1-2. Kai kari sibahas bas artikel enda?

MON-MON siukuri kerna uga gendekna umurta ‘si dem kesusahen ras mesera.’ (Jop 14:1) Emaka masuk akal adi mon-mon kitik ukurta. Melala umat Jahwe si mbarenda pe bage perasanna, janah piga-piga mate ka atena. (1 Raj. 19:2-4; Jop 3:1-3, 11; 7:15, 16) Tapi, lalap iapuli Jahwe kalak e janah ipegegehiNa. Pengalamen kalak e icatat guna ngapuli ras ngajari kita.​—Rom. 15:4.

² Bas artikel enda, sibahas kari piga-piga umat Jahwe si megenggeng sanga ngadapi tentangen. Misalna Jusup anak Jakup, Naomi ras permenna Rut, kalak Lewi si nulis Masmur 73, bage pe Rasul Petrus. Uga Jahwe mpegegehi kalak e? Janah kai si banci sipelajari arah kalak e? Jawapenna erban kita tek maka “[Jahwe] nemani kalak si lanai piher ukurna,” janah “isampatiNa kalak si enggo bene pengarapenna.”​—Msm. 34:19.

3-4. Kai si terjadi man Jusup sanga ia nguda denga?

³ Sanga umur Jusup kira-kira 17 tahun lit dua kali ia ernipi. Nipina e i bas Dibata nari. Erti nipina e eme jadi kalak penting pagi ia janah ihormati keluargana. (Kej. 37:5-10) Tapi, la ndekah kenca Jusup ernipi, terjadi kai si la mehuli man bana. Perban la iergai senina-seninana ia, idayaken kalak e ia man kalak Mesir, dungna jadi budak Potipar ia. (Kej. 37:21-28) Mis kel berubah kegeluhen Jusup, lanai ia tading bas rumah ras bapak si engkelengi ia. Jadi budak ia bas Mesir, erdahin man sekalak dilaki si la nandai Jahwe.​—Kej. 39:1.

⁴ Kenca si e, reh kelekna masalah si iadapi Jusup. Ituduh ndehara Potipar Jusup erusaha mperkosa ia. La  ipastiken Potipar lebe kejadin situhuna, mis ipenjarakenna Jusup janah igari me ia bas penjara. (Kej. 39:14-20; Msm. 105:17, 18) Bayangken uga perasan Jusup si nguda denga sanga ituduh mperkosa kalak. Ukuri ka uga cedana gelar Jahwe eme Dibata si isembah Jusup, sanga ibegi kalak e kerna kejadin e. Pasti kitik kel ukur Jusup.

5. Kai si ilakoken Jusup gelah positif janah la kitik ukurna?

⁵ Sanga Jusup jadi budak janah dungna masuk penjara, la banci ilakokenna kai pe guna ngubah situasina. Kai si erbanca maka Jusup tetap positif janah la kitik ukurna? La iukurina kai si la banci ilakokenna, tapi iusahakenna asa ngasupna ngelakoken kerina pendahin si ibereken man bana. Si pentingna, iusahaken Jusup erban meriah ukur Jahwe. Asilna, ipasu-pasu Jahwe kerina si ilakoken Jusup.​—Kej. 39:21-23.

6. Uga nipi Jusup mpegegehi ia?

⁶ Banci saja Jusup terpegegehi perban iukurina ka kerna nipi si ibereken Jahwe man bana piga-piga tahun si lewat. Arah e itehna me maka banci denga idahna keluargana janah kegeluhenna banci reh ulina. Dungna, e me si terjadi. Sanga umur Jusup kira-kira 37 tahun, terjadi me nipina e alu cara si luar biasa!​—Kej. 37:7, 9, 10; 42:6, 9.

7. Menurut 1 Petrus 5:10, kai si banci nampati kita gelah megenggeng sanga ngadapi tentangen?

⁷ Pelajarenna man banta. Cerita Jusup ngingetken kita maka doni enda kejam janah banci saja la adil kalak man banta. Turang seninata pe banci saja la adil man banta. Tapi, adi sianggap Jahwe Gunung Batuta ntah pe inganta erlindung, la kitik ukurta ntah pe lanai silayani Jahwe. (Msm. 62:7, 8, Terjemahan Dunia Baru; baca 1 Petrus 5:10.) Cuba ka inget mulihi kerna Jusup, ibereken Jahwe man  Jusup nipi sanga umurna kira-kira 17 tahun. Jadi, arah e teridah maka tek Jahwe maka umatNa si nguda denga banci tetap setia. Gundari, enterem anak muda si bali bagi Jusup, erkiniteken kalak e man Jahwe. Piga-piga arah kalak e ipenjaraken alu cara si la adil, perban terus kalak e patuh man Dibata.​—Msm. 110:3.

8. Kai si terjadi man Naomi ras Rut?

⁸ Perban terjadi kelihen si mekelek bas Juda, pindah me Naomi ras keluargana ku Moap. I je, mate perbulangen Naomi si gelarna Elimelek, janah lit dua anak kalak e. Bas pudi wari, erjabu dua anakna e ras kalak Moap si gelarna Rut ras Orpa. Kira-kira sepuluh tahun kenca si e, mate ka duana anak Naomi e janah kalak e pe la lit anakna. (Rut 1:1-5) Bayangken uga kitikna ukur teluna diberu e! Memang, banci denga nge Rut ras Orpa erjabu, tapi ise kari si ngurus Naomi si enggo metua? Sempat stres kel Naomi perban si e, janah nina, “Olanai igelarindu aku Naomi. Maralah bahan gelarku, sabap Dibata si Erkuasa enggo mahanca pagit kegeluhenku.” Perban kerina kejadin e, mulih me Naomi ku Betlehem janah ikut permenna Rut ras ia.​—Rut 1:7, 18-20.

9. Menurut Rut 1:16, 17, 22, uga Rut mpegegehi Naomi?

⁹ Kai si banci nampati Naomi? Kekelengen si setia. Contohna, icidahken Rut kekelengen si setia man Naomi alu terus nemani ia. (Baca Rut 1:16, 17, 22.) Bas Betlehem, Rut kerja keras mpepulung gandum guna dirina ras Naomi. Erkiteken si e, itandai kalak maka Rut e diberu si mehuli janah mejingkat.​—Rut 3:11; 4:15.

10. Alu cara kai Jahwe ncidahken kekelengen man kalak mesera bagi Naomi ras Rut?

¹⁰ Mekuah ate Jahwe kalak si mesera bagi Naomi ras Rut. Enda teridah arah undang-undang si iberekenNa man kalak Israel. Ikataken Jahwe man umatNa gelah itadingken kalak e sitik asil ranina i pinggir-pinggir jumana gelah banci ibuat kalak mesera. (Im. 19:9, 10) Emaka, Naomi ras Rut banci ndatken pangan alu la perlu mindo-mindo.

11-12. Kai si ilakoken Boas si erbanca Naomi ras Rut ermeriah ukur?

¹¹ Si mpuna juma ingan Rut mpepulung gandum eme Boas, ia sekalak dilaki si seh kel bayakna. Luar biasa kel iakapna ngidah Rut, perban keleng kel ate Rut Naomi janah setia ka ia man bana. Emaka, bas pudi wari iempoi Boas me Rut janah itukurna mulihi taneh keluarga Naomi. (Rut 4:9-13) Dungna lit me anak Rut ras Boas si gelarna Obet, si jadi nini bulang Raja Daud.​—Rut 4:17.

¹² Bayangken uga riahna iakap Naomi sanga iangkipna Obet, pasti ertoto ia ngata bujur man Jahwe! Tapi, lit denga keriahen ukur si terbelinen si banci igejapken Rut ras Naomi. Sanga ipekeke pagi kalak e, itehna me maka Obet e jadi salah sada nini bulang Mesias si ijanjiken, eme Jesus Kristus!

13. Pelajaren kai si banci sidat arah pengalamen Naomi ras Rut?

¹³ Pelajarenna man banta. Sanga siadapi melala tentangen, kitik ukurta janah banci saja getem kel siakap. Lanai siakap lit jalan keluarna. Bas paksa si bage, arus kita tuhu-tuhu tek man Bapakta si i surga janah rembak ras turang seninata bas runggun. Memang banci saja, la imasapken Jahwe kerina masalahta. Mbarenda  pe, la ipekeke Jahwe perbulangen Naomi ras anak-anakna. Aminna pe la imasapken Jahwe masalahta, tapi ipegegehiNa kita. Mon-mon ipegegehiNa kita arah turang seninata si mehuli.​—Kua. 17:17.

14. Engkai maka kitik kel ukur penulis Masmur 73?

¹⁴ Penulis Masmur 73 eme sekalak dilaki arah suku Lewi. Perban ia kalak Lewi, banci ia ngelayani i bas rumah pertoton Jahwe. Tapi bas sada paksa kitik kel ukurna. Engkai? Mulai atena cian ngidah kalak jahat ras kalak sombong, labo perban atena ilakokenna kai si la mehuli bagi si ilakoken kalak e, tapi perban idahna sikapen kegeluhen kalak e asangken kegeluhenna sendiri. (Msm. 73:2-9, 11-14) Tempa-tempa la kalak e kurang kai pe, bayak kalak e, sikap pergeluhna janah la lit kekuatirenna. Kitik kel ukur kalak Lewi e sanga idahna kai si inanami kalak jahat. Emaka nina, “Percuma kujaga diringku bersih, la erguna kusirangken dosa.” Jelas me, enda banci erban ia ngadi ngelayani Jahwe.

15. Menurut Masmur 73:16-19, 22-25, kai si ilakoken kalak Lewi gelah lanai kitik ukurna?

¹⁵ Baca Masmur 73:16-19, 22-25. Masuk kalak Lewi ku “Rumah Dibata.” I je, pulung ia ras kalak si nembah Jahwe. Alu bage, banci dame iakapna, tenang carana rukur, janah itotokenna kerna situasina e. Asilna, mulai me itehna enggo salah carana rukur sedekah enda, janah e banci erban ceda hubungenna ras Jahwe. Itehna ka maka kalak jahat e lit i bas “dalan medalit” janah pasti nge kalak e kernep. Dungna, seri perukuren kalak Lewi ras perukuren Jahwe. Emaka lanai kitik ukurna janah lanai atena cian kalak jahat. Perban bage banna, dame me mulihi pusuhna janah meriah iakapna, nina, “La lit kai pe ateku ngena i doni seakatan [Jahwe].”

16. Pelajaren kai si banci sidat arak kalak Lewi?

¹⁶ Pelajarenna man banta. Arusna ula pernah cian ateta kalak jahat si tempa-tempa sikap pergeluhna. Keriahen ukur  kalak e banci bene janah la banci kalak e nggeluh si rasa lalap. (Peng. 8:12, 13) Adi cian ateta man kalak e, banci kitik ukurta janah dungna banci ceda hubungenta ras Jahwe. Emaka, adi perasanndu enggo mulai bali bagi perasan kalak Lewi, lakokenlah kai si ilakokenna. Patuhilah nasehat Dibata si perkeleng, janah ertemanlah kam ras kalak si ngelakoken peraten Jahwe. Sanga reh kelengna atendu Jahwe lebihen asangken kai pe, banci gejapkenndu keriahen ukur situhu-tuhu. Janah banci kam tetap erdalan bas dalan si nuju ku “kegeluhen situhu-tuhu.”​—1 Tim. 6:19.

17. Kai si erbanca maka kitik kel ukur Petrus?

¹⁷ Rasul Petrus sekalak dilaki si semangat, tapi metersa rusur iturikenna isi pusuhna. La iukurina lebe kai si ikatakenna ras si ilakokenna, janah dungna menyesal ia. Contohna, sanga ikataken Jesus man rasul-rasulna maka inanamina kari kiniseran janah dungna mate, bagenda nina Petrus man Jesus, “Labo banci terjadi si enda kerina man bandu.” Kenca si e, ipekena Jesus cara rukur Petrus. (Mat. 16:21-23) Sanga enterem jelma reh guna nangkap Jesus, mis ibuat Petrus pedangna janah iretapkenna cuping budak imam si mbelin. La iukurina lebe kai si ilakokenna e. Mulihi ka ipersingeti Jesus Petrus. (Joh. 18:10, 11) Selain si e, pernah ka ibanggaken Petrus dirina, ikatakenna maka la mungkin itadingkenna Jesus aminna pe rasul-rasul si deban nadingken ia. (Mat. 26:33) Tapi, si terjadi labo bagi si ikataken Petrus e, perban mbiar ia man manusia ipersokenna Jesus telu kali. Seh kel kitikna ukurna erkiteken si e, “lawes ia ndarat janah nderkuh ia tangis.” (Mat. 26:69-75) Pasti tersungkun-sungkun ia nggit nge Jesus ngampuni ia ntah lang.

18. Kai si ilakoken Jesus man Petrus gelah lanai kitik ukur Petrus?

 ¹⁸ Amin pe kitik ukur Petrus la ia ngadi ngelayani Jahwe. Kenca kesalahen si ilakokenna e, terus ilayanina Jahwe radu ras rasul-rasul si deban. (Joh. 21:1-3; Perb. 1:15, 16) Kai si erbanca maka lanai kitik ukur Petrus? Iingetna maka pernah itotoken Jesus ia gelah la bene kinitekenna janah ijawap Jahwe toto si bulat ukur e. Selain si e, ikatakenna ka maka pasti Petrus robah janah isuruhna gelah ipegegehina senina-seninana. Bas pudi wari, icidahken Jesus dirina man Petrus, banci jadi guna mpegegehi ia. (Luk. 22:32; 24:33, 34; 1 Kor. 15:5) Ijumpai Jesus ka rasul-rasul si enggo sada berngin nangkap ikan tapi kai pe la lit dat kalak e. Paksa si e, ibereken Jesus kesempaten man Petrus guna nuriken uga belinna kekelengenna man Jesus. Iampuni Jesus teman si ikelengina enda janah iberekenna terbuen pendahin man bana.​—Joh. 21:15-17.

19. Menurut Masmur 103:13, 14, uga nge perukuren Jahwe man banta sanga silakoken dosa?

¹⁹ Pelajarenna man banta. Cara Jesus erurusen ras Petrus ncidahken maka Jesus e perkuah bali bagi Bapakna. Jadi sanga siban kesalahen, ula siakap maka labo pernah iampuni Jahwe kita. Ingetlah, cara rukur si bage me si iarapken Setan arah kita nari. Emaka, arus siusahaken gelah terus siukuri uga perukuren Jahwe man banta. Situhuna keleng nge ateNa kita, iangkaiNa kelemahenta, janah nggit Ia ngampuni kita. Arus ka siusih Ia sanga kitik ukurta iban kalak si deban.​—Baca Masmur 103:13, 14.

20. Kai kari sibahas bas artikel seterusna?

²⁰ Contoh Jusup, Naomi, Ruth, ras kalak Lewi, bage pe Petrus erban kita tek maka, “[Jahwe] nemani kalak si lanai piher ukurna.” (Msm. 34:19) Mon-mon ipediatNa kita ngadapi tentangen si erban kitik ukurta. Tapi, sanga ngasup kita ngadapi tentangen alu penampat Jahwe, reh paguhna kinitekenta. (1 Pet. 1:6, 7) Bas artikel seterusna sibahas kari terbagesen uga cara Jahwe nampati umatNa si sangana kitik ukurna perban perukuren si negatif, kesalahen si pernah ibanna, bage pe pinakit.