1, 2. მუშენ ოკო რდას არძა ქრისტიან დაინტერესებულ ზეციერ გათელებათ?

იეჰოვაშ მსახურეფიშ უმენტაშის დედამიწას მარადიულ ცხოვრებაშ იმენდ უღჷ. მარა ნამთინე ქრისტიან, მით იეჰოვაშე რე ცხებულ, ზეცას გათელებას ელჷ. ცხებულ ქრისტიანეფს მანგარო ოინტერესნა, მუნერ იჸუაფ მუნეფიშ ცხოვრება მომავალს, მარა მუშ რაგად შილებე თინეფშე, მიდგას დედამიწას ცხოვრებაშ იმენდ უღნა? მუჭოთ ბძირუნთ, ზეციერ გათელება თინეფს ხოლო მოუღანს ჯგირობუას. თაშ ნამდა, ზეცას ცხოვრებაშ იმენდ მიღნა დოვარ დედამიწას, დაინტერესებულეფ ოკო ვორდათ ზეციერ გათელებათ.

² ღორონთიქ პირველ საუკუნეს იესოშ ნამთინე მოწაფე აღძრჷ, ნამდა ზეცას ცხოვრებაშ იმენდიშ გურშენ დუჭარდესკო. მოციქულ იოანექ ჭარჷ: „ასე ჩქი ღორონთიშ სქუალეფ ვორეთ, მარა დიო ვა მიჩქნა, მუნერეფ იპჸით. ჩქი მიჩქნა, ნამდა თიშ [ღორონთიშ] გიმოცხადებაშ დროს თიცალეფ იპჸით“ (1 იოან. 3:2). ათეშენ, ცხებულ ქრისტიანეფს ვა უჩქნა, მუნერეფ იჸინა, მუჟამსით ზეცას სულიერ სხეულით გეთელებნა. მარა მუნეფიშ ჯილდოს მიღენან, თინეფ პირდაპირ გაგებათ ძირნა იეჰოვას. ბიბლია არძა დეტალს ვემეჩიებნა ზეციერ გათელებაშენ, მარა პავლე მოციქულქ მუსხირენ მუდგარენ მიწუეს თიშ გურშენ. ცხებულეფ იესოწკუმა ართო იჸინა, მუჟამსით „თინა არძა მთავრობას, ხელისუფლებას დო ძალაუფლებას მოსპუნს“, თინეფ შქას უკანასკნელ ნტერს, ღურას. ბოლოს იესო მუშ თანამართველეფწკუმა ართო მუშ დუდის დო ირფელს იეჰოვას დუმორჩილენს (1 კორ. 15:24—28). მუ სარკო დრო იჸუაფ! *

3. მუჭოთ პირველ კორინთელეფიშ 15:30—32-ს იძირე, მუშ კეთებას მეხვარ პავლეს გათელებაშ იმენდიქ?

 ³ პავლეს გათელებაშ იმენდიქ მეხვარ შხვადოშხვა განსაცდელეფიშ გარზებას (წეკითხით 1 კორინთელეფიშ 15:30—32). თიქ კორინთელეფს უწუ: „ირდღას ღურას ინვოჯინექ თოლეფს“. უკულ გეუძინ, ნამდა მხეცეფწკუმა ხოლო ურკინებ ეფესოს. შილებე თინა ნამდვილ ცხოველეფწკუმა რკინენდკო ეფესოშ არენას (2 კორ. 1:8; 4:10; 11:23). ვარდა შილებე გულისხმენდკო მოწინააღმდეგე ებრაელეფს დო თინეფს, მით „მხეცეფცალეფ“ რდეს (საქ. 19:26—34; 1 კორ. 16:9). მუდგა ვა ჸოფედკონ, პავლე სერიოზულ საფრთხეეფს შითმოხვადუდ, მარა მომავალშენ დადებით განწყობას იშენით ვადინუანდჷ (2 კორ. 4:16—18).

4. მუჭო ამანგარენს ამდღა გათელებაშ იმენდ ქრისტიანეფს? (ქოძირით სურათ გალენ გვერდის).

⁴ ჩქი ოშქურანჯ დროს ფცხოვრენთ. ნამთინე ჩქინ ჯიმაქ დანაშაულიშ მსხვერპლიქ იჸუ. შხვეფ ცხოვრენა თიცალ ადგილეფს, სოდეთ ჩხუპ რე დო ვა რენა თხილერ. თიცალ ქიანეფს, სოდეთ ჩქინ საქმიანობა შეზღუდულ ვარდა ვარიებულ რე, იეჰოვაშ ხალხ სიცოცხლეს ვარდა თავისუფლებას რისკიშ თუდო გიორინუანს, ნამდა ემსახურას ღორონთის. თეშ უმკუჯინუო, თე და დო ჯიმალეფ იშენით აგრძელენა იეჰოვაშ მსახურებას დო მანგარ ჯგირ მაგალითის მარზენა. თინეფს ვაშქურნა, მუშენდა უჩქნა, ამდღა დოღურანინ ხოლო, იეჰოვა თინეფს ბრელით უჯგუშ მუდგარენს ოპირ მომავალშო.

5. ნამ საშიშ აზროვნებას შეულებ დამსუსტან ღურელეფიშ გათელებაშ რწმენა?

⁵ პავლექ გაფრთხილ ჯიმალეფ თი საშიშ აზროვნებაშ გურშენ, ნამუთ ნამთინეს უღუდ: «ღურელეფ ვეგეთელებნან-და, იმწკუმა „ბჭკუმათ დო ფშვათ, მუშენდა ჭუმან გობჭყორდუთ“». თეცალ დამოკიდებულება პავლეშახ ხოლო არსებენდჷ. თინა შილებე ესაიაშ 22:13-ს ენოჭარილ სიტყვეფს ციტირენდკო, ნამუთ ისრაელეფიშ დამოკიდებულებას ოხუ. თიშ მანგიორო, ნამდა თინეფს იეჰოვაწკუმა ურთიერთობა გუმანგარებდესკო, მუნეფიშ დუდიშ სიამოვნებაშო ფიქრენდეს. ისრაელეფ ამდღარ დღათ ცხოვრენდეს, მუშენდა მიორჩქუდეს, ნამდა შილებე ნებისმიერ დროს დოღურესკო. თეცალ დამოკიდებულება ამდღა ხოლო რე გავრცელებურ. ბიბლიას მოჩამილ რე, მუ გლახა შედეგეფქ მაჸუნ თინეფიშ არასწორ აზროვნებას (2 მატ. 36:15—20).

6. მუჭო შილებე იმოქმედას ღურელეფიშ გათელებაშ გურშენ რწმენაქ ჩქინ გადაწყვეტილებაშა, მის გიშებგორუნთ მეგობრეფო?

⁶ იეჰოვას ღურელეფიშ გათელება შეულებუნ, თეშ რჩქინა მოქმედენს ჩქინ გადაწყვეტილებაშა — მის გიშებგორუნთ მეგობრეფო. კორინთელ ჯიმალეფს დუდ ოკო ეუჩილითუაფდესკო თინეფწკუმა მეგობრობაშა, მიდგას გათელებაშ ვა წანდჷ. თავრეშე ბგურაფლენთ, ნამდა მუთუნნერ ჯგირობუას ვა მომღანა თინეფწკუმა ბრელ დროშ გატარება, მით ხვალე მუშ დუდიშ სიამოვნებაშო ფიქრენს დო ვაინტერეს, მუ მოხვადუ მომავალს. თეჯგურა ადამიანეფწკუმა ურთიერთობაქ შილებე ქრისტიანს სწორ აზროვნება დო საქციელ დუთირუას. თექ შილებე თინა ცოდვაშა ხოლო ქიმიჸონას, მუთ იეჰოვას ჯოგჷ. ათეშენ, პავლექ გენჭირელო უწუ თინეფს: „აზრშა ქუმორთით დო თინა აკეთით, მუთ სწორ რე დო ნუმ ცოდენთ“ (1 კორ. 15:33, 34).

7. მუჭოთ პირველ კორინთელეფიშ 15:35—38-ს იძირე, მუ შილებე იკითხკო ნამთინექ?

⁷ წეკითხით 1 კორინთელეფიშ 15:35—38. ნამთინექ, მიდგას ოკოდ, შხვეფს ეჭვი  გურჩქინკო გათელებაშ გურშენ, იკითხჷ: „მუჭო გეთელებნა ღურელეფ?“ ჯგირ იჸუაფ, დეფიფქრათ პავლეშ სიტყვეფშე, მუშენდა ამდღა ბრელს შხვადოშხვანერ შეხედულება უღჷ ღურაშ უკულ სიცოცხლეწკუმა დაკავშირებით. მარა მუს ოგურუანს ბიბლია?

8. ნამ შედარება მოხვარნა, ქინვანჭათ ზეცას ცხოვრებაშო გათელებას?

⁸ მუჟამსით კოჩ ღურუ, თიშ სხეულ იხრწნებ. მარა თიქ, მიდგაქ თე ქიანა მუთუნ ვა რდუნ თეშ გაჭყჷ, შეულებ გათელას პიროვნება დო ქიმეჩას თის თიცალ სხეულ, მუნერით ოსაჭირ (დაბ. 1:1; 2:7). პავლექ შედარება გიმირინუ თიშ ოძირაფალო, ნამდა ღორონთის ვედესაჭირებუდ, გათელებურ პიროვნებას კინ თი სხეულ დურთინუკო, მუთ ღურაშახ უღუდ. დეფიქრით ქობალიშ კაკალშე ვარდა შხვა ოთასალ „მარცვალშე“. მუჟამსით მარცვალ ინოთასილ რე დიხას, თინა რდუალას იჭყანს დო ახალ მცენარეთ გინირთუ. ახალ მცენარე ბრელით განსხვავებულ რე ჭიჭე მარცვალშე. პავლექ თე შედარება თიშ ოძირაფალო გიმირინუ, ნამდა ჩქინ გუმაჭყაფალს შეულებ გათელებურ პიროვნებას თიცალ სხეულ მეჩას, მუნერით მუს ოკო.

9. მუს იჩიებ პირველ კორინთელეფიშ 15:39—41 შხვადოშხვანერ სხეულეფიშ გურშენ?

⁹ წეკითხით 1 კორინთელეფიშ 15:39—41. პავლექ მიშინუ, ნამდა ღორონთის ხვალე ართნერ სხეულ ვა გურჩქინუ. მაგალთო, არსებენს შხვადოშხვანერ ხორციელ სხეულ, მუნერით რე ორინჯიშ, ფრინველეფიშ დო ჩხომეფიშ. თიქ მიშინუ, ნამდა ცას ჩქი ვორწყეთ განსხვავებას ბჟა დო თუთაშ შქას. პავლექ თქუ: „მურიცხეფ ხოლო შხვადოშხვანერეფ რენა დიდებულებათ“. თე განსხვავებას ჩქინ თოლეფით ვა ვორწყედათინ ხოლო, მეცნიერეფ მირაგადნა, ნამდა არსებენს შხვადოშხვანერ მურიცხეფ, მაგალთო, ჭითა ქვერსემ, ჩე ჭიჭე დო ყვინთელ მურიცხეფ, მუნერით ბჟა რე. პავლექ თინა ხოლო თქუ, ნამდა „რე ზეციურ სხეულ დო რე მიწიერ სხეულ“. მუს  გულისხმენდჷ თინა? დედამიწას ჩქი მიღნა ხორციელ სხეულ, მარა ზეცას სულიერ სხეულ რე, მუნერით ანგელოზეფს უღნა.

10. მუნერ სხეულ აღვენუნა თინეფს, მით ზეცას გეთელებნა?

¹⁰ ქიდეკვირით, მუ თქუ პავლექ უკულ: „თაშ რე ღურელეფიშ გათელება ხოლო. მუდგა ინთხორუნ, ხრწნად რე, დო მუთ გეთელებუ — უხრწნელ“. მიჩქნა, ნამდა, მუჟამსით კოჩ ღურუ, თიშ სხეულ იხრწნებ დო კინ ტვერო გინირთუ (დაბ. 3:19). იმწკუმა, მუჭო რე შეიოლებერ „უხრწნელ“ სხეულქ გეთელას? პავლე ვეჩიებუდ თი პიროვნებაშე, მიდგაქ დედამიწაშ ოცხოვრებელო გეთელ თინეფცალო, მით ელიაქ, ელისექ დო იესოქ გათელეს. პავლე იჩიებუდ თინეფიშ გურშენ, მით სულიერ სხეულით გეთელებდეს (1 კორ. 15:42—44).

11, 12. მუჭო ითირ იესოქ, მუჟამსით გეთელ დო მუ მოხვადუ ცხებულეფწკუმა დაკავშირებით ხოლო?

¹¹ დედამიწას ცხოვრებაშ დროს იესოს ხორციელ სხეულ უღუდ, მარა, მუჟამსით გეთელ, თიქ გინირთჷ „მაცოცხალებერ შურო“ დო ზეცაშა დირთჷ. თეცალო ცხებულ ქრისტიანეფ ხოლო გეთელებდეს ზეცას ცხოვრებაშო. პავლექ ენწყჷ: „მუჭოთ ტვერშე გოჭყაფილიშ ამნახანტ ვორეთ, თიცალო იპჸით ზეციერიშ ამნახანტ“ (1 კორ. 15:45—49).

¹² პავლექ გათელებაშ გურშენ მსჯელობა ბოლოშა ქიმიჸონ. მნიშვნელოვან რე, ყურადღება ქიმვაქცუათ, ნამდა იესო ხორციელ სხეულით ვა გათელებე. პავლექ ხაზ გუსვჷ: „ხორციელ სხეულს ღორონთიშ სამეფო ვა დამკვიდრებე“ ზეცას (1 კორ. 15:50). მოციქულეფ დო შხვა ცხებულეფ ზეცას ვა გეთელებდეს ხორციელ სხეულით, ნამუთ იხრწნებ. მუჟამ გეთელებდეს თინეფ? პავლექ თქუ, ნამდა თე გათელება დიო ხოლო წოხოლე რდუ; თე მოვლენა დოღურუდესინ, ხეთეშე ვა მოხვადუდ. მუჟამსით პავლექ 1 კორინთელეფ ჭარჷ, ნამთინე მოციქულ უკვე ღურელ რდუ, მაგალთო მოციქულ იოანე (საქ. 12:1, 2). შხვა მოციქულეფ დო ცხებულეფ უმოს გვიანო დოღურუდეს (1 კორ. 15:6).

13. მუ იჸუაფუდ იესოშ მოულაშ ნიშან?

¹³ იესო დო პავლე წინასწარმეტყველენდეს მანგარ მნიშვნელოვან დროშ, ქრისტეშ მოულაშ, გურშენ. ქრისტეშ მოულაშ ნიშან იჸუაფუდ ჩხუპეფ, მიწისძვრეფ, ეპიდემიეფ დო შხვა უბედრობეფ, ნამუთ მთელ მსოფლიოს მოხვადუდ. ჩქი ქობძირით, ნამდა თე წინასწარმეტყველება 1914 წანაშე ისრულებ. მარა ხვალე თენა ვარინ, თე ნიშანს ხოლო ართ მნიშვნელოვან ნაწილ უღჷ. იესოქ თქუ, ნამდა სახიოლო ამბეს ღორონთიშ სამეფოშ მართველობაშ გურშენ იქადაგენდეს „მთელ მსოფლიოს, არძა ხალხშა გაცხადებელო“ დო თიმწკუმა ქუდოდირთუდ აღსასრულ (მათ. 24:3, 7—14). პავლექ თქუ, ნამდა უფალიშ მოულაშ პერიოდ „ღურაშ ლურით დორულაფირ“ ცხებულ ქრისტიანეფიშ გათელებაშ დრო ხოლო იჸუაფუდ (1 თეს. 4:14—16; 1 კორ. 15:23).

14. მუ ხვადუ ცხებულ ქრისტიანეფწკუმა დაკავშირებით, მით ქრისტეშ მოულაშ დროს ღურნა?

¹⁴ ცხებულეფ, მით ამდღა ღურნა, ხეთეშე ითელებნა ზეცას ოცხოვრებელო. თენა იძირე პავლეშ სიტყვეფშე, ნამუთ 1 კორინთელეფიშ 15:51, 52-ს რე ჭარილ: „არძა ვა ბღურუთ, მარა არძა დიფთირუთ, უცბას, თოლიშ დოვალაფაშა, უკანასკნელ საყვირიშ ხონარიშ დროს“. პავლეშ თე სიტყვეფ ასე ისრულებ! გათელებაშ დროს ქრისტეშ ჯიმალეფს მანგარ დიდ ხიოლ აღვენუნა. თინეფ „ირიათო უფალწკუმა“ იჸუაფნა (1 თეს. 4:17).

15. მუ საქმე ელნა თინეფს, მით „თოლიშ დოვალაფაშა“ დითირუნა?

¹⁵ ბიბლია მირაგადნა, მუს გაკეთენა ზეცას თინეფ, მით „თოლიშ დოვალაფაშა“ დითირუნა. იესოქ თინეფს უწუ: „გიმარჯგინალს დო ჩქიმ შარეფით გილმაულარს ქიმეფჩანქ თიცალ ძალაუფლებას ხალხეფშე, მუნერით მა მიბღჷ მუაჩქიმშე;  დოჭყიშანს თინა ხალხის რკინაშ კვერთხით დო თინეფ თიხაშ ჭურჭელცალო აკოტირხუნა“ (გამოცხ. 2:26, 27). ცხებულეფ მიაჸუნუნა მუნეფიშ მეთაურს იესოს დო რკინაშ კვერთხით დოჭყიშანა არძა ხალხის (გამოცხ. 19:11—15).

16. მუჭო გიორჯგინანს ბრელ ადამიან ღურას?

¹⁶ ცხებულეფ გიორჯგინანა ღურას (1 კორ. 15:54—57). თე გათელება თინეფს საშვალებას არზენს, მონაწილება მიღან არმაგედონიშ ომიშ დროს არძანერ უბადობაშა გერჯგინას. მილიონობით ქრისტიან ქომოლკათა დო ოსურკათა „დიდ გასაჭირს“ გეგნიღანს დო ახალ ქვეყნიერებაშა გინილენს (გამოცხ. 7:14). დედამიწას გინოსქილადირეფ მუნეფიშ თოლით ქოძირნა, ხოლო ართ გერჯგინას ღურაშა — მილიარდობით ადამიანიშ გათელებას, მიდგაქ თეიშახ ღურეს. წერმიდგინით, მუ ხიოლ მაღვენუნა, მუჟამსით თე სარკო მოვლენა ქუმოხვადუ! (საქ. 24:15). თინეფ ხოლო, მიდგაქ ბოლოშახ ქუდოსქიდეს იეჰოვაშ ართგურეფქ, გიორჯგინანა მემკვიდრეობათ მეღებულ ღურას დო შეიალებენა იცხოვრან მარადიულო.

17. მუჭოთ პირველ კორინთელეფიშ 15:58-შე იძირე, მუ ოკო ვაკეთათ ამდღა?

¹⁷ ამდღა არძა ქრისტიან მარდულ ოკო რდას თი გურიშ ემაკინალ სიტყვეფშენ, ნამუთ პავლექ კორინთელეფს გათელებაშ გურშენ მეჭარ. ჩქი ირნერ მიზეზ მიღნა, მიბღათ პავლეშ რჩევა დო მუთ შემლებნან, ირფელ გუვაკეთათ „უფალშო“ (წეკითხით 1 კორინთელეფიშ 15:58). თე საქმეს ართგურო დო აქტიურო ქუვორეთ ჩართულ-და, თინეფ შქას იპჸით, მით დიდ ხიოლს გეგმოცადუნს მომავალს. თე მომავალ ბრელით უმოს სარკო იჸუაფ, ვინემ შემლებნა წერმიბდგინათ. თენა დუმარწმუნენა, ნამდა უფალწკუმა ართო ტყურათ ვამხანდებნა.