ARTIKULONG PAG-AADALAN 51
‘Iliniligtas ni Jehova an mga May Lupaypay na Espiritu’
“Harani si Jehova sa mga nalugadan an puso; iliniligtas niya an mga may lupaypay na espiritu.”—SAL. 34:18, NWT.
KANTA 30 Sakuyang Ama, Sakuyang Diyos Asin Katuod
SUMARYO KAN PAG-AADALAN *
1-2. Ano an pag-uulayan ta sa artikulong ini?
KUN minsan, tibaad naiisip ta na haliputon man an buhay saka “pano nin kasakitan.” (Job 14:1, NWT) Kaya natural sana na kun minsan pinangluluyahan kita nin buot. Dakul sa mga lingkod ni Jehova kan suanoy an nakamati man kaiyan. An iba ngani sainda gusto nang magadan. (1 Ha. 19:2-4; Job 3:1-3, 11; 7:15, 16) Pero si Jehova—an Diyos na pinagtitiwalaan ninda—pirmi sindang rinaranga asin pinapakusog. An mga eksperyensiya ninda isinurat para sa pagranga asin pagtukdo sato.—Roma 15:4.
2 Sa artikulong ini, pag-uulayan ta an nagkapirang lingkod ni Jehova na nakaeksperyensiya nin nakakapangluyang mga sitwasyon—si Jose na aki ni Jacob, an balong si Noemi asin an manugang niyang si Ruth, an Levitang nagsurat kan Salmo 73, asin si apostol Pedro. Paano sinda pinakusog ni Jehova? Asin ano an mga manunudan ta sa halimbawa ninda? An simbag diyan nag-aasigurar sa sato na “harani si Jehova sa mga nalugadan an puso,” asin “iliniligtas niya an mga may lupaypay na espiritu.”—Sal. 34:18, NWT.
NAKAEKSPERYENSIYA SI JOSE NIN KARINGISAN ASIN INHUSTISYA
3-4. Ano an nangyari ki Jose kan hoben pa siya?
3 Kan si Jose mga 17 anyos, nagkaigwa siya nin duwang pangaturugan na parehong hali sa Diyos. Ipinarisa kan mga pangaturugan na ini na pag-abot nin panahon magkakaigwa nin halangkaw na posisyon si Jose asin igagalang kan saiyang pamilya. (Gen. 37:5-10) Pero dai nahaloy pagkatapos kan mga pangaturugan na iyan, biyong nagbago an buhay ni Jose. Imbes na igalang, ipinabakal siya kan saiyang mga tugang bilang uripon. Dangan nagin uripon siya nin sarong opisyal sa Ehipto na si Potifar. (Gen. 37:21-28) Hali sa pagigin namumutan na marhay na aki kan saiyang ama, si Jose bigla na sanang nagin hamak na uripon nin sarong paganong opisyal kan palasyo sa Ehipto.—Gen. 39:1.
4 Dangan mas naggrabe pa an sitwasyon ni Jose. Inakusaran si Jose kan agom ni Potifar na pinurbaran daa kaining lupigan siya. Ipinapreso ni Potifar si Jose, asin kinadenahan na dai lamang iniimbestigaran an mga akusasyon digdi. (Gen. 39:14-20; Sal. 105:17, 18) Imahinara an namatian kan hoben na si Jose kan akusaran siya na nagpurbar na manglupig. Asin isipa na sana an katuyawan na posibleng dinara kan akusasyon na iyan sa pangaran ni Jehova. Kaya natural sanang pangluyahan nin buot si Jose!
5. Paano napangganahan ni Jose an pangluluya nin buot?
5 Kan si Jose uripon asin kan siya nakapreso, limitado an mga magigibo niya asin an saiyang katalingkasan. Paano siya nagdanay na positibo? Imbes na magpokus sa mga dai niya na magigibo, mahigos niyang ginibo an trabahong iinasignar sa saiya. Urog sa gabos, pinagdanay ni Jose si Jehova bilang an pinakaimportanteng Persona sa buhay niya. Huli kaiyan, binendisyunan ni Jehova an gabos na ginibo ni Jose.—Gen. 39:21-23.
6. Paano posibleng napakusog si Jose kan mga pangaturugan niya?
6 Posibleng napakusog man si Jose kan paghurop-hurop sa propetikong mga pangaturugan niya kaidto. Ipinarisa kaiyan na mahihiling niya giraray an saiyang pamilya asin na magrarahay an sitwasyon niya. Asin iyan man nanggad an nangyari. Kan mga 37 anyos na si Jose, nagpuon na mautob sa pambihirang paagi an propetikong mga pangaturugan niya!—Gen. 37:7, 9, 10; 42:6, 9.
7. Sigun sa 1 Pedro 5:10, ano an makakatabang sa sato na matagalan an mga pagbalo?
7 Mga leksiyon para sa sato. Ipinapagirumdom sa sato kan istorya ni Jose na maringis an kinaban na ini asin na tatrataron kita kan mga tawo nin bakong makatanusan. Dawa an mga kapagtubod ta tibaad trataron kita nin bakong makatanusan. Pero kun minamansay ta si Jehova bilang an satong gapo o pailihan, dai kita pangluluyahan na marhay nin buot o mapundo sa paglilingkod saiya. (Sal. 62:6, 7; basahon an 1 Pedro 5:10.) Girumdumon man na tibaad mga 17 anyos pa sana si Jose kan itao sa saiya ni Jehova an mga pangaturugan na idto. Malinaw na may kumpiyansa si Jehova sa hoben niyang mga lingkod. Dakul ngunyan an mga hoben na arog ki Jose. Kapareho man kan ki Jose an pagtubod ninda ki Jehova. An iba ngani sa sainda iprineso nin bakong makatanusan huling habo nindang ikompromiso an kaimbudan ninda sa Diyos.—Sal. 110:3.
DUWANG BABAYI NA GRABE AN KAMUNDUAN
8. Ano an nangyari ki Noemi asin Ruth?
8 Huli sa grabeng tiggutom, binayaan ni Noemi asin kan pamilya niya an harong ninda sa Juda asin nag-istar sa Moab bilang mga dayuhan. Diyan nagadan an agom ni Noemi na si Elimelec asin nawalat sa saiya an duwa nindang aking lalaki. Pag-abot nin panahon, an duwa niyang aki nag-agom nin mga Moabita, si Ruth asin Orpa. Pakalihis nin mga sampulong taon, nagadan man an mga aki ni Noemi na mayong mga aki. (Rut 1:1-5) Siguradong grabe nanggad an kamunduan kan tulong babaying idto! Siyempre, puwedeng mag-agom giraray si Ruth asin Orpa. Pero siisay na an maataman sa gurang nang si Noemi? Huli sa grabeng kamunduan, nasabi ni Noemi: “Dai nindo ako pag-apudon na Noemi. Apudon nindo akong Mara huling an sakuyang buhay ginibo nanggad na mapait kan Makakamhan sa Gabos.” Pagkatapos nin gabos na mamundong mga pangyayaring ini, nagdesisyon si Noemi na bumalik sa Betlehem, asin nag-iba saiya si Ruth.—Rut 1:7, 18-20, NWT.
Pinatunayan nin Diyos ki Noemi asin Ruth na matatabangan niya an saiyang mga parasamba na mapangganahan an pangluluya nin buot asin kamunduan. Bako daw na gigibuhon niya man iyan para saimo? (Hilingon an parapo 8-13) *
9. Sigun sa Rut 1:16, 17, 22, paano pinakusog ni Ruth si Noemi?
9 An nakatabang ki Noemi iyo an maimbod na pagkamuot. Halimbawa, ipinahiling ni Ruth an maimbod na pagkamuot niya ki Noemi paagi sa pagdanay na kaibanan kaini. (Basahon an Rut 1:16, 17, 22.) Sa Betlehem, mahigos na nagtrabaho si Ruth sa pangungua nin tada-tadang mga sebada para sa sainda ni Noemi. Huli kaiyan, nagkaigwa siya nin marahayon na reputasyon.—Rut 3:11; 4:15.
10. Paano ipinahiling ni Jehova an saiyang pagkamuot sa mga pobre arog ki Noemi asin Ruth?
10 Tinawan ni Jehova an mga Israelita nin sarong tugon na nagpapahiling kan pagmalasakit niya sa mga pobre arog ki Noemi asin Ruth. Ipinagbuot niya sa saiyang banwaan na pag nag-aani sinda, dai ninda dapat ubuson an nasa gilid kan saindang uma imbes itatada ninda iyan para sa mga pobre. (Lev. 19:9, 10) Kaya dai kaipuhan ni Noemi asin Ruth na makilimos nin kakanon.
11-12. Paano tinawan ni Boaz si Noemi asin Ruth nin dahilan para mag-ugma?
11 An kagsadiri kan uma kun sain nangungua si Ruth iyo an mayaman na lalaking si Boaz. Napahiro si Boaz sa kaimbudan asin pagkamuot ni Ruth sa panugangan niyang si Noemi kaya binalukat niya an mana kan pamilya kaini asin kinua si Ruth bilang agom. (Rut 4:9-13) Nagkaaki an mag-agom asin pinangaranan ining Obed; nagin lolo siya ni Hading David.—Rut 4:17.
12 Imahinara na sana an kaugmahan ni Noemi mantang kurukarga niya an umboy na si Obed asin ipinapahayag an udok sa puso niyang pasasalamat ki Jehova! Pero urog pa diyan an kaugmahan na mamamatian ni Noemi asin ni Ruth pag-abot nin panahon. Pag binuhay na liwat sinda, maaaraman ninda na si Obed nagin apuon kan Ipinanugang Mesiyas, si Jesu-Cristo!
13. Anong mahalagang mga leksiyon an manunudan ta sa istorya ni Noemi asin Ruth?
13 Mga leksiyon para sa sato. Pag nag-aagi kita nin mga pagbalo, tibaad pangluyahan kita nin buot, o mamundo pa nganing marhay. Tibaad pagmati ta mayo nang solusyon an mga problema ta. Sa arog kaiyan na mga sitwasyon, dapat na lubos kitang magtiwala sa satong Ama sa langit asin magdanay na harani sa satong mga tugang sa kongregasyon. Siyempre, tibaad dai man halion ni Jehova an problema ta. Girumdumon na dai niya man binuhay liwat an agom saka mga aki ni Noemi. Pero tatabangan niya kita na makatagal, tibaad paagi sa pagpahiling nin maimbod na pagkamuot kan satong espirituwal na pamilya.—Tal. 17:17.
SARONG LEVITA NA DIKIT PANG PUMUNDO SA PAGLILINGKOD KI JEHOVA
Dikit pang maraot an espirituwalidad kan kagsurat kan Salmo 73 huli sa garo baga pagigin asensado kan mga dai nakapokus sa paglilingkod ki Jehova. Puwede man iyan na mangyari sa sato (Hilingon an parapo 14-16)
14. Taano ta pinangluyahan na marhay an sarong Levita?
14 Sarong Levita an kagsurat kan Salmo 73. Kaya may pambihira siyang pribilehiyo na maglingkod sa lugar nin pagsamba ki Jehova. Dawa arog kaiyan, may panahon na maski siya pinangluyahan man nin buot. Taano? Nagpuon siyang mauri sa mga maraot asin mapalangkaw, bako dahil sa mga ginigibo nindang maraot, kundi dahil sa pagigin asensado ninda. (Sal. 73:2-9, 11-14, NWT) Garo yaon na sainda an gabos—kayamanan, marahay na buhay, saka mayong kahaditan. Huli kaiyan, pinangluyahan na marhay an salmista kaya sinabi niya: “Talagang mayo nin saysay na pinagdadanay ko pang dalisay an sakong puso asin na hinuhugasan ko an sakong puso para ipahiling na daing sala ako.” Malinaw na namemeligro nanggad an saiyang espirituwalidad.
15. Sigun sa Salmo 73:16-19, 22-25, paano napangganahan kan Levita na nagsurat kan salmong ini an saiyang pangluluya nin buot?
15 Basahon an Salmo 73:16-19, 22-25. * An Levita naglaog sa “banal na santuwaryo nin Diyos.” Diyan, posibleng marhay na kaiba kan saiyang mga kapwa parasamba, nagin kalmado siya, nakapag-isip nin malinaw, asin naipamibi an saiyang sitwasyon. Huli kaiyan, narealisar niya na kamangmangan palan an iniisip niya, asin puwede kaiyan na maisapeligro an dayupot na relasyon niya ki Jehova. Nasabutan niya man na an mga maraot nasa ‘mahalnas na daga’ asin “teribleng katapusan” an saindang kaaabtan. Tanganing mahali an saiyang pagkauri asin pangluluya, kaipuhan kan salmistang Levita na hilingon an mga bagay-bagay sigun sa pagmansay ni Jehova. Kan ginibo niya iyan, nagkaigwa giraray siya nin katuninungan asin nagin maugma. Sinabi niya: “Apuwera [ki Jehova] mayo na akong iba pang minamawot sa daga.”
16. Anong mga leksiyon an manunudan ta sa sarong Levita?
16 Mga leksiyon para sa sato. Kaya dai nanggad kita mauri sa maraot na mga tawo na garo baga asensado. An kaugmahan ninda hababaw asin temporaryo, asin dai sinda mabubuhay nin daing sagkod. (Par. 8:12, 13) Kun mauuri kita sa sainda, puwede kitang pangluyahan nin buot asin puwede kaiyan na maraot an satong espirituwalidad. Kaya kun marisa mong nauuri ka sa garo baga kapangganahan kan mga maraot, gibuhon an ginibo kan Levita. Sunudon an mamumuton na sadol nin Diyos, asin makiiba-iba sa mga naggigibo kan kabutan ni Jehova. Kun namumutan mo si Jehova nin urog sa gabos, magigi kang tunay na maugma. Asin magdadanay ka sa dalan pasiring “sa tunay na buhay.”—1 Tim. 6:19.
NADISGANAR SA SADIRI SI PEDRO DAHIL SA SAIYANG MGA KALUYAHAN
Matatabangan kita kan paghurop-hurop sa kun paano ni Pedro napangganahan an pangluluya nin buot kaya nakapagpokus giraray siya sa paglilingkod sa Diyos. Matatabangan ta man an iba paagi sa paghiras sainda kan halimbawa ni Pedro (Hilingon an parapo 17-19)
17. Ano an mga dahilan kaya pinangluyahan nin buot si Pedro?
17 Si apostol Pedro sarong maigot na lalaki, pero kun minsan pabigla-bigla siya asin dai pinag-iisipan an saiyang mga sinasabi o ginigibo. Bilang resulta, may mga sinabi siya asin ginibo na pinagbasulan niya kan huri. Halimbawa, kan sinabi ni Jesus sa saiyang mga apostol na siya magsasakit asin magagadan, sinaway siya ni Pedro na sinasabi: “Dai lamang ini mangyayari sa saimo.” (Mat. 16:21-23) Kaya itinanos ni Jesus si Pedro. Kan may mag-abot na sarong grupo tanganing arestaron si Jesus, nagin pabigla-bigla si Pedro kaya tinigbas niya an uripon kan halangkaw na saserdote asin natakras an talinga kaini. (Juan 18:10, 11) Sa giraray itinanos ni Jesus an apostol. Ipinaghambog man ni Pedro na maski pa magruluya an pagtubod kan ibang mga apostol dahil sa mangyayari ki Cristo, siya dai nanggad! (Mat. 26:33) Pero si Pedro bakong arog kakusog kan iniisip niya. Nagpadara siya sa pagkatakot sa tawo asin tulong beses na pignigaran an saiyang Kagurangnan. Huli sa grabeng pagkadisganar sa sadiri, ‘nagluwas si Pedro saka naghibi sa sobrang kamunduan.’ (Mat. 26:69-75) Siguradong naisip niya kun mapapatawad pa daw siya ni Jesus.
18. Paano tinabangan ni Jesus si Pedro na mapangganahan an pangluluya nin buot?
18 Alagad, dai tinugutan ni Pedro na madaog siya nin pangluluya nin buot. Pagkatapos na matumba, nakabangon siya, asin padagos siyang naglingkod ki Jehova kaiba kan iba pang mga apostol. (Juan 21:1-3; Gibo 1:15, 16) Ano an nakatabang sa saiya? Bago pa kaiyan, ipinamibi ni Jesus na lugod na dai mawara an pagtubod ni Pedro, asin dinagka ni Jesus si Pedro na bumalik asin pakusugon an saiyang mga tugang. Sinimbag ni Jehova an udok sa pusong pamibing iyan. Tapos, nagpahiling mismo si Jesus ki Pedro, siguradong para pakusugon ini. (Luc. 22:32; 24:33, 34; 1 Cor. 15:5) Nagpahiling man si Jesus sa mga apostol pagkatapos nindang magdamlag na manira na mayong nadakop. Sa pagkakataon na ini, tinawan ni Jesus si Pedro nin tsansa na ipahayag sa saiya kun gurano siya kaini kanamumutan. Pinatawad ni Jesus an namumutan niyang amigo asin pinagkatiwalaan ini nin mas dakul pang gibuhon.—Juan 21:15-17.
19. Paano makakatabang sa sato an Salmo 103:13, 14 na hilingon an mga nakakagibo nin sala sa sato kauyon kan pagmansay ni Jehova?
19 Mga leksiyon para sa sato. Ipinapahiling kan paagi nin pagtratar ni Jesus ki Pedro na siya mahihirakon na marhay, arog mismo kan saiyang Ama. Kaya pag nakakagibo kita nin sala, dai pag-isipon na mayo na kitang paglaom. Dapat tang tandaan na iyan mismo an gusto ni Satanas na isipon ta. Kun siring, pagmaigutan niyatong hilingon an satong sadiri—asin an mga nakakagibo nin sala sa sato—kauyon kan mapagmalasakit asin mamumuton na pagmansay kan satong Ama sa langit.—Basahon an Salmo 103:13, 14.
20. Ano an pag-uulayan ta sa masunod na artikulo?
20 Inaasigurar kita kan halimbawa ni Jose, Noemi asin Ruth, kan Levita, asin ni Pedro na “harani si Jehova sa mga nalugadan an puso.” (Sal. 34:18, NWT) Tinutugutan niya kitang mag-agi nin mga pagbalo o pangluyahan nin buot kun minsan. Dawa arog kaiyan, pag mapanggana tang natatagalan an mga pagbalo sa tabang ni Jehova, nagkukusog an satong pagtubod. (1 Ped. 1:6, 7) Sa masunod na artikulo, urog ta pang mahihiling kun paano tinatabangan ni Jehova an saiyang maimbod na mga lingkod na pinangluluyahan nin buot tibaad dahil sa saindang pagkabakong perpekto o dipisil na mga kamugtakan.
KANTA 7 Si Jehova, an Samong Kakusugan
^ par. 5 Si Jose, Noemi asin Ruth, an sarong Levita, saka si apostol Pedro pararehong nakaeksperyensiya nin pangluluya nin buot. Sa artikulong ini mahihiling ta kun paano sinda rinanga asin pinakusog ni Jehova. Pag-uulayan ta man kun ano an manunudan ta sa saindang halimbawa asin sa kun paano sinda mamumuton na tinabangan ni Jehova.
^ par. 15 Salmo 73:16-19, 22-25, NWT: “Kan hinguwahon kong sabuton ini, nakapurisaw nanggad ini sa sako; sagkod sa luminaog ako sa banal na santuwaryo nin Diyos, saka ko nasabutan an saindang kaaabtan. Totoo nanggad na ibinubugtak mo sinda sa dagang mahalnas. Pinangyayari mong matumba sinda asin malaglag. Bigla na sana sindang malalaglag! Bigla sana sindang matatapos pag mag-abot sa sainda an teribleng katapusan! Nagin akong daing pag-iisip asin mayo nin pakasabot; nagin akong garo daing isip na hayop sa atubangan mo. Pero ngunyan, padagos akong minaiba sa saimo; kapot mo an tuong kamot ko. Ginigiyahan mo ako paagi sa saimong sadol, asin pagkatapos dadarahon mo ako sa kamurawayan. Siisay pa man sa kalangitan an makakatabang sa sakuya? Asin apuwera saimo mayo na akong iba pang minamawot sa daga.”
^ par. 57 DESKRIPSIYON KAN RITRATO: Si Noemi, Ruth, asin Orpa nagmundong marhay asin pinangluyahan nin buot kan magadan an saindang agom. Dangan kan mamundag si Obed, nag-ugma si Ruth asin Noemi kaiba si Boaz.
