1-2. Kay ano nga an ngatanan nga Kristiano angay magin interesado mahitungod ha pagkabanhaw ngadto ha langit?

KADAM-AN han mga nag-aalagad kan Jehova yana naglalaom nga mabuhi ha tuna ha waray kataposan. Pero an nabibilin nga mga dinihogan naglalaom nga babanhawon hira basi mabuhi ha langit. Ini nga mga dinihogan interesado gud kon ano an ira magigin kinabuhi didto, pero kumusta man adton naglalaom nga mabuhi ha tuna? Sugad han aton hihisgotan, an pagkabanhaw ngadto ha langit magriresulta liwat hin mga bendisyon para ha mga naglalaom nga mabuhi ha tuna ha waray kataposan. Salit ha langit man o ha tuna an aton paglaom, angay kita magin interesado mahitungod ha pagkabanhaw ngadto ha langit.

² Gin-giyahan han Dios an pipira nga disipulo ni Jesus ha siyahan nga siglo ha pagsurat mahitungod han pagkabanhaw ngadto ha langit. Hi apostol Juan nagsaysay: “Mga anak na kita yana han Dios, pero waray pa igpadayag kon magigin ano kita. Maaram kita nga kon igpadayag na hiya magigin pariho kita ha iya.” (1 Juan 3:2) Salit an dinihogan nga mga Kristiano diri maaram kon ano an ira magigin kinabuhi kon banhawon na hira ngadto ha langit sugad nga espiritu. Pero makikita na nira hi Jehova kon makarawat na nira ito nga balos. Waray unabiha han Biblia an tanan nga detalye mahitungod han pagkabanhaw ngadto ha langit, pero hi apostol Pablo naghatag hin pipira nga impormasyon mahitungod hito. An mga dinihogan kaupod na han Kristo kon wad-on na niya an “ngatanan nga gobyerno ngan an ngatanan nga awtoridad ngan gahum.” Upod hini “an kataposan nga kaaway, an kamatayon.” Ha kataposan, hi Jesus  pati an iya mga igkasi-magmarando magpapasakop kan Jehova, ngan igpapasakop liwat niya kan Jehova an ngatanan nga butang. (1 Cor. 15:24-28) Magigin makalilipay gud ito nga panahon! *

3. Sugad han iginpapakita han 1 Corinto 15:30-32, an pagtoo ni Pablo ha pagkabanhaw nakabulig ha iya nga buhaton an ano?

³ An pagtoo ni Pablo ha pagkabanhaw nakabulig ha iya nga mailob an iba-iba nga pagsari. (Basaha an 1 Corinto 15:30-32.) Nagsiring hi Pablo ha mga taga-Corinto: “Kada adlaw naatubang ako ha kamatayon.” Nagsurat liwat hiya: “Nakig-away ako ha magpintas nga mga hayop ha Efeso.” Posible nga an iya gin-uunabi amo an iya pakig-away ha mga hayop ha usa nga arena ha Efeso. (2 Cor. 1:8; 4:10; 11:23) O bangin an iya gin-uunabi amo an nakontra nga mga Judio ngan an iba pa nga pariho hin “magpintas nga mga hayop.” (Buh. 19:26-34; 1 Cor. 16:9) Hain man hito, nameligro gud an kinabuhi ni Pablo. Pero padayon la gihapon hiya nga sinarig nga magkakaada hiya makalilipay nga kabubuwason.​—2 Cor. 4:16-18.

4. Paonan-o an paglaom ha pagkabanhaw nagpaparig-on ha mga Kristiano yana? (Kitaa an retrato ha kobre.)

⁴ Nabubuhi kita ha peligroso nga panahon. An pipira han aton kabugtoan nagin biktima han krimen. An iba naukoy ha mga lugar nga may girra diin inaabat nira nga diri hira talwas. An iba naman nag-aalagad kan Jehova ha mga lugar nga an pagsangyaw nga buruhaton may restriksyon o igindidiri pa ngani, bisan kon mapriso hira o mameligro an ira kinabuhi. Pero bisan pa hito, ini nga kabugtoan padayon nga nagsisingba kan Jehova, ngan maopay gud hira nga susbaranan. Diri hira nahahadlok kay maaram hira nga bisan kon mamatay hira, may ihahatag ha ira hi Jehova nga mas maopay nga kinabuhi ha tiarabot.

5. Ano nga peligroso nga panhunahuna an makakapaluya han aton pagtoo ha pagkabanhaw?

⁵ Ginpahamangnoan ni Pablo an iya kabugtoan mahitungod ha peligroso nga panhunahuna han pipira: “Kon an mga patay diri bubuhion, ‘pangaon ngan panginom kita, kay buwas mapatay kita.’” Sugad na hito an panhunahuna han pipira antes pa han panahon ni Pablo. Posible nga ginkotar niya an Isaias 22:13 nga nagtutudlok ha disposisyon han mga Israelita. Imbes nga magpahirani ha Dios, mas gin-una nira an pagpalipay ha ira kalugaringon. An panhunahuna hito nga mga Israelita nga kinahanglan “magkalipay kita yana, kay bangin buwas patay na kita,” komon liwat bisan yana. Pero iginrekord han Biblia an maraot nga nahitabo ha nasud han Israel tungod hiton sayop nga panhunahuna.​—2 Cron. 36:15-20.

6. Ano an sadang magin epekto han paglaom nga pagkabanhaw ha aton pagpili hin mga sangkay?

⁶ Matin-aw, an kamatuoran nga kaya ni Jehova banhawon an mga patay kinahanglan makaapekto ha aton pagpili hin mga sangkay. An kabugtoan ha Corinto kinahanglan diri makig-upod-upod hadton diri natoo ha pagkabanhaw. Ini an leksyon para ha aton: Kon makikig-upod-upod kita ha mga tawo nga diri naghuhunahuna han tiarabot lugod an ginhihinunahuna la an pagkalipay, maraot hira nga impluwensya ha aton. Kon an usa nga Kristiano makikig-upod-upod ha sugad nga mga tawo, madadaot hito an iya maopay nga panhunahuna ngan pamatasan. Ngani, mahimo ito magresulta hin pakabuhat hin mga butang nga ginkakangalasan han Dios. Salit hi Pablo nag-aghat: “Pamurubuot kamo ha matadong nga paagi ngan ayaw pagbinuhat hin sala.”​—1 Cor. 15:33, 34.

7. Uyon ha 1 Corinto 15:35-38, ano nga pakiana mahitungod ha pagkabanhaw an bangin igpakiana han iba?

⁷ Basaha an 1 Corinto 15:35-38. Adton  naruruyag nga impluwensyahan an iba nga magruhaduha ha pagkabanhaw, bangin magpakiana: “Paonan-o bubuhion an mga patay?” Maopay nga hunahunaon naton an baton ni Pablo kay damu yana an may kalugaringon nga gintotoohan mahitungod han kinabuhi katapos han kamatayon. Pero ano an igintututdo han Biblia?

8. Ano nga ilustrasyon an makakabulig ha aton basi masabtan an pagkabanhaw ngadto ha langit?

⁸ Kon namamatay an usa nga tawo, nadudunot an iya lawas. Pero Hiya nga naglarang han uniberso makakabanhaw hito nga tawo ngan makakahatag ha iya hin angayan nga lawas. (Gen. 1:1; 2:7) Naggamit hi Pablo hin ilustrasyon basi ipakita nga diri kinahanglan ibalik han Dios an dati nga lawas. Hunahunaa an “liso” han usa nga tanom. Kon igintatanom ito ha tuna, naturok ito ngan nagigin usa nga bag-o nga tanom. Ito nga bag-o nga tanom iba gud an hitsura ha gutiay nga liso. Gin-gamit ni Pablo ini nga pagkompara basi ipakita nga an aton Maglalarang makakahatag “hin lawas uyon ha iya nalilipayan.”

9. Ano an ginsisiring han 1 Corinto 15:39-41 mahitungod han iba-iba nga klase han lawas?

⁹ Basaha an 1 Corinto 15:39-41. Gin-unabi ni Pablo nga iba-iba gud an mga linarang. Pananglitan, diri parapriho an lawas han baka, tamsi, ngan isda. Nagsiring hiya nga ha langit, makikita naton an kaibahan han adlaw ngan han bulan. Ngan gin-unabi niya nga “iba an himaya han usa nga bitoon ha lain nga bitoon.” Oo, bisan kon diri ito nakikita han aton mga mata, an mga syentista nasiring nga iba-iba an klase han mga bitoon, may dagku, may gurogudti, may pula, may busag, ngan may dulaw, sugad han adlaw. Hi Pablo nagsiring liwat nga “may langitnon nga mga lawas ngan tunan-on nga mga lawas.” Ano an iya karuyag sidngon? Bueno, ha tuna, unudnon an aton mga lawas, pero ha langit, espiritu an ira mga lawas pariho han mga anghel.

10. Magkakaada hin ano nga klase hin lawas adton babanhawon ngadto ha langit?

¹⁰ Pansina an sunod nga ginsiring ni Pablo: “Sugad liwat hito an pagkabanhaw han mga patay.  Iginsabwag ito nga nadudunot; ginbuhi ito nga diri nadudunot.” Syempre, kon namamatay an tawo, nadudunot an iya lawas ngan nabalik ito ha tapotapo. (Gen. 3:19) Salit paonan-o nga an usa nga lawas ‘ginbuhi nga diri nadudunot’? An gin-uunabi ni Pablo diri usa nga tawo nga ginbanhaw basi mabuhi dinhi ha tuna, sugad han mga ginbanhaw nira Elias, Eliseo, ngan Jesus. Lugod, an iya gin-uunabi amo an usa nga tawo nga ginbanhaw ha langitnon nga lawas, karuyag sidngon, ha usa nga “espirituwal nga lawas.”​—1 Cor. 15:42-44.

11-12. Ano nga pagbag-o an naeksperyensyahan ni Jesus han ginbanhaw hiya, ngan paonan-o liwat ito maieksperyensyahan han mga dinihogan?

¹¹ Han hi Jesus nakanhi ha tuna, unudnon an iya lawas. Pero han ginbanhaw hiya, “nagin espiritu [hiya] nga naghahatag hin kinabuhi” ngan binalik ha langit. Ha pariho nga paagi, an dinihogan nga mga Kristiano babanhawon sugad nga espiritu. Hi Pablo nagsaysay: “Sugad la nga an aton dagway pariho ha iya nga ginhimo tikang ha tapotapo, magigin pariho liwat kita ha dagway niya nga langitnon.”​—1 Cor. 15:45-49.

¹² Hirani na matapos an paghisgot ni Pablo mahitungod han pagkabanhaw. Importante nga hinumdoman naton nga hi Jesus waray banhawa sugad nga tawo. Iginsaysay ni Pablo an rason: “An unod ngan dugo diri makakapanunod han Ginhadian han Dios” ha langit. (1 Cor. 15:50) An mga apostol ngan an iba pa nga mga dinihogan diri babanhawon ngadto ha langit nga an lawas may unod ngan dugo nga nadudunot. San-o hira babanhawon? Ginpabug-atan ni Pablo nga ito nga pagkabanhaw tiarabot pa; diri dayon ito mahitatabo kamatay nira. Han iginsurat ni Pablo an 1 Corinto, an pipira nga disipulo “nangaturog na ha kamatayon,” sugad kan apostol Santiago. (Buh. 12:1, 2) Ha urhi, an iba nga apostol ngan mga dinihogan ‘makaturog [liwat] ha kamatayon.’​—1 Cor. 15:6.

13. Ano an magigin tigaman han presensya ni Jesus?

¹³ Igintagna ni Jesus ngan ni Pablo nga may  maabot nga usa nga importante nga panahon​—an presensya han Kristo. Magigin tigaman hito nga presensya an pagkaada mga girra, linog, epidemya, ngan iba pa nga magraot nga panhitabo ha bug-os nga kalibotan. Ini nga tagna han Biblia natutuman na tikang pa han 1914. May usa pa nga importante nga bahin ito nga tigaman. Hi Jesus nagsiring nga an maopay nga sumat han naestablisar na nga Ginhadian han Dios isasangyaw “ha bug-os nga inuukyan nga tuna sugad nga pamatuod ha ngatanan nga nasud, ngan katapos hito maabot an kataposan.” (Mat. 24:3, 7-14) Hi Pablo nagsiring nga ha “presensya han Ginoo” mahitatabo liwat an pamanhaw ha dinihogan nga mga Kristiano nga “nangaturog na ha kamatayon.”​—1 Tes. 4:14-16; 1 Cor. 15:23.

14. Ano an naieksperyensyahan han mga dinihogan nga namamatay durante han presensya han Kristo?

¹⁴ Yana, an mga dinihogan nga namamatay ginbabanhaw dayon basi mabuhi ha langit. Ginpamatud-an ini han ginsiring ni Pablo ha 1 Corinto 15:51, 52: “Diri kita ngatanan makaturog ha kamatayon, pero kita ngatanan mababag-o, ha dalikyat, ha pagpirok han mata, durante han ultimo nga trumpeta.” Ini nga ginsiring ni Pablo natutuman na yana! Kabanhaw hini nga kabugtoan han Kristo, magkakaada hira daku nga kalipay; ‘pirme na nira makakaupod an Ginoo.’​—1 Tes. 4:17.

15. Ano an magigin buruhaton hadton mga mababag-o ha usa la ka “pagpirok han mata”?

¹⁵ Iginsusumat han Biblia an pagbubuhaton ha langit hadton mga nabag-o ha usa la ka “pagpirok han mata.” Hi Jesus nagsiring ha ira: “Hiya nga nagdadaog ngan nagsusunod han akon mga buhat tubtob ha kataposan, tatagan ko hin awtoridad ha bawbaw han mga nasud, ngan iya babantayan an katawohan gamit an usa nga tungkod nga puthaw basi mapusak  hira pariho hin mga surudlan nga hinimo ha lapok, sugad han akon nakarawat tikang ha akon Amay.” (Pah. 2:26, 27) Ito nga mga ginbanhaw ngadto ha langit masunod ha ira Kumander ha pagbuhat han ira toka​—an pagbantay ha mga nasud gamit an usa nga tungkod nga puthaw.​—Pah. 19:11-15.

16. Paonan-o an damu nga tawo magdadaog kontra ha kamatayon?

¹⁶ Klaro, an mga dinihogan magdadaog kontra ha kamatayon. (1 Cor. 15:54-57) Tungod kay ginbanhaw hira, makakabulig hira ha pagwara han ngatanan nga karaotan ha tuna ha tiarabot nga girra han Armagedon. Minilyon nga iba pa nga mga Kristiano an ‘makakatalwas ha daku nga kasakitan’ ngan makakasulod ha bag-o nga kalibotan. (Pah. 7:14) Ito nga mga makakatalwas dinhi ha tuna makakakita mismo hin usa pa nga kadaogan kontra ha kamatayon​—an pagkabanhaw han binilyon nga tawo nga nagkamatay. Imadyina la an daku nga kalipay kon mahitabo na ito nga kadaogan! (Buh. 24:15) Ngan an ngatanan nga bug-os nga maunungon kan Jehova magdadaog bisan ha napanunod nga kamatayon. Mabubuhi hira ha waray kataposan.

17. Ano an igin-aaghat ha aton han 1 Corinto 15:58?

¹⁷ An tagsa nga Kristiano yana angay magin mapasalamaton ha nakakaliaw nga mga pulong nga iginsurat ni Pablo ha mga taga-Corinto mahitungod han pagkabanhaw. May mag-opay kita nga rason nga sundon an sagdon ni Pablo nga bug-os nga makigbahin ha “buruhaton han Ginoo.” (Basaha an 1 Corinto 15:58.) Kon maunungon kita ngan aktibo nga nakikigbahin hito nga buruhaton, makakalaom kita nga magkakaada kita makalilipay gud nga kinabuhi ha tiarabot. Ito nga kinabuhi magigin mas makalilipay gud kay ha aton nahuhunahuna. Magpapamatuod gud ito nga an aton mga pagbudlay may kalabotan ha Ginoo waray makarag.