1, 2. Kaba wakutiha lidan arütíkulu le?

ANIHEIN dan sanditiwa maguraasuni dan le wasaminarun luagu ‘mabagari wamá saragu dan, ani buin liña lan wabagari lau idiheri’ (Hob. 14:1). Sanditiña meha giñe saragu hádangiñe lubúeingu Heowá ha lánina binadu dan houngua ítara. Añahein meha hádangiñe busentiña meha hóunwegun (1 Uru. 19:2-4; Hob. 3:1-3, 11; 7:15, 16). Lau sun lira, súnwandan meha líchugun Heowá, Bungiu le uágubei hafiñera gurasu houn. Lanwoun lira, adügati Heowá lun labürüdǘn tidan Bíbülia le asuseredubei houn lun gayara lan wafurendeirun lídangiñe luma lun líchugun gurasu woun (Rom. 15:4).

² Lidan arütíkulu le, wayanuhan hawagu fiu hádangiñe lubúeingu Heowá ha agagibudagubaña luma lénrengunga le adügübei lun heferidiruni haguraasun kéiburi: Hosé, le liráü Hakobu, Noemí würi to hilaalibei tani weiriei tuma Rudu to tídiñu; lewita le abürühabalin Sálumu 73, luma apostolu Féduru. Ida liña meha san líchugun Heowá derebugu houn? Ani Ka wafurendeirubei hámagiñe? Chóurugüda lumutiwa óunabagülei lun burí álügüdahani le, “yarafati [lan] Aburemei lun lesefuruniña ha gáribei hasandirunu hanigi, ha féridi hamaalibei hemenigin” (Sal. 34:18).

3, 4. Ka asuseredubei lun Hosé dan le meha nibureingili?

³ Dan le disedü lubéi meha irumu lau Hosé, aba lasubudiragüdüni Heowá lun lidan bián uénedü lachülürüba lan dan lun aban lan gürigia inebewati hadan liduheñu (Agu. 37:5-10).  Gama lumoun, murusun lárigiñe gewenedü lani uénedü burí le aba lasansirun libagari. Lubaragiñe inebe lan houn líbirigu, aba haluguruni kei idamuni, aba lachülürün lun lidamun lan Potifárü, hábuti súdara ehiptuna (Agu. 37:21-28). Lídanrügü murusun dan aba lasansirun libagari Hosé. Úaali meha múnada luma lúguchi le hínsiñebei lun. Lidamunhali meha aban wügüri le meseriwidunti lun Heowá (Agu. 39:1).

⁴ Ábanti lawosudun le gádanbalin Hosé. Aba tíchugun lani Potifárü weiriou lidurun áluga lan Hosé lun láguragunun. Aba ladaürǘn Hosé Ehiptu. Máfaagunti Potifárü lasubudiruni anhein inarüni lubéi gadurun lan Hosé, aba lagüraguágüdüni lau güringüri ani aba ladaüragüdüni (Agu. 39:14-20; Sal. 105:17, 18). Nibureingili meha Hosé, so samina wamá ida liña lan funa lasandiragun lungua dan le lichugún lidurun. Samina wamá ida liña lan gani lan katei le luma liri Heowá. Chóuruti gébuna lan meha Hosé lun lábürüha larüna.

5. Ka ladügübei Hosé lun lagagibudagun luma maguraasuni?

⁵ Siñati meha ladügün Hosé ni kata lun lasansiruni le gádanbalin dan meha le aban lubéi idamuni ni dan le furisunrugu lubéi. Ka íderagubalin lun ítarameme lan arufuda aban lubuidun igaburi? Lubaragiñe lerederun asaminara luagu le lásiñarubei adüga, áfaaguarügüti lun ladügüni wadagimanu le meha ichugúbei lun. Lóugiñe sun katei, ru lumuti Heowá furumiñe lidan libagari, ligía labinirubalin Heowá sun le ladügübei (Agu. 39:21-23).

6. Ida liña san libihin Hosé gurasu lídangiñe luénedü?

⁶ Másiñati giñe ibiha lan Hosé gurasu dan lararamagubei asaminara luagu le meha gewenedü lubéi, le arufudubei larihayabaña lan meha liduheñu ani lasansiruba lan le gádanbalin. Ani ligía asuseredubei. Dan meha le 37 lubéi irumu lau Hosé, aba lagumeserun sun le gewenedü lubéi agunfulira lidan aban lubuidun igaburi (Agu. 37:7, 9, 10; 42:6, 9).

7. Según 1 Féduru 5:10, kaba íderaguawa awanda óuchawaguni?

 ⁷ Ka wafurendeirubei? Haritaguagüda lumutiwa le lásügürübei Hosé, wuriba lan ubóu le ídanbei wawinwanda ani añahein lan gürigia ha gayaraabei hóuseruniwa wuriba. Íbini aban hádangiñe wábirigu gayaraati hóuseruniwa wuriba. Gama lumoun ánhawa arihei Heowá kei waramudaguagüle méiguadunbadiwa ani mígirun wabéi weseriwidun lun (Sal. 62:6, 7; aliiha huméi 1 Féduru 5:10). Haritagua waméi giñe 17 lan meha irumu lau Hosé dan ladügübei Heowá lun gewenedülani uénedü burí ligía. Arufudati le afiñe lan Heowá hawagu lubúeingu ha nibureingiña. Uguñe weyu añahein saragu nibureintiña ha afiñetiña luagu Heowá kei meha ladügüni Hosé, ani hádangiñe añahein furisunrugu madurunga ladüga úaraguameme hamá lun Heowá (Sal. 110:3).

8. Ka meha asuseredubei tun Noemí tuma Rudu?

⁸ Biánñanu meha tisaanigu Noemí lau Elimélekü ani Hudá meha hawinwanda, gama lumoun aba ladagarun aban lueirin ümi lidan sun fulasu, ligía aba lubéi houdin awinwanda lidan amu ageiraü le gíribei Moabü. Ñein aba lounwen Elimélekü, aba terederun Noemí tábugua hau bián tisaanigu wügüriña. Lau lásügürün dan aba hamarieidun tisaanigu hama bián würiña moábüna, Orufá tuma Rudu híribei. Kéiburi diisi irumu lárigiñe, aba hóunwegun bián tisaanigu Noemí marahüñüga (Rudu 1:1-5). Wéiriti meha hagarigu würiña ha. Kaba funati hadüga guentó? Dandu Rudu kei Orufá gayaraagili meha hamarieidun. Agia Noemí, aban würi derebuguharu? Kaba meha óunigiroun? Wéiriti meha tirun darí tariñagun: “Hebé hagúahan nun Noemí, wa humá nun Mará, ladüga gífigüda laali Wabungiute, le Suntigabafu nibagari”. Lárigiñe sun le tásügürübei Noemí aba tagiribudun tárigoun Belén, ani aba tidin Rudu tuma (Rudu 1:7, 18-20).

9. Según Rudu 1:16, 17, 22, ida liña tíchugun Rudu gurasu tun Noemí?

⁹ Ka íderagubarun Noemí? Ínsiñeni le úaraguati. Arufuda tumuti Rudu luwuyeri ínsiñeni le tun Noemí dan le terederubei tuma (aliiha huméi Rudu 1:16, 17, 22). Lidan uburugu Belén, nadagimeintu Rudu saragu abudaha türigu lun teigin tuguya tuma Noemí. Ladüga lira aba hadimureha gürigia buidu tuagu (Rudu 3:11; 4:15).

10. Ida liña larufuduni Heowá línsiñehabu houn gürigia gudemetiña kei Rudu tuma Noemí?

¹⁰ Ruti meha Heowá aban lúrudu houn ísüraelina le arufudubalin lugudemehabu hawagu gürigia gudemetiña kei Rudu tuma Noemí. Ruti gumadi houn lumutuniña lun malubahan hamani sun ilaü lídangiñe hachari, mosu meha hígirun habá gudemetiña (Fad. 19:9, 10). Ligíati gayara lubéi meha tibihin Rudu tuma Noemí éigini sin harihadiha.

11, 12. Ka ladügübei Boosu tuma Rudu lun tagundaarun Noemí?

¹¹ Aban meha wügüri rísiti le gíribei Boosu laburemebei ichari le ñein lubéi meha tawadigimarida Rudu. Wéiritu meha lanigi Boosu lau úaraguni luma ínsiñeni le tarufudubei Rudu tun Noemí to tágürü. Ligíati, aba lamarieidun Boosu tuma Rudu ani aba lagañeihani fulasu le meha hánibei tiduheñu Noemí, lun galagante hamani tirahüñü Rudu (Rudu 4:9-13). Lau lásügürün dan aba gasaani hamá aban irahü le meha gíribei Owedi, ligía meha lárugutibei urúei Dawidi (Rudu 4:17).

¹² Samina wamá luagu ugundani le tasandirubei Noemí óuyuahei Owedi ani aba tadaarunu tanigi íchiga seremei lun Heowá! Ani gúndaatimaboun Noemí tuma Rudu danme le háguyugun ani ábame híchugun fe hádangiñe lan lagüchagu Owedi liabin Mesíasi le meha füramase wabéi.

13. Ka katei súdiniti gayaraabei wafurendeirun lúmagiñe abahüdaguni tuáguti Noemí tuma Rudu?

 ¹³ Ka wafurendeirubei? Dan le wagagibudagun luma lénrengunga, másiñati weferidiruni wemenigin ani aba tagaridun wanigi. Háfuga wasaminarun siñá lan wáfuridun lídangiñe le gádanbaliwa. Dan le lasuseredun lira, lunti wafiñerun sunsuinagubei luagu Wáguchi le siélubei ani lunti giñe werederun yarafa houn wábirigu. Subudi wamuti mama lan súnwandan lagidarubei lan Heowá waturobulin wawéi, ítara kei Noemí magiribudagüdün lumuti tani weiriei hama tisaanigu tun. Íbini ítara líderagubadiwa awanda, másiñati lau harufudun wábirigu ínsiñeni le úaraguati woun (Ari. 17:17).

14. Ka uagu leferidirubalin aban lewita luguraasun?

¹⁴ Aban meha lewita abürühabalin Sálumu 73. Ibihatiña meha lewitagu aban lubuidun chansi lun heseriwidun tidan muna to ayusurúboun lun lahudurawagún lun Heowá. Íbini ítara, chülüti meha dan lun leferidiruni lewita le abürühabalin Sálumu 73 luguraasun ladüga aba lagimugaruniña ha salufuribaña hama ha barüguabaña houngua (Sal. 73:2-9, 11-14). Genegeti buidu lan meha lidin houn ha salufuribaña luma houn ha barüguabaña houngua: rísitiña meha, buiti meha habagari ani genegeti madiheridun hamá meha luagu ni kata. Aba meha leferidiruni lewita le luguraasun dan le larihini katei le, darí lun lariñagun: “Málati haruma tan nanigi, ani haruma ligía núhabu lídangiñe sun wuribani!”. Furanguti gayara lan meha ladügün katei le lun leferidiruni lumadagua luma Heowá.

15. Según Sálumu 73:16-19, 22-25, ka ladügübei lewita le abürühabalin Sálumu 73 lun liñuragun lídangiñe maguraasuni?

¹⁵ (Aliiha huméi Sálumu 73:16-19, 22-25). Beluti meha lewita le abürühabalin Sálumu 73 “lúbiñoun Bungiu”. Ñein, hadan amu ísüraelina ha meha áhuduragubaña lun Bungiu, gayaraati meha lasandirun gálumaü, lasaminarun buidu, ani furíei ligía luagu le gádanbalin. Adügati lira lun ladaaruni lagu ani aba gunfuranda lani mama lan meha larufuduña lichú-aau ani anhein lan asigira ítara gayara lan leferidiruni lumadagua luma Heowá. Aba giñe gunfuranda  lani añahein lan salufuritiña lidan aban “fulasu guyeti” ani wuribabei lan hagumuchun. Ka méhati láranibei gimugaü luma maguraasuni le lasandirubei lewita le? Mosu meha larihini katei kei larihini Heowá. Dan le ladügüni le, aba lasandirun aban darangilaü ani aba lagundaarun. Ábati lariñagun: “Dan le búmañadina lan, úati ni kata nabusenrun ubouagu”.

16. Ka wafurendeirubei lúmagiñe lewita le abürühabalin Sálumu 73?

¹⁶ Ka wafurendeirubei? Maweiyasun wamá agimugarei habagari gürigia wuribatiña ha genegeti buidu lan dan houn. Lagumuchaguba hagundan ani mawinwandunbaña lun sun dan (Apur. 8:12, 13). Ánhawa agimugaraña gayaraabei weferidiruni waguraasun ani gayaraabei giñe weferidiruni wamadagua luma Heowá. Ligíati, ánhawa agimugaraña wuribatiña, adüga waméi le meha ladügübei lewita: aganba waméi ladundehan Wabungiute le hínsiñehabuti ani sügǘ wamá dan hama ha adügübalin lugundan. Dan le hínsiñe lan Heowá woun lóugiñe sun katei, wadarirubei ugundani le inarüniti ani werederuba lidan üma le anügübei lidoun “ibagari magumuchaditi” (1 Tim. 6:19).

17. Ka meha adügübei lun leferidiruni Féduru luguraasun?

¹⁷ Aban meha wügüri chubaluguti apostolu Féduru. Lau sun lira, anihein meha dan ariñagati o adügati katei masaminarunga, lárigiñeme lira aba burí lasaküriha ladüga le lariñagubei o le ladügübei. Kéiburi, dan le lariñagubei Hesusu houn lani apostolugu lóunweba lan ani súfuri ligíame, aba ladeinha Féduru lun, ariñageina: “Siñati lasuseredun katei le bun!” (Mat. 16:21-23). Aba lererehan Hesusu lun. Dan le hóudinbei saragu gürigia lun hárügüdüni Hesusu, aba láchuguni Féduru larigei aban lumusun fádiri le íñutimabei (Huan 18:10, 11). Lanwoun lira, apantahati meha giñe Féduru dan le lariñagubei maweiyasunbei lan ígirei Hesusu íbini anhein hígira ha híbiri (Mat. 26:33). Gama lumoun, le lueirin lafiñen Féduru luougua  aba lanufudedun hawéi wügüriña darí lun lariñagun ǘrüwa wéiyaasu ibidiñe lan Hesusu lun. Lau saragu íruni, “aba láfuridun Féduru ñéingiñe, aba layahuahan lau igarigu” (Mat. 26:69-75). Chóuruti álügüdagua lan meha lungua anhein feruduna lubéi lan Hesusu.

18. Ida liña líderaguni Hesusu Féduru iñuragua lídangiñe maguraasuni?

¹⁸ Mígirunti meha Féduru lun ladügün lábürühan larüna lun meseriwidun lan lun Heowá. Lárigiñe le asuseredubei, sigiti eseriwida lun Heowá úara hama ha híbiri apostolugu (Huan 21:1-3; Adü. 1:15, 16). Ka íderagubalin? Aba laritaguni furíei lan meha Hesusu luagu, lun meferidirun lani lafiñen. Ani amuriahati giñe Hesusu luma lun lagiribudun lun lederbudagüdüniña líbirigu. Dan lárigiñe, aba meha larufudagun Hesusu lungua lun Féduru. Chóuruti lun lan meha líchugun gurasu lun (Luk. 22:32; 24:33, 34; 1 Ko. 15:5). Arufudaguati meha giñe Hesusu lungua houn apostolugu lárigiñe hásügürüni sun áriebu óuchaha ani mañugunga ni kata. Ruti Hesusu chansi lun Féduru lun lariñaguni lun anhein hínsiñegili lubéi lun. Ferudunalali meha Hesusu Féduru ani aba líchugun lanwoun lidasin (Huan 21:15-17).

19. Según Sálumu 103:13, 14, ka lasaminarubei Heowá luagu wachara ani ida luba wáyeihani?

¹⁹ Ka wafurendeirubei? Arufudati ligaburi lóuseruniña Hesusu lani disipulugu gudemehabu lan ítara kei Lúguchi. Ligíati, dan le wachararun masaminara wamá úabei lan feruduna lániwa Heowá. Mabulieida waméi ligía lan labusenrubei Satanási lun wasaminarun. Lubaragiñe lira, áfaagua wamá waríagun woungua ani ariha wamañame giñe ha achararubaña woun lau ligiaméme ínsiñeni luma gudemehabu libe le aubei larihaña Wáguchi le siélubei (aliiha huméi Sálumu 103:13, 14).

20. Kaba wariha lidan leweñegua arütíkulu?

²⁰ Arufudati abahüdaguni luagu Hosé, Noemí tuma Rudu, lewita luma Féduru ‘yarafati lan Heowá houn ha gáribei hasandirunu hanigi’ (Sal. 34:18). Anihein dan ígira lumutiwa Heowá lun wagagibudagun luma lénrengunga o lun weferidiruni wemenigin. Íbini ítara, dan le wawandun lau lídehan, aba lederebugudun wafiñen (1 Fe. 1:6, 7). Lidan leweñegua arütíkulu, warihiba ida liña lan líderaguniña Heowá ha úaraguabaña lun dan le heferidiruni haguraasun, másiñati ladüga lan hachara guánarügü o ladüga amu gádantiña.