1-2. San wi o luku aini a artikel ya?

SON leisi kande wi e sidon pakisei den somen polobelema anga den booko-ede di wi abi aini a satu pisiten di u de a libi (Yopu 14:1). A sani ya sa meke u lasi-ati son yuu. A omen fu den sama di be e dini Yehofa a fositen be e lasi-ati son yuu te da den be e wani dede (1 Kow. 19:2-4; Yopu 3:1-3, 11; 7:15, 16). Ma den be e fitoow Yehofa, neen meke na ala yuu a be e toosutu den, a be e gi den kaakiti baka. Yehofa meke sama sikiifi den toli ya aini Beibel fu mi anga i sa fende taanga-sikin te useefi e fii so. Den o yeepi u tu fu sabi san u mu du te son sani e miti u.​—Rom. 15:4.

² Aini a artikel ya wi o taki fu wantu sama di be e dini Yehofa a fositen di be e fii booko-saka son yuu. Den sama ya a Yowsefu, Naomi anga Rut, a Leifisama di sikiifi Psalm 73, anga apostel Peitilisi. Fa Yehofa be toosutu den? San den toli ya e leli u? A fasi fa sani be waka gi den sama ya, o soi u taki ‘Yehofa de koosube fu den sama di booko-saka, ala yuu ai yeepi den sama di lasi-ati’.​—Ps. 34:18.

3-4. San be miti Yowsefu di a be yonkuu?

³ Di Yowsefu be abi 17 yali, Yehofa be meke a deen tu deen. Den deen ya be e soi taki Yowsefu be o toon wan bigiman, ala den famii fi en be o lesipeki en (Gen. 37:5-10). Ma wan pisiten baka di Yowsefu deen den sani ya, en hii libi kengi. Pe fu den baala fi en lesipeki en baka di a taigi den san a deen, den seli en. Bakaten a toon a saafu fu Potifar, wan bigiman aini Egepte (Gen. 37:21-28). Aini  wan satu pisiten Yowsefu libi kengi. A á be de a osu moo anga en dda di be lobi en, ma a be mu wooko enke saafu gi wan man di á be e dini Yehofa.​—Gen. 39:1.

⁴ Sani be moo ogii gi Yowsefu di a uman fu Potifar lei gi en taki a be wani suwa anga en. Potifar á luku seefi efu a sani di en uman taki a tuu fosi a meke sama sooto Yowsefu (Gen. 39:14-20; Ps. 105:17, 18). A pisiten ya Yowsefu a be wan yonkuman. Pakisei fa a be e fii fu koti sitaafu fu wan sani di a á du. Kande Yowsefu be e booko en ede taki a sani ya be o meke sama taki ogii fi en Gadu Yehofa. Den sani ya be sa meke Yowsefu fii booko-saka.

5. San be yeepi Yowsefu fu a á lasi-ati tumisi?

⁵ Di Yowsefu be e wooko enke saafu a á be poi du san a wani. Di a be de a sitaafu-osu a á be poi go a pe a wani tu. San be e yeepi en aini den muliki ten ya? Yowsefu á be e poti pakisei a den sani di a á be poi du, ma a be e meke moiti fu du den wooko di den be gi en bun. A moo gaan sani di be yeepi Yowsefu, na a wani di a be e wani du sani di e meke Yehofa piisii. Fu di Yowsefu be e si Yehofa enke a moo pelensipali Sama aini en libi, meke Yehofa be e belesi ala san a be e du.​—Gen. 39:21-23.

6. Fa den deen fu Yowsefu be e gi en taanga-sikin?

⁶ Kande Yowsefu be e fende taanga-sikin tu te be e pakisei den sani di a be deen. Den deen ya be e soi taki a be o si en famii baka. A be o abi wan moo bun libi tu. Di Yowsefu be abi 37 yali, sani bigin waka enke fa a be deen.​—Gen. 37:7, 9, 10; 42:6, 9.

7. Enke fa 1 Peitilisi 5:10 e soi, da san o yeepi u fu holidoo te sani e miti u?

⁷ San u leli? A toli fu Yowsefu leli u taki a goontapu ya ogii, son leisi sama o du  ogii anga u. Son leisi a taa Kotoigi o libi ogii anga u. Ma u mu e si Yehofa enke a sama di u sa go te sani e moo u, a sani ya o yeepi u fu wi á gwe fika en winsi san e miti u. (Ps. 62:6, 7; leisi 1 Peitilisi 5:10.) A 17 yali Yowsefu be abi di Yehofa soi en den tu deen. A sani ya e soi taki Yehofa e poti pakisei a den yonkuuwan di e dini en. A omen yonkuuwan e dini Yehofa aini a ten ya. Den e fitoow Yehofa, leti enke Yowsefu. Den poti son wan fu den a sitaafu-osu seefi, fu di den á wani du sani di Yehofa á lobi.​—Ps. 110:3.

8. San be miti Naomi anga Rut?

⁸ Wan gaan angiiten be de a Yuda, neen meke Naomi anga en osufamii foloisi go tan a Moab. Di den tan anda te wan pisi, neen Elimelek, a man fu Naomi dede. Baka wan pisiten den tu boi fu Naomi toow anga tu uman fu Moab, Rut anga Orpa. Baka wan sani fu tin yali neen den boi fu Naomi dede tu. Den boi ya á meke nawan pikin fosi den dede (Rut 1:1-5). Ná pikin sani miti den dii uman ya. Ma Rut anga Orpa be sa toow baka. Sama be o solugu Naomi? Bika u sabi taki a be gaandi kaba. Naomi be e kusumi te neen a taki: ‘Wi á mu kai mi Naomi moo. U kai mi Mara, bika a Moo Taanga Gadu meke a libi bita gi mi.’ Baka di ala den sani ya miti Naomi, neen a daai go neen kondee Betelehem baka. Rut go anga en tu.​—Rut 1:7, 18-20.

9. Enke fa Rut 1:16, 17, 22 e soi, da fa Rut toosutu Naomi?

⁹ San be toosutu Naomi di ala den sani ya be miti en? A sani di be toosutu en a lobi. Rut go anga Naomi neen kondee fu yeepi en, a so a soi en taki a lobi en tuutuu. (Leisi Rut 1:16, 17, 22.) Di den doo Betelehem, Rut wooko taanga aini alisi goon fi en anga Naomi be sa fende sani fu nyan. Ala sama be e gafa a yonkuu uman ya fu a fasi fa a holibaka gi en main.​—Rut 3:11; 4:15.

10. Fa Yehofa soi taki ai booko en ede anga pootiman enke Rut anga Naomi?

¹⁰ Yehofa be e booko en ede anga pootiman, neen meke a be taigi a foluku fi en fa den mu yeepi den sama ya. A be taigi den taki te den e koti alisi a goon, den be mu fika pikinso gi den pootiman. Na a sani ya be yeepi Naomi anga Rut fu fende sani fu nyan (Lef. 19:9, 10). Den á be abi fu go begi sama nyanyan.

11-12. Fa Bowas meke Naomi piisii?

¹¹ A wan guduman den e kai Bowas be abi a goon di Rut be e go dyunta alisi. A be bigi gi a man ya di a yee fa Rut gwe fika en kondee fu di a be wani yeepi Naomi. Neen meke Bowas toow anga Rut. A bai a pisi doti di Naomi be lasi di en man anga den boi fi en dede. A so den pikin fu Rut be o fende a doti ya (Rut 4:9-13). Bowas anga Rut meke wan boi, neen den kai en Obed, a gaandda fu Kownu David.​—Rut 4:17.

¹² Pakisei fa Naomi be e poolo te a be holi Obed neen futu tapu. A be musu e gafa Yehofa fu a gaan bun di a du gi en. Ma a toli fu Naomi anga Rut á kaba ete. Di den o weki baka, den o yee taki Obed a be wan gaandda fu Yesesi Kelestesi, a Mesiyas di Gadu be paamisi.

13. San a toli fu Naomi anga Rut e leli u?

¹³ San u leli? A toli ya e leli u taki son leisi wi e fii booko-saka te sani e miti u. Kande wi e fii enke den booko-ede fu u ná o kaba moo. Te wi e fii so, u mu fitoow  u Dda Yehofa. U mu tan koosube fu den baala anga sisa fu u tu. Kande Yehofa ná o puu a polobelema gi u. Yehofa á be weki a man fu Naomi anga den boi fi en baka, ma a yeepi en a wan taa fasi. Son leisi a den baala anga sisa Yehofa e meke yeepi wi anga san wi abi fanowdu.​—Odo 17:17.

14. Saide wan Leifisama be e fii booko-saka?

¹⁴ A wan Leifisama sikiifi Psalm 73. A man ya be abi a gaandi fu wooko aini a osu fu Yehofa. Ma wan pisiten a á be e piisii moo anga a wooko di a be e du gi Yehofa. San be du en? A man ya be bigin luku a switi libi fu den sama di nai libi enke fa Yehofa wani (Ps. 73:2-9, 11-14). Di a luku den sama ya, a si taki den e piisii, den gudu, ala sani fu den e waka bun, winsi fa den e du ogii. Di a si so, neen a bigin dyalusu anga den. A fii booko-saka te neen a taki: ‘A sosokaali mi e du sani anga wan kiin ati. A fu soso mi wasi mi ana taki mi ná o du ogii.’ Pikinmoo a gwe fika Yehofa.

15. Enke fa Psalm 73:16-19, 22-25 e soi, da san yeepi a psalm sikiifiman fu a á booko en ede moo?

¹⁵ Leisi Psalm 73:16-19, 22-25. Di a man ya go ‘aini a gaan santa peesi fu Gadu’ a miti wantu taa sama di be e dini Gadu. A sidon pakisei saide a be e fii so, neen a begi Gadu. Di a du a sani de, a kon si taki a á be e denki bun. A si tu taki efu a á be kengi a fasi fa a be e denki, a sani de be o meke a gwe fika Yehofa. Di a denki go, denki kon, neen a fusutan taki ogii o miti den sama di nai libi enke fa Yehofa wani. A sani di yeepi a psalm sikiifiman ya fu kisi enseefi baka, a di a meke moiti fu denki enke fa Yehofa e denki. Di á du a sani de, a á be e booko en ede moo, a be e piisii baka. A taki: ‘Boiti [Yehofa], mi á fanowdu nawan taa sani a goontapu.’

16. San a toli fu a psalm sikiifiman e leli u?

¹⁶ San u leli? Son leisi ai gei enke sani e go bun anga den sama di nai libi enke fa  Yehofa wani, ma wi á mu dyalusu anga den sama ya. Winsi a gei enke den e piisii nownow, den ná abi nawan howpu (Peleik. 8:12, 13). Efu u be o dyalusu anga den, a sani de be o meke u fii booko-saka te da u gwe fika Yehofa. Te yu e fii enke yu e bigin dyalusu anga den sama di e du ogii, du a sani di a psalm sikiifiman be du, paa anga sama di lobi Yehofa. A di Gadu lobi u meke ai gi u deki-ati fu du a sani ya. Efu u lobi Yehofa moo ala taa sani, a sani de o meke u piisii. Noiti wi o komoto na a pasi di o meke u fende a ‘tuutuu libi’ tu.​—1 Tim. 6:19.

17. Saide Peitilisi be e fii booko-saka son leisi?

¹⁷ Apostel Peitilisi á be e feele fu du son sani efuso taki fa ai fii. Ma son leisi a be e du efuso taki sani sondee fu a denki. Di Yesesi be taigi den apostel taki sama be o pina en te enke a dede, Peitilisi taigi en taki: ‘A sani ya ná o miti i seefiseefi’ (Mat. 16:21-23). Ma Yesesi soi en taki a á be e denki bun. Bakaten di feyanti kon fu kisi Yesesi, Peitilisi á daaidaai, a hali en fetihow neen feleng, a doo a yesi fu a saafu fu a gaan pilisite (Yoh. 18:10, 11). Yesesi soi en baka taki a á be mu du a sani de. Peitilisi be gafa tu taki winsi ala den taa apostel gwe fika Yesesi, en dati noiti o gwe fika en (Mat. 26:33). Ma aseefi neti de a taki dii leisi taki a á sabi Yesesi, fu di a be e feele den sama di be kisi Yesesi. Di Peitilisi kisi enseefi, ‘a go a doose neen a bali wan a dyumadye’ (Mat. 26:69-75). Kande a be e si enke Yesesi á be o gi en paadon.

18. Fa Yesesi yeepi Peitilisi fu a á fii booko-saka moo?

¹⁸ Ma Peitilisi á sidon e booko en ede naamo. Di a fusutan taki a fowtu kaba, a meke moiti toon Yehofa mati baka. Bakaten a be de makandaa anga den taa  apostel e kisi fisi (Yoh. 21:1-3; Toli 1:15, 16). San yeepi en fu a kisi enseefi? Fosi a sani ya be miti Peitilisi, Yesesi be begi gi en fu a sa kisi enseefi baka. A be taigi Peitilisi tu taki te a be o kisi enseefi, a be mu gi den taa apostel taanga-sikin. Yehofa aliki a begi fu Yesesi. Di Yesesi weki baka, a go taki anga Peitilisi fu gi en taanga-sikin (Luk. 22:32; 24:33, 34; 1 Kor. 15:5). Bakaten Yesesi go taki anga ala den apostel tu. A dei de den suku fisi a hii neti ma den á be kisi nawan fisi. Di den miti, Yesesi akisi Peitilisi efu a lobi en, neen Peitilisi piki taki a lobi en. Yesesi wai ede gi a mati fi en ya di a be lobi. A gi en moo wooko tu, bika a be e fitoow en.​—Yoh. 21:15-17.

19. Enke fa Psalm 103:13, 14 e soi, da fa Yehofa e si u te u meke wan fowtu?

¹⁹ San u leli? Wi e si taki Yesesi abi tyali-ati tuutuu te u luku fa a libi anga Peitilisi. A so Yehofa de tu, bika Yesesi abi denseefi manii fi en Dda. Neen meke te u meke wan fowtu, wi á mu sidon e booko wi ede naamo. Saatan wani u denki taki te u meke fowtu Yehofa ná o gi u paadon. Ma a ná tuu, bika Yehofa abi tyali-ati. A de kabakaba fu gi u paadon. Neen meke te wan sama du wan hati sani anga u, useefi mu de kabakaba fu gi den paadon tu.​—Leisi Psalm 103:13, 14.

20. San wi o luku aini a taa artikel?

²⁰ A toli fu Yowsefu, Naomi anga Rut, a Leifisama, anga Peitilisi e soi u kiin taki ‘Yehofa de koosube fu den sama di booko-saka’ (Ps. 34:18). Yehofa nai puu ala den booko-ede fu u, ma ai gi wi a kaakiti di wi abi fanowdu fu pasa den tesi di e miti u. Baka te u pasa wan tesi, u biibi e kon moo taanga (1 Peit. 1:6, 7). Aini a taa artikel wi o luku fa Yehofa e yeepi den sama di booko-saka fu di sani e miti den. Wi o luku tu fa ai yeepi den sama di booko-saka fu di den meke wan fowtu.