XTUUTYUM ARTIKEL 51
“Yeehoowa . . . ret tii woo oone muut sin”
“Yeehoowa is ticht pay tëne woo een ferprochne hërts hon; eyer ret tii woo oone muut sin.” (SALMO 34:18, noote)
LIIT 30 Meu Deus, meu Amigo e Pai
WAS TUUN MER SIIN? *
1-2. Was tuun mer in tiise artikel lërne?
ALS MOOL, fiilaycht khene mer tenke iwer wii unser leepe khorts is un wii unser taache “fol mit soriche” sin. (Jó 14:1) Tan, is tsum ferxteen tas als mool fine mer uns oone muut. Fiile fon Yeehoowa sayn tiiner in te friirixe tsayte hon se sich soo kexpiirt. Welche wolte soo kaar xtërpe. (1 Reis 19:2-4; Jó 3:1-3, 11; 7:15, 16) Awer noo un noo, hot Yeehoowa — te Kot aan weem se ketraut hon — tëne ketreest un ferxtërkt. Tëne sayn kexichte sin kexrip kep fer uns treeste un in lërne. (Rom. 15:4)
2 In tiise artikel, tuun mer xpreche iwer etliche tiiner fon Yeehoowa woo hon sich oone muut kexpiirt weeche ti kefoere woo se mit kemacht hon: Yoosef — Yaakop sayn soon —, ti witfraa Noemi un sayn xwiichertochter Rut, te Lewiiter woo hot te Salmo 73 kexrip, un te aphostel Pheeter. Wii hot Yeehoowa tëne ferxtërkt? Un was fer lisyoone khene mer mit tëne sayn payxpiil lërne? Ti antworte tuun uns sicher lose tas “Yeehoowa is ticht pay tëne woo een ferprochne hërts hon; eyer ret tii woo oone muut sin”. (Salmo 34:18, noote)
YOOSEF HOT KROP UNKERECHTICHKHEET AUS KEHAL
3-4. Was is mit Yoosef pasiirt wii eyer noch yung waar?
3 Yoosef waar unkefeer 17 yoer alt wii eyer tswaay treeme fon Kot hat. Tiise treeme hon petayt tas Yoosef teet een wichtich persoon wëre — yemant woo teet respekt fon sayn familye kriin. (Gên. 37:5-10) Awer klaych noo tas Yoosef tiise treeme hat, xlechte tinge sin mit tëm pasiirt. Xtats tëm respekt tsayche, sayn priiter hon tëm wii een sklaaw ferkhaaft; xpeeter, is eyer een sklaaw fer Potifaar kep, een ejiptix ofitseer. (Gên. 37:21-28) In een khorts tsayt, Yoosef sayn leepe hot sich kans keënert. Tee waar net mee tehëm mit sayn fater, woo hot tëm soo fiil keliipt; yets waar eyer ploos een sklaaw im Ejipt kewees, fer eene man am xafe woo hot net Yeehoowa kekhënt. (Gên. 39:1)
4 Awer tan, Yoosef sayn situatsyoon is noch xlimer kep. Potifaar sayn fraa hot een falx akusatsyoon keeche tëm kemacht: tas eyer fersuucht hat tëne iwerfale. Awer Potifaar hot net fersuucht raus fine ep tas wërklich woer waar. Xtats tas, hot eyer Yoosef in te katee kexmis, un tat waar eyer mit khete ferpun. (Gên. 39:14-20; Sal. 105:17, 18) Iwerlee tich wii hot te yung Yoosef sich kexpiirt weeche tiise falx akusatsyoon. Un wën ti layt too triwer heere teete, khente se xlechte tinge iwer Yoosef sayn Kot, Yeehoowa, tenke. Kewis hat Yoosef uersache fer sich oone muut fine!
5. Was hot Yoosef kemacht fer net tsu oone muut plaype?
5 Wii Yoosef een sklaaw waar un wii eyer inkexpërt waar, khont eyer niks mache fer sayn situatsyoon ënere. Was hot tëm keholef net uf kepe? Xtats sich traan hale aan te tinge woo eyer khont net mache, hot eyer flaysich kexaft aan te flichte woo eyer kriit hat. Un tas haupste: Yeehoowa waar imer ti wichtichste persoon im Yoosef sayn leepe kewees. Weeche tas, Yeehoowa hot ales was Yoosef kemacht hot keseechent. (Gên. 39:21-23)
6. Wii hon Yoosef sayn treeme tëm fiilaycht uf kemuut?
6 Fiilaycht, Yoosef hot sich aach ufkemuut kexpiirt wën eyer traan ketenkt hot aan te treeme woo Yeehoowa tëm friier kep hat. Tii hon ketsaycht tas eyer teet noch mool sayn familye siin un tas sayn situatsyoon teet sich ferpesere. Un kraat tas is pasiirt. Wën Yoosef unkefeer 37 yoer alt waar, sayn treeme hon aan kefang sich in een wunerlich aat erfiile! (Gên. 37:7, 9, 10; 42:6, 9)
7. Tëm noo 1 Pedro 5:10, was tuut uns helfe ti kefoere aus hale?
7 Was sin ti lisyoone fer uns? Yoosef sayn kexicht erinert uns tas tiise welt krop is un tas ti layt tuun uns unkerecht pehantele. Soo kaar eene pruuter orer een xwester khent uns wee mache. Awer wën mer Yeehoowa siin wii unser Fels, orer Xits Plats, tuun mer net tsu oone muut plaype orer noo lose tëm tiine. (Sal. 62:6, 7; lees 1 Pedro 5:10.) * Eriner tich aach tas Yoosef waar unkefeer 17 yoer alt wën Yeehoowa hot tëm ti treeme kep. Es is taytlich, tan, tas Yeehoowa traut aan sayn yunge tiiner. Hayt se taach fiile yunger sin soo wii Yoosef: tii hon te selwiche klaape aan Yeehoowa. Welche fon tëne waare soo kaar unkerecht in kexpërt wayl tii wolte net fon sayn leaaliteet tsu Kot uf kepe. (Sal. 110:3)
TSWAAY FRAAE WOO WAARE MIT TRAURICHKHEET IWERKELAAT
8. Was is mit Noemi un Rut pasiirt?
8 Weeche een xroo hungernoot, Noemi un sayn familye hon sayn haus in Yuuta hiner kelos, un sin wii frëmte layt im Moap woone kang. Tat, Noemi sayn man, Elimelëk, is kextorep; tan is se aleen mit sayn tswaay khiner keplip. Mit te tsayt, ti tswaay soone hon sich mit tswaay moapitixe fraae kehayrat: Rut un Orpa. Unkefeer 10 yoore xpeeter, Noemi sayn soone sin aach kextorep un hon khee khiner kelos. (Rute 1:1-5) Iwerlee tich wii traurich waare ti tray fraae kewees! Kewis, Rut un Orpa khonte sich noch mool hayrate. Awer, weer teet Noemi, woo waar xon am alt wëre, uf phase? Noemi is soo tiifsinich kep, tas se kesaat hot: “Ruuft mich net Noemi. Ruuft mich Mara, wayl te Ale Mechtiche hot mayn leepe seer piterlich kemacht.” Noemi — mit sayn hërts ferproch — hot ëntxlist tsurik tsu Petleheem keen, un Rut is mit tëne kang. (Rute 1:7, 18-20)
Kot hot fer Noemi un Rut pewayst tas eyer khan sayn tiiner helfe noch mool muutich un froo wëre. Khan eyer tas selwiche fer tich mache? (Kuk ti apsetse 8-13.) *
9. Tëm noo Rute 1:16, 17, 22, wii hot Rut Noemi uf kemuut?
9 Was hot Noemi keholef? Leaale liip. Tsum payxpiil, wën Rut mit Noemi keplip is, hot se leaale liip ketsaycht. (Lees Rute 1:16, 17, * 22. *) In Petleheem, Rut hot xtram kexaft fer keerst samer refe fer sich selepst un aach fer Noemi. Weeche tas, is Rut pekhant kep wii een kuut un flaysich fraa. (Rute 3:11; 4:15)
10. In was fer aate hot Yeehoowa liip ketsaycht fer ti aarme, soo wii Noemi un Rut?
10 Yeehoowa hat fer ti israelite een kesets kep woo hot sayn mitlayt fer ti aarme — soo wii Noemi un Rut — ketsaycht. Tee hot fer sayn folek kesaat tas wën se ërnte teete, tii selte ti rënte fon te plantaaj net ërnte; soo khente ti aarme tat samer refe keen. (Lev. 19:9, 10) Tan, Noemi un Rut prauchte net petle fer ese kriin.
11-12. Wii hot Poaas Noemi un Rut froo kemacht?
11 Poaas, eene rayche man, hot ti plantaaj pesits aan woo Rut keerst samer keraft hot. Ti liip un leaaliteet woo Rut tsu Noemi ketsaycht hot, hon Poaas tiif kekrif. Tes weeche, hot Poaas xpeeter ti ërpxaft fon Noemi sayn familye tsurik kekhaaft un sich mit Rut kehayrat. (Rute 4:9-13) Tas pheyerche hot een khint kriit, Opët, woo is xpeeter te kheenich Tawi sayn wowo kep. (Rute 4:17)
12 Iwerlee tich Noemi sayn frayt wii se te kleenche Opët uf sayn xoos kehal hot, un wii se sayn petanklich hërts tsu Yeehoowa uf kemacht hot! Awer Noemi un Rut tuun noch frooer wëre; in tëm ufxtaye fom toot, tuun se tsu wise kriin tas Opët waar foerkhomer fon tëm Ferxprochne Mesias kewees, Yeesus Kristus!
13. Was fer wichtiche lisyoone khene mer lërne fon Noemi un Rut sayn kexicht?
13 Was sin ti lisyoone fer uns? Wën mer torich kefoere keen, fiilaycht fine mer uns oone muut, orer soo kaar fon traurichkheet iwerkelaat. Im xtant, khene mer net een ausweech fer unser propleeme siin. In tiise xtune, sole mer kans uf unser himlixe Fater traue un ticht pay unser priiter uns xwestere in te kemaynt plaype. Es is woer tas Yeehoowa tuut net imer ti propleeme wech nëme. Tsum payxpiil: eyer hot net tsurik fer Noemi keprung sayn toote man un khiner. Awer tee heleft uns tas phake, manich mool torich ti liipliche tinge woo unser priiter un xwestere fer uns mache. (Pro. 17:17)
EEN LEWIITER WOO NEEKST KEXTOLPERT HOT
Wayls hot aus kesiin tas tii woo net Yeehoowa ketiint hon eene kuute leepe hate, te xrayper fon te Salmo 73 hot neekst kextolpert. Tas khan mit uns pasiire (Kuk ti apsetse 14-16.)
14. Weeche was is eene Lewiiter aarich unmuutich kep?
14 Te xrayper fon tëm Salmo 73 waar een Lewiiter kewees. Tes weeche, hat eyer ti eer fer aan Yeehoowa sayn aanpeetung plats tiine. Soo wii soo, is eyer een mool oone muut kep. Weeche was? Tee hot aan kefang nayt fon te xlechte un hoochmuutiche layt hon, net weeche sayn xlechtichkheet, awer wayls hot aus kesiin tas tëne sayn leepe waar peser wii tëm sayns. (Sal. 73:2-9, 11-14) Es hot aus kesiin tas se ales hate — kelt, een kuute leepe, un ruu. Wën te Lewiiter tas kesiin hot, is eyer soo oone muut kep tas eyer kesaat hot: “Sicher waar es umsonst mayn hërts rayn hale un mayn hënt in unxult wexe.” Kewis, tee khont, weeche tas, noo lose Yeehoowa aan peete.
15. Tëm noo Salmo 73:16-19, 22-25, wii hot te Lewiiter — woo tiise Salmo kexrip hot — es hin kriit noch mool muutich wëre?
15 Lees Salmo 73:16-19, * 22-25. * Te Lewiiter is “aan Kot sayn kroose hayliche plats rin kang”. In Kot sayn haus, wën eyer mitsamer waar mit anere woo hon Kot aan kepeet, khont eyer ruych plaype, taytlich tenke un iwer sayn situatsyoon peete. Tes weeche, hot eyer aan kefang se mërke tas sayn aat fer se tenke waar net kluuch un tas eyer aan kefang hat in een kefeerlich weech keen woo teet tëm fon Yeehoowa aus naner mache. Tee hot aach kemërkt tas ti xlechter sin “in een krunt woo ritxt” un tas se “een xrekliche ën” kriin tuun. Te Lewiiter praucht ti selwiche mënunge wii Yeehoowa iwer ti tinge hon, tas eyer khent ti unmuutichkheet un nayt iwerkhome. Wën eyer tas kemacht hot, sayn hërts is noch mool im friit keplip un eyer waar noch mool froo. Tee hot kesaat: “Sonst [Yeehoowa], winxe ich kaar niks mee uf te eyert.”
16. Was fer lisyoone khene mer fon tëm Lewiiter lërne?
16 Was sin ti lisyoone fer uns? Siits aus tas welche xlechte layt een frooes leepe hon. Mer sole nii mools nayt fon tëne xpiire. Sayne frooheet is ploos in te auswënich sayt un tuut ferxwiine — tii tuun net fer imer leepe. (Ecl. 8:12, 13) Wën mer nayt fon tëne hon, wëre mer oone muut un khente mer soo kaar unser froyntxaft mit Yeehoowa fersaue. Tan, wëns tuu aan fangst tich soo wii te Lewiiter fine, mach was eyer kemacht hot: heer Yeehoowa sayn liiplich aanreet aan un samel tich mit anere woo Yeehoowa sayn wile mache. Wën Yeehoowa tayn kreeste frayt is, tuust tuu woere frooheet fine un playpst tuu im weech woo tsu tëm “woere leepe” nëmt. (1 Tim. 6:19)
PHEETER SAYN XWACHEETE HON TËM OONE MUUT KELOS
Mer khene keholef wëre, orer khene mer ti anere helfe, wën mer triwer noo tenke aan Pheeter sayn payxpiil: tee waar een mool oone muut, awer noo heyer, hot eyer sich traan kehal aan Kot tiine (Kuk ti apsetse 17-19.)
17. Weeche was is Pheeter oone muut kep?
17 Te aphostel Pheeter waar eene muutwilich mënx; awer als mool, hot eyer tinge kemacht un kesaat oone se tenke, un noo heyer hot eyer sich weeche tas peroyt. Tsum payxpiil, wën Yeesus hot fer sayn aphostele kesaat tas eyer teet layte un xtërpe, Pheeter hot tëm kexënt un kesaat: “Es tuut nii net mit tich pasiire.” (Mat. 16:21-23) Tan, hot Yeesus Pheeter tisipliniirt. Wën phaar layt khom sin fer Yeesus in xpërte, Pheeter hot, oone se pleene, tas oer fon een sklaaw fon tëm heechste priister ap kexnit. (João 18:10, 11) Xon noch mool, Yeesus hot Pheeter tisipliniirt. Un noch, Pheeter hot sich keproost tas soo kaar wën ti anere aphostele teete Yeesus im xtich lose, eyer teet nii net soo was mache! (Mat. 26:33) Awer Pheeter waar net soo xtark wii eyer ketenkt hot; xpeeter aan tiise selwich nacht, hot eyer pang kriit un hot Yeesus tray mool ap kextos. Kans oone muut, is Pheeter “naus kang un hot piterlich keprilt”. (Mat. 26:69-75) Tsiimlich sicher, hot eyer sich kefroot ep Yeesus teet tëm eene taach noch mool fertsaye.
18. Wii hot Yeesus Pheeter keholef noch mool muutich wëre?
18 Awer, Pheeter is net soo oone muut keplip tas eyer noo kelos hot Yeehoowa tiine. Noo sayn feeler, hot eyer wayter Yeehoowa mit te anere aphostele ketiint. (João 21:1-3; Atos 1:15, 16) Was hot tëm keholef tas mache? Eyerst, Yeesus hat friier kepeet tas Pheeter sayn klaape selt sich net ferxweeche; un Yeesus hot Pheeter uf kemuut tsurik khome un sayn priiter ferxtërke. Yeehoowa hot tiise hërtsliche kepeete keantwort. Xpeeter, is te aychne Yeesus foer Pheeter khom, tsiimlich sicher fer iim uf muute. (Luc. 22:32; 24:33, 34; 1 Cor. 15:5) Yeesus is aach fer al ti aphostele tsum foer xayn khom, noo tas se hon ti kanse nacht kefixt un kaar niks kefang. In tiise xtun, Yeesus hot Pheeter te xans kep fer se saan wii fiil hot eyer tëm keliipt. Yeesus hat sayn liipe froynt fertsayt un hot tëm noch mee aarwayt kep. (João 21:15-17)
19. Wii tuut te Salmo 103:13, 14 uns helfe unser sinte siin soo wii Yeehoowa tëne siit?
19 Was sin ti lisyoone fer uns? Ti aat wii Yeesus mit Pheeter um kang is, tsaycht wii parmhërtslich Yeesus is — kraat soo wii sayn Fater. Tan, wën mer feeler mache, sole mer net rechne tas Yeehoowa tuut uns nii mools fertsaye. Mer thërfe uns net ferkese tas Satanaas wil tas mer soo sorte xpiirunge hon. Xtats tas, wole mer uns miie fer uns selepst — un tii woo keeche uns sinte — in te richtich aat siin: mit mitlayt un liip, soo wii unser himlixe Fater, Yeehoowa. (Lees Salmo 103:13, 14.) *
20. Was tuun mer im neekste artikel lërne?
20 Ti payxpiile fon Yoosef, Noemi un Rut, te Lewiiter, un Pheeter lose uns sicher tas “Yeehoowa is ticht pay tëne woo een ferprochne hërts hon”. (Sal. 34:18) Tee erlaupt tas mer kefoere mit mache, un tas mer als mool oone muut wëre. Awer, wën mer ti kefoere mit Yeehoowa sayn hilef iwerkhome, unser klaape wërt ferxtërkt. (1 Ped. 1:6, 7) In tëm neekste artikel, tuun mer wayter lërne iwer wii Yeehoowa xtitst sayn troye tiine uner woo oone muut sin, fiilaycht weeche sayn imperfektsyoone orer weeche xweyere situatsyoone.
LIIT 7 Yeehoowa, mayn kraft un mayn macht
^ parágrafo 5 Yoosef, Noemi un Rut, een Lewiiter, un te aphostel Pheeter hon kefoere mit kemacht woo hon tëne oone muut kelos. In tiise artikel, tuun mer siin wii hot Yeehoowa tëne ketreest un ferxtërkt. Meyer tuun aach siin was khene mer lërne mit tëne sayn payxpiil un mit te liiplich aat wii Yeehoowa mit tëne um kang is.
^ parágrafo 7 (1 Pedro 5:10) Awer, noo tas teyer fer een khorts tsayt kelit hot, tuut te aychne Kot fon al unfertiint kuutheet, woo tsu sayn eewich hërlichkheet in eenichkheet mit Kristus aych keruuft hot, ayre iipung fërtich pringe. Tee tuut aych fest mache, tee tuut aych xtark hale, tee tuut aych fest xtele.
^ parágrafo 9 (Rute 1:16, 17) Awer Rut hot kesaat: “Hal net aan fer tich im xtich lose, fer noo lose mit tich keen. Wayl, woos tuu hin keest, tat keen ich; un woos tuu iwer nacht playpst, tat tuun ich iwer nacht plaype. Tayn folek wërt mayn folek, un tayn Kot wërt mayn Kot. 17 Woos tuu xtërpst, tat xtërpe ich, un tat wëre ich aach pekraapt. Tas Yeehoowa mich xweyer xtrooft wën sonst was, woo net te toot is, mich fon tich aus naner macht.”
^ parágrafo 9 (Rute 1:22) Soo is Noemi mit sayn moapitixe xwiichertochter, Rut, fon te khemp fon Moap tsurik khom. Ti keerst ërntung hat kraat aan kefang wii se pis Petleheem khom sin.
^ parágrafo 15 (Salmo 73:16-19) Wën ich fersuucht hon tas ferxteen, sin ich unruych keplip, 17 pis wan ich aan Kot sayn kroose hayliche plats rin kang sin un ferxtan hon tëne sayn tsukhunft. 18 Sicher, xtelst tuu tëne uf een krunt woo ritxt. Tuu machst tëne in te fernichtung fale. 19 Uf een mool sin se fernicht! In een khorts xtun khomt sayn ën — een xrekliche ën!
^ parágrafo 15 (Salmo 73:22-25) Es hot mich ferninftichkheet un ferxtan kefeelt. Foer tich, waar ich wii een tier woo kaar net pleene khan. 23 Awer yets sin ich imer mit tich; tuu halst mayn recht hant fest. 24 Tuu lënkst mich mit tayn aanreete, un noo heyer nëmst tuu mich tsu te hërlichkheet. 25 Weer noch hon ich im himel? Sonst tich, winxe ich kaar niks mee uf te eyert.
^ parágrafo 19 (Salmo 103:13, 14) Soo wii een fater tsu sayne soone parmhërtslich is, soo is Yeehoowa parmhërtslich mit tëne woo tsu iim tiif respekt tsayche. 14 Wayl eyer wees wii meyer kemacht sin, erinert sich tas meyer xtaap sin.
^ parágrafo 62 PILTER AUSLEYUNGE: Noemi, Rut un Orpa waare traurich un oone muut weeche te toot fon sayn mëner. Xpeeter, Rut un Noemi, tepay mit Poaas, hon sich kefrayt wayl Opët is uf te welt khom.
