1-2. Ngei aKristu ese ecidikana kufunda zvakawanda nge zve rumuko re kudenga?

ASEENZI akawanda a Djehovha ano kariro ye kuzorarama nokusikaperi pasi pano. Anganani e aKristu akadzodzwa no mwiya mucena, ano kariro yo kuzomutswa kuti araramire kudenga. Aya akadzodzwa, ari kuetsera no mwoyo wese kuti upenyu wawo we kudenga ucazogara wakadini, asi zvakadini no aya ano kariro ye kuzoraramira pasi pano? Hingana zvatakafunda, rumuko re kudenga ricaunza makomborero kuno aya ano kariro ye kuzorarama pasi pano nokusikaperi. Ngekudaro, kunyazi tino kariro ipi hayo ingaita ye kudenga kana ye pa nyika, tinodikana kufunda zvakawanda nge zve rumuko re kudenga.

² Mwari akafemera afundi a Djesu anganani e mu nguwa ye kare kuti atare nge zve kariro yo kudenga. Muphostori Juau wakatara eciti: “Zvino tiri ana a Mwari, asi zvaticagara azvisati zvapangidzwa pamhene. Tinoziya kuti pa nguwa ipi hayo yaacadzipangidza pamhene ticapfara naye.” (1Ju. 3:2) Ngokugaro, aKristu akadzodzwa aazii kuti acagara kudini paacatorhwa kuti aende kudenga no mwiri we mwiya. Ngokudaro, nge gwanza rekufananidzira, acaona Djehovha paacatambira mubairo wawo. Bhaibheri aripanganidzi zvese zvinocokuita no rumuko re kudenga, asi muphostori Pauro unotibvunza masoko manganani ano cokuita no rumuko iri. Akadzodzwa paanonga ana Kristu acaparadza “utongi yese kutobatanidzawo aya ano masimba.” Kutobatanidzawo “muzondi we kupedzesera, rufu.” Pakupedzesera, Djesu Kristu—no aya aacatonga nawo acadzikanda pasi pa Djehovha. (1Ako. 15:24-28) Ii inonga iri nguwa inoshamisa! *

3. Hingana zvinoreketwa pana 1 Akorinti 15:30-32, kutenda ka Pauro nge zve rumuko kakamubetsera kuti aitei?

 ³ Kutenda ka Pauro mu rumuko kakamubetsera kushingirira miedzo yakawanda. (Erengai 1 Akorinti 15:30-32.) Iyena wakati ku Akorinti: “Mazuva ese ndinoringisana ne rufu.” Pauro wakatizve: “Ndakarhwisana no zvikara mu Efeso.” Pamweni iyena waireketa nge zve kupondana no zvinyama kamare mu Efeso. (2Ako. 1:8; 4:10; 11:23) Kana kuti iyena waireketa nge zve azondi ake eci Djudha uye no amweniwo aiita hingana “zvikara.” (Zvi. 19:26-34; 1Ako. 16:9) Kana zviri izvona, Pauro wakasongana no matambudziko akakura, asi wainga ano maonero akanaka nge zve ramangwana.—2Ako. 4:16-18.

4. Kariro ye rumuko iri kubambisa kudini aKristu a nyamasi uno? (Onai foto ye pa kapa.)

⁴ Tiri kurarama mu nguwa dzinonetsa. Hama dzimweni dziri kusongana no ubhinya. Amweni ari kurarama mu mbuto dzakasakadzwa nge hondo, uye aazi kunyasa kucengeteka. Amweni awo ari kuseenzera Djehovha mu nyika yakarambidzwa basa redu, uye anoseenzera Djehovha kunyazi ecikanda upenyu wawo pa ngozi. Kunyazi zvakadaro, hama no hanzvadzi idzi dziri kurumbwa dzecinamata Djehovha, dzecitipasa muezaniso wakanaka katiri. Aona ano rugondo rekuti, kunyazi angapsvetekerhwa no upenyu nyamasi uno, Djehovha ari kuwagadzirira ramangwana rakanaka.

5. Maonero api akashata aizoita kuti tirembe pa kutenda mu rumuko?

⁵ Pauro wakangwadza hama dzake nge zve maonero akashata ainga no anhu amweni e kuti: “Kana akafa asikamutswi, ‘ngatirhye ngatimwe ngekuti mangwana ticafa.’” Maonero aya ainga aripo no kare Pauro asati atobarhwa. Pamweni iyena wakaseenzesa masoko ari pana Isaya 22:13, anoreya miitiro ye aIsraeri. Pane kuti apsvake Mwari, aona akapsvaka upenyu we mupfaro. Zvezvirokwazvo, miitiro ye aIsraeri yainga yekuti “tinorarama nyamasi, mangwana aticiripopi,” maonero ano anhu akawanda nyamasi uno. Ngokudaro, miitiro yakashata ye dzinza re aIsraeri yakatarhwa mu Bhaibheri.—2 Mak. 36:15-20.

6. Kariro yedu ye rumuko ingabata-bata kudini pa kusanangura katinoita shamwari?

⁶ Zviri pamhene kuti cokwadi cekuti Djehovha acamutsa anhu akafa, cingakwanisa kubata-bata kusanangura katinoita shamwari dzedu. Hama dze ku Korinti dzaidikana kuima kushamwaridzana no aya ainga asikatendi mu rumuko. Muezaniso uu wakanaka katiri nyamasi uno: Apana zvazvinobetsera kusanangura kutamba no aya ano kariro yo kurarama nguwa doko. Kupedza nguwa yakareba no anhu aya, angakwanisa kucinja maonero ne miitiro yedu yakanaka ye ciKristu. Zvezvirokwazvo, izvi zvingakwanisa kuita kuti tirarame upenyu unozondwa na Djehovha—we kuita citema. Ndiyo ndaa, Pauro wakaita kohomedzo yakabamba yekuti: “Hwiriraizve pa kuita zviro zve unatsi uye musaite citema.”—1Ako. 15:33, 34.

7. Mubvunzo upi uno anhu akawanda nge zve rumuko, hingana zvinorekethwa pana 1 Akorinti 15:35-38?

⁷ Erengai 1 Akorinti 15:35-38. Muphikisi aikwanisa kubvunza mubvunzo wekuti: “Akafa aizomutswa kudini?” Zvakanaka kuti tione mhinduro ye muphostori Pauro, ngekuti anhu akawanda nyamasi uno ano maonero akasiyana nge zvinoitika no munhu paanofa. Asi ngazvipi zvinofundiswa no Bhaibheri?

8. Muezaniso upi ungakwanisa kutibetsera kuti tizwisise rumuko re kudenga?

 ⁸ Munhu paanofa, muiri wake unoora. Asi uya akasika denga no nyika pasina caakaseenzesa ungakwanisa kumutsa munhu uu, ecimupasa muiri wakanaka. (Ge. 1:1; 2:7) Pauro wakaseenzesa muezaniso uu kuti apangidze kuti Mwari aadi muiri we munhu uu kuti akwanise kumumutsa. Rangarirai nge zve “tsangu isina ciro” kana kuti “mbeu.” Tsangu imwe ye mbeu painosimwa inomera uye inokura. Muti unomera unonga wakasiyana no mbeu inonga yasimwa. Pauro wakaseenzesa muezaniso uu kuti apangidze kuti Musiki wedu unokwanisa kupasa “muiri umweni waanonga apfarira.”

9. Nge daa ye muiri, 1 Akorinti 15:39-41 inoreketa musiyano upi uripo?

⁹ Erengai 1 Akorinti 15:39-41. Pauro wakaona kuti pane zviro zvakasiyana-siyana zvakasikwa. Ngo muezaniso, pano muiri yakasiyana-siyana hingana n’ombe, shiri, uye howe. Iyena wakatizve, kudenga tinoona musiyano we zuwa no mwedzi. Uye iyena wakaona kuti “nyeredzi imwe inosiyana no nyaredzi imweni pa kudjeka.” Honde, kunyazi tisikakwanisi kuzviona no madziso edu, pano dzinodaindzwa no masientista kuti nyeredzi dzakakura dzakapsvuka, nyeredzi dzidoko uye nyeredzi dze nzanya, dzakaita hingana zuwa. Pauro wakatiwo “kuno muiri we kudenga no muiri we pa nyika.” Pakudini? Pa nyika, tino muiri we nyama, asi kudenga kuno muiri we mwiya, hingana muiri we ngirozi.

10. Kusiyana-siyana ke muiri kungaezaniswa kudini no rumuko?

¹⁰ Onai zvakazoreketwazve na Pauro: “Ndizvona zvinoitikawo pa kumutswa ke akafa. Unosimwa usina simba uye unomutswa waanosimba.” Zvirokwazvo kuti patinofa, muiri wedu unoora wohwirira kuita hingana mataka. (Ge. 3:19) Hino, zvingaitika kudini kuti muiri ‘womutswa waanosimba’? Pauro wainga  asikareketi nge zve anhu acamutswa kuti araramire pa nyika, hingana aya akamutswa na Eriya, Erisha uye na Djesu. Pauro wainga ecireya nge zve aya acamutswa no muiri we kudenga, kana kuti, “muiri we mwiya.”—1Ako. 15:42-44.

11-12. Cinjo ipi yakaitika na Djesu paakamutswa uye icaitikawo kudini kuno akadzodzwa?

¹¹ Djesu paainga ari pa nyika wainga uno muiri we nyama asi paakazomutswa, “akagara mwiya unopa upenyu” uye akahwirira kudenga. Ngo mushobo umwewo, aKristu akadzodzwa acamutswawo ku upenyu we mwiya. Pauro wakapanganidza eciti: “Ngekuti isusu takatodzana no uya akagadzirhwa no mataka, ticatodzanawo no uya we mwiya.”—1Ako. 15:45-49.

¹² Pauro wainga ecipedzesa kupanganidza kake kunoshamisa nge zve rumuko. Zvinokosha kuziya kuti Djesu aazi kumutswa no muiri we anhu. Pauro wakakohomedzesa kuti: “Nyama no ngazi azvipindi mu Umambo wa Mwari” kudenga. (1Ako. 15:50) Aphostori no amweni akadzodzwa, aazomutswi kuti aende kudenga no muiri we nyama no ngazi. Aona aizomutswa riini? Pauro wakareketa kuti rumuko iri raizouya; izvi zvaisazoitikapi mu masure me kufa kawo. Pauro paakatara tsamba ya 1 Akorinti, afundi amweni ainga “awata mu rufu,” ngo muezaniso, mufundi Tiyago. (Zvi. 12:1, 2) Afundi amweni no akadzodzwa ainga “akawata mu rufu”.—1Ako. 15:6.

13. Cinyi caizopangidza kuwapo ka Djesu?

¹³ Djesu na Pauro akareketa nge zve nguwa inoshamisa yaizouya—kuwapo ka Kristu. Kuwapo uku kaizooneka no hondo, zvigidhi-gidhi, nhenda dzakasiyana-siyana uye no zvimweniwo zvaizoitika mu nyika yese. Takaona uphorofiti uu we Bhaibheri wecidzadzika kubvira muna 1914. Dii rimweni re zviitiko izvi  zvaizonyasa kuoneka. Djesu akareketa eciti, masoko anopfadza e Umambo wa Mwari aizoparidzwa “mu nyika yese inogarhwa, kuitira kupasa upupuri ku madzinza ese uye zvadaro mugumo [we nyika] ucauya.” (Mt. 24:3, 7-14) Pauro wakareketa kuti “kuwapo ka Tenzi” yaizogarawo nguwa ye kumutswa ke aKristu akadzodzwa ainga “akawata mu rufu.” —1 Ate. 4:14-16; 1Ako. 15:23.

14. Cinyi cinoitika no akadzodzwa paanofa mu nguwa ye kuwapo ka Kristu?

¹⁴ Akadzodzwa paanopedza basa rawo pasi pano, aona anomutswa kuti araramire kudenga ciriporipoco. Izvi zvinopupurirhwa no masoko a Pauro ari pana 1 Akorinti 15:51, 52: “Atesepi ticawata mu rufu, asi tese ticazomutswa, mu nguwa doko, mukuphaira ke dziso, mukurira ke trombeta yekupedzesera.” Masoko aya a Pauro ari kudzadzika nyamasi uno! Mumasure mekumutswa, hama idzi dza Kristu dzicagara no mupfaro usikaperi; aona “anonga ana Tenzi nguwa dzese.”—1 Ate. 4:17.

15. I basa ripi ricapaswa aya acacinjwa “mu kuphaira ke dziso”?

¹⁵ Bhaibheri rinotibvunza kuti i basa ripi ricaizwa no aya anocinjwa “mu kuphaira ke dziso”. Djesu akati kaari: “Uya anowina uye anoita mabasa angu dakara ku mugumo, ndicamupasa simba pa madzinza, uye acausha madzinza no ndonga ye simbi, zvekuti aona acaputswa-putswa hingana zvakagadzirhwa no dongo.” (Zva. 2:26, 27) Awona acateera Mutungamiriri wawo akabatira ndonga mu nyara—ecuusha madzinza no ndonga ye simbi.—Zva. 19:11-15.

16. Anhu akawanda acakunda kudini rufu?

¹⁶ Zviri pamhene kuti akadzodzwa acakunda rufu. (1Ako. 15:54-57) Kumutswa kawo  kucaita kuti abetsere pa kubvisa matambudziko ese pa nguwa ye hondo ye Amagedhoni. Mamirionji e hama no hanzvadzi dze ciKristu “acapona mukutambudzika kukuru” uye acararama mu nyika ipsva. (Zva. 7:14) Aya acapona pa nyika pano, acagara apupuri pa kukunda rufu—kumutswa ke mamirionji e anhu akafa kare. Rangarirai mupfaro unonga uripo pacaitika zviro izvi! (Zvi. 24:15) Uye ese aya anonga apangidza kugondeka kuna Djehovha acakunda kunyazi pa rufu. Aona acakwanisa kurarama nokusikaperi.

17. Tecirangarira 1 Akorinti 15:58 tinodikana kuitei?

¹⁷ AKristu ese ari kurarama nyamasi uno, anodikana kupangidza kutenda nge masoko anonyaradza nge zve rumuko akatarhwa na mu phostori Pauro ku Akorinti. Tino zvikonzero zvakawanda zvinoita kuti tipangidze cido cainga no mu phostori Pauro cekugara takabatikana zvino “mu basa ra Tenzi.” (Erengai 1 Akorinti 15:58.) Kana tikaita basa iri no mwoyo wese uye takagondeka, ticagarawo pamundandanda we aya acararama upenyu unopfadza we ramangwana. Ramangwana iri ricapfadza maningi kupinda zvese zvatiri kurangarira nyamasi uno. Zvezvirokwazvo ticagara no rugondo rekuti taiseenzera zviripo.