1-2. Mang fan nib t’uf ni nge fil urngin e Kristiano murung’agen e fos ko yam’ nra tay e piin yad ra yan nga tharmiy?

YOOREN e girdi’ ni yad be pigpig ngak Jehovah e chiney e yad be athapeg e yafos ni manemus u fayleng. Machane, tin ka bay ko pi Kristiano ni kan dugliyrad e yad be athapeg e yan nga tharmiy. Pi cha’ney ni kan dugliyrad e ri yad baadag ni ngar nanged rogon e par rorad boch nga m’on. Machane, uw rogon e piin yad be athapeg e par u fayleng? Gad ra fil ni piin yira fasegrad ko yam’ ma ranod nga tharmiy e ku bay e tow’ath ni yad ra yibnag ngak e piin yad be athapeg e yafos ni manemus u fayleng. Ere demtrug ko gad be athapeg e yan nga tharmiy ara par u fayleng, ma gad gubin nib t’uf ni ngad nanged murung’agen e fos ko yam’ nra tay e piin yad ra yan nga tharmiy.

² I thagthagnag Got nga laniyan’ boch i gachalpen Jesus ko bin som’on e chibog ni ngar yoloyed murung’agen e athap ko piin yad ra yan tharmiy. I weliy apostal John ni gaar: “Chiney e gadad pi fak Got, machane dawori tamilangan’dad u rogodad ni bay darod da pired. Machane baaray e tin ni gadad manang: nap’an nra yib i m’ug Kristus ma gadad ra bod ir.” (1 John 3:2) Ere pi Kristiano ni kan dugliyrad e dar nanged ko uw rogon e par rorad u tharmiy ko ngiyal’ ni yira fasegrad nga reb e dowef ni gathi downgin e girdi’ ko ngiyal’ ni yad ra yan nga tharmiy. Machane, nap’an ni yad ra yan nga tharmiy ma yad ra guy Jehovah. Der tamilangnag e Bible urngin ban’en u murung’agen e fos ko yam’ nra tay e piin yad ra yan nga tharmiy, machane bay boch ban’en riy ni weliy apostal Paul murung’agen. Piin kan dugliyrad e yad ra moy rok Kristus ko ngiyal’ nra “gel ngak urngin e pi kan ni be gagiyeg, nge piin ni yad be tay murung’agen ban’en, nge piin ni yad be yog e thin.” Re n’ey e ba muun ngay e “bin th’abi tomur e toogor” ni aram e yam’. Tomur riy, ma Jesus nge piin yad ra un ngak ko gagiyeg e yad ra ted yad nga tan pa’ Jehovah nib muun ngay urngin e tin ka bay ban’en.  (1 Kor. 15:24-28) Rib manigil e re ngiyal’ i n’em! *

3. Bochan nib mich e fos ko yam’ u wan’ Paul, ma mang e ayuweg ni nge rin’ nrogon ni bay ko 1 Korinth 15:30-32?

³ Bochan nib mich e fos ko yam’ u wan’ Paul, ma aram e n’en ni ayuweg ni nge athamgil u fithik’ boor mit e skeng ni i yib ngak. (Mu beeg e 1 Korinth 15:30-32.) I gaar ngak piyu Korinth: “Gubin e rran ni gu be yan u thatharen e riya’!” Ki yoloy Paul ni gaar: “Kug chamgad e ‘gamanman ni maloboch’ u roy u Efesus.” Sana rayog ni be weliy Paul murung’agen ni kar chamgad boch e gamanman u lan reb e tafen e gosgos u Efesus. (2 Kor. 1:8; 4:10; 11:23) Fa reb e rayog ni be weliy murung’agen e togopuluw ni i tay e pi Jew nge yugu boch e girdi’ ngak ni yad bod e “gamanman ni maloboch.” (Acts 19:26-34; 1 Kor. 16:9) Demtrug rogon, ma boor ban’en ni i mada’nag Paul nib gel e riya’ riy. Machane i ulul ni nge lemnag e pi n’en ni bay nga m’on u fithik’ e felfelan’.​—2 Kor. 4:16-18.

4. Uw rogon ni athap ko fos ko yam’ ni bay ko pi Kristiano e ngiyal’ ney e be pi’ gelngirad? (Mu guy e sasing ni bay u wuru’ e re ke babyor ney.)

⁴ Gad be par u ba ngiyal’ nib gel e riya’ riy. Bay boch i walagdad ni kar gafgowgad ni bochan boch e kireb ni be rin’ e girdi’ ngorad nib togopuluw ko motochiyel ko am. Boch i yad e be par u boch e nam ni yibe mahl riy ma dakir yag ni ngar pared nib pagan’rad. Ku bay boch e walag ni yad ma par u boch e nam ni bay boch ban’en u rogon fare maruwel ni machib ndabiyog ni ngan rin’ riy ara kan taleg e machib riy ni yad be pigpig ngak Jehovah ni yugu aram rogon nrayog ni ngan kalbusnagrad ara ni thang e fan rorad. Yugu aram rogon, ma ka be ulul e pi walag ney ni ngar liyorgad ngak Jehovah, ma yad be dag e kanawo’ nib manigil nrayog ni ngad folwokgad riy. Darur rusgad ni bochan e yad manang ni mus ni faan yira thang e fan rorad e chiney, ma bay ban’en ni kab gel boch e fel’ riy ni ke micheg Jehovah nra pi’ ngorad boch nga m’on.

5. Mang reb e lem nde fel’ nrayog ni nge warnag rogon e michan’ rodad ko fos ko yam’?

⁵ Bay reb e lem nde fel’ ni ma tay boch e girdi’ ni yog Paul ngak pi walagen ni ngar siyeged. Re lem nem e: “[Faanra dab ni faseg e yam’ me ere] mmarod nguud abichgad ma gadad be garbod, ya bayi gabul ma kad m’ad.” Bin riyul’ riy e, immoy boch e girdi’ u m’on ko ngiyal’ ni immoy Paul riy ni aray rogon e lem rorad. Ere sana rayog ni be sul u daken fapi thin ni bay ko Isaiah 22:13 ni be weliy rogon e lem rok piyu Israel ni yad baadag ni ngar rin’ed boch ban’en ni ngar felfelan’gad ngay ko bin ngar guyed rogon ni ngari t’uf Got rorad. Ere rogon e lem ni i tay e pi girdi’ nu Israel nem e aram e ngan felfelan’ nga rogon e par e chiney ya demtrug e ngiyal’ nrayog ni ngad m’ad. Mus ko ngiyal’ ney nib ga’ ni ma lem e girdi’ ni aray rogon. Machane, kan yoloy nga Bible murung’agen wenegan ni yib ngak piyu Israel ni bochan e biney e lem nde puluw ni ur ted.​—2 Kron. 36:15-20.

6. Mang e susun ni nge rin’ e michan’ rodad ko fos ko yam’ nga rogon e piin gad ma mel’eg ni ngar manged fager rodad?

⁶ Gad manang nra faseg Jehovah e piin kar m’ad, ere susun ni nge gagiyegnag e re n’ey rogon e piin gad ma mel’eg ni ngar manged fager rodad. Ba t’uf ni nge guy e pi walag nu Korinth rogon ndab ur chaggad ngak e piin nde mich e fos ko yam’ u wan’rad. Bay ban’en nrayog ni ngad filed ko re n’ey: Rayog ni nge yib wenegan ngodad ni faanra ud chaggad ko girdi’ nde ga’ fan u wan’rad e n’en nra buch nga m’on ma kemus ni yad baadag ni ngar rin’ed boch ban’en ni ngar felfelan’gad ngay. Faanra i chag reb e tin riyul’ e Kristiano ko girdi’ ni aray rogon, ma rayog ni nge kireb rogon e lem ni be tay nge pi n’en ma rin’. Bin riyul’ riy e, ku rayog ni nge  k’aring e re n’ey ni nge rin’ boch ban’en nib fanenikan Got ni aram e denen. Aram fan ni tay Paul ir ngak e pi walag ni gaar: “Mu sulweged lanin’med mi gimed tal ndab kum denengad.”​—1 Kor. 15:33, 34.

7. Mang reb e deer nsana rayog ni i fith boch e girdi’ nrogon ni bay ko 1 Korinth 15:35-38?

⁷ Mu beeg e 1 Korinth 15:35-38. Be’ ni baadag ni nge k’aring yugu boch e girdi’ ni nge maruwar e fos ko yam’ u wan’rad e rayog ni nge gaar: “Ra diin mi ni faseg e yam’?” Ba fel’ ni ngad lemnaged e fulweg ni pi’ Paul ko re deer ney ni bochan e boor e girdi’ e ngiyal’ ney nib thil rogon e michan’ rorad u murung’agen e n’en ma buch ko girdi’ u tomuren ni kar m’ad. Machane, mang e be fil e Bible ngodad?

8. Mang fanathin e rayog ni nge ayuwegdad ni ngad nanged rogon e fos ko yam’ nra tay e piin nga ranod nga tharmiy?

⁸ Nap’an nra yim’ be’, ma aram e ra wod downgin. Machane, En ni sunmiy e palpalth’ib ko dariy e rayog rok ni nge faseg faanem ko yam’ me pi’ reb e dowef nib m’ag ngak. (Gen. 1:1; 2:7) Bay ba fanathin ni yog Paul ni nge dag nde t’uf ni nge faseg Got facha’ me pi’ fare dowef ngak ni immoy rok u m’on ni nge yim’. Am lemnag “awochngin” ba mit e woldug. Yira yung reb e awoch nga fithik’ e but’, ma aram e ra tugul me ilal ni ke mang ba woldug. Fare woldug ni ke ilal e ba thil yaan ko fachi awoch nni yung ko som’on. I fanay Paul e re fanathin ney ni nge tamilangnag ni En Ke Sunmiydad e rayog ni nge pi’ ngak facha’ “e re dowef nib m’agan’ ngay.”

9. Mang e be yog e 1 Korinth 15:39-41 u murung’agen boch e dowef nib thilthil rogon?

⁹ Mu beeg e 1 Korinth 15:39-41. I yog Paul ni gathi gubin ban’en ni sunmiy Got ni taareb rogon. Bod nib thil e dowef ni kan pi’ ko garbaw, nge arche’, nge nig. Ki yog nnap’an ni gad ra sap nga lan e lang, ma gad ra guy ni yal’ nge pul ni bay riy e ku de taareb rogon. Ki yog ni “ku er rogon e t’uf nra reb ma ba thil e birok e gamog.” Riyul’ e re n’ey ni mus ni faanra dabiyog ni ngad guyed e n’en nib thil u thilin reb e  t’uf nge reb. Ke yog e piin llowan’ ni boor mit e t’uf, ya bay boch nib ga’, ma boch e ba achig, ma boch e ba rowrow, ma boch e ba wechwech, ma boch e ba maguchol ni bod e yal’. Ki yog Paul ni “bay e tin nu tharmiy e dowef ma bay e tin nu fayleng e dowef.” Ni uw rogon? Tin nu fayleng e dowef e aram downgin e girdi’, ma tin nu tharmiy e dowef e dabiyog ni ngan guy nga owchey ni bod rogon e dowef ni bay ko pi engel.

10. Uw rogon e dowef ni yira pi’ ngak e piin yira fasegrad ko yam’ ma ranod nga tharmiy?

¹⁰ Mu tay fanam i yan ko n’en ni migid ni yog Paul ni gaar: “Ereray rogon e n’en ni bayi rin’ e yam’ ni ka ni fasegrad. Faani bay ni k’eyag e dowef ma ba dowef ni ra kireb; ma faan nni faseg ko yam’ ma dab ki yim’ biid.” Machane, gad manang nnap’an nra yim’ be’ me wod downgin nge sul ko but’. (Gen. 3:19) Ere uw rogon nrayog ni ngan “faseg [be’] ko yam’ ma dab ki yim’ biid”? Der weliy Paul murung’agen be’ ni kan faseg u roy u fayleng, ni bod rogon e piin ni fasegrad Elijah, nge Elisha, nge Jesus. Ya be weliy Paul murung’agen be’ ni yira faseg min pi’ reb e dowef ngak “nib thil nga downgin e girdi’.”​—1 Kor. 15:42-44.

11-12. Mang ban’en nib thil ni buch rok Jesus u nap’an nni faseg ko yam’, ma uw rogon ni ku taareb rogon e n’en nra buch rok e piin kan dugliyrad?

¹¹ Nap’an ni immoy Jesus u fayleng, ma dowef ni immoy rok e taareb rogon nga downgin e girdi’. Machane nap’an nni faseg ko yam’ me mang “fare Kan ni ma pi’ e yafos,” ma aram me sul nga tharmiy. Ere ku arrogon e pi Kristiano ni kan dugliyrad ni yad ra fos ko yam’ min pi’ reb e dowef ngorad nrayog ni nge un ko par u tharmiy. I weliy Paul ni gaar: “Rogodad ni gadad bod yaan faanem nni ngongliy ko but’, e aram rogon ni bay da boded yaan Faanem ni ir e yib u tharmiy.”​—1 Kor. 15:45-49.

¹² Ba ga’ fan ndab da paged talin nnap’an nni faseg Jesus ko yam’ ma dan pi’ downgin e girdi’ ngak. Nap’an ni ke chugur ni nge museg Paul e n’en be weliy, me tamilangnag fan e re n’ey ni aram e gaar: “N’en nni ngongliy ko ufin nge racha’ e dabiyog ni nge yan nga lan suwon  Got.” (1 Kor. 15:50) Pi apostal nge piin kan dugliyrad e nap’an yira fasegrad ko yam’ nga ranod nga tharmiy, ma dabin pi’ e dowef ko girdi’ ngorad ni bay e ufin nge racha’ riy ma rayog ni nge wod. Ere mingiyal’ e yira fasegrad ko yam’? I tamilangnag Paul nre ngiyal’ i n’em e ka bay boch nga m’on, ma gathi yugu ra buch e re n’em u tomuren ni kar m’ad e ngiyal’ nem. Nap’an ni yoloy Paul e 1 Korinth, ma bay boch i gachalpen Jesus ni “ke yim’” ni bod rogon apostal James. (Acts 12:1, 2) Ku bay boch e apostal nge piin kan dugliyrad ni yad ra “yim’” boch nga tomuren.​—1 Kor. 15:6.

13. Mang e ra buch ko ngiyal’ ni bay Jesus riy?

¹³ I yiiynag Jesus nge Paul murung’agen ba ngiyal’ nib ga’ fan u chepin e girdi’. Re ngiyal’ i n’em e aram e ngiyal’ ni bay Kristus riy. Nap’an e ngiyal’ ni bay Kristus riy ma ra un mahl, ma be yib e durru’, nge m’ar, maku be buch boch ban’en nib kireb u ga’ngin yang e fayleng. Kad guyed e re yiiy nu Bible ney ni ke lebug ni ka nap’an e duw ni 1914. Machane, ka bay bang nib ga’ fan ko re pow ney nra lebug. I yog Jesus ni fare thin nib fel’ ni murung’agen Gil’ilungun Got ni be gagiyeg e chiney e yira “machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matt. 24:3, 7-14) I tamilangnag Paul ni “chirofen nra sul [“ngiyal’ ni bay,” NW] Somol riy” e aram e ngiyal’ ni yira faseg e pi Kristiano ni kan dugliyrad ni kar ‘m’ad’ ni ngar uned ko par u tharmiy.​—1 Thess. 4:14-16; 1 Kor. 15:23.

14. Mang e ra buch ko pi Kristiano ni kan dugliyrad ni yad be yim’ ko ngiyal’ ni bay Kristus riy?

¹⁴ Piin kan dugliyrad ni yad be yim’ e chiney e nap’an ni yug ra yim’ bagayad, ma ka chingiyal’ nem me fos nge yan nga tharmiy. I micheg Paul e re n’ey u daken fapi thin ni yog ni bay ko 1 Korinth 15:51, 52 ni be gaar: “Gathi gadad gubin ni bay da m’ad, machane lan ba talab e bay  nthiliyeg dowdad riy, ni bod machregin lan mit be’ ni talab, ko ngiyal’ ni bay non e bin tomur e rappa riy.” Pi thin ney ni yog Paul e be lebug e chiney! Nap’an yira faseg e pi cha’ney ni walagen Kristus, ma rib gel e felfelan’ ni yad ra tay, ya ‘gubin ngiyal’ ni bay ur pired rok Somol.’​—1 Thess. 4:17.

15. Mang maruwel e bay nra rin’ e piin yira thilyeg downgirad u “lan ba talab”?

¹⁵ Be yog e Bible ngodad rogon e re miti maruwel ni bay u tharmiy nra rin’ e piin yira thilyeg downgirad u “lan ba talab.” I gaar Jesus ngorad: “Piin ni yad ra gel ndar paged yad ko kireb, ni piin ni yad be ngongliy e tin nib m’agan’ug ngay nge yan i mada’ ko tomur e gu ra pi’ mat’awrad ni taareb rogon nga mat’awug ni yog ngog rok e Chitamag: Bay gu pi’ mat’awrad ni ngar gagiyegniged e pi nam nga ba ley i wasey ngar t’et’ared girdien e pi nam ngay ni nochiyang ni bod bogi th’ib ni but’.” (Rev. 2:26, 27) Ere yad ra lek Jesus mu ur gafaliyed e pi nam nga ba ley i wasey.​—Rev. 19:11-15.

16. Uw rogon nra gel boor e girdi’ ko yam’ boch nga m’on?

¹⁶ Ba tamilang ni piin kan dugliyrad e yad ra gel ko yam’. (1 Kor. 15:54-57) Fos ko yam’ ni yad ra tay e aram e n’en nra bing e kanawo’ ngorad ni ngar uned i chuweg e kireb u fayleng u nap’an e Armageddon. Ma yugu boch e Kristiano ni pumoon nge ppin ni bokum milyon urngirad e yad ra thap nga barba’ “fare gafgow ni ba ga’” ma ranod nga lan e bin nib beech e fayleng. (Rev. 7:14) Pi girdi’ nem ni yad ra magey ni yad ba fos mar pared u fayleng e ku yad ra guy reb e kanawo’ ni yira gel riy ko yam’ u nap’an yira faseg bokum bilyon e girdi’ ni kar m’ad kafram. Am lemnag gelngin e felfelan’ ni gad ra tay u nap’an nra buch e re n’ey nrib manigil! (Acts 24:15) Ma urngin e piin yad ra par ni yad ba yul’yul’ ngak Jehovah e ku yad ra gel ko yam’ ni ke af rok Adam ngorad. Ma aram e rayog ni ngar pared ni manemus.

17. Mang e be pi’ e 1 Korinth 15:58 e athamgil ngodad ni ngad rin’ed e chiney?

¹⁷ Gubin e Kristiano ni ka yad ba fos e chiney e susun e ngar pininged e magar ni bochan e pi thin ney nrayog ni nge fal’eg lanin’uy ni yoloy Paul ngak e pi Kristiano nu Korinth ni be weliy murung’agen e fos ko yam’. Bay fan nib fel’ ni ngad folgad ko fonow ni pi’ Paul ni aram e ngad rin’ed urngin e tin rayog rodad e chiney ni fan ko ‘maruwel rodad ni fan ngak Somol.’ (Mu beeg e 1 Korinth 15:58.) Faan gad ra un ko re maruwel ney u fithik’ e yul’yul’ nge pasig, ma aram e rayog ni ngad athapeged reb e par boch nga m’on nib gel e felfelan’ ni gad ra tay riy. Binem e par e kab gel e fel’ riy ko n’en nrayog ni nge taw e lem rodad ngay. Ra micheg ni maruwel rodad ni kad rin’ed ni fan ngak Somol e de yan i aw nib m’ay fan.