1-2. Anni i gigiammuattam taw nga artikulo?

AMMU tam nga ababba laman i pattolay ta maddaggun anna “napannu tu problema” yatun. (Job 14:1) Yayya nga nu mittan, gagangay laman nga makkafi i nono tam. Kunnatun gapa i natageno na aru ta aripan ni Jehova gari. Kayà paga lagu na karuan nga matay ngana. (1 Pat. 19:2-4; Job 3:1-3, 11; 7:15, 16) Ngem megafu ta nattalo ira kani Jehova, kanayunna ira nga binanna-bannayan anna pinasikan. Mabibbig i istoriada ta Biblia tapenu matudduan ittam anna massikan i nono tam.​—Roma 15:4.

² Ikonsidera naw nga artikulo i karuan nga aripan ni Jehova nga nakapagattam ta kapurueba ira nga namakkafi ta nonoda kagitta ni Jose nga ana ni Jacob, i balu nga si Noemi anna i manuganna nga si Ruth, i Levita nga nangitura ta Salmo 73, anna si apostol Pedro. Kunnasi nga pinasikan ni Jehova i nonoda? Anni gapa i magigiammu tam ta ekspiriensada? I tabbag tatun ira i mangipasiguradu nittam nga ‘aranni i YAFU ta makafi i nonoda anna arianna nga pagurayan danuri awan tu iddanamana.’​—Sal. 34:18.

3-4. Anni i nesimmu kani Jose ta kabbinna?

³ Turi ta 17 anios si Jose, namiddua yayya nga pinattatageno na Dios. Nipasingan danatun nga tatageno nga mabbalin noka tu tadday nga importante nga tolay si Jose nga irespeto na familiana. (Gen. 37:5-10) Imbes nga irespeto yayya na wawwaragina, nilakuda lallagu yayya tapus nabbalin tu tadday nga aripan  na ofisial ta Ehipto nga si Potifar. (Gen. 37:21-28) Ta ababba laman nga tiempo, dakal i nangulian na situasion ni Jose. Ta baleda, meddeddu nga ana si Jose, ngem sangawe, aripan ngana laman yayya na tadday nga ari nga massesserbi kani Jehova.​—Gen. 39:1.

⁴ Mas paga nga narrake i situasion ni Jose. Inakusan na atawa ni Potifar si Jose nga finuersana kanu yayya nga makibbiko nisa. Megafu tatun, insigida nga nipefuku ni Potifar si Jose anna kinawagadda yayya maski paga nu awan tu ebidensia nga nesimmu yatun. (Gen. 39:14-20; Sal. 105:17, 18) Anni tamma i natageno ni Jose? Abbabbing paga laman yayya ngem kunnatun ngana i akusasiodda nisa. Agga-nonona gapa nga baka mepasiranan i ngagan ni Jehova megafu tatun. Ari gafu nga kakkadda-kaddag nga nakkafi i nono ni Jose!

5. Anni i kingngua ni Jose tapenu massikan i nonona?

⁵ Megafu ta aripan anna nakafuku si Jose, awan tu maski anni nga makuana ta situasionna. Ngem anni i kingnguana tapenu massikan i nonona? Imbes nga maffokus yayya ta arianna makua, nallallappo yayya nga kuan i maski anni nga ipakuada nisa. Nakafokus gapa yayya ta pamagayayya kani Jehova. Megafu tatun, binendisionan ni Jehova i ngamin nga kingnguana.​—Gen. 39:21-23.

6. Kunnasi nga nabanna-bannayan si Jose megafu ta tatagenona ira?

⁶ Awayyana gapa nga nabanna-bannayan si Jose megafu ta neraddammanna i tatagenona ira ta nappasa. Nipasingan danatun nga duttal noka i tiempo nga masinganna uli i familiana anna makkasta i situasionna. Kurug tu nesimmu yatun. Turi ta 37 anios ngana si Jose, kappabbaw i nikatuppal na tatagenona ira!​—Gen. 37:7, 9, 10; 42:6, 9.

7. Segun ta 1 Pedro 5:10, anni i makoffun nittam tapenu maattammattam i kapurueba ira?

⁷ Anni i magigiammu tam? Iperaddam nittam na istoria ni Jose nga nu mittan, marake anna  ari tu patas i pattratu na totolay nittam. Matakitan ittam paga maski na kapangngurug tam. Ngem nu nonopattam nga si Jehova i mangiyegu anna mamaliag nittam, ari nga makkafi i nono tam anna ari ittam nga magimmang nga masserbi nisa. (Sal. 62:6, 7; bibbigan i 1 Pedro 5:10.) Daddammattam gapa nga 17 anios laman si Jose turi ta nattatageno yayya. Ipasingan natun nga mattalo si Jehova ta mabbing ira nga aripanna. Aru nga abbarabbing ta kaggawattam i kagitta ni Jose. Dakal gapa i pangurugda kani Jehova. Mefuku paga lagu i karuan nira megafu ta kayàda nga mattalupaddian nga matalo ta Dios.​—Sal. 110:3.

8. Anni i nesimmu kani Noemi anna Ruth?

⁸ Nanaw si Noemi anna i familiana ta Juda anna nagali ira ta Moab megafu ta grabe nga bisin. Natay ta Moab i atawa ni Noemi nga si Elimelec, yari tu i dua nga ánana nga lalaki ngana laman i kavuluna. Nangatawa danatun nga lallaki tu babbay nga Moabita—da Ruth anna Orpa. Ngem nappasa laman i mafulu nga ragun, natay gapa i ána nga lalaki ni Noemi. Megafu ta awan tu ána da Ruth anna Orpa, awan ngana gapa tu kavuluda dua. (Ruth 1:1-5) Nonopammu ngana laman i nepallo nga daddam natun nga tallu nga babbay! Puede nga maki-atawa uli da Ruth anna Orpa. Ngem sinni ngana saw i manangngaw kani Noemi jebi ta bako ngana yayya? Kuruga nakkafi i nono ni Noemi yatutta nakagina: “Ariannù nga agalan tu Noemi. Agalannù tu Mara, megafu ta nipamavulun na Makapangngua-sa-ngamin nga mazziga i pattolè.” Megafu tatun ira nga nesimmu, naddesision si Noemi nga manoli ta Betlehem anna nevulu si Ruth nisa.​—Ruth 1:7, 18-20.

9. Segun ta Ruth 1:16, 17, 22, kunnasi nga pinasikan ni Ruth i nono ni Noemi?

⁹ Anni i namasikan ta nono ni Noemi? I matalo nga aya. Angngariganna, nipasingan ni Ruth i matalo nga ayana kani Noemi turi ta arianna yayya vuluvuga nga pinanawan. (Bibbigan i Ruth 1:16, 17, 22.) Turi ta egga ngana ira ta Betlehem, nallallappo si Ruth nga magillawag tu sebada para ta pakawagadda ni Noemi. Megafu ta kingnguana, makasta i reputasionna ta totolay.​—Ruth 3:11; 4:15.

10. Kunnasi nga nipasingan ni Jehova nga ayatanna danuri pobre kagitta da Noemi anna Ruth?

¹⁰ Nipasingan ni Jehova i allona ta Israelita ira turi ta nangiyawa yayya tu dob para ta pobre ira gitta da Noemi anni Ruth. Nidogna ta totolena nga ariadda gapasan onu fusikan i ngamin nga egga ta aggig na komadda tapenu puede paga nga apan yatun na pobre ira. (Lev. 19:9, 10) Yayya nga egga lagapa i kanan da Noemi anni Ruth maski nu ari ira makkiddaw tu makan ta tanakuan.

11-12. Kunnasi nga pinagayayya ni Boaz da Noemi anna Ruth?

¹¹ Si Boaz i makakkua ta koman nu sitaw nga magillawag si Ruth. Mariku yayya nga lalaki. Nagustuanna i kinamatalo anna i aya ni Ruth kani Noemi. Yayya nga inatawana si Ruth anna ginatanna i davvun nga dati nga pakkukua na familia ni Noemi tapenu marensia yatun na ána ni Ruth. (Ruth 4:9-13) Nakka-ana ira tapus ningaganadda yatun tu Obed nga nabbalin tu kakay ni Patul David.​—Ruth 4:17.

¹² Imajinammu ngana laman i ayayya ni Noemi turi ta ginabbayna si Obed. Siguradu nga mappappabalo yayya kani Jehova! Ngem egga paga i mas makasta nga mesimmu kani Noemi anna Ruth. Sonu mapaginnolay ira, mammuadda nga tadday gabba si Obed ta ginafuan na Nepromesa nga Mesias nga si Jesu-Cristo!

13. Anni i magigiammu tam kani Noemi anna Ruth?

 ¹³ Anni i magigiammu tam? Baka makkafi i nono tam anna mawanan ittam tu iddanama nu mapurueban ittam. Awayyana nga manono tam paga lagu nga awan ngana tu solusion na problema tam. Ngem mawag tu mattalo ittam ta nelangitan nga Yama tam anna mattalupaddian ittam nga madukko ta kapangngurug tam ira. Daddammattam nga ari nga pinaginnolay ni Jehova i atawa ni Noemi anna i ánana nga lallaki. Kayà kagian natun nga ari gapa kanayun nga alsan ni Jehova i problema tam ira. Ngem uffunanna ittam tapenu maattammattam yatun. Kunnasi? Gukaban na matalo nga aya nga ipasa-pasingan na wawwaragi nittam.​—Prov. 17:17.

14. Ngatta nakkafi i nono na tadday nga Levita?

¹⁴ Tadday nga Levita i nangitura ta Salmo 73. Egga i pribilehiona nga masserbi ta templo ni Jehova. Ngem mittan, sobra i pinakkafi na nonona. Passilanna gare danuri marake anna maparayag. Ngatta? Ari tu megafu ta kayàna nga parigan ira. Masinganna gare nga mas makasta i pattoleda anne tannisa. (Sal. 73:2-9, 11-14) Abbona nga egga ngana nira i ngamin gitta na kinariku, makasta nga pattolay, anna awan tu pakavurungadda. Megafu ta masingi-singan yatun na Levita, grabe i pinakkafi na nonona. Yayya nga niyavuna: “Awan kari tu kwenta na nipattolè ta marenu anna i kawan na katagaruliak-ku?” Posible nga yatun i mamagimmang tannisa ta passerbi ta Dios.

15. Segun ta Salmo 73:16-19, 22-25, kunnasi nga nalabanan na Levita i pakkafi na nonona?

¹⁵ Bibbigan i Salmo 73:16-19, 22-25. ‘Simillung i Levita ta templo’ na Dios. Turi ta kavuluna ngana tatun i kaparehuna nga maddayaw ta Dios, nabbalin yayya tu kalmadu, nakapannono tu mapia, anna nepakimallona i situasionna. Megafu tatun, nalippawana nga mali i appana-panonona anna delikadu ngana i pappangetanna megafu ta meyarayyu ngana yayya kani Jehova. Nalippawana gapa nga egga ta “maduya nga lugar ira” danuri marake anna “kanninipang i ed-da nga pattuppalan.” Tapenu massikan i nono na Levita anna malsana i passilna ta marake nga  totolay, mawag tu pariganna i pagimamma ni Jehova ta ganna-gannug. Turi ta kingnguana yatun, nabbalin mana tu memammo i panagenona anna magayayya mana yayya. Kunna: “Ay nu kukua taka [Jehova], anni paga ta davvunaw i ek-ku awagan?”

16. Anni ira i magigiammu tam ta Levita?

¹⁶ Anni i magigiammu tam? Ariattam nakuan vuluvuga nga passilan danuri marake nga tolay nga makasta lagapa i pattoleda. Mawawan noka i pagayayyada anna ari ira nga mattolay tu mannanayun. (Ecl. 8:12, 13) Nu passilattam ira, makkafi laman i nono tam anna mawawan i relasiottam kani Jehova. Yayya nga nu mamegafu ka ngana nga makatageno tu passil, parigammu i kingngua na Levita. Tuttulammu i meddu nga tabarang ni Jehova anna makikavulu ka turi ira ta mangngua ta urena. Nu mas ayatammu si Jehova anne ta maski anni nga gannug, mabbalikka tu kurug nga magayayya anna makapattalupaddiakka ta dalan mappange ta “kurug nga pattolay.”​—1 Tim. 6:19.

17. Ngatta nakkafi i nono ni Pedro?

¹⁷ Matalikarag si apostol Pedro. Ngem nu mittan, arianna nga pannonopan i kakkagian onu kukukuanna tapus pabbabawyanna yatun. Angngariganna, turi ta kinagi ni Jesus ta apostolna ira nga mazziga-riga yayya anna matay, nivuya yayya ni Pedro anna kinagina: “Ari mepangngo tu makua yatun nikaw!” (Mat. 16:21-23) Nitunung ni Jesus si Pedro. Tapus turi ta arestowan ngana na suddalu ira si Jesus, gavva nga siniwag ni Pedro i aripan na katannangan nga pari yatutta nari i talingana. (Juan 18:10, 11) Megafu tatun, nitunung mana ni Jesus si Pedro. Niparayag gapa ni Pedro nga maski nu pallikuran na apostol ira si Jesus, arianna nga vuluvuga kuan yatun! (Mat. 26:33) Ngem megafu tatun nga sobra nga pakkomfiansa ni Pedro ta baggina, naganassing yayya ta tolay anna namillu nga kinagina nga arianna ammammu si Jesus. Megafu tatun, sobra i pinakkafi na nonona  tapus ‘nallawan yayya nga siminangi ta nepallo.’ (Mat. 26:69-75) Nononopanna nu mapakoma kari paga yayya ni Jesus.

18. Kunnasi nga pinasikan ni Jesus i nono ni Pedro?

¹⁸ Maski nu kunnatun i nakua ira ni Pedro, nitulu-tuloyna lagapa nga masserbi kani Jehova kavulu i karuan nga apostol. (Juan 21:1-3; King. 1:15, 16) Kunnasi nga nassikan i nono ni Pedro? Neraddammanna nga nipakimallo yayya ni Jesus tapenu ari nga makkafi i pangurugna. Kinagi gapa ni Jesus nga sonu makatoli ngana si Pedro, pasikannanna i wawwaragina. Sinabbag ni Jehova yatun nga napafutuan nga pakimallo. Nappasingan gapa si Jesus kani Pedro tapenu pasikannanna yayya. (Luc. 22:32; 24:33, 34; 1 Cor. 15:5) Turi ta tangagabi nga awan tu nakanna nga manango na apostol ira, nappasingan si Jesus nira. Tatun nga kinagi ni Jesus nga kuruga ayatanna si Pedro. Pinakoma gafu ni Jesus i meddu nga kofunna anna nitalona paga nisa i mas aru nga trabahu.​—Juan 21:15-17.

19. Segun ta Salmo 103:13, 14, anni i nononopan ni Jehova nu makaliwa ittam?

¹⁹ Anni i magigiammu tam? Nipasingan na pattratu ni Jesus kani Pedro nga minangngikallo yayya kagitta na Yamana. Nu makaliwa gafu ittam, ariattam nakuan vuluvuga nonopan nga ari ittam ngana mapakoma ni Jehova. Kayà ni Satanas nga kunnatun i matageno tam. Ngem daddammattam nakuan nga iddeddukan ittam ni Jehova, ammuna i limitasiottam anna kayàna ittam nga pakoman. Kunnatun nakuan i kuattam turi ira ta nakataki nittam.​—Bibbigan i Salmo 103:13, 14.

20. Anni i gigiammuattam ta tumunug nga artikulo?

²⁰ Ipasiguradu nittam na nesimmu kani Jose, Noemi anni Ruth, ta tadday nga Levita anna kani Pedro nga “aranni i YAFU ta makafi i nono da.” (Sal. 34:18) Nu mittan, ipamavulun ni Jehova nga mapurueban ittam anna makatageno ittam tu pakkafi na nono. Ngem nu maattammattam danatun ta uffun ni Jehova, mattuyag i pangurug tam. (1 Ped. 1:6, 7) Gigiammuattam ta tumunug nga artikulo nu kunnasi nga uuffunan ni Jehova danuri matalo nisa nu makkafi i nonoda megafu ta nakkamaliadda onu ta mariga nga situasion.