1-2. Inai stadi ai dahaka do ita herevalaia?

NEGA haida ita laloa iseda mauri be kwadogi bona “hekwarahi be bada herea.” (Iobu 14:1) Unai dainai, nega haida do ita lalomanoka. Baibel negadiai Iehova ena hesiai taudia be unai bamona idia mamia danu. Idia haida idia ura idia mase. (1 Kin. 19:2-4; Iobu 3:1-3, 11; 7:15, 16) To hanaihanai, idia abidadama henia Diravana, Iehova, ese idia ia hagoadaia. Edia sivarai be Baibel lalonai idia torea ita idia hagoadaia bona hadibaia totona.​—Roma 15:4.

² Inai stadi ai, unai bamona lalomanoka idia haheaukalaia taudia hegeregere Iakobo ena natuna Iosepa, Ruta bona ena ravana hahine Naomi, Salamo 73 ia torea Levi tauna bona aposetolo Petero do ita herevalaia. Edena dala ai Iehova ese idia ia hagoadaia? Bona edia haheitalai amo dahaka do ita dibaia? Unai henanadai edia haere ese ita do ia hagoadaia “[Iehova] be lalohisihisi taudia kahirakahira ia noho, bona ia ese edia lalona ia ore taudia ia hamauria noho.”​—Sal. 34:18.

3-4. Iosepa be mero matamata neganai, ia dekenai dahaka idia vara?

³ Iosepa ena mauri lagani be 17 neganai, nihi rua ia abia, unai nihi be Dirava amo. Iosepa ia abia nihi ese idia hahedinaraia nega ta ena bese lalonai dagi badana ta do ia abia. (Gen. 37:5-10) To Iosepa be unai nihi ia abia murinai, ia dekenai gau dikadia idia vara. Unai negai ena kakadia ese idia matauraia lasi bona hesiai tauna bamona idia hoihoilaia. Gabeai, Aigupito tauna Potifara ena ruma ai hesiai gaukara ia karaia. (Gen. 37:21-28) Karaharaga ena mauri ia idau,  guna ia be ena tamana ese ia lalokau henia natuna, to hari Potifara ena hesiai tauna ai ia lao.​—Gen. 39:1.

⁴ To Iosepa ena hekwakwanai idia bada idia lao. Potifara ena hahine ia koikoi bona ia gwau Iosepa ia ura ia do ia reipia. Potifara be tahua gaukara ia karaia lasi, to Iosepa be dibura ruma dekenai idia negea bona seini amo idia guia. (Gen. 39:14-20; Sal. 105:17, 18) Mero matamatana Iosepa be unai koikoi herevana dainai ia lalohisihisi bada. Bona taunimanima be unai koikoi herevana idia kamonai neganai, Iosepa ena Dirava, Iehova idia gwauraia dika. Oibe, unai dainai Iosepa be ia lalomanoka!

5. Iosepa be edena dala ai lalomanoka karana ia hanaia?

⁵ Iosepa be hesiai tauna bona dibura ruma ai ia noho neganai, ia dekenai ia vara gauna ia haidaua diba lasi. To dahaka ese ia durua lalohadai maorona ia dogoatao totona? Ia karaia diba lasi gaudia ia laloa momo lasi, to ia dekenai idia henia gaukara ia karaia namonamo. Mai anina bada gauna be, Iosepa ia ura hanaihanai Iehova ia hamoalea. Unai dainai Iehova ese ia karaia gaukara ibounai ia hanamoa.​—Gen. 39:21-23.

6. Iosepa be edena dala ai ena nihi amo goada ia abia?

⁶ Iosepa be reana guna Iehova ese ia henia nihi ia laloa dobu karana amo goada ia abia. Unai nihi ese idia hahedinaraia nega ta ia be ena famili do ia itaia lou bona ena mauri do ia namo. Bona unai ia vara momokani. Iosepa ena mauri lagani be 37 neganai, ena nihi be hoa dalanai idia guguru matamaia!​—Gen. 37:7, 9, 10; 42:6, 9.

7. Petero Ginigunana 5:10 ena hereva bamona, dahaka ese ita do ia durua ita haheauka totona?

⁷ Ita dibaia gaudia. Iosepa ena sivarai amo ita diba ita be dagedage bona kara auka tanobadana ai ita noho. Danu tadikaka eiava taihu ta ese ita ia hahisia diba. To Iehova be iseda Nadi Badana eiava Kohoro  Goadana bamona ita laloa neganai, do ita lalomanoka lasi bona ia do ita hesiai henia noho. (Sal. 62:6, 7; 1 Petero 5:10 duahia.) Laloatao, Iosepa ena mauri lagani be 17 neganai, Iehova be ia dekenai nihi ia henia. Unai ese ia hahedinaraia Iehova be ia idia hesiai henia matamata taudia ia abidadama henia. Hari, matamata taudia momo be Iosepa bamona. Idia danu be Iehova idia abidadama henia. Idia haida be dibura ruma ai idia atoa badina idia ura lasi Dirava badinaia karana idia hadikaia.​—Sal. 110:3.

8. Naomi bona Ruta dekenai dahaka ia vara?

⁸ Hitolo bada ia vara dainai, Naomi bona ena bese taudia be Iuda tanona dekenai edia hanua idia rakatania bona idau taudia bamona Moaba ai idia noho. Unuseniai, Naomi ena tau, Elimeleka ia mase, bona Naomi ida natudia memero rua ia rakatania. Gabeai, unai memero be Moaba hahine rua, Ruta bona Oropa idia adavaia. Lagani 10 bamona murinai, Naomi ena natudia memero be bese idia havaraia lasi bona idia mase. (Ruta 1:1-5) Unai hahine toi be idia lalohisihisi bada! Momokani, Ruta bona Oropa be idia headava lou diba. To daika ese edia ravana burukana, Naomi, do ia naria? Naomi ia lalohisihisi bada bona nega ta ia gwau: “Lauegu ladana umui atoa lasi, Naomi, to Mara do umui atoa, badina be Siahu Bada Diravana ena kara lau dekenai be auka.” Naomi be ia lalohisihisi bada dainai, ia ura Betelehema dekenai do ia giroa lou, bona Ruta ese ia bamoa.​—Ruta 1:7, 18-20.

9. Ruta 1:16, 17, 22 ena hereva bamona, edena dala ai Ruta ese Naomi ia hagoadaia?

⁹ Dahaka ese Naomi ia durua? Lalokau! Hegeregere, Ruta be Naomi dekenai lalokau ia hahedinaraia bona ia rakatania lasi. (Ruta 1:16, 17, 22 duahia.) Betelehema ai Ruta ia gaukara goada ia bona Naomi totona witi ia haboua. Unai dainai, momo idia itaia Ruta be gaukara goada bona ladana namona hahinena.​—Ruta 3:11; 4:15.

10. Edena dala ai Iehova ese ogogami taudia, hegeregere Naomi bona Ruta dekenai lalokau ia hahedinaraia?

¹⁰ Iehova be Israela taudia dekenai taravatu ta ia henia ogogami taudia, Naomi bona Ruta bamona taudia, durua totona. Iehova be ena taunimanima ia hamaoroa uma ena anina idia haboua neganai, uma ena dokonai idia tubu aniani do idia utua lasi, to idia rakatania ogogami taudia ese idia gogoa totona. (Lev. 19:9, 10) Unai amo Naomi bona Ruta be idia noinoi lasi, to hemataurai dalanai aniani idia abia diba.

11-12. Edena dala ai Boasi ese Naomi bona Ruta ia hamoalea?

¹¹ Ruta be taga tauna ladana Boasi ena uma dekenai witi momoru ia gogoa. Boasi ia itaia Ruta be ena ravana hahinena, Naomi ia lalokau henia, bona unai kara ia ura henia. Unai dainai, gabeai Ruta ia adavaia bona Naomi ena bese edia tano ia hoia. (Ruta 4:9-13) Boasi bona Ruta be natuna mero ta idia havaraia, ena ladana be Obeda. Ia be King Davida ena tubuna.​—Ruta 4:17.

¹² Mani oi laloa, Naomi be beibi Obeda ia rosia neganai ia moale bada herea bona Iehova ia tanikiu henia! To gabeai, Naomi bona Ruta dekenai gau namona ta do ia vara. Idia toreisi lou neganai do idia diba Gwauhamata Mesiana, Iesu Keriso, be Obeda ena bese amo ia vara!

13. Naomi bona Ruta edia sivarai amo dahaka gaudia ita dibaia?

¹³ Ita dibaia gaudia. Hahetoho ita davaria neganai, ita lalohisihisi bona lalomanoka diba. Reana ita laloa iseda hekwakwanai hanamoa dalana ta be lasi. Unai  bamona negadia ai, namona be iseda guba Tamana do ita abidadama henia bona iseda kongrigeisen tadikaka taihu do ita bamoa. Momokani, Iehova be iseda hekwakwanai do ia kokia lasi. Hegeregere, ia ese Naomi ena tau bona natuna memero rua ia hatorea isi lou lasi. To, ia ese ita do ia hagoadaia ita haheauka totona, bona iseda tadikaka taihu edia hebogahisi karadia amo ita ia durua.​—Aon. 17:17.

14. Dahaka dainai Levi tauna ta be ia lalomanoka momokani?

¹⁴ Salamo karoa 73 ia torea tauna be Levi tauna ta. Unai dainai, ia abia hahenamo be Iehova ena dubu helaga dekenai ia gaukara. To, iena mauri lalonai nega ta ia lalomanoka momokani. Dahaka dainai? Ia ese kara dika bona hekokoroku taudia ia mama henidia, edia kara dikadia dainai lasi, to edia kohu dainai ia mama henidia. (Sal. 73:2-9, 11-14) Toana be idia dekenai gau ibounai be hegeregere, mai edia moni bona kohu, mauri namona bona idia lalohekwarahi lasi. Levi tauna be unai ia itaia neganai ia lalomanoka, bona ia gwau: “Lau ese lau kara kava, a? Nega ibounai lauegu lalona lau hagoevaia, bona kara dika ta lau karaia lasi.” Momokani, unai lalohadai ese ia veria diba Iehova ia rakatania totona.

15. Salamo 73:16-19, 22-25 ena hereva bamona, Levi tauna be edena dala ai lalomanoka karana ia hanaia?

¹⁵ Salamo 73:16-19, 22-25 duahia. Unai Levi tauna be “Dirava ena Dubu Helaga dekenai” ia vareai. Dirava ena Dubu Helaga lalonai ena tadikaka bona taihu huanai, ia ese mai guriguri bona laloa maoromaoro ida ena mauri ia laloa lou. Unai amo ia laloparara iena lalohadai be maoro lasi, bona ia be Iehova ia rakatania diba dalana ai ia raka lao noho. Ia laloparara danu unai kara dika taudia be “dedidedi gabudia” dekenai idia raka bona do ‘idia mase haraga.’ Levi tauna be mama bona lalomanoka karana ia dadaraia totona, namona be Iehova ena lalohadai ia abia. Unai ia karaia neganai, ia lalomaino bona ia moale. Ia gwau: “Tanobada dekenai, gau ta lau ura henia lasi, oi [Iehova] sibona.”

16. Levi tauna ta amo dahaka gaudia ita dibaia?

 ¹⁶ Ita dibaia gaudia. Namo lasi mai edia kohu o moni momo kara dika taudia ita mama henidia. Edia moale be do ia ore bona do idia mauri hanaihanai lasi. (Had. 8:12, 13) Idia ita mama henidia neganai, do ita lalomanoka bona iseda hetura karana Iehova ida ita hadikaia diba. Unai dainai bema oi be kara dika taudia edia mauri dainai oi mama, namona be Levi tauna ena kara oi tohotohoa. Dirava ena sisiba namodia oi badinaia, bona Iehova ena ura idia karaia taudia oi bamoa. Bema Iehova oi lalokau henia bada bona gau ma haida oi laloa momo lasi, moale korikorina do oi davaria. Bona “mauri korikorina” ena dala ai do oi raka noho.​—1 Tim. 6:19.

17. Dahaka dainai Petero ia lalomanoka?

¹⁷ Petero be goada tauna bona gaudia ia karaia haraga, nega haida ena hemami ia gwauraia haraga danu. Unai dainai, nega haida ia gwauraia herevadia eiava ia karaia gaudia dainai gabeai ia lalohisihisi. Hegeregere, Iesu be ena aposetolo taudia ia hamaoroa ia be hisihisi do ia abia murinai do idia hamasea neganai, Petero ese Iesu ia gwau henia, ia gwau: “Oi dekenai unai bamona do ia vara lasi.” (Mat. 16:21-23) Iesu ese Petero ena lalohadai kererena ia hamaoromaoroa. Hutuma be Iesu dogoatao totona idia mai neganai, Petero be ia laloa namonamo lasi bona hahelaga tauna badana ena hesiai tauna ta ena taiana ia utua oho. (Ioa. 18:10, 11) Iesu ese aposetolo Petero ma ia hamaoromaoroa lou. Ma danu, Petero ia heagi ia gwau aposetolo taudia haida be Keriso do idia rakatania bona heau, to ia be unai bamona do ia karaia lasi! (Mat. 26:33) To, Petero be taunimanima dekenai ia gari, bona nega toi ia gwau ena Biaguna ia diba lasi. Petero be ia lalomanoka momokani, bona “murimuri dekenai ia lao bona ia tai dikadika.” (Mat. 26:69-75) Reana ia lalohekwarahi  bema Iesu ese do ia gwauatao eiava lasi.

18. Edena dala ai Iesu ese Petero ia durua ia lalomanoka lasi totona?

¹⁸ To, Petero be ena lalomanoka karana dainai, Iehova ia rakatania lasi. Ena be ia lalomanoka, to ia goada lou bona aposetolo taudia ma haida ia bamoa. (Ioa. 21:1-3; Kara 1:15, 16) Dahaka ese ia durua ia goada lou totona? Ia laloatao, Iesu be guna ia totona ia guriguri ena abidadama do ia rakatania lasi, bona Iesu ese Petero ia hagoadaia do ia giroa bona iena tadikaka do ia hagoadadia. Iehova ese Iesu be mai kudouna ibounai ida ia gwauraia gurigurina ia haerelaia. Gabeai, Iesu be Petero dekenai ia hedinarai bona ia hagoadaia. (Luka 22:32; 24:33, 34; 1 Kor. 15:5) Danu, aposetolo taudia be hanuaboi ibounai idia haoda, to gwarume ta idia abia lasi murinai, Iesu be idia dekenai ia hedinarai. Unai nega ai, Iesu be Petero dekenai dala ia kehoa ena lalokau ia dekenai ia hamomokania totona. Iesu ese iena turana namona ia gwauatao bona maduna ma haida ia henia.​—Ioa. 21:15-17.

19. Salamo 103:13, 14 ena hereva bamona, ita kara dika neganai Iehova be edena bamona ita ia laloa?

¹⁹ Ita dibaia gaudia. Iesu ese Petero ia kara henia dalana amo iena hebogahisi karana ia hahedinaraia, bona Iesu be iena Tamana ia tohotohoa goevagoeva. Unai dainai ita kara dika neganai, namo lasi ita laloa Iehova be ita do ia gwauatao lasi. Satani ia ura unai bamona do ita laloa. To namona be ita laloatao, Iehova be ita ia lalokau henia bona iseda goada ena hetoana ia lalopararalaia, bona ia ura iseda dika ia gwauatao. Unai dainai, ma haida ese ita idia kara dika henia neganai, Ia ita tohotohoa be namo.​—Salamo 103:13, 14 duahia.

20. Stadi atikol 52 ai dahaka do ita stadilaia?

²⁰ Iosepa, Naomi bona Ruta, Levi tauna ta, bona Petero edia sivarai ese ita ia hagoadaia “[Iehova] be lalohisihisi taudia kahirakahira ia noho.” (Sal. 34:18) Nega haida Dirava ese ita davaria hahetoho bona lalomanoka ia koua lasi. To, Iehova ena heduru amo hahetoho idauidau ita haheaukalaia neganai, iseda abidadama ia goada. (1 Pet. 1:6, 7) Stadi atikol 52 ai, Iehova ese ena abidadama hesiai taudia be edia kara dika eiava idia davaria hekwakwanai dainai idia lalomanoka neganai, ia durua daladia ma haida do ita herevalaia.