1, 2. ¿Xiñee nabé galán gánnanu jma de ora guiasa binni de lade gueʼtuʼ para cheʼ guibáʼ?

LAANU, ca xpinni Jehová, racaláʼdxinu gánnanu jma de ora guiasa binni de lade gueʼtuʼ para cheʼ guibáʼ. Nanna dxíchinu laaca racalaʼdxiʼ ca ungidu ni nabani lu Guidxilayú riʼ gánnacaʼ jma de tema riʼ purtiʼ nápacaʼ esperanza checaʼ guibáʼ. Ne ca ni nápanu esperanza de guibáninu lu Guidxilayú riʼ —stale de ca xpinni Jehová— laaca racaláʼdxinu gánnanu jma de tema riʼ, purtiʼ pur laani zacaanu stale ndaayaʼ.

² Gucané Dios caadxi xpinni Cristu de primé siglu para gucaacaʼ jma de esperanza ni napa ca ni cheʼ guibáʼ. Apóstol Juan bicaa: «Maʼ xiiñiʼ Dios laanu, peru caʼruʼ diʼ guihuinni ximodo chigácanu. Nánnanu zácanu casi laabe» (1 Juan 3:2). Nga runi, qué ganna ca ungidu ximodo nga guibánicaʼ guibáʼ ne gápacaʼ ti cuerpu de espíritu. Ni nánnacabe nga ora chécabe guibáʼ zuuyacabe Jehová. Qué rusiene Biblia xi guiráʼ zazaacaʼ ora cheʼ ca ungidu guibáʼ, peru rusiéneni caadxi de laani. Guzéʼtenu ti ejemplu, apóstol Pablo guníʼ maʼ nuu ca ungidu ra nuu Jesús ora gunduuxebe «guiráʼ gobiernu ne guiráʼ autoridad ne poder», ne laaca zunitilube  guendaguti, «últimu enemigu». Últimu la? Jesús ne guiráʼ ni guni mandarné laa zuzuubacaʼ stiidxaʼ Dios, ne maʼ Jehová guni mandar guiráʼ xixé ni nuu (1 Cor. 15:24-28). ¡Guizáʼ galán dxi gaca ni bizéʼtenu riʼ! *

3. Casi ná 1 Corintios 15:30-32, ¿xi gunda biʼniʼ Pablo pur biʼniʼ cré zabani binni de lade gueʼtuʼ?

³ Cumu biʼniʼ cré Pablo zabani binni de lade gueʼtuʼ biʼniʼ huantar stale prueba (biindaʼ 1 Corintios 15:30-32). Gúdxibe ca hermanu de Corinto: «Guiráʼ dxi ridxaagaluáʼ guendaguti». Ne laaca guniʼbe: «Maʼ gudindeniaʼ maniʼ duxhuʼ ndaaniʼ guidxi Éfeso». Zándaca caniʼbe bidxelasaabe caadxi maniʼ duxhuʼ lu circo nuu ndaaniʼ guidxi que (2 Cor. 1:8; 4:10; 11:23). O zándaca caniʼbe dxi guzananda ca judíu ne xcaadxi enemigu laabe ca ni beeda gaca casi «maniʼ duxhuʼ» (Hech. 19:26-34; 1 Cor. 16:9). Modo tiica si gúcani, bidxiilú Pablo ca guendanagana que sin niree gana (2 Cor. 4:16-18).

4. Esperanza ni nápanu ziasa guiráʼ ca ni maʼ guti, ¿ximodo racaneni stale xpinni Cristu? (Biiyaʼ foto ni zeeda lu portada).

⁴ Laanu laaca nabáninu ti tiempu ra nuu cosa malu. Caadxi hermanu stinu huayuniná binni malu laacaʼ. Laaca nuu tu laa nabeza lugar ra cadi seguru pur ca guerra. Ne nuu guidxi qué rudii lugar guni predicar ca hermanu, peru runi ca hermanu riʼ stipa gúnicaʼ ni ná Jehová neca riuu xquendanabánicaʼ ra naxoo. Neca zacá, cayuni adorárcabe Jehová ne nácacabe ti ejemplu para laanu. Qué ridxíbicabe purtiʼ nánnacabe, neca gáticabe, zusibani Jehová laacabe lu ca dxi ni zeeda ca.

5. ¿Ximodo cadi naquiiñeʼ guiníʼ ique ca xpinni Cristu?

⁵ Pablo gudxi ca hermanu stiʼ gápacaʼ cuidadu purtiʼ nuu de laacaʼ sicaríʼ caníʼ íquecaʼ: «Pa qué zabani ca gueʼtuʼ, “guidoʼno ne guideʼnu purtiʼ guixíʼ zátinu”». Maca zacá riníʼ ique stale binni dxiqué. Ne zándaca caníʼ Pablo ca diidxaʼ ni zeeda lu Isaías 22:13, ra riete bibani ca israelita que para gúnicaʼ ni riuuláʼdxicaʼ, lugar de guidxíñacaʼ Dios. Casi ca binni de tiempu riʼ, sicaríʼ guníʼ ca israelita dxiqué: «Guiéchenu, purtiʼ cadi xadxí nabáninu». Peru maʼ nánnanu ximodo biluxe guidxi Israel (2 Crón. 36:15-20).

6. Esperanza ni nápanu ziasa guiráʼ ca ni maʼ guti, ¿ximodo zanda gacaneni laanu para cuinu tu gaca xhamígunu?

⁶ Nánnanu zusibani Jehová ca ni maʼ guti, nga runi naquiiñeʼ cuinu tu gaca xhamígunu. Ca xpinni Cristu de Corinto naquiiñeʼ guixélecaʼ de ca binni ni qué runi cré ziasa ca ni maʼ guti. ¿Xi rusiidiʼ ndiʼ laanu yaʼ? Ni rusiidiʼ ni laanu nga qué zabeendunu ni galán pa guidxaaganu binni ni riníʼ ique guni ni gapa gana purtiʼ cadi xadxí zabani. Pa guidxaaganu laacabe chaahuidugá zuxélecabe laanu de Jehová ne zunítinu ca costumbre galán ni nápanu. Dede zanda gucaacabe laanu gúninu cosa ni nanalaʼdxiʼ Dios. Nga runi bidii Pablo conseju riʼ: «Lacuu xpiaanitu ne maʼ cadi gucheetu» (1 Cor. 15:33, 34).

7. Casi ná 1 Corintios 15:35-38, ¿xi zanda guinabadiidxaʼ ca binni ni qué runi cré ziasa ca ni maʼ guti?

⁷ (Biindaʼ 1 Corintios 15:35-38). Ti binni ni racalaʼdxiʼ gucaa xcaadxi cadi guni cré ziasa ca ni maʼ guti zanda guinabadiidxaʼ: «¿Ximodo guibani ca ni maʼ guti yaʼ? Ne ¿xi clase cuerpu guiasanécabe yaʼ?». Galán nga guidúʼyanu ximodo bicabi Pablo pregunta riʼ, purtiʼ gadxé gadxé ni runi cré binni rizaaca ca ni maʼ guti. Peru ¿xi rusiidiʼ Biblia yaʼ?

8. ¿Xi ejemplu racané laanu gánnanu ximodo zaca ca binni ni guiasa de lade gueʼtuʼ para cheʼ guibáʼ?

⁸ Ora rati tuuxa la? riuʼdxuʼ cuerpu stiʼ. Peru Jehová, ni bizáʼ universu, zanda gusibani binni ca ne gudiibe laa cuerpu ni caquiiñeʼ (Gén. 1:1; 2:7). Biquiiñeʼ Pablo ti ejemplu para gusiene ora rusibani Dios binni de lade gueʼtuʼ qué rudiibe laacaʼ ngueca cuerpu, sínuque zanda gudiibe cada tobi de laacaʼ ti cuerpu ni racaláʼdxibe. Guníʼ Pablo de «ti biidxiʼ» ni rudxiibaʼ tuuxa ne ra tidiʼ tiempu rácani ti yagahuiiniʼ. Ne maʼ gadxé yagahuiiniʼ riʼ de biidxiʼ ni bidxiibacabe que.

9. ¿Xi riníʼ 1 Corintios 15:39-41 de ca tipu cuerpu ni nuu?

⁹ (Biindaʼ 1 Corintios 15:39-41). Guníʼ Pablo xi guiráʼ cosa bizáʼ Dios. Guniʼbe bizáʼ Dios cuerpu stiʼ ca yuze, ca maniʼ ripapa ne ca benda. Laaca guniʼbe gadxé nga Gubidxa de Beeu, ne «gadxé gadxé biaaniʼ stiʼ cada beleguí». Neca cadi casi ziuunu ridúʼyanu cani, nuu beleguí ni runibiáʼ ca científicu casi estrellas rojas gigantes, enanas blancas ne estrellas amarillas, casi Gubidxa. Laaca guníʼ Pablo «nuu cosa guibáʼ ne nuu cosa lu guidxilayú». ¿Xi riníʼ ca diidxaʼ riʼ yaʼ? Riniʼni binni ni nabeza  lu Guidxilayú riʼ nápacaʼ ti cuerpu de beela, peru ca ni nuu guibáʼ nápacaʼ ti cuerpu de espíritu, casi ca ángel.

10. ¿Xi tipu cuerpu zapa ca binni ni guibani guibáʼ?

¹⁰ Despué guníʼ Pablo ca diidxaʼ riʼ: «Zacaca nga ora guibani ca gueʼtuʼ. Rigaachiʼ cuerpu ni rinitilú, ne riasa cuerpu ni qué rinitilú». Dxandíʼ nga ora rati binni riuʼdxuʼ cuerpu stiʼ ne rácani yu (Gén. 3:19). Yanna, ¿ximodo guiasa ti «cuerpu ni qué rinitilú» de lade gueʼtuʼ yaʼ? Cadi caníʼ diʼ Pablo de ti binni ni guiasa de lade gueʼtuʼ para guibani lu Guidxilayú riʼ, casi ca binni ni gundisaʼ Elías, Eliseo ne Jesús de lade gueʼtuʼ. Raríʼ caniʼbe de ca binni ni guiasa né «ti cuerpu de espíritu» para guibani guibáʼ (1 Cor. 15:42-44).

11, 12. ¿Xi cuerpu gucuaa Jesús despué de biasa de lade gueʼtuʼ, ne xi zazaaca né ca ungidu?

¹¹ Dxi guyuu Jesús lu Guidxilayú gupa ti cuerpu de beela. Peru ora biásabe de lade gueʼtuʼ, gucuaabe ti cuerpu de «espíritu ni rudii guendanabani» ne guyebe guibáʼ. Ngaca zazaaca ca ungidu, ziásacaʼ de lade gueʼtuʼ casi espíritu. Pablo guníʼ: «Nácanu casi hombre ni bizáʼ Dios de yu que, ne laaca zácanu casi hombre ni beeda de guibáʼ que» (1 Cor. 15:45-49).

¹² Nabé risaca guietenaláʼdxinu qué ñasa Jesús né ti cuerpu ni napa binni guidxilayú. Ora cusiene Pablo jma de tema riʼ, bisiene xiñee, sicaríʼ guniʼbe: «Qué zanda chuʼ beela ne rini lu Reinu stiʼ Dios» ni nuu guibáʼ (1 Cor. 15:50). Qué zié ca apóstol ne xcaadxi ungidu guibáʼ né ti cuerpu de beela ne rini ni rinitilú. Yanna, ¿padxí guiásacabe de lade gueʼtuʼ yaʼ? Guníʼ Pablo ziásacabe de lade gueʼtuʼ lu ca dxi ni zeeda ca, ne cadi casi gáticabe. Dxi bicaa Pablo 1 Corintios, «maʼ guti chupa  chonna de» ca discípulo —casi apóstol Santiago—, ne despué guti xcaadxi apóstol ne ca ungidu (1 Cor. 15:6; Hech. 12:1, 2).

13. ¿Xi zazaaca «lu presencia stiʼ» Jesús?

¹³ Guníʼ Jesús ne Pablo de presencia stiʼ Cristu, ti tiempu ra ziuu stale guerra, xu roʼ, guiráʼ clase guendahuará ti lugar ne sti lugar ne xcaadxi cosa malu. Cayaca cumplir profecía riʼ dede lu iza 1914, peru nápani sti cosa nabé galán. Jesús guníʼ «zaca predicar ca noticia galán stiʼ Reinu lu guidubi guidxilayú para gunadiaga guiráʼ xixé guidxi ni» (Mat. 24:3, 7-14). Pablo guníʼ «lu presencia stiʼ Señor» ziasa ca ungidu «ni maʼ guti» para checaʼ guibáʼ (1 Tes. 4:14-16; 1 Cor. 15:23).

14. ¿Xi rizaaca ca ungidu ni gatiʼ lu presencia stiʼ Cristu?

¹⁴ Tiempu riʼ ca ungidu ni gatiʼ maca zecaʼ guibáʼ. ¿Xiñee nánnanu ni yaʼ? Pur ca diidxaʼ bicaa Pablo lu 1 Corintios 15:51, 52, sicaríʼ nani: «Cadi guiranu zásinu lu guendaguti, peru guiranu zuchaa Dios laanu ti ratuhuiiniʼ si, biaʼ riguiñe laga si binni, ora maʼ xhidxi últimu trompeta». Cayaca cumplir ca diidxaʼ riʼ tiempu riʼ. Ora guiasa ca xpinni Cristu riʼ zabánicaʼ jma nayecheʼ purtiʼ «qué ziuuruʼ dxi» guixélecaʼ «de Señor» (1 Tes. 4:17).

15. ¿Xi chiguni ca ungidu guibáʼ?

¹⁵ Biblia cusiene xi chiguni ca ungidu guibáʼ, ca ni zadxaa «biaʼ riguiñe laga si binni». Sicaríʼ guníʼ Jesús: «Binni guni ganar ne guiaana lu ca neza stinneʼ dede dxi gueeda fin la? zudieeʼ  laa autoridad luguiáʼ guiráʼ guidxi, cásica maʼ bidii Bixhozeʼ autoridad naa. Ne laa zuni mandar binni né vara de guiibaʼ, ne óraque zacadé ca binni que casi guisu de yu» (Apoc. 2:26, 27). Zinanda ca ungidu xaíque sticaʼ ne zuni mandarcaʼ guiráʼ guidxi «né vara de guiibaʼ» (Apoc. 19:11-15).

16. ¿Ximodo zuni ganar millón de binni guendaguti?

¹⁶ Zuni ganar ca ungidu guendaguti (1 Cor. 15:54-57). Ora maʼ guiásacabe de lade gueʼtuʼ zacanécabe guiree cosa malu de lu Guidxilayú riʼ lu Armagedón, ni maʼ nuu gaxha. Millón de xpinni Cristu zalá lu gran tribulación ne ziuucaʼ ndaaniʼ Guidxilayú cubi ca (Apoc. 7:14). Ca hombre ne ca gunaa riʼ zuuyacaʼ ximodo guni ganar Cristu ne ca ungidu guendaguti, ¿ximodo yaʼ? Dxi guiasa millón de binni ni bibani dxiqué de lade gueʼtuʼ. ¡Guizáʼ galán ni chigaca riʼ! (Hech. 24:15). Ne guiráʼ ca ni cadi gucheené Jehová laaca zuni ganarcaʼ guendaguti ni bisaanané Adán binni ne zabánicaʼ para siempre.

17. Casi ná 1 Corintios 15:58, ¿xi naquiiñeʼ gúninu?

¹⁷ Laanu, ca xpinni Cristu ni nabáninu tiempu riʼ, rudiʼnu xquixe peʼ pur ca diidxaʼ galán ni bicaa Pablo ra nuu ca hermanu de Corinto ni caníʼ ziasa ca ni maʼ guti. Nga runi, nápanu stale razón para chinándanu conseju ni bidii Pablo ni ná cadi gusaana de gúninu «xhiiñaʼ Señor» (biindaʼ 1 Corintios 15:58). Pa cadi guchéʼnenu Dios ne gúninu biaʼ gándatiʼ lu dxiiñaʼ riʼ, zabáninu jma nayecheʼ lu ca dxi ni zeeda ca, jma de biaʼ guníʼ íquenu. Ne óraca zudiʼnu cuenta cadi pur gana bíninu xhiiñaʼ Señor.