1-2. Nemene la hne së hna troa ce wang ngöne la tane mekun celë?

 AME itre xaa ijin, easa qaja ka hape, xoxopatre hi la mel nge “atraqate la gomegom.” (Iobu 14:1) E cili, easa kucakuca me akötr. Celë hi lai ka traqa ekö kowe la itre hlue i Iehova. Ame itre xan, angatr a ajane troa mec. (1 Ite jo. 19:2-4; Iobu 3:1-3, 11; 7:15, 16) Ngo hnei Iehova Akötresie hna ithuecatr koi angatr me aegöcatrenyi angatr. Eje hi, hna cinyihane lai e hnine la Tusi Hmitrötr, matre troa akeukawane la hni së me hamë ini koi së.—Rom. 15:4.

² Ame ngöne la tane mekun celë, tro sa ce ithanatane la tulu ne la itre xaa hlue i Iehova ka catre xomihnine la itre jol ka tru. Tro sa ce wang la tulu i Iosefa, nekö i Iakobo, Naomi me Rutha tresi eahlo, memine la ketre atre Levi lo ka cinyihane la tusi Salamo 73, me Peteru aposetolo. Nemene la aqane xatua angatr hnei Iehova? Nemene la itre ini hne së hna xom qa ngöne la tulu i angatr? Tro la aqane sa la itre hnyinge celë a amamane koi së laka, “eashenyi Iehova koi angete thë fë hni; nge kola amele ange aköte u.”—Sal. 34:18.

3-4. Nemene la jol hna cile kow hnei Iosefa?

³ Ame ngöne la kola 17 lao macatre i Iosefa, hnei angeic hna alua pu, nge lue pu qaathei Akötresie. Hnei angeic hna puje laka, tro angeic a ketre atr ka tru, nge troa metrötrë angeic hnene la fami angeic. (Gen. 37:5-10) Ngo thupene la Iosefa a pu, nyimutre la itre jol ka traqa koi angeic. Tha hna metrötrë angeice kö hnene la itre sipu trejin me angeic. Hnei angatr hna salemë angeic matre troa nyi hlu. Hnei angeic e thupen hna huliwa koi Potifera, ketre taane la hnanyijoxu i Farao. (Gen. 37:21-28) Eje hi, nyimenyime la aqane  traqa la itre jol koi Iosefa. Angeice hi lo nekö hnimina ne la keme i angeic, ngo angeic ha huliwa e Aigupito kowe la ketre atr ka thatre Iehova.—Gen. 39:1.

⁴ Ngo hetre jole palakö hna troa cile kow hnei Iosefa. Hnene la föe i Potifera hna upezö angeic ka hape, hnei angeic hna thele troa angazo eahlo. Tha hnei Potifera kö hna pane thele la nyipici. Hnei nyidrëti hna othi Iosefa me akalabusi angeic. (Gen. 39:14-20; Sal. 105:17, 18) Pane mekune jë la akötr ka eje thei Iosefa! Maine jë, hnei angeic hna mekun la thangane lai kowe la ëje i Iehova. Celë hi kepin matre, kucakuca catre Iosefa.

5. Nemene la hnei Iosefa hna kuca matre tha tro kö a kucakuca?

⁵ Eje hi laka, thatreine kö Iosefa troa apatrene la itre jol. Nemene la ka xatua angeic? Tha hnei Iosefa kö hna mekun lapane la itre ewekë hnei angeic hna thatreine kuca. Hnei angeice pe hna catre kuca la hnëqa hna ahnithe koi angeic. Eje hi, hnei angeic palahi hna thele troa amadrinë Iehova. Nge hnei Iehova hna amanathithine la nöjei huliwa i angeic.—Gen. 39:21-23.

6. Nemene la aqane xatua Iosefa hnene lo itre pu i angeic?

⁶ Maine jë, hnei Iosefa hna lapa mekun la itre pu i angeic ekö, nge celë hi ka ithuecatre koi angeic. Eje hi, itre ej a amekunë angeic laka, tro hmaca angeic a iöhny memine la fami angeic, nge tro ha lolo me madrin la mele i angeic. Nge celë hi la ka traqa. Ame lo kola 37 lao macatre i Iosefa, hna nyiqane eatr la itre pu i angeic.—Gen. 37:7, 9, 10; 42:6, 9.

7. Thenge la 1 Peteru 5:10, nemene la ka troa xatua së troa xomihnine la itre jol?

⁷ Itre ini koi së. Kola amamane hnene la tulu i Iosefa laka, ka ngazo catre la fen nge ijije hi troa qanangazo së. Ijije fe troa akötrë së hnene la ketre trejin. Ngo maine Iehova la Giti së me Hnapo së, tha tro kö sa  kucakuca me nuetriji Nyidrë. (Sal. 62:6, 7; e jë la 1 Peteru 5:10.) Eje hi, 17 hi lao macatre i Iosefa ngöne la Iehova a hamë angeic la itre pu. Kola amamane laka, Iehova a mejiune kowe la itre thöth ka nyihlue i Nyidrë. Alanyimu enehila la itre nekötrahmany me neköjajiny ka tui Iosefa me catre lapaune koi Iehova. Ame la itre xan, hna akalabusi angatr ke, angatr a mele nyipici koi Akötresie.—Sal. 110:3.

8. Nemene la ka traqa koi Naomi me Rutha?

⁸ Ame la kola jiin atraqatr, hnei Naomi me fami eahlo hna feke qa Iudra a tro Moaba, ketre nöje trenyiwa. E cili, hna meci hnei Elimelek, föi Naomi, matre eahlo caasi pë hë memine la lue nekö i eahlo trahmany. Thupene lai, hnei nyidro hna faipoipo me Rutha me Orepa, lue föe ne Moaba. Ngo treen lao macatre thupen, hnene la lue nekö i Naomi hna mec nge pëkö nekö i nyidro. (Rutha 1:1-5) Pane mekune jë la akötre i Naomi, Rutha me Orepa! Ijije hi tro Rutha me Orepa hmaca a faipoipo. Ngo drei pë hë la ka troa thupë Naomi ke, qatre föe hë eahlo? Kucakuca catre Naomi, matre öni eahlo: “The hë ni hmaca kö Naomi, ngo Mara, ke haitre hë la meleng hnei Akötresie.” (Rutha 1:20) Tru la akötre i Naomi, matre hnei eahlo hna bëek a tro Bethelema, nge hnei Rutha hna ce tro me eahlo.—Rutha 1:7, 18-20.

9. Thenge la Rutha 1:16, 17, 22, tune kaa la aqane xatua Rutha hnei Naomi?

⁹ Ame la ka xatua Naomi ngöne la eahlo a kucakuca me akötr, tre, hnene la hna hnimi eahlo hnei itre xan. Celë hi lai hna kuca hnei Rutha. Tha hnei angeice kö hna nuaxöji Naomi. (E jë la Rutha 1:16, 17, 22.) Ame e Bethelema, hnei angeic hna catre hlem la qitr ka lapa pe, thatraqai angeic me Naomi. Celë hi matre hna qaja aloinyi angeic hnei itre xan.—Rutha 3:11; 4:15.

10. Nemene la aqane amamane Iehova laka, Nyidrëti a utipine la itre ka pë ewekë, tui Naomi me Rutha?

¹⁰ Ame lo Iehova a hamëne kowe la nöje Isaraela la ketre wathebo, hnei Nyidrëti hna amaman laka, Nyidrëti a utipine la itre ka pë ewekë, tui Naomi me Rutha. Thenge la wathebo cili, tha tro kö angetre Isaraela a menuën asë la zi angatr. Loi e tro angatr a nue la itre ngon thatraqane la itre ka pë ewekë. (Lev. 19:9, 10) E cili, tha hna ahmahmanyi Naomi kö me Rutha. Tha hnei nyidroti kö hna sipo manie. Hnei nyidroti pe hna huliwa matre hetre nyine tro nyidroti a xen.

11-12. Nemene la aqane amadrinë Naomi me Rutha hnei Obeda?

¹¹ Hnei Rutha hna huliwa ngöne la hlapa i Boaza, ketre atr ka trenamo. Hna ketri Boaza ngöne la nyidrëti a öhne la aqane hnimi Naomi hnei Rutha. Celë hi matre, hnei Boaza hna faipoipo me Rutha. Hnei nyidrëti fe hna itöne la itre mo ne la fami Naomi, matre tro pë hë itre edrö thatraqane la itre nekö i nyidro. (Rutha 4:9-13) Ame e thupen, hnei nyidroti hna hnaho me hëne la nekö i nyidro ka hape, Obeda, qaaqa i Dravita joxu.—Rutha 4:17.

¹² Pane mekune jë la madrine i Naomi ngöne la eahlo a xepi Obeda! Maine jë, hnei Naomi hna olen me atrunyi Iehova. Ngo hetre itre xaa manathith palakö hna troa kapa elany hnei Naomi me Rutha. Ame la kola troa amele nyidroti hmaca, tro nyidroti a öhn laka, Obeda la ketre xötrapane i Iesu Keriso, ene la Mesia!

13. Nemene la itre ini hne së hna xom qa ngöne la tulu i Naomi me Rutha?

¹³ Itre ini koi së. Ame ngöne la kola traqa la itre jol, easa kucakuca me akötr. Easa  mekun laka, pëkö nyin la jole së. Ngo loi e tro sa catre mejiune kowe la Keme së e hnengödrai, me easenyi catr kowe la itre trejin. Eje hi, tha tro kö Iehova a apatrene la itre jol. Tha hnei Nyidrëti kö hna amelene la föi Naomi me lue nekö i eahlo. Ame pe, tro kö Nyidrëti a xatua së troa xomihnine la itre akötr. Maine jë, tro Nyidrëti a upe la itre trejin troa xatua së me hnimi së.—Ite Edomë 17:17.

14. Pine nemene matre hna kucakuca hnene la atre Levi?

¹⁴ Ketre atre Levi la ka cinyihane la tusi Salamo 73. Eje hi, hna hamë angeic la ketre hnëqa ka tru, ene la troa huliwa ngöne la uma hnë atrunyi Iehova. Ngo ame pe, hnei angeice fe hna hane kucakuca. Pine nemen? Pine laka, hnei angeic hna piine la mele ne la itre atr ka ngazo. (Sal. 73:2-9, 11-14) Eje hi, lolo me tingeting la mele ne la itre ka trenamo. Celë hi matre, önine la atre cinyihane la Salamo: “Nyipici gufa kö la hnenge hna nyidrawane la hning, me kölaime ngöne la thina ka pë ethan.” Celë hi aqane mekun ka troa ajojezi angeic, me upi angeic troa nue la huliwa i Iehova.

15. Thenge la Salamo 73:16-19, 22-25, nemene la ka xatuane la atre Levi matre troa cile kowe la ketre jol?

¹⁵ E jë la Salamo 73:16-19, 22-25. Hnene la atre Levi hna tro “kowe la ēnē i Akötesie” memine la itre xaa hlue i Iehova. E cili, hnei angeic hna mekun la jole ka eje thei angeic me thith. Trotrohnine hë angeic e thupen laka, tha ka loi kö la aqane mekune i angeic, nge maine ju, tro hë angeic a nuetriji Iehova. Hnei angeice fe hna öhn laka, itre atr ka ngazo “ngöne la ite ga ucic” nge tro ha “nue angate troa kei kowe la hnëjin.” Eje hi, tha piine hmaca kö angeic la mele i angatr. Hnei angeic hna saze me catre thele la aqane waiewekë i Iehova. E cili, madrin me tingeting la hni angeic. Öni angeic koi Iehova: “Pëkö kete hnenge hna ajan’ e celë fen, nga Cilieti hmekuje hi.”

16. Nemene la ini hne së hna xom qa ngöne la tulu ne la atre Levi?

¹⁶ Itre ini koi së. Tha tro kö sa piine la  mele ne la itre ka ngazo. Tha ka cile huti kö la madrine i angatr, nge tha tro kö angatr a hetrenyi la mele ka pë pun. (Ate cai. 8:12, 13) Eje hi, maine tro sa piine la mele ne la itre ka ngazo, tro hë sa kucakuca me thë la aqane imelekeu së me Iehova. Maine traqa ju së cile kowe la jole cili, loi e tro sa nyitipune la atre Levi. Loi e tro sa trongëne la itre eamo ka lolo nge ka amamane la etrune la ihnimi Iehova. Loi e tro fe sa nyisineene la itre ka kuca la aja i Nyidrë. Maine tro sa thele troa acatrene la ihnimi së koi Iehova hune la itre xaa ewekë, tro hë sa madrin me lapa ngöne la gojeny ka tro kowe “la nyipi mel.”—1 Tim. 6:19.

17. Pine nemene matre kucakuca catre Peteru?

¹⁷ Ame Peteru ke, ketre atr ka enij nge ka canga ithanata. Tha xoue angeice kö troa qaja la itre mekun me aliene hni angeic. Ame pe e thupen, hnei hnei angeic hna canga qaja me kuca la ketre ewekë, ngo tha pane mekune pe. Matre kucakuca catre angeic e cili. Ame lo Iesu a qaja kowe la itre aposetolo ka hape, troa akötrë nyidrë me humuthi nyidrë, hnei Peteru hna canga sa ka hape: “Tha tro kö a traqa lai koi nyipë!” (Mat. 16:21-23) E cili, hnei Iesu hna ameköti angeic. Nge ame lo kola othi Iesu, hnei Peteru hna uthe la taua me thupa la hnangenyë ne la hlue ne la atre huuje ka sisitria. (Ioane 18:10, 11) E cili, hnei Iesu hmaca hna ameköti angeic. Ketre, öni Peteru ka hape, maine tro itre xan a kei me nuetriji Iesu, tha tro kö angeic a nuetriji nyidrë! (Mat. 26:33) Hnei Peteru hna mejiune kowe la sipu trengecatre i angeic. Ame la pun, hnei angeic hna kei kowe la xoue atr me akönia qaja ka hape, thatre Iesu kö hnei angeic. E cili, hnei angeic hna kucakuca me “treije latresi.” (Mat. 26:69-75) Maine jë, hnei Peteru hna hnying ka hape, tro jë kö Iesu elanyi a nue la ngazo i angeic.

18. Nemene la hnei Iesu hna kuca matre tha tro hmaca kö a kucakuca hnei Peteru?

 ¹⁸ Ngacama hnei Peteru hna kei kowe la jol, ngo tha hnei angeice kö hna nuetriji Iehova. Hnei angeice pe hna catr me ce tro hmaca memine la itre xaa aposetolo. (Ioane 21:1-3; Itre hu. 1:15, 16) Nemene la ka xatua Peteru troa catr? Hnei Peteru hna lapa mekun lo kola thithi sai angeic hnei Iesu, matre tha tro kö a nanazij la lapaune i angeic, me upi angeic troa bëek me ithuecatre kowe la itre trejin. Nge hnei Iehova hna kapa la thithi Iesu. Ketre, hnei Iesu hna mama koi Peteru me hamë ithuecatre koi angeic. (Luka 22:32; 24:33, 34; 1 Kor. 15:5) Ame ngöne la ketre ijin, hnene la itre aposetolo hna nyi ie ngöne la jidri ka pexej, ngo pëkö ie hna ea. E cili, hnei Iesu hna mama koi angatr me aijijë Peteru troa amamane la ihnimi angeic koi nyidrë. Eje hi, hnei Iesu hna nue la ngazo i Peteru me hamë huliwa koi angeic.—Ioane 21:15-17.

19. Thenge la Salamo 103:13, 14, nemene la aqane tro sa goeëne la itre tria së tui Iehova?

¹⁹ Itre ini koi së. Hnei Iesu hna nyitipu Iehova ngöne la nyidrëti a hnim me utipi Peteru. Matre ame la easa tria, tha tro kö sa mekun laka, tha tro kö Iehova a nue la ngazo së. Celë hi lai hna ajane hnei Satana. Ngo ame Iehova Keme së, tre, ka tru ihnimi Nyidrë me hetre utipin. Celë hi matre, loi e tro sa sipu goeë së kö tune la aqane goeë së hnei Iehova. Nge nyipiewekë tro sa nyitipu Nyidrë ngöne la kola akötrë së hnei itre xan.

20. Nemene la hne së hna troa ce wang ngöne la ketre tane mekun?

²⁰ Ame la tulu i Iosefa, me Naomi, me Rutha, memine la atre Levi, me Peteru, tre, kola ithuecatre koi së laka, “eashenyi Iehova koi angete thë fë hni.” (Sal. 34:18) Nyidrëti a nue la itre akötr me jol, ngacama easa kucakuca. Ngo jëne la ixatua i Nyidrë, ijije hi tro sa cile catr me acatrene la lapaune së. (1 Pet. 1:6, 7) Ame ngöne la ketre tane mekun, tro sa ce wang la itre xaa aqane xatua së hnei Iehova ngöne la easa kucakuca pine la itre jol me itre ngazo së.