1-2. Ka nou ké vwè adan awtik-lasa ?

DÉLÈ, nou sizé ka réfléchi, é nou ka rann-nou kont kè vi a on nonm kout toubònman é i plen pwoblèm (Jòb 14:1). Kifè, sa toutafè nòwmal si défwa, nou ka santi-nou dékourajé. An tan lontan, ni onlo sèwvitè a Jéova ki santi-yo dékourajé. Jous ni sa ki té anvi mò (1 Wa 19:2-4 ; Jòb 3:1-3, 11 ; 7:15, 16). Men Jéova toujou konsolé-yo é i toujou ba-yo fòs pou yo pé sa tchenbé. Istwa a yo pé itil pou nou é pé konsolé-nou. Dayè, sé pousa yo maké-yo adan Labib (Wom. 15:4).

² Adan awtik-lasa nou ké palé dè sèwvitè a Bondyé ki viv dé biten ki dékourajé-yo. Nou ké palé dè Jozèf gason a Jakòb, dè Noémi on madanm ki pèd mari a-y, dè Rit bèlfi a-y, dè on Lévit ki maké Sòm 73 la, é dè lapòt Pyè. Kijan Jéova ba-yo fòs ? Ka ègzanp a yo ka aprann-nou ? Lè nou ké réponn a sé kèsyon-lasa nou ké rann-nou kont kè « Jéova toupré a moun tchè a yo fann », é kè « i ka sové moun ki dékourajé » (Sòm 34:18).

3-4. Lè Jozèf té jenntiboug, ki malè i rivé-y ?

³ Jozèf té ni 17 an apépré lè Bondyé fè-y fè 2 rèv. Sé rèv-lasa té ka montré kè Jozèf té’é vin on moun enpòwtan é kè an fanmi a-y, moun té’é ka rèspèkté-y (Jén. 37:5-10). Men on ti moman apré i fè sé rèv-lasa, vi a Jozèf chanjé bout pou bout. A épòk-lasa, frè a-y pa té ni pon rèspé pou-y. Yo jous vann-li é i vin touvé-y èsklav a on fonksyonè éjipsyen non a-y sé té Potifa (Jén. 37:21-28). Adan  on batzyé, tout biten chaviré ! Sé té tiboug préféré a pap’a-y men konnyéla la, i èsklav a on boug ki pa’a menm ka sèvi Jéova. É mandé moun si i ka viv ! (Jén. 39:1).

⁴ Sitiyasyon a Josèf vin pi grav ankò. Madanm a Potifa ay di kè Jozèf éséyé vyolé-y. Potifa pa menm chèché a sav si sa madanm-la té ka di sé té lavérité, i enn pran Jozèf é i mété-y lajòl é yo maré maléré-la èvè chenn (Jén. 39:14-20 ; Sòm 105:17, 18). Jozèf sé té on jennboug é i té inosan. Si zò té aplas a-y, kijan zò té’é santi-zòt ? É lè moun té’é tann palé dè sa, a pa sali sa té’é sali non a Jéova alò ! Aaa sèlman, a pa ti dékourajé sa dwèt dékourajé Jozèf !

5. Jozèf té dékourajé. Men ka ki édé-y ?

⁵ Lè Jozèf té èsklav é lè i té lajòl, i pa té pé fè ayen pou chanjé sitiyasyon a-y. Men i pa pèd lakat. Ka ki édé-y ? Ni onpakèt biten i pa té pé fè ankò, men i pa rété ka sonjé sa. Okontrè, lè yo té ka bay on travay a fè, i té ka chèché a fè-y byen konm i fo. Jozèf toujou mèt Jéova prèmyé douvan an vi a-y é li Jéova, té ka béni tousa Jozèf té ka fè (Jén. 39:21-23).

6. Sé rèv-la Jozèf fè la konsolé-y toubònman. Kijansa ?

⁶ Lè Jozèf té ka sonjé sé rèv-la Jéova té fè-y fè la kèlkè lanné avan, sèten sa dwèt ba-y bon fòs. Grasa sé rèv-la i fè-la, i té sèten kè i té’é wouvwè fanmi a-y é kè sitiyasyon a-y té’é vin pibon. É sé sa i rivé ! Lè Jozèf té ni 37 an, sé rèv-la i té fè la koumansé réyalizé é sa fèt on mannyè i pa té’é jen imajiné (Jén. 37:7, 9, 10 ; 42:6, 9).

7. Dapré 1 Pyè 5:10, ka ki ké édé-nou lèwvwè nou ké ka jwenn éprèv ?

⁷ Ka sa ka aprann-nou ? Istwa a Jozèf ka fè-nou sonjé kè an mond-la,  lamajorité a sé moun-la méchan, é yo pé rivé a aji mal èvè-nou. Menm on frè oben on sè a lasanblé-la pé rivé a fè-nou on biten ki pa bon. Si pou nou, Jéova sé on gwo wòch oben on abri, nou ké pran kouraj é nou pé’é jen arété sèvi Jéova (Sòm 62:6, 7 ; li 1 Pyè 5:10). Sonjé kè Jozèf té ni yenki 17 an apépré lèwvwè Jéova fè-y fè sé rèv-la i fè la. Sa ka montré kè lèwvwè sé jenn-la ka sèvi Jéova, i ka fè-yo konfyans. Jòdijou, ni onlo jenn ki kon Jozèf. Yo osi, yo ni fwa an Jéova. Pawmi yo, ni sa yo mèt lajòl pas yo pa té vlé fè ayen ki té’é pé fè Jéova lapenn (Sòm 110:3).

8. Ka ki rivé Noémi é Rit ?

⁸ Konm moun té ka mò fen an péyi a Jida, Noémi é fanmi a-y ay enstalé-yo a Moab. Lèwgadé, Élimélèk, mari a Noémi mò é i lésé-y èvè 2 gason. Kèlkè tan apré, yo mayé èvè 2 madanm moabit. Non a yo sé té Rit é Òwpa. Apépré 10 an apré, gason a Noémi mò é yo pa té ni timoun. Kifè, sé madanm-la touvé-yo tousèl (Rit 1:1-5). Nou ka tou konprann kè Noémi é 2 bèlfi a-y dwèt soufè toubònman ! Sé vré, Rit é Òwpa té’é pé woumayé. Men kimoun ki té’é okipé-y dè Noémi ? Pas malérèz-la té ja ni on ti laj. Tèlman Noémi pa té ni moral, mi sa i di : « Pa kriyé-mwen Noémi ankò, kriyé-mwen Mara, pas Toupuisan-la rann vi an mwen anmè toubònman. » Onlo malè rivé Noémi é sa fann tchè a-y. Kifè, i désidé rètouné a Bétléèm é Rit a-y èvè-y (Rit 1:7, 18-20).

9. Sèlon Rit 1:16, 17, 22, kijan Rit ankourajé Noémi ?

⁹ Ka ki édé Noémi ? I rivé tchenbé grasa lanmou-la i rèsèvwa la. Pa ègzanp, Rit montré i té enmé Noémi toubònman piskè i pa jen lagé-y (li Rit 1:16, 17, 22). A Bétléèm, Rit travay rèd pou ranmasé grenn a séréal, pou li é bèlmè a-y té ni sa ki fo pou yo té manjé. Kifè, toutmoun rann-yo kont kè Rit sé té on bon ti madanm ki té ka travay rèd (Rit 3:11 ; 4:15).

10. Kijan Jéova montré kè i té ni lanmou pou maléré kon Noémi é Rit ?

¹⁰ Jéova ba sé Izraélit-la on lwa ki té ka montré kè i té ni onlo konpasyon pou maléré, é Rit é Noémi bénéfisyé dè lwa-lasa. Jéova té di pèp-la kè lèwvwè yo té k’ay rékòlté chan a yo, fò-yo té lésé sa ki òbò pou sé maléré-la té pé sa rékòlté osi (Lév. 19:9, 10). Konsa, Noémi é Rit pa té’é ni a mandé ponmoun tanprisouplé a yo pou yo té pé sa ni on dèkwa pou yo manjé.

11-12. Kijan Boaz fè Noémi é Rit ni tchè-kontan ?

¹¹ Rit té ka ranmasé grenn adan chan a on boug rich non a-y sé té Boaz. Lè Boaz vwè jan Rit enmé Noémi, sa touché-y toubònman. Kifè, Boaz mayé èvè Rit é i achté tout sé tè-la timoun a Rit té’é ni la siwvwè i té fè timoun èvè 1^é mari a-y (Rit 4:9-13). Aprésa, Rit é Boaz vin ni on timoun é yo kriyé-y Obèd. Sé-y ki té granpè a wa David (Rit 4:17).

¹² A pa ti kontan Noémi dwèt té kontan lè i té ka tchenbé Obèd an bra a-y ! É sèten i té ka di Jéova mèsi pou pitit-lasa. Men pou Noémi é Rit, bénédisyon dèyè poko mannyé pas lè Jéova ké résisité-yo é kè yo ké vin sav kè Mési-la sé on désandan a Obèd, yo ké soté maté !

13. Ka ègzanp a Noémi é Rit ka aprann-nou ?

¹³ Ka sa ka aprann-nou ? Lè nou ka jwenn éprèv, sa pé dékourajé-nou é sa  pé jous rivé a fann tchè an nou. Pétèt-nou pa’a vwè pon solisyon. Lè nou adan on sitiyasyon konsa, fò-nou kontinyé fè Pap’an nou ki an syèl-la konfyans a san pou san é fò-nou kontinyé frékanté frè é sè an nou an lasanblé-la. Sé vré kè a pa toutlè kè Jéova ka fè pwoblèm an nou disparèt. Pa ègzanp, i pa résisité mari a Noémi é i pa résisité gason a-y nonplis. Men Jéova ké édé-nou é pousa, i ké sèvi èvè frè é sè an nou. Yo ké montré-nou kè yo enmé-nou fò é sa ké konsolé-nou (Pwov. 17:17).

14. Pou ki rézon on Lévit touvé-y dékourajé toubònman ?

¹⁴ Sé on Lévit ki maké Sòm 73 la. Konm sé té on Lévit, i té ka sèvi Jéova adan tanp a-y, é sé té on gran lonnè toubònman ! Men rivé onlè, i touvé-y dékourajé toubònman. Poukwa ? Pas i touvé-y jalou sé méchan-la. Apapoudi i té anvi fè menm biten ki yo, men i té ni lenprésyon kè yo té ka viv alèz a yo, é i té anvi viv kon yo (Sòm 73:2-9, 11-14). Lè i té ka gadé-yo, ou té’é di yo té ni tout pou yo : yo té rich, yo té ka viv alèz a yo, é yo té ka bwè dlo a yo trankilman. Lè i té ka gadé sa, sa té ka dékourajé-y tèlman ! Mi sa i di : « Vréman, sé pou ayen an té ka fè éfò pou tchè an mwen rété pwòp é pou an pa sali men an mwen adan sa ki pa bon. » I té an danjé, pas sa té’é pé fè-y arété sèvi Jéova !

15. Sèlon Sòm 73:16-19, 22-25, kijan Lévit-la ki ékri sòm-lasa woupran doubout a-y ?

¹⁵ (Li Sòm 73:16-19, 22-25.) Lévit-la rantré adan tanp a Bondyé ki té èstraòwdinè. Adan kaz a Bondyé i té ka touvé-y èvè dòt moun ki té ka adoré Bondyé kon-y menm. Sé on koté i té’é pé réfléchi trankilman é kè i té’é pé priyé Jéova pou di-y tousa i ni an fon a tchè a-y. Kifè, i rann-li kont kè rézònman a-y pa té bon é kè i manké pèd lanmityé a-y èvè Jéova. I rann-li kont kè sé méchan-la ka touvé-yo on koté ki ka glisé é kè sa ké fin mal ba yo. Pou Lévit-la pa té jalou ankò é pou i té woupran doubout a-y, fò i té vwè  sitiyasyon-la kon Jéova té ka vwè-y. Lè i fè sa, sitiyasyon-la pa té ka trakasé-y ankò é i té ni tchè-kontan. Sé pousa i di : « dépi an ni [Jéova], an pa bizwen ayen dòt asi latè. »

16. Ka ègzanp a on Lévit ka aprann-nou ?

¹⁶ Ka sa ka aprann-nou ? Défwa, nou ni lenprésyon kè zafè a moun ki méchan ka maché, men fò pa nou jalou-yo. Yo ni tchè-kontan swadizan, men tousa sé bétiz ! Sa pé’é diré. Talè, sé disparèt yo ké disparèt (Ékl. 8:12, 13). Si nou jalou-yo, sa ké dékourajé-nou é nou pé rivé a pèd lanmityé an nou èvè Jéova. Kifè, vou osi, si ou ka touvé-w jalou sé méchan-la, fè menm biten ki Lévit-la. Pran tan kouté sé konsèy-la Jéova ka ba-w la, pas si i ka ban-nou sé konsèy-lasa sé kè i enmé-nou. É kontinyé frékanté moun ki ka sèvi Jéova pas si ou enmé Jéova plis ki tout biten, ou ké ni tchè-kontan pou touttan. Konsa, ou ké rété asi chimen-la ki ka menné a « vré vi-la » (1 Tim. 6:19).

17. Pou ki rézon Pyè té dekourajé ?

¹⁷ Lapòt Pyè sé té on boug ki té byen djòk, men défwa, i té ka palé san réfléchi é i té ka fè nenpòt ki biten. Aprésa, i té ka règrété sa. Pa ègzanp, lè Jézi di apòt a-y kè fò i soufè é fò i mò, Pyè di-y kè fò pa i palé konsa. Mi sa i di-y : « É non Ségnè, [...] sa pé ké rivé-w ! » (Mat. 16:21-23). Aprésa, Jézi korijé-y. Lè on foulmoun vin arété Jézi, Pyè aji san réfléchi, i koupé zorèy a èsklav a gran prèt-la (Jan 18:10, 11). Jézi woukorijé Pyè ankò. Ondòt fwa ankò, Pyè bat lèstonmak a-y pou di kè menmsi sélézòt apòt-la lagé Jézi, li i pé’é jen lagé-y (Mat. 26:33). Pyè konpranndèdi kè i té fò, men tibwen plita, i touvé-y pè é i jous di i pa konnèt Jézi ni an blan ni an nwè. Tèlman Pyè té dékourajé, i sòti « é i pléré gwo dlo » (Mat. 26:69-75). I dwèt mandé-y si on jou Jézi ké padonné-y.

18. Kijan Jézi édé Pyè woupran doubout a-y ?

 ¹⁸ Sé vré, Pyè té dékourajé, men i pa jen arété sèvi Jéova. Apré i fè érè-lasa, i woupran doubout a-y é i kontinyé travay ba Jéova èvè sélézòt apòt-la (Jan 21:1-3 ; Akt 1:15, 16). Ka ki édé-y woupran doubout a-y ? On 1^é biten sé kè Pyè sonjé kè Jézi té priyé pou fwa a-y pa fébli é Jézi di-y kè lè i ké woufè kò a-y, fò i ké ankourajé frè a-y. Jézi priyé èvè tout tchè a-y, kifè, Jéova réponn a priyè-lasa. Tibwen plita, Jézi parèt douvan Pyè, pétèt pas i té vlé ankourajé-y (Lik 22:32 ; 24:33, 34 ; 1 Kor. 15:5). On jou, sé apòt-la pasé tout on nuit ka péché men yo pa pran ayen. É aprésa, Jézi parèt douvan yo. Jou-lasa, Jézi ba Pyè lokazyon di-y kè i enmé-y fò. Jézi té ja padonné bon zanmi a-y é i montré kè i té ka fè-y konfyans, piskè i ba-y plis rèsponsabilité (Jan 21:15-17).

19. Sòm 103:13, 14 ka di-nou ka Jéova ka pansé dè nou lè nou ka péché. Ka sa ka aprann-nou ?

¹⁹ Ka sa ka aprann-nou ? Lè nou ka gadé jan Jézi aji èvè Pyè, nou ka rann-nou kont kè i té plen mizérikòd. I té ka imité Pap’a-y a san pou san. Kifè, si nou fè on érè, fò pa nou mèt an tèt an nou kè pa ni mwayen fè pon té pou nou, pas Jéova enmé padonné. Satan té’é byen kontan si nou té ka rézonné konsa. Sa pou nou sonjé sé kè Jéova enmé-nou. I sav kè nou enpawfè é i vé padonné-nou. É lè on moun ka mal aji èvè nou, fò-nou imité Jéova (li Sòm 103:13, 14).

20. Ka nou ké vwè adan awtik-la ki ka vin la ?

²⁰ Sa ki rivé Jozèf, Noémi é Rit, Lévit-la é Pyè ka montré-nou kè « Jéova toupré a moun tchè a yo fann » (Sòm 34:18). Sé vré, Jéova pa ka anpéché-nou jwenn difikilté, é sa pé rivé kè nou santi-nou dékourajé. Men lè nou ka vwè kijan Jéova ka édé-nou lè nou ka jwenn éprèv, sa ka ban-nou plis fwa ankò (1 Pyè 1:6, 7). Sèwten sèwvitè a Jéova ki fidèl ka santi-yo dékourajé pas yo enpawfè oben pas yo ka jwenn sitiyasyon ki difisil. Adan awtik-la ki ka vin la, nou ké vwè ka Jéova ka fè pou soutyenn-yo.