu. Paulo akongera yagamba ati: “Haroho nemibiri eyahaiguru, nemibiri eyahansi.” Akaba namanyisa ki? Omu nsi twine emibiri y’enyama, baitu omu iguru baine emibiri ey’omwoyo, nk’emibiri ya bamalaika.

10. Abo abarukugenda kwikara omu iguru bahumbuuka n’omubiri gwa mulingo ki?

¹⁰ Wetegereze Paulo ekiyayongiireho, akagamba ati: “Nukwo nokuhumbuka kwabafu kuli kuti. Guzikwa nokujunda, guhumburwa nokutajunda.” Tukimanyire ngu omuntu obw’afa omubiri gwe gujunda, kandi gufooka cucu. (Kub. 3:19) Hati nikisoboka kita ngu omubiri “guhumburwa nokutajunda”? Paulo akaba atarukubazaaho abantu kuhumbuuka bakagaruka omu nsi, nk’abo abahumbwirwe Eriya, Erisa, hamu na Yesu. Paulo akaba n’abazaaho abantu abahumbuurwa n’omubiri “ogwomwoyo.”​—1 Kol. 15:42-44.

11-12. Mpinduka ki ey’ahikire hali Yesu, kandi abaseserweho amagita nabo balihikwaho bata empinduka niyo emu?

¹¹ Yesu obwakaba ali omu nsi, akaba aine omubiri ogw’enyama. Baitu obuyahumbuukire ‘akafooka omwoyo ogwomeeza,’ kandi y’agaruka omu iguru. Omu mulingo nugwo gumu, Abakristaayo abaseserweho amagita nibaija kuhumbuuka bagende omu bwomeezi obw’omwoyo. Paulo akasoborra ati: “Nkokutwasisaine nowahansi, nukwo tulisisana nowomu iguru.”​—1 Kol. 15:45-49.

¹² Kikuru kukiijuka ngu Yesu atahumbuuke n’omubiri ogw’abantu. Paulo obw’akaba ali mukumalirra kubazaaho okuhumbuuka akasoborra ensonga habwaki obuyagambire ati: “Enyama nesagama tibisobora okugwetwa obukama bwa Ruhanga,” omu iguru. (1 Kol. 15:50) Abakwenda n’abaseserweho amagita abandi, tibakuhumbuukire n’emibiri y’enyama hamu n’esagama, ebisobora kujunda. Baali nibagenda kuhumbuuka di? Paulo  akakyoleka kurungi ngu okuhumbuuka kunu kwali nikugenda kubaho omu maiso, hatali aho naaho hanyuma y’okufa. Nambere omukwenda Paulo y’ahandikiire 1 Abakolinso, abamu h’abegeswa bakaba bamazire ‘kugwijagira’ omu kufa, ekyokurorraho, omukwenda Yakobo. (Eng. 12:1, 2) Abakwenda abandi hamu n’abaseserweho amagita nabo baali nibagenda ‘kugwijagira’ omu kufa.​—1 Kol. 15:6.

13. Kiki eky’ali nikigenda kubaho omu kasumi “ak’okubaho” kwa Kristo?

¹³ Yesu hamu na Paulo bakaranga akasumi ak’embaganiza akaali nikagenda kwija. Akasumi ako nuko ak’okubaho kwa Yesu. Akasumi ak’okubaho kwa Yesu kaali nikagenda kubamu obulemu, emisisa, endwaire, hamu n’ebintu ebindi ebibi ebirukubaho omu nsi. Turozere obunabbi bunu nibuhikirra kuruga omu mwaka gwa 1914. Hakubaireho ekicweka ekindi ekikuru eky’akokurorraho ako. Yesu akagamba ngu enjiri ey’okurangirra ngu Obukama bwa Ruhanga butandikire kulema ekaba negenda kutebezebwa “omu nsi zona, okuba kaiso hali amahanga gona; nubwo empero erihika.” (Mat. 24:3, 7-14) Paulo akooleka ngu akasumi “ak’okubaho kwa Mukama waitu” kaali nikagenda kuba n’akasumi ak’okuhumbuuka okw’Abakristaayo abaseserweho amagita abaali “bagwijagiire omu kufa.”​—1 Bas. 4:14-16, NW; 1 Kol. 15:23.

14. Kiki ekibaho Abakristaayo abaseserweho amagita abafa omu kasumi ak’okubaho kwa Kristo?

¹⁴ Abakristaayo abaseserweho amagita abafa omu kasumi kanu bahumbuurwa aho naaho bagenda omu iguru. Kinu nikigumibwa ebigambo bya Paulo ebirukusangwa omu 1 Abakolinso 15:51, 52 ebirukugamba biti: “Tituligwijagira itwena, baitu itwena tulihindurwa, omu kasumi kake, okuzibiriza ekikohi, ha ngwara ya hampero.” Ebigambo bya Paulo binu nibihikirizibwa  omu kasumi kanu! Bagenzi ba Kristo banu obubahumbuuka, batunga okusemererwa kwingi, kandi nibaija ‘kwikaraga na Mukama waitu ebiro byona.’​—1 Bas. 4:17.

15. Mulimo ki ogulindiriire abo abalihindurwa omu “okuzibiriza ekikohi”?

¹⁵ Baibuli n’etugambira omulimo abo abalihindurwa omu “okuzibiriza ekikohi” balikora omu iguru. Yesu n’abagambira ati: “Anyakusingura nakwata emirimo yange okuhikya ha mpero, nuwe ndiha amani ha mahanga: alibalema nomuigo gwekyoma, nkebibindi ebyomubumbi okubicwekacweka, nka nyowe okunahairwe hali Isenyowe.”(Kus. 2:26, 27) Bali hondera omudumizi wabo omu kukora omulimo ogw’okulema amahanga n’omwigo ogw’ekyoma.​—Kus. 19:11-15.

16. Abantu baingi nibaija kusingura bata okufa?

¹⁶ Hataroho kugurukyagurukya abaseserweho amagita nibaija kusingura okufa. (1 Kol. 15:54-57) Okuhumbuuka kw’abo nikwija kubasobozesa kwejumbira omu kumaraho obubi omu nsi yoona, omu kasumi ak’obulemu obwa Haramagedoni. Obukaikuru n’obukaikura obw’Abakristaayo abandi nibaija kuruga “omu muhito omwingi,” bataahe omu nsi empyaka. (Kus. 7:14) Abo abalikiraho omuhito omwingi nibaija kurora omulingo ogundi okufa kulisingurwa kuraba omu kuhumbuuka kw’obuhumbe n’obuhumbe bw’abantu abafiire kara. Tekerezaaho okusemererwa okutulitunga ekintu eki ekirukuhuniriza obukiribaho! (Eng. 24:15) Abo abalikara bali besigwa hali Yahwe, nibaija n’okusingura okufa okubaijukwire kuruga hali Adamu. Nibaija kusobora kwomeera ebiro n’ebiro.

17. 1 Abakolinso 15:58 nirututererra kukora ki?

¹⁷ Buli Mukristaayo wena hati, asemeriire kusiima habw’ebigambo ebirukuhuuumuza Paulo ebiyahandikiire Abakolinso ebirukukwata ha kuhumbuuka. Twine ensonga enungi habwaki tusemeriire kworobera okutererra kwa Paulo okw’okwekamba nk’oku turukusobora hati “omu mirimo ya Mukama.” (Soma 1 Abakolinso 15:58.) Kakuba twekamba kandi tukaikara tuli besigwa omu mulimo ogu, nitwija kuba nitwetekaniriza okutunga okusemererwa omu kasumi ak’omu maiso. Akasumi ako nikaija kuba karungi muno kukira nk’oku tusobora kutekereza. Kandi nikaija kugumya ngu tutekambire busa omu mirimo ya Mukama waitu.