1, 2. Бу мәгаләдә нә һагда данышаҹағыг?

ИНСАН өмрү ҝөдәк, үстәлик, «әзаб-әзијјәтлә долудур» (Әјј. 14:1). Буна ҝөрә дә тәбиидир ки, бәзән өзүмүзү пәришан һисс едирик. Јеһованын гәдимдә јашамыш хидмәтчиләри дә бәзән бу ҹүр һиссләр кечирирди, һәтта еләләри вар иди ки, өлмәк истәјирди (1 Пад. 19:2—4; Әјј. 3:1—3, 11; 7:15, 16). Амма пәнаһ апардыглары Аллаһ Јеһова һәмишә онлара дајаг олурду. Онларын һадисәси Мүгәддәс Китабда бизә тәсәлли вә нәсиһәт үчүн јазылыб (Ром. 15:4).

² Бу мәгаләдә Јеһованын чәтинликләрә синә ҝәрмиш хидмәтчиләриндән данышаҹағыг: Јагубун оғлу Јусифдән, дул галмыш Наимәдән вә ҝәлини Рутдан, 73-ҹү мәзмуру јазмыш лавилидән вә һәвари Бутрусдан. Јеһова онлара неҹә дајаг олмушду? Онларын һадисәсиндән биз неҹә тәсәлли тапа биләрик? Бу суалларын ҹавабындан ҝөрәҹәјик ки, «Јеһова гәлбисыныглара јахындыр, пәришан инсанлары азад едир» (Зәб. 34:18).

3, 4. Ҝәнҹ јашларында Јусифин башына нәләр ҝәлмишди?

³ Һәзрәти Јусиф 17 јашы оланда ики јуху ҝөрмүшдү. Һәр ики јуху Јеһовадан иди. Бу јухулар ҝөстәрирди ки, Јусиф бир ҝүн аиләдә һөрмәт саһиби олаҹаг (Јар. 37:5—10). Амма јуху ҝөрмәсиндән чох кечмәмиш Јусифин һәјаты көклү сүрәтдә дәјишди. Јусифә һөрмәт ҝөстәрмәләри галсын бир јана, гардашлары ону гул кими сатдылар (Јар. 37:21—28). Беләҹә, атасынын әзиз өвлады олан Јусиф чох кечмәмиш Мисирдә Фитфир адлы бүтпәрәст сарај әјанынын евиндә гул олду (Јар. 39:1).

⁴ Бундан сонра Јусифин башына ҝәлән бәлалар даһа да артды. Фитфирин арвады Јусифи она тәҹавүз етмәкдә шәрләди.  Мәсәләни ајдынлашдырмадан Фитфир Јусифи һәбсә атдырды вә ону зәнҹирләтди (Јар. 39:14—20; Зәб. 105:17, 18). Тәсәввүр етмәк олар, тәҹавүз етмәкдә ҝүнаһландырылан ҝәнҹ Јусиф өзүнү неҹә һисс едирди. Үстәлик, бу иттиһам Јеһованын адына ләкә ҝәтирә биләрди. Шүбһәсиз, бу шејләр Јусифи чох мәјус едирди!

5. Мәјуслуға гапылмамаг үчүн Јусиф нә етди?

⁵ Јусиф һәм гул оланда, һәм дә һәбсә дүшәндә вәзијјәти дәјишмәк онун әлиндә дејилди. Бәс о, никбин әһвали-руһијјәни неҹә горуја билди? О, диггәтини едә билмәјәҹәји шејә ҹәмләмирди. Башыны ашағы салыб, она бујрулан иши ҝөрүрдү. Ән әсасы исә Јеһованы разы салмаг онун үчүн һәјатда һәр шејдән өнәмли иди. Буна ҝөрә дә Јеһова Јусифин атдығы һәр аддымы аванд едирди (Јар. 39:21—23).

6. Чох еһтимал ки, јухулары Јусифә неҹә тәскинлик верирди?

⁶ Чох еһтимал ки, Јусиф бир заманлар ҝөрдүјү јухулар һаггында дүшүнүб тохтаглыг тапырды. Бу јухулар ону ҝөстәрирди ки, о, аиләсинә јенидән говушаҹаг вә вәзијјәт јахшылыға доғру дәјишәҹәк. Белә дә олду. Јусифин тәхминән 37 јашы оланда онун јухулары һејрәтамиз шәкилдә јеринә јетмәјә башлады! (Јар. 37:7, 9, 10; 42:6, 9).

7. 1 Бутрус 5:10 ајәсинә әсасән, үзләшдијимиз сынагларын өһдәсиндән ҝәлмәјә бизә нә көмәк едә биләр?

⁷ Бу һадисәдән нә өјрәнирик? Јусифин башына ҝәләнләр ҝөстәрир ки, биз гәддар, һагсызлыгларла долу дүнјада јашајырыг. Һәтта диндашымыз белә гәлбимизи јаралаја биләр. Амма әҝәр Јеһова бизим гајамыз вә пәнаһымыз олса, мәјуслуға гапылмајаҹағыг вә Јеһоваја хидмәти дајандырмајаҹағыг (Зәб. 62:6, 7; 1 Бутрус 5:10 ајәсини охујун). Унутмајын ки, Јеһова Јусифә хүсуси рәғбәт бәсләјиб, она јухулар ҝөстәрәндә о, ҹәми 17 јашында иди. Бәли,  Јеһова ҝәнҹ хидмәтчиләринә етибар едир. Бу ҝүн дә Јусиф кими, Јеһоваја иманы олан чохлу ҝәнҹләр вар. Онлардан бәзиләри Јеһоваја садиг галдыглары үчүн һагсыз јерә һәбс олунублар (Зәб. 110:3).

8. Наимә илә Рутун башына нәләр ҝәлмишди?

⁸ Јәһудада шиддәтли аҹлыг олдуғундан Наимә аиләси илә бирҝә гүрбәт елә, Муаба көчүр. Орада Наимәнин әри Әлимәлик вәфат едир вә о, ики оғлу илә тәк галыр. Бир мүддәт сонра Наимәнин оғуллары Рут вә Орпа адлы муаби гызларла аилә гурурлар. Тәхминән 10 илдән сонра Наимәнин оғуллары да өлүр. Онун ҝәлинләри Рут вә Орпа дүнјаја өвлад ҝәтирмәмиш дул галыр (Рут 1:1—5). Ҝөрүн бу үч гадын нә гәдәр дәрдли иди! Рутла Орпа јенидән аилә гура биләрди. Бәс јаша долмуш Наимәнин гајғысына ким галаҹагды? Наимә о гәдәр пәришан иди ки, һәтта белә демишди: «Мәнә Наимә демәјин. Мәнә Мара дејин, чүнки Гүдрәт Саһиби һәјатымы аҹы етди». Дәрддән гәдди бүкүлмүш Наимә Бејтләһмә гајыдыр, Рут да онунла ҝедир (Рут 1:7, 18—20).

9. Рут 1:16, 17, 22 ајәләринә әсасән, Рут Наимәјә неҹә дајаг олду?

⁹ Наимәјә бу дәрдә дөзмәјә нә көмәк етди? Мәһәббәт. Мәсәлән, она бу мәһәббәти Рут ҝөстәрди. О, Наимәни тәк гојмады. (Рут 1:16, 17, 22 ајәләрини охујун.) Бејтләһмдә Рут өзүнү вә Наимәни доландырмаг үчүн башаг јығмаға башлады. Беләҹә, бу ҹаван ҝәлин тез биз заманда јахшы ад газанды (Рут 3:11; 4:15).

10. Јеһова Наимә вә Рут кими касыблара мәһәббәтини неҹә ҝөстәрирди?

¹⁰ Јеһованын исраиллиләрә вердији бир ганунда касыблара гаршы неҹә шәфгәтли олдуғу ҝөрүнүр. Јеһова халга бујурмушду ки, мәһсул бичәндә тарланын гыраг-буҹагларыны бичмәсинләр, онлары касыб-кусуб үчүн сахласынлар (Лав. 19:9, 10). Бу ганунун сајәсиндә Наимә илә Рут чөрәк үчүн һеч кимә әл ачмады. Онлар ләјагәтләри алчалмадан өзләрини тәмин едә билдиләр.

11, 12. Наимә илә Рутун хошбәхтлијиндә Буәзин һансы ролу вар иди?

¹¹ Рутун башаг јығдығы тарланын саһиби Буәз адлы варлы бир киши иди. Рутун гајынанасына олан сәдагәти вә мәһәббәти ону һејран гојмушду. Буна ҝөрә дә бу аиләнин мирасына јијәлик етди вә Рутла аилә гурду (Рут 4:9—13). Онларын Абид адлы оғлу дүнјаја ҝәлди. Сонралар Абид Давуд падшаһын бабасы олду (Рут 4:17).

¹² Биз һеч тәсәввүр белә едә билмәрик, Наимә балаҹа Абиди гуҹағына аланда вә Јеһоваја шүкранлығыны билдирәндә неҹә хошбәхт иди! Амма Наимә илә Руту гаршыда даһа бөјүк немәтләр ҝөзләјир. Онлар дириләндә өјрәнәҹәкләр ки, вәд олунмуш Мәсиһ Абидин нәслиндән ҝәлиб!

13. Наимә илә Рутун һадисәсиндән һансы ваҹиб дәрсләри өјрәнирик?

¹³ Бу һадисәдән нә өјрәнирик? Үзләшдијимиз сынаглар уҹбатындан пәришан олуруг, руһдан дүшүрүк. Бәлкә дә, вәзијјәтимизин чыхылмаз олдуғуну дүшүнүрүк. Белә вәзијјәтдә тамамилә сәмави Атамыза бел бағламалыјыг. Диндашларымызла сых мүнасибәтләримизи горумалыјыг. Дүздүр, ола билсин, Јеһова проблемимизи арадан галдырмајаҹаг. Мәсәлән, О, Наимәнин әрини вә ики оғлуну дирилтмәди. Амма Јеһова бизә дөзмәјә көмәк едәҹәк. Ола билсин, диндашларымызы јөнәлдәҹәк ки, бизим үчүн хејирхаһ ишләр ҝөрсүнләр (Мәс. 17:17).

14. Нәјә ҝөрә бир лавили мәјуслуға гапылмышды?

¹⁴ 73-ҹү мәзмуру бир лавили јазмышды. Лавили олдуғу үчүн она шәрәф нәсиб олмушду, Јеһоваја ибадәт олунан јердә хидмәт едирди. Буна бахмајараг, о, һәјатынын бир дөнәминдә руһ дүшкүнлүјүнә гапылмышды. Сәбәб о иди ки, бу лавили писләрә, ловғалара пахыллыг едирди. О онларын пис әмәлләринә јох, хош ҝүзәранларына һәсәд апарырды (Зәб. 73:2—9, 11—14). Гырагдан елә ҝөрүнүрдү ки, һәмин инсанларын вар-дөвләти башларындан ашыр, һәр иши аванд ҝедир, дәрди-сәрләри јохдур. Лавили бүтүн бунлары ҝөрүб о гәдәр пәришан олмушду ки, белә демишди: «Әбәс јерә үрәјими саф етмишәм, әлләрими ҝүнаһсызлыг сујунда јумушам». Ајдындыр ки, онун руһанилији ҹидди тәһлүкә алтында иди.

15. Зәбур 73:16—19, 22—25 ајәләринә әсасән, бу мәзмуру јазан лавили мәјуслугдан неҹә гуртулду?

¹⁵ Зәбур 73:16—19, 22—25 ајәләрини охујун. Лавили «Аллаһын мүгәддәс мәканына» ҝирир. Орада Јеһованын диҝәр хидмәтчиләри арасында оланда сакит шәкилдә, ајдын дүшүнәрәк вә дуа едәрәк өз вәзијјәтини ҝөтүр-гој едә билир. Беләҹә, дүшүнҹәләринин нә гәдәр ахмаг олдуғуну баша дүшүр. Анлајыр ки, тәһлүкәли јола гәдәм гојуб, бу ону Јеһовадан узаглашдыра биләр. Һәмчинин о баша дүшүр ки, писләр сүрүшкән јердәдир вә агибәтләри дәһшәтли олаҹаг. Пахыллыг вә мәјуслуг һиссиндән гуртулмаг үчүн лавили мәсәләјә Јеһова кими јанашмалы иди. Белә етмәјин сајәсиндә, о, јенидән гәлб раһатлығы вә хошбәхтлик тапды. О деди: «[Јеһовадан] савајы һеч нә ҝәрәјим дејил».

16. Лавилидән нә өјрәнирик?

¹⁶ Бу һадисәдән нә өјрәнирик? Биз гырагдан хошбәхт кими ҝөрүнән пис инсанлара пахыллыг етмәмәлијик. Онларын хошбәхтлији сәтһи вә өтәридир. Онларын әбәди ҝәләҹәји јохдур (Ваиз 8:12, 13). Белә инсанлара пахыллыг етмәк мәјуслугдан вә руһани мәһвдән башга инсана һеч нә газандырмыр. Әҝәр ҝөрсәниз ки, сиздә писләрин хош  ҝүзәранына гаршы пахыллыг јараныр, лавили кими давранын, мәһәббәтли Аллаһымызын мәсләһәтләринә әмәл един вә Онун ирадәсини јеринә јетирән инсанларла отуруб-дурун. Јеһованы һәр шејдән чох севсәниз, һәгигәтән хошбәхт олаҹагсыныз. Онда әсл һәјата ҝедән јолдан сапмајаҹагсыныз (1 Тим. 6:19).

17. Бутрусун мәјус олмасына нәләр сәбәб ола биләрди?

¹⁷ Һәвари Бутрус зирәк, енержили инсан иди. Амма бәзән о, чох тәләскән олурду, өз һиссләрини дүшүнмәдән ифадә едирди. Буна ҝөрә дә елә анлар олурду ки, етдији һансыса һәрәкәтин, дедији һансыса сөзүн пешманчылығыны чәкирди. Мәсәлән, бир дәфә Иса өзү һагда дејәндә ки, әзаб чәкиб өлмәлидир, Бутрус ону мәзәммәт едәрәк демишди: «Белә шеј һеч вахт ола билмәз!» (Мәт. 16:21—23). Иса Бутрусун дүшүнҹәсинә дүзәлиш етди. Башга вахт бир дәстә инсан Исаны тутмаға ҝәләндә Бутрус тәләскән давранараг баш каһинин нөкәринин гулағыны кәсмишди (Јәһ. 18:10, 11). Иса бу дәфә дә онун сәһвини дүзәлтди. Бундан әлавә, Бутрус бир дәфә өјүнәрәк Исаја демишди ки, башга шаҝирдләр ондан үз дөндәрсә дә, о өмрүндә ондан үз дөндәрмәз! (Мәт. 26:33). Амма о өзүндән чох архајын иди. Елә һәмин ҝеҹә Бутрус инсан горхусуна гапылараг Ағасыны үч дәфә данды. Буна ҝөрә о гәдәр пәришан олду ки, «чөлә чыхыб һөнкүр-һөнкүр ағлады» (Мәт. 26:69—75). Бәлкә дә, о дүшүнүрдү ки, Иса ону һеч вахт бағышламаз.

18. Иса Бутрусун мәјуслуға үстүн ҝәлмәсинә неҹә көмәк етди?

¹⁸ Лакин Бутрус јол вермәди ки, мәјуслуг ону үстәләсин. О ҝүнаһ ишләсә дә, руһән дирчәлди вә диҝәр һәвариләрлә бирҝә Јеһоваја хидмәти давам етдирди (Јәһ. 21:1—3; Һәв. 1:15, 16). Бәс она нә көмәк  етди? Биринҹиси, Иса бир мүддәт әввәл дуа етмишди ки, Бутрусун иманы түкәнмәсин. Сонра ону тәшвиг етмишди ки, гајыдыб гардашларынын иманыны мөһкәмләндирсин. Даһа сонра о, Бутруса тәкликдә ҝөрүнмүшдү. Шүбһәсиз, ону руһландырмаг истәјирди (Лука 22:32; 24:33, 34; 1 Кор. 15:5). Һәмчинин һәвариләр бүтүн ҝеҹәни әлләшиб-вурушуб, балыг тута билмәјәндә дә Иса онлара ҝөрүнмүшдү. Һәмин вахт о имкан јаратмышды ки, Бутрус она олан севҝисини ифадә етсин. Иса әзиз достуну бағышлады вә она даһа чох иш һәвалә етди (Јәһ. 21:15—17).

19. Зәбур 103:13, 14 ајәләриндән ҝөрүндүјү кими, Јеһова ҝүнаһ ишләјән бәндәләринә неҹә јанашыр?

¹⁹ Бу һадисәдән нә өјрәнирик? Исанын Бутрусла давранышындан онун нә гәдәр рәһмли олдуғуну ҝөрмәк олар. Иса Бутруса рәһм етмәклә Атасыны мүкәммәл сүрәтдә әкс етдирирди. Буна ҝөрә дә биз сәһвләрә јол верәндә дүшүнмәмәлијик ки, Јеһова бизи һеч вахт бағышламајаҹаг. Бизим бу ҹүр дүшүнмәјимизи Шејтан истәјир. Буна ҝөрә дә ҝәлин Јеһованын мәрһәмәтли вә мәһәббәтли Аллаһ олдуғуну унутмајаг. Истәр өзүмүзә, истәрсә дә бизә гаршы ҝүнаһ едәнләрә Јеһова кими јанашаг. (Зәбур 103:13, 14 ајәләрини охујун.)

20. Нөвбәти мәгаләдә нә һагда данышаҹағыг?

²⁰ Бәли, бу ҝүн биз бәзән сынагларла үзләширик, пәришан, мәјус олуруг. Дүздүр, Јеһова бунларын һәмишә гаршысыны алмыр. Амма Јусифин, Наимә вә Рутун, лавилинин, Бутрусун нүмунәси бизи әмин едир ки, «Јеһова гәлбисыныглара јахындыр» (Зәб. 34:18). Үстәлик, Јеһованын көмәји илә бу чәтинликләрин өһдәсиндән ҝәләндә иманымыз мөһкәмләнир (1 Бут. 1:6, 7). Нөвбәти мәгаләдә ҝөрәҹәјик ки, гејри-камиллијә вә диҝәр чәтинликләрә ҝөрә мәјус олан садиг хидмәтчиләринә Јеһова даһа неҹә дајаг олур.