1-2. Aha ma na laho iulas hita bani artikel on?

SIPATA ra do iahap hita “buei do hasunsahan” ibagas goluhta sonari on. (Job 14:1) Halani ai, ra do gabe maretek ni uhur hita. Hinan, dong homa juakjuak ni Naibata na sonai pangahapni. Anjaha halani sunsah tumang uhurni, dong na mangahap rahanan ma sidea matei. (1 Raj. 19:2-4; Job 3:1-3, 11; 7:15, 16) Tapi, tongtong do ipatoguh Jahowa uhur ni sidea. Anjaha isurat do pangalaman ni sidea ai bani Bibel laho patoguhkon uhurta.​—Rom 15:4.

² Bani artikel on, iulas hita ma pasal juakjuak ni Naibata na ongga maretek ni uhur. Umpamani, dong si Josep, si Naomi pakon si Rut parumaenni, panurat buku psalmen bindu 73, ampa apostel Petrus. Sonaha Jahowa mangurupi sidea? Anjaha aha do na boi iparlajari hita humbani pangalaman ni sidea? Dob iulas hita balosni ai, gabe lambin porsaya ma hita “dohor do Jahowa bani halak paruhur na marosak” anjaha “ipaluah partonduy na maropuk”.​—Ps. 34:19.

3-4. Aha do na masa bani si Josep sanggah poso ope ia?

³ Sanggah si Josep marumur 17 tahun marnipi ma ia, anjaha humbani Naibata do rohni nipi ai. Arti nipini ai gabe halak na ponting do holi si Josep. (1 Mus. 37:5-10) Hape lang piga dokah dobkonsi ai, lang sonai na masa. Lambin parah do situasini. Umpamani, ijual abangni do ia anjaha gabe jabolon ma ia i rumah ni sada pagawai Masir na margoran si Potipar. (1 Mus. 37:21-28) Gabe bahat do hasunsahan na roh hubani si Josep. Daoh do ia humbani bapani,  janah gabe jabolon do ia i rumah ni halak na lang sisombah Jahowa.​—1 Mus. 39:1.

⁴ Tapi dobkonsi ai, roh parahni do situasini. Ituduh istri ni si Potipar ma anggo si Josep laho memperkosa ia. Mintor porsaya do homa si Potipar bani istrini ai. Lang ipareksa ia sonaha na sasintongni. Ipenjarahon ma si Josep janah irantei bosi ma naheini. (1 Mus. 39:14-20; Ps. 105:17, 18) Bayangkon ma sonaha pusok ni uhur ni si Josep. Sanggah ai poso ope ia, anjaha ra do halani ai gabe adong ma halak na manrisai goran ni Jahowa.

5. Aha ma na ibahen si Josep ase ulang mandolei ia?

⁵ Sanggah si Josep iparjabolon anjaha ipenjarahon, lang boi iubah ia situasini ai. Aha ma na ibahen si Josep ase ulang mandolei ia? Lang lalab ipingkiri ia aha na lang tarbahensi. Tapi marusaha do ia mangkorjahon tugas aha pe na ibere hu bani. Janah marusaha do ia tongtong pamalaskon uhur ni Jahowa. Halani ai, ipasu-pasu Jahowa ma ganup na hinorjahonni.​—1 Mus. 39:21-23.

6. Sonaha do ra pangahap ni si Josep sanggah idingat ia use nipini?

⁶ Ra do idingat si Josep use nipi na ongga ibere Jahowa hu bani. Halani ai, gabe tarapoh ma uhurni. Ibotoh ia ma mubah do holi situasini janah boi do ia pajumpah use pakon kaluargani. Tongon, sonai do na masa. Sanggah marumur 37 tahun ia, saud do ganup nipini ai.​—1 Mus. 37:7, 9, 10; 42:6, 9.

7. Domu bani 1 Petrus 5:10, aha ma na boi mangurupi hita ase totap martahan sanggah dong hasunsahan?

⁷ Parlajaranni hubanta. Songon na ibahen hubani si Josep, bahat do halak sonari on na mambahen sunsah goluhta. Ra do homa adong sanina botou na mambahen borit uhurta. Tapi, anggo ibahen hita Jahowa gabe Parlinggoman ampa Batar-batarta, tontu lang mandolei hita.  (Ps. 62:7, 8; basa 1 Petrus 5:10.) Dingat ma homa sanggah Jahowa mambere nipi hubani si Josep, marumur 17 tahun ope ia. On patuduhkon marosuh do Jahowa hubani na maposo. Sonari on pe bahat do homa na maposo songon si Josep. Porsaya do sidea bani Jahowa janah dong do homa humbani sidea ai na ipenjarahon halani mamilih totap setia hubani Naibata.​—Ps. 110:3.

8. Aha do na masa hubani si Naomi pakon si Rut?

⁸ Halani masa kelaparan, pindah ma si Naomi pakon kaluargani hun Juda hu nagori Moab. Ijai, matei ma si Elimelek, suami ni si Naomi. Tading ma ia pakon dua anakni. Dob ai, marhajabuan ma haduasi anakni ai pakon boru Moab, ai ma si Rut pakon si Orpa. Hira-hira sapuluh tahun dobkonsi ai, matei ma haduasi anak ni si Naomi hape lape marniombah. (Rut 1:1-5) Tontu pusok tumang ma uhur ni si Naomi pakon parumaenni ai. Sasintongni boi do namin si Rut pakon si Orpa marhajabuan use. Tapi ise ma holi na mansarihon si Naomi na domma matua? Halani pusokni uhurni ihatahon si Naomi ma sonon, “Ulang be goran nasiam ahu si Naomi, goran nasiam ma ahu si Mara, ai paet tumang do pambahenan ni Pargogoh Na So Tarimbang in hu bangku.” Halani ai, mulak ma use si Naomi hu Betlehem anjaha dihut do si Rut pakonsi.​—Rut 1:7, 18-20.

9. Domu bani Rut 1:16, 17, 22, sonaha ma si Rut mangapoh si Naomi?

⁹ Jadi, aha ma na boi mangapoh uhur ni si Naomi? Halani tongtong do si Rut mangkaholongisi, gabe tarapoh ma si Naomi. Umpamani, lang ra si Rut manadingkonsi. (Basa Rut 1:16, 17, 22.) Sanggah i Betlehem, ringgas do si Rut manjomputi buyur ni gandum ase adong sipanganon ni sidea. Halani ai, gabe itanda halak ma anggo si Rut ai naboru na bujur janah ringgas marhorja.​—Rut 3:11; 4:15.

10. Sonaha Jahowa patuduhkon idop ni uhur-Ni hubani halak na miskin, songon si Naomi pakon si Rut?

¹⁰ Ibere Jahowa do titah hubani halak Israel na patuduhkon idop ni uhur-Ni hubani halak na miskin, songon si Naomi pakon si Rut. Iparentahkon do ase halak Israel na marpariama, ulang bois ipariamai sidea jumani ase dong teba bani halak na miskin. (3 Mus. 19:9, 10) Halani ai, gabe adong ma horja ni si Rut. Janah lang pala mangindo-indo si Naomi pakon si Rut laho mandapot sipanganon.

11-12. Mase malas uhur ni si Naomi pakon si Rut?

¹¹ Laho ma si Rut hu juma ni si Boas manjomputi buyur ni gandum. Sahalak na bayak do si Boas ai. Gabe maidop ma uhur ni si Boas dob mambotoh bujur tumang do si Rut hubani simatuani. Ibuat si Boas ma si Rut gabe istrini, anjaha itobus ma ganup tading-tadingan ni suami ni si Naomi. (Rut 4:9-13) Ujungni, itubuhkon si Rut ma sada anak na margoran si Obed. Ia do holi na gabe ompung ni Raja Daud.​—Rut 4:17.

¹² Gabe marmalas ni uhur ma si Naomi halani tubuh si Obed. Mintor martonggo janah martarima kasih ma ia hubani Jahowa. Tapi, lambin tambah do holi malas ni uhur ni si Naomi pakon si Rut sanggah sidea ipapuho. Ibotoh sidea ma holi humbani ginompar ni si Obed do hape roh Mesias na ijanjihon ai.

13. Aha ma na boi iparlajari hita humbani si Naomi pakon si Rut?

¹³ Parlajaranni hubanta. Ra do gabe mandolei hita halani bahatni parsoalan.  Janah ra do nini uhurta lang tarsaloseihon ai. Hassi pe sonai, maningon marondos ma hita hubani Jahowa janah totap dohor hubani sanina botou. Tongon, ra do ipaturut Jahowa totap adong parsoalanta ai. Umpamani, songon si Naomi lang mintor ipapuho Jahowa suamini pakon haduasi anakni sanggah ai. Tapi ipargogohi Ia do hita ase boi totap martahan. Janah sipata, igunahon Jahowa do sanina botou laho mangurupi hita.​—Pod. 17:17.

14. Aha do na mambahen sahalak Levi gabe maretek ni uhur?

¹⁴ Halak Levi do na manuratkon Psalmen bindu 73, anjaha marugas i rumah panumbahan do ia. Tapi ongga do ia gabe maretek ni uhur. Mase? Mulai ma ia simburu mangidah parjahat. Tapi sedo halani sihol uhurni mangkorjahon na jahat. Simburu ia halani mangidah sonang goluh ni parjahat ai. (Ps. 73:2-9, 11-14) Lambin tambah do habayakon ni sidea anjaha lalab do sidea marsonang-sonang. Halani ai gabe maretek ni uhur ma ia janah ihatahon ma, “Soya-soya do hape hupaborsih uhurhu, huburihi tanganku tanda lang [marsalah].” Tapi, anggo lalab sonai ia, dokah-dokah boi ma gabe soh ia mangidangi Jahowa.

15. Domu bani Psalmen 73:16-19, 22-25, aha do na mangurupi halak Levi ai ase lang be maretek ni uhur?

¹⁵ Basa Psalmen 73:16-19, 22-25. Jadi, ‘masuk ma ia hu ianan ni Naibata na pansing in’. Ijai bahat do halak na manombah Jahowa. Halani ai gabe boi ma ia torang marpingkir, ipareksa ia ma situasini, janah itonggohon ia ma ai. Hasilni, gabe ibotoh ia ma na oto do hape na ipingkiri ia ai. Janah boi do ai mambahen gabe maseda parhasomananni pakon Jahowa. Leganni ai, gabe ibotoh ia ma homa bani “ianan na landit do” parjahat ai anjaha “majangin tumang” do holi ujungni sidea. Jadi maningon itiru halak Levi ai do pingkiran ni Jahowa ase lang be simburu ia bani parjahat janah lang maretek ni uhur. Halani itiru ia Jahowa,  gabe damei ma use pangahapni anjaha marmalas ni uhur. Ia mangkatahon, ‘Sobali Jahowa, seng dong iharosuhkon uhurhu i tanoh on.’

16. Parlajaran aha ma na boi dapot hita humbani pangalaman ni halak Levi ai?

¹⁶ Parlajaranni hubanta. Ulang ma hita simburu mangidah parjahat. Hassi pe sonang goluh ni sidea, tapi tongkin dassa ai. Janah lang boi dapot sidea hagoluhan na sadokah ni dokahni. (Par. 8:12, 13) Anggo simburu hita mangidah sidea, holi gabe maretek ni uhur ma hita janah maseda ma parhasomananta pakon Jahowa. Jadi, anggo simburu ham mangidah parjahat, tiru ma aha na ibahen halak Levi ai. Dalankon ma parentah ni Jahowa anjaha marsaor ma ham pakon sidea na unduk hu Bani. Anggo ibahen ham Jahowa na sipontingan ibagas goluhmu, tontu martuah ma ham. Anjaha boi ma holi dapot ham “goluh na sintong” ai.​—1 Tim. 6:19.

17. Aha do na mambahen si Petrus maretek ni uhur?

¹⁷ Sahalak na ringgas do si Petrus ai. Tapi sipata, ra do lang ipingkiri ia aha na laho ihatahon ampa na laho ihorjahonsi. Ujungni, gabe isolsoli ia ma ai. Umpamani, sanggah ihatahon Jesus maningon marsitaronon do ia janah ibunuh, mintor ipasingat si Petrus ma Jesus janah ihatahon ma, “Ulang ma masa ai bamu!” (Mat. 16:21-23) Igilai Jesus ma ia. Dob ai, sanggah roh buei halak laho manangkap Jesus, mintor itampul si Petrus ma pinggol ni jabolon ni sintua ni malim. (Joh. 18:10, 11) Halani ai, ipodahi Jesus ma ia. Leganni ai, barani do si Petrus mangkatahon anggo ia lang ra manadingkon Jesus hassi pe apostel-apostel na legan mambahen na sisonai. (Mat. 26:33) Hape lang tongon ai! Bani bornginni ai, halani mabiar bani jolma, tolu hali ma iporsou ia Jesus.  Halani ai, gabe maretek ni uhur ma ia janah “laho ma ia hu darat tangis [gogoh-gogoh]”. (Mat. 26:69-75) Tontu iahap si Petrus ma lang tarmaafkon Jesus hasalahanni ai.

18. Sonaha Jesus mangurupi si Petrus ase lang be maretek ni uhur?

¹⁸ Hassi pe sonai lang soh si Petrus mangidangi Jahowa. Totap do ia mangidangi Jahowa rap pakon apostel-apostel na legan. (Joh. 21:1-3; Lah. 1:15, 16) Aha ma na mangurupi si Petrus ase ringgas use? Domma itonggohon Jesus hinan ase ulang magou haporsayaon ni si Petrus. Janah ibalosi Jahowa do tonggo ni Jesus ai. Leganni ai, dobkonsi ipapuho Jesus, ipatuduh do dirini hubani si Petrus laho patoguhkon uhurni. (Luk. 22:32; 24:33, 34; 1 Kor. 15:5) Anjaha sanggah laho ganup apostel manjala dengke, hape bani sabornginni ai aha pe lang dapot sidea, roh ma Jesus manjumpahi sidea. Ijai ma isungkun Jesus si Petrus atap na holong do uhurni bani Jesus. Tangkas ma isalpuhon Jesus do hasalahan ni si Petrus janah ibere do lambin bahat tugas hu bani.​—Joh. 21:15-17.

19. Domu bani Psalmen 103:13, 14, sonaha ma pangahap ni Jahowa porini mambahen hasalahan hita?

¹⁹ Parlajaranni hubanta. Hunjon tangkas ma paridop ni uhur do Jesus ai songon Bapani. Jadi, anggo mambahen hasalahan hita, ulang ma iagan hita lang tarsasap Jahowa hasalahanta ai. Anggo sonai pingkiranta, gabe sonang ma Sibolis. Dingat ma holong tumang do uhur ni Jahowa hubanta, iarusi Ia do hagalekonta, janah sihol do Ia manalpuhon hasalahanta. Anjaha maningon sonai do homa ibahen hita anggo adong hasoman na mambahen borit uhurta.​—Basa Psalmen 103:13, 14.

20. Aha ma na laho iulas hita bani artikel na mangihut?

²⁰ Humbani pangalaman ni si Josep, si Naomi pakon si Rut, halak Levi, ampa si Petrus, ibotoh hita ma “dohor do Jahowa bani halak paruhur na marosak”. (Ps. 34:19) Sipata ipaturut Ia do hita marsitaronon ampa maretek ni uhur. Tapi, anggo marondos hita hu Bani, gabe lambin toguh do haporsayaonta. (1 Ptr. 1:6, 7) Bani artikel na mangihut iulas hita ma sonaha Jahowa mangurupi juakjuak-Ni na maretek ni uhur halani hagalekonni atap pe halani situasi na sunsah.