1-2. Ubba Kiristtaaneti saluwan deˈanawu denddiyoogaabaa erana koshshiyoy aybissee?

HA WODIYAN Yihoowawu haggaaziya daro asay saˈan merinawu deˈanawu hidootees. SHin Yihooway tiyido amarida Kiristtaaneti saluwan deˈanawu hidootoosona. He tiyettidaageeti sinttappe bantta deˈoy ay mala gidanaakko eranawu keehi koyoosona; saˈan deˈanawu hidootiyaageeti hegaa eranawu koyana bessiyoy aybissee? Nuuni beˈanaagaadan, saluwan deˈanawu denddiyo denddoy saˈan merinawu deˈanawu hidootiyaageetikka anjjuwaa demmanaadan maaddana. Yaatiyo gishshawu, nu hidootay saluwaana gidin saˈaana gidin, saluwan deˈanawu denddiyo dendduwaabaa nuuni erana koshshees.

² Koyro xeetu layttan deˈida Yesuusi erissiyo ashkkaratuppe amaridaageeti saluwan deˈanawu denddiyo hidootaabaa xaafanaadan Xoossay denttettiis. Kiitettida Yohaannisi hagaadan giis: “Ha77i nuuni Xoossaa naata; nuuni ai hananaakko biron erettibeenna; shin Kiristtoosi qoncciyo wode, nuuni a milatanaagaa eroos.” (1 Yoh. 3:2) Hegaa gishshawu, tiyettida Kiristtaaneti hayquwaappe denddidi saluwaa biyo wode yan deˈoy ay mala gidanaakko erokkona. Gidoppe attin, eti bantta woytuwaa ekkiyo wode Yihoowa beˈana. Saluwan deˈanawu denddiyo dendduwaabaa Geeshsha Maxaafay ubbabaa yootana xayikkonne, kiitettida PHawuloosi hegaabaa amaridabaa yootiis. Kiristtoosi ‘halaqatetta ubbaa, godatetta ubbaanne wolqqa ubbaa’ xayssiyo wode tiyettidaageeti aara gidana. Eti wurssetta ‘morkkiyaa hayquwaakka’ xayssana. Wurssettan,  Yesuusinne aara haaranaageeti Yihoowawu haarettana. (1 Qor. 15:24-28) Hegee keehi ufayssiya wode gidana! *

3. Koyro Qoronttoosa 15:30-32y yootiyoogaadan, PHawuloosi dendduwan ammaniyoogee I ay oottanaadan maaddidee?

³ PHawuloosi dendduwan ammaniyoogee dumma dumma paaceta genccanaadan A maaddiis. (Koyro Qoronttoosa 15:30-32 nabbaba.) I Qoronttoosan deˈiyaageetussi taani “wonttin wonttin haiqqais” giidi yootiis. Gujjidikka I, ‘Taani Efisoonan doˈaara baaxetaas’ yaagiis. I Efisoonan deˈiya isttaadeemiyan tumu doˈaara baaxettidoogaabaa yootennan aggenna. (2 Qor. 1:8; 4:10; 11:23) Woy I doˈaa mala gidida Ayhudatinne hara asati bana eqettidoogaa odennan aggenna. (Oos. 19:26-34; 1 Qor. 16:9) PHawuloosa wolqqaama metoy gakkiis. Gidikkonne I sinttappe ufayssiyaaba demmanaagaa ammaniyoogaa aggibeenna.—2 Qor. 4:16-18.

4. Dendduwaa hidootay ha wodiyan deˈiya Kiristtaaneta waati minttettidee? (Koyro sinttan deˈiya misiliyaa xeella.)

⁴ Nuuni keehi iita wodiyan deˈoos. Nu ishanttuppe amaridaageeti danobay gakkin qohettidosona. Harati olay deˈiyo heeran deˈiyo gishshawu hirggoosona. Issi issi biittatun Yihoowa asay laˈatettan sabbakenna, qassi eti hegaa gaasuwan qashettana woy hayqqana danddayikkonne aggennan awu haggaazoosona. SHin he ubba ishanttinne michchontti aggennan Yihoowawu goynniyoogan nuussi loˈˈo leemiso. Eti ha wodiyan hayqqiyaaba gidikkonne, Yihooway sinttappe etawu keehi loˈˈobaa immanawu qaalaa gelidoogaa eriyo gishshawu aybanne yayyokkona.

5. Dendduwan nu ammaniyoogaa shugissana danddayiya iita qofay aybee?

⁵ “Hayqqidaageeti hayquwaappe denddennabaa gidikko, ‘simmi moosinne uyoos; ayssi giikko, nuuni wontto hayqqana’” giidi amaridaageeti qoppiyo iita qofaappe ba ishantti naagettanaadan PHawuloosi yootiis. Hegaadan qoppiya amarida asay PHawuloosa wodeppe kasekka deˈees. Israaˈeelatu eeshshaa qonccissiya Isiyaasa 22:13n deˈiya qofaappe I hegaa yootennan waayi aggana. Eti Xoossaa mintti siiqanawu baaxetiyoogaa aggidi banttana ufayssiyaaba xallaa koyidosona. Awudenne hayqqiyoogee attenna gishshawu, hachchi ufayttana koshshees giidi Israaˈeelati qoppiyo qofay ha wodiyankka meeze gididaba. SHin he iita qofaa gaasuwan Israaˈeela deriyaa bolli iitabay gakkidoogaa Geeshsha Maxaafay yootees.—2 Odi. 36:15-20.

6. Hayqqidaageeti denddanaagaa ammaniyoogee, laggiyaa dooriyo wode nuna waati maaddana koshshii?

⁶ Yihooway hayqqidaageeta denttanaagaa nuuni eriyoogee, nuuni laggiyaa dooriyo wode nuna maaddana koshshees. Qoronttoosan deˈiya ishantti dendduwan ammanennaageetuura laggetennaadan naagettana koshshiis. Hegaappe nuuni tamaariyoobay deˈees: Nuuni sinttappe aybi hananaakko qoppennanne banttana ufayssiyaaba xallaa qoppiya laggetuura daro wodiyaa aattiyaaba gidikko, eti nuna qohana. Issi Kiristtaane hegaa mala uraara daro wodiyaa aattikko, A loˈˈo qofaynne eeshshay moorettana danddayees. He asati Xoossay ixxiyoobata oottanaadan A denttettanakka danddayoosona. Hegaa gishshawu PHawuloosi, “Xillotettaakko simmite. Nagara oottoppite” giidi minttidi zoriis.—1 Qor. 15:33, 34.

7. Koyro Qoronttoosa 15:35-38y yootiyoogaadan, dendduwaa xeelliyaagan amaridaageeti woygi oychchidonaa?

⁷ Koyro Qoronttoosa 15:35-38 nabbaba.  Harati dendduwaabaa siranaadan oottanawu koyiya amaridaageeti, “Haiqqida asai waanidi denddanee?” giidi oychchidosona. Ha wodiyan deˈiya daroti asay hayqqi simmin waaniyaakko dumma dummabaa qoppiyo gishshawu, PHawuloosi yootido zaaruwaabaa qoppiyoogee nuna maaddees. SHin Geeshsha Maxaafay ay tamaarissii?

8. Saluwan deˈanawu denddiyoogaabaa akeekanaadan nuna maaddana danddayiya leemisoy awugee?

⁸ Issi uri hayqqiyo wode, A bollay musees. SHin saluwaanne saˈaa medhdhidaagee he ura hayquwaappe denttidi awu koshshiya bollaa immana danddayees. (Doo. 1:1; 2:7) Xoossay kaseegaa mala bollaara denttana koshshennaagaa PHawuloosi issi leemisuwan qonccissiis. Zeriyo kattaa ayfiyaa qoppa. He kattaa ayfee biittan zerettiyo wode mokkidi ooratta katta gidees. He mokkida kattay zerettida qeeri ayfiyaappe keehi dummatees. PHawuloosi nuna Medhdhidaagee ‘ba dosido bollaa immana’ danddayiyoogaa ha leemisuwan qonccissiis.

9. Dumma dumma bollaa qommuwaa xeelliyaagan 1 Qoronttoosa 15:39-41 yootiyoobay aybee?

⁹ Koyro Qoronttoosa 15:39-41 nabbaba. Xoossay ubba bollaa issi mala oottidi medhdhibeennaagaa PHawuloosi qonccissiis. Leemisuwawu, miizzatu, kafotunne moletu ubbaa bollay dumma dumma. Awa ayfiyaanne aginaa giddon dummatettay deˈiyoogaa nuuni akeekiyoogaa PHawuloosi yootiis. Qassi I “issi xoolinttee hinkko xoolinttiyaappe bonchchuwan” dummatiyoogaa yootiis. Nuuni he dummatettaa nu ayfiyan beˈana xayikkonne hegee tuma. Saynttistteti dumma dumma xoolinttetu qommoy deˈiyoogaa yootoosona; amaridaageeti gita, amaridaageeti guutta, amaridaageeti zoˈˈo, amaridaageeti bootta, qassi amaridaageeti awa ayfiyaadan adilˈˈe ciishsha milatoosona. PHawuloosi “saluwaa bollatinne sa7aa bollati” deˈiyoogaakka yootiis. I woyganawu koyidee? Saˈan nuussi  ashuwaa bollay deˈees; shin saluwan kiitanchchatuyyo deˈiyaagaa mala ayyaana bollay deˈees.

10. Saluwan deˈanawu denddanaageeti ay mala bollaara denddanee?

¹⁰ PHawuloosi kaallidi giidobaa akeekite: “Haiqqidaageeti haiquwaappe denddiyo wode hegaadan hanana; haiqqiya bollai moogettidi, haiqqenna bolla gididi denddana.” Issi uri hayqqiyo wode, A bollay musiyoogaanne zaarettidi biitta gidanaagaa nuuni eroos. (Doo. 3:19) Yaatin, hegee waani “haiqqenna bolla gididi denddana” danddayii? PHawuloosi yootidoy Eelaasi, Elssaˈinne Yesuusi saˈan deˈanawu denttido asaabaa gidenna. PHawuloosi saluwan deˈanawu ‘ayyaana bollaara’ denddiya uraabaa yootiis.—1 Qor. 15:42-44.

11-12. Yesuusi hayquwaappe denddiyo wode laamettidabay aybee, qassi tiyettidaageeti aagaadan waani hananee?

¹¹ Yesuusi saˈan deˈiyo wode, ayyo ashuwaa bollay deˈees. SHin I hayquwaappe denddido wode ‘deˈuwaa immiya ayyaana gididi’ saluwaa simmiis. Hegaadankka, tiyettida Kiristtaaneti ayyaana mereta gididi denddana. PHawuloosi hagaadan giis: “Nuuni biittaappe merettidaagaa meraa maayidoogaadan, saluwaappe yiidaagaa meraakka qassi maayana.”—1 Qor. 15:45-49.

¹² Yesuusi asaagaa mala bollaara denddibeennaagaa hassayiyoogee keehi koshshiyaaba. PHawuloosi dendduwaa xeelliyaagan qonccissidobaa wurssana haniyo wode, “ashoinne suutti [saluwan] Xoossaa kawotettaa laattana danddayenna” giiyoogan hegee aybissakko qonccissiis. (1 Qor. 15:50) Kiitettidaageetinne tiyettida harati musana danddayiya ashoynne suuttay deˈiyo bollaara saluwaa bookkona. Eti denddanay awudee? PHawuloosi eti hayqqosaara gidennan sinttappe denddanaagaa yootiis. PHawuloosi 1 Qoronttoosa xaafiyo wode, amarida erissiyo ashkkarati “haiqqidosona”; leemisuwawu kiitettida Yaaqoobi hegeetuppe issuwaa.  (Oos. 12:1, 2) Kiitettida haratinne ayyaanan tiyettidaageeti hegaappe simmin “haiqqidosona.”—1 Qor. 15:6.

13. Yesuusi ‘qoncciyo’ wode aybi hananee?

¹³ Yesuusikka PHawuloosikka keehi koshshiya wodee yaanaagaa kasetidi yootidosona. He wodee Kiristtoosi qoncciyo wodiyaa. Kiristtoosi qoncciyo wodiyan, kumetta alamiyan olaynne harggee denddana, biittay qaaxxana, qassi hara iitabati hanana. Geeshsha Maxaafay yootiyo ha hiraagay 1914⁠ppe doommidi polettiiddi deˈiyoogaa nuuni beˈoos. He malaataappe keehi koshshiya issibaykka hanana. Xoossaa Kawotettay haariiddi deˈiyoogaa yootiya mishiraachchoy ‘saˈa ubban odettanaagaanne hegaappe guyyiyan, wurssettay gakkanaagaa’ Yesuusi yootiis. (Maa. 24:3, 7-14) ‘Hayqqida’ tiyettidaageeti ‘Goday qoncciyo gallassi’ denddidi saluwan deˈanawu baanaagaa PHawuloosi yootiis.—1 Tas. 4:14-16; 1 Qor. 15:23.

14. Kiristtoosi qoncciyo wodiyan hayqqiya tiyettida Kiristtaaneti waananee?

¹⁴ Ha wodiyan hayqqiya tiyettida Kiristtaaneti saluwan deˈanawu liphida ayfee xeellanaashin baana. PHawuloosi 1 Qoronttoosa 15:51, 52n hagaadan giis: “Nuuni ubbai haiqqokko. SHin wurssetta malkkatai punettiyo wode, liphida aifee xeellanaassi hassayennan laamettana.” PHawuloosi yootido he qofay polettiiddi deˈees! Ha Kiristtoosa ishantti denddi simmidi, ‘Godaara issippe ubba wode deˈiyoogan’ keehi ufayttana.—1 Tas. 4:17.

15. ‘Liphida ayfee xeellanaashin’ laamettanaageeta naagiya oosoy aybee?

¹⁵ ‘Liphida ayfee xeellanaashin’ laamettiyaageeti saluwan oottanabaa Geeshsha Maxaafay  yootees. Yesuusi etawu hagaadan giis: “Xoonidaagaayyoonne wurssettai gakkanaassi ta oosuwaa naagidaagaayyo, asa zare ubbaa haarana mala, taani ta Aawaappe ekkido maataa malaa ayyo immana; i eta birata dullan haarananne urqqa miishsha menttiyoogaadan menttana.”(Ajj. 2:26, 27) Eti Yesuusa kaallidi birata dullan saˈaa asaa haarana.—Ajj. 19:11-15.

16. Daro asay hayquwaa waati xoonanee?

¹⁶ Tiyettidaageeti hayquwaa xoonanaagee qoncce. (1 Qor. 15:54-57) Eti denddiyoogee Armmageedoona olaa wode iitatetta ubbaa xayssiyoogan hashetanaadan oottana. “Daro waayiyaa waayidi [yiida]” miilooniyan qoodettiya hara Kiristtaaneti xayuwaappe attidi ooratta alamiyaa gelana. (Ajj. 7:14) Beni hayqqida biilooniyan qoodettiya asay denddiyo wode, paxa kanttidaageeti hayqoy xoonettiyo hara xoonuwaa beˈana. He maalaalissiyaabay haniyo wode, nuuni ay keena ufayttanaakko qoppa! (Oos. 24:15) Qassi Yihoowawu kumetta wozanan ammanettidi deˈida ubbay Addaameppe laattido hayquwaa xoonana. Eti merinawu deˈana.

17. Koyro Qoronttoosa 15:58y nu ha wodiyan ay oottanaadan minttettii?

¹⁷ PHawuloosi dendduwaa xeelliyaagan Qoronttoosan deˈiyaageetuyyo xaafido minttettiya qofaa gishshawu ha wodiyan deˈiya Kiristtaaneti ubbay galatana koshshees. “Godaa oosuwaa” oottanaadan PHawuloosi zoridobaa azazettanawu ha wodiyan nuussi danddayettida ubbabaa oottiyo loˈˈo gaasoy deˈees. (Koyro Qoronttoosa 15:58 nabbaba.) Nuuni nuuyyo danddayettida ubban he oosuwaa oottikko, sinttappe demmana keehi ufayssiya deˈuwaa yeemuwan naagana danddayoos. He wodee nuuni qoppana danddayiyo aybippenne aadhdhiya ufayssiyaagaa gidana. Hegee Godaara gayttidaagan nu oottido oosoy hada gidennaagaa nuussi qonccissana.