1-2. Ki nou pou vwar dan sa lartik?

I KAPAB ki parfwa nou mazinen ki lavi i kourt e i “ranpli avek traka.” (Zob 14:1) Alor nou kapab konpran si sa i fer nou dekouraze. Bokou serviter Zeova dan Labib ti santi koumsa. Serten ti menm anvi mor. (1 Rwa. 19:2-4; Zob 3:1-3, 11; 7:15, 16) Me plizyer fwa Zeova in rekonfort zot e ankouraz zot. Zot leksperyans in ganny ekrir dan Labib pour rekonfort e ansenny nou.​—Rom. 15:4.

² Dan sa lartik, nou pou vwar legzanp serten serviter Zeova ki ti pas dan bann sityasyon ki ti fer zot dekouraze. Nou pou vwar legzanp Zozef garson Zakob, legzanp en vev ki ti apel Naomi ek son belfiy Rit, legzanp sa Levit ki ti ekrir Psonm 73 e legzanp zapot Pyer. Ki mannyer Zeova ti ankouraz zot? Ki nou kapab aprann avek zot leksperyans? Larepons sa bann kestyon i reasir nou ki “Zeova i pre avek sa bann ki annan leker brize e i sov bann ki dekouraze.”​—Ps. 34:18, not, NWT.

3-4. Ki ti arive avek Zozef ler i ti ankor zenn?

³ Ler Zozef ti annan 17 an, Zeova ti fer li ganny de rev. Sa bann rev ti montre ki en zour Zozef ti pou vin en dimoun enportan e son fanmir ti pou respekte li. (Zen. 37:5-10) Me pa bokou letan apre ki i ti’n ganny sa bann rev, bann move keksoz ti arive avek li. Sa letan, son bann frer ti napa ditou respe pour li e zot ti vann li konman lesklav. Pli tar, i ti vin en lesklav dan lakour en zofisye Ezipsyen ki ti apel Potifar. (Zen. 37:21-28) Dan zis en ptigin letan, lavi Zozef ti sanz konpletman. I ti nepli kot son papa ki ti kontan li. I ti vin en senp lesklav Lezip e i ti pe travay  pour en zonm ki pa ti konn Zeova.​—Zen. 39:1.

⁴ Apre sa, keksoz ti vin pli difisil pour Zozef. Madanm Potifar ti dir ki Zozef ti’n esey vyol li. Potifar pa ti rode si sa ti vre. O kontrer i ti fer met Zozef dan prizon e zot ti anmar son lipye avek lasenn. (Zen. 39:14-20; Ps. 105:17, 18) Sa letan, Zozef ti en zenn garson. Mazinen ki mannyer Zozef ti’n bezwen santi ler i ti ganny akize konmkwa i ti’n esey vyol madanm Potifar. Osi, mazin lo repros ki sa lakizasyon ti’n kapab anmennen lo non Zeova. Zozef ti annan rezon pour li dekouraze!

5. Ki mannyer Zozef ti sirmont dekourazman?

⁵ Zozef pa ti kapab sanz son sityasyon ler i ti en lesklav e ler i ti dan prizon. Me kwa ki ti ed li pour reste pozitif? Dan plas konsantre lo sa ki i pa ti kapab fer, i ti fer son mye dan sa travay ki i ti’n ganny demande pour fer. Pli enportan ankor, Zozef ti reste konsantre lo fer plezir Zeova. Akoz sa, Zeova ti beni tou sa ki Zozef ti fer.​—Zen. 39:21-23.

6. Ki mannyer bann rev ki Zozef ti gannyen dan lepase ti rekonfort li?

⁶ I kapab ki Zozef ti ganny ankouraze ler i ti mazin lo bann rev ki Zeova ti’n donn li dan lepase. Sa bann rev ti montre li ki i ti pou vwar son fanmir ankor e ki son sityasyon ti pou sanze. Sanmenm ki ti arive. Ler Zozef ti annan apepre 37 an, son bann rev ti konmans vin vre dan en fason ekstraordiner.​—Zen. 37:7, 9, 10; 42:6, 9.

7. Dapre 1 Pyer 5:10, kwa ki pou ed nou fer fas avek bann difikilte?

⁷ Leson pour nou. Leksperyans Zozef i fer nou rapel ki lemonn i kriyel e ki dimoun pou tret nou dan fason ki enzis. Menm en frer oubyen en ser i kapab tret  nou dan en fason ki enzis. Me si Zeova i nou Ros, nou pa pou dekouraze oubyen aret servi li. (Ps. 62:6, 7; lir 1 Pyer 5:10.) Rapel ki i kapab ki Zozef ti annan apepre 17 an ler i ti ganny sa bann rev. Sa i montre ki Zeova i annan konfyans dan bann zenn ki servi li. Ozordi i annan bokou zenn ki parey Zozef. Zot osi zot annan lafwa dan Zeova. Serten parmi zot in menm ganny anprizonnen dan en fason enzis akoz zot fidelite anver Bondye.​—Ps. 110:3.

8. Ki ti arive avek Naomi ek Rit?

⁸ Naomi ek son fanmir ti kit zot lakour Zida akoz i ti annan en lafamin terib e zot ti al reste dan en pei etranze ki ti apel Moab. Ler zot ti Moab, msye Naomi, Elimelek ti mor e i ti kit Naomi avek zot de garson. Pli tar, sa de garson ti marye avek de madanm Moabit ki ti apel Rit ek Orpa. Apepre di-z-an pli tar, bann garson Naomi ti mor e vi ki zot ti napa zanfan, zot madanm ti reste tousel. (Rit 1:1-5) Sa trwa madanm ti’n bezwen vreman sagren! Byensir Rit ek Orpa ti kapab remarye. Me lekel ki ti pou pran swen avek Naomi ki ti pe vye? Naomi ti sitan dekouraze ki i ti dir: “Pa apel mwan Naomi, ki vedir Erez, apel mwan Mara, savedir anmer, akoz Bondye Toupwisan in rann mon lavi vreman anmer!” Apre tou sa soufrans, Naomi ti deside retourn Betleenm e Rit ti al avek li.​—Rit 1:7, 18-20.

9. Dapre Rit 1:16, 17, 22, ki mannyer Rit ti ankouraz Naomi?

⁹ Sa ki ti ed Naomi dan son sagrinasyon i lanmour fidel. Par egzanp, ler Rit ti reste avek Naomi, i ti demontre lanmour fidel pour li. (Lir Rit 1:16, 17, 22.) Ler zot ti Betleenm, Rit ti travay dir pour anmas lagrenn pour zot de Naomi. Akoz sa, tou dimoun ti vwar ki Rit ti en bon madanm ki ti travay dir.​—Rit 3:11; 4:15.

10. Ki mannyer Zeova ti demontre lanmour pour bann pov parey Naomi ek Rit?

¹⁰ Zeova ti’n donn nasyon Izrael en lalwa ki montre ki i annan konpasyon pour bann dimoun pov parey Naomi ek Rit. I ti dir son pep ki ler zot fer rekolt lo zot later, zot pa ti devret anmas bann keksoz ki’n pous lo balizaz zot plantasyon me zot ti devret kit sa pour bann pov gannyen. (Lev. 19:9, 10) Alor Naomi ek Rit pa ti bezwen mandyan pour ganny manze.

11-12. Ki mannyer Boaz ti fer Naomi ek Rit zwaye?

¹¹ Sa plantasyon kot Rit ti al anmas lagrenn ti pou en zonm ris ki ti apel Boaz. Ler Boaz ti vwar ki mannyer Rit ti demontre fidelite anver Naomi e ki kantite Rit ti kontan Naomi, sa ti enpresyonn li. Alor, pli tar Boaz ti marye avek Rit e i ti reaste later ki ti pour fanmir Naomi koumsa bann zanfan Rit ti pou kapab erit sa later pli tar. (Rit 4:9-13) Boaz ek Rit ti ganny en garson ki zot ti apel Obed, ki pli tar ti vin granpapa Lerwa David.​—Rit 4:17.

¹² Zis mazinen ki mannyer Naomi ti vreman zwaye ler i ti pran Obed dan son lebra e remersye Zeova! Me Naomi ek Rit pou pli ere ler zot pou resisite e aprann ki Obed ti en zanset Zezi Kri.

13. Ki leson enportan nou kapab aprann avek leksperyans Naomi ek Rit?

¹³ Leson pour nou. Ler nou pas dan problenm, nou kapab santi nou dekouraze. Petet nou krwar ki nou pa pou kapab trouv en solisyon pour nou problenm.  Dan sa bann moman, nou devret depan lo nou Papa ki dan lesyel e reste pros avek nou bann frer ek ser dan kongregasyon. I vre ki Zeova pa toultan rezourd nou problenm. Par egzanp, i pa ti resisit msye ek bann garson Naomi. Me i pou ed nou fer fas avek nou problenm. Parfwa i kapab ed nou atraver bann bon keksoz ki nou bann frer ek ser i fer pour nou.​—Prov. 17:17, NWT.

14. Akoz en Levit ti dekouraze?

¹⁴ Sa ekriven ki ti ekri Psonm 73 ti en Levit. I ti annan sa privilez pour servi kot tanp Zeova. Kantmenm sa, i ti annan en moman kot i ti vreman dekouraze. Akoz? I ti konmans zalou bann move dimoun ek bann arogan, pa akoz i ti anvi fer bann move keksoz me akoz zot ti pe pli prospere dan lavi ki li. (Ps. 73:2-9, 11-14) I ti paret konmsi zot ti annan tou. Zot ti ris, annan en bon lavi e zot ti napa okenn traka. Ler sa Levit ti vwar sa, i ti dekouraze e dir: “Mon’n reste onnet pour nanryen; mon’n lav mon lanmen pour montre mon linosans.” Sa sityasyon ti’n kapab fer li aret servi Zeova.

15. Dapre Psonm 73:16-19, 22-25, ki mannyer sa Levit ki ti ekri sa psonm ti sirmont dekourazman?

¹⁵ Lir Psonm 73:16-19, 22-25, NWT. * Sa Levit ti “antre dan gran sanktyer Bondye.” Dan lakaz Bondye, ansanm avek bann ki ti pe servi Zeova, sa Levit ti kapab analiz son sityasyon dan en fason kalm, reflesir byen e priy Zeova. Apre sa, i ti realize ki son fason panse ti bet e ki avek letan i ti pou kapab perdi son lanmitye avek Zeova. I ti osi konpran ki bann  move dimoun ti “lo en teren glise” e ki “en destriksyon terib [pou] vin lo zot.” Pour sa Levit kapab aret zalou e dekouraze, i ti bezwen vwar keksoz parey Zeova i vwar. Apre ki i ti fer sa, i ti nepli dekouraze e i ti zwaye. I ti dir: “Apard ki [Zeova], mon pa anvi nanryen lo later.”

16. Ki leson nou aprann avek en Levit?

¹⁶ Leson pour nou. Nou pa devret zanmen zalou bann move dimoun ki paret pe prospere. Sa lazwa ki zot annan pa pou dire e zot pa pou viv pour touzour. (Ekle. 8:12, 13, NWT) Si nou zalou zot, nou pou dekouraze e nou kapab perdi nou lanmitye avek Zeova. Alor, si ou konmans zalou sa bann dimoun, fer sa ki sa Levit ti fer. Obei konsey Bondye e pas letan avek bann ki fer lavolonte Bondye. Ler ou kontan Zeova plis ki okenn lezot keksoz, ou pou vreman ere e ou pou reste lo sa semen ki anmenn ver “sa vre lavi.”​—1 Tim. 6:19.

17. Kwa ki ti’n kapab fer Pyer dekouraze?

¹⁷ Zapot Pyer ti en zonm ki ti devoue. Me parfwa i ti dir oubyen fer bann keksoz san reflesir ki i ti regrete pli tar. Par egzanp, ler Zezi ti dir son bann zapot ki i ti pou soufer e mor, Pyer ti koz severman avek li e dir: “Pa bezwen dir sa Senyer, sa pa pou zanmen ariv avek ou.” (Mat. 16:21-23) Zezi ti koriz Pyer. Ler en group dimoun ti vin aret Zezi, Pyer ti azir san reflesir e i ti koup zorey lesklav granpret. (Zan 18:10, 11) Ankor enn fwa, Zezi ti koriz li. An plis, Pyer ti fer vantar e dir ki li i pa pou zanmen kit Zezi menm si lezot zapot i fer li! (Mat. 26:33) Me Pyer pa sitan for parey i ti krwar. Pli tar sa zour swar, Pyer ti telman per ki trwa fwa i ti dir ki i pa konn Zezi. Sa ti fer Pyer sitan dekouraze ki i ti al “deor e plere asodlarm.” (Mat. 26:69-75) Petet i  ti demann son lekor si Zezi ti pou pardonn li.

18. Ki mannyer Zezi ti ed Pyer sirmont dekourazman?

¹⁸ Pyer pa ti vin sitan dekouraze ki sa ti fer li aret servi Zeova. Apre ki i ti’n fer sa fot, i ti kontinyen servi Zeova ansanm avek lezot zapot. (Zan 21:1-3; Akt 1:15, 16) Kwa ki ti ed li pour santi li pli byen? Pyer ti rapel ki pli boner Zezi ti priye ki lafwa Pyer pa afebli konpletman e ki Zezi ti ankouraz li pour retournen e fortifye son bann frer. Zeova ti reponn sa lapriyer senser. Pli tar, Zezi ti aparet avek Pyer e i tre probab ki i ti fer sa pour ankouraz Pyer. (Lik 22:32; 24:33, 34; 1 Kor. 15:5) Zezi ti osi aparet avek tou bann zapot apre ki zot ti’n al lapes tou lannwit e zot pa ti’n atrap okenn pwason. Sa zour, Zezi ti donn Pyer sa loportinite pour dir Zezi ki kantite i kontan li. Zezi ti’n pardonn son bon zanmi e i ti donn li plis responsabilite.​—Zan 21:15-17.

19. Ki mannyer Psonm 103:13, 14 i ed nou konpran ki Zeova i panse lo nou ler nou fer pese?

¹⁹ Leson pour nou. Lafason ki Zezi ti tret Pyer i montre ki Zezi i annan konpasyon zis parey son Papa. Alor, ler nou fer fot, nou pa devret krwar ki Zeova pa pou zanmen pardonn nou. Gard antet ki Satan ki anvi nou mazin koumsa. Nou devret mazin byen lo ki mannyer Zeova i kontan nou, i konpran ki nou annan limit e i anvi pardonn nou. Osi, nou devret swiv son legzanp ler lezot i bles nou.​—Lir Psonm 103:13, 14.

20. Ki nou pou diskite dan sa lartik ki swiv?

²⁰ Legzanp Zozef, Naomi, Rit, en Levit ek zapot Pyer i asir nou ki “Zeova i pre avek sa bann ki annan leker brize.” (Ps. 34:18, NWT) I les nou pas dan bann difikilte e i les nou santi nou dekouraze parfwa. Kantmenm sa, ler Zeova i ed nou fer fas avek difikilte, nou lafwa i vin pli for. (1 Pyer 1:6, 7) Dan sa lartik ki swiv, nou pou diskit plis lo ki mannyer Zeova i ed son bann serviter fidel ki dekouraze akoz zot lenperfeksyon oubyen akoz bann sirkonstans difisil.