1-2. Ania ti usigentayo iti daytoy nga artikulo?

NO DADDUMA, mabalin a pampanunotentayo nga ababa ken “napno iti riribuk” ti biag. (Job 14:1) Natural laeng ngarud a no dadduma, maupaytayo. Kasta ti narikna ti adu nga adipen ni Jehova idi un-unana. Kayat pay ketdin ti dadduma ti matay. (1 Ar. 19:2-4; Job 3:1-3, 11; 7:15, 16) Ngem ni Jehova—ti Dios a nagtalkanda—kanayon a liniwliwa ken pinabilegna ida. Naisurat dagiti pakasaritaanda tapno mangliwliwa ken mangisuro kadatayo.—Roma 15:4.

² Iti daytoy nga artikulo, usigentayo ti dadduma nga adipen ni Jehova a nangibtur kadagiti makapaupay a pakasuotan, a kas ken Jose nga anak ni Jacob, ti balo a ni Noemi ken ti manugangna a ni Ruth, ti Levita a nangisurat iti Salmo 73, ken ni apostol Pedro. Kasano a pinabileg ida ni Jehova? Ken ania dagiti masursurotayo iti ulidanda? Ipasigurado kadatayo dagiti sungbat nga “asideg ni Jehova kadagiti nasaktan ti pusoda,” ken “isalakanna dagidiay maup-upay.”—Sal. 34:18, ftn.

3-4. Ania ti napasamak ken Jose idi agtutubo?

³ Idi agarup 17 ti tawen ni Jose, namindua a pinagtagtagainep ti Dios. Sigun kadagita a tagtagainep, addanto aldaw a mararaem ni Jose iti pamiliana. (Gen. 37:5-10) Ngem kalpasan dagita a tagtagainepna, bigla a nagbaliw ti biagna. Imbes a raemenda, inlako isuna dagiti kakabsatna tapno agbalin nga adipen. Idi kuan, naipan iti balay ni Potifar a maysa nga Egipcio nga opisial. (Gen. 37:21-28) Interamente a nagbalbaliw ti biag ni Jose. Nupay madungdungngo idi iti denna ni amana, nagbalinen a nanumo nga adipen ti maysa a lalaki iti  Egipto a saan a makaam-ammo ken Jehova.—Gen. 39:1.

⁴ Idi kuan, kimmaro ti kasasaad ni Jose. Ti asawa ni Potifar pinabasolna ni Jose iti gandat a panangrames. Gapu ta saan a nagimbestigar ni Potifar, impaibaludna a dagus ni Jose sa nakawaran. (Gen. 39:14-20; Sal. 105:17, 18) Panunotem ti narikna ti agtutubo a ni Jose idi napabasol iti gandat a panangrames. Panunotem met ti pannakaibabain ti nagan ni Jehova gapu iti dayta nga akusasion. Sigurado a naupay ni Jose!

5. Kasano a napagballigian ni Jose ti pannakaupay?

⁵ Bayat a ni Jose ket adipen ken balud, awan ti naaramidanna a mangbalbaliw iti situasionna. Ania ti nakatulong kenkuana tapno agtalinaed a positibo? Imbes nga agpokus kadagiti dinan maaramidan, inggaedna nga inaramid dagiti naipatrabaho kenkuana. Kangrunaan iti amin, pinampanunot ni Jose a ni Jehova ti kapatgan a Persona iti biagna. Gapu iti dayta, binendisionan ni Jehova ti amin nga inaramid ni Jose.—Gen. 39:21-23.

6. Kasano a nakaliwliwa ken Jose dagiti tagtagainepna?

⁶ Mabalin a naliwliwa met ni Jose idi pinampanunotna dagiti naimpadtuan a tagtagainepna. Ipasimudaag dagita a tagtagainep a makitananto manen ti pamiliana ken sumayaat ti situasionna. Ket dayta ti napasamak. Idi agarup 37 ti tawenen ni Jose, natungpal dagiti naimpadtuan a tagtagainepna iti naisangsangayan a pamay-an!—Gen. 37:7, 9, 10; 42:6, 9.

7. Sigun iti 1 Pedro 5:10, ania ti makatulong kadatayo a mangibtur kadagiti pakasuotan?

⁷ Dagiti masursurotayo. Ipalagip ti pakasaritaan ni Jose a naulpit ti lubong ken mabalin a mapasarantayo ti di kinahustisia. Mabalin a saan a nasayaat ti panangtrato kadatayo uray ti maysa a kapammatiantayo. Ngem no ibilangtayo ni Jehova kas Dakkel a Bato, wenno Pagkamangantayo, saantayonto a maupay wenno agsardeng nga agserbi kenkuana. (Sal.  62:6, 7; basaen ti 1 Pedro 5:10.) Lagipentayo met a mabalin a 17 ti tawen ni Jose idi namindua a pinagtagtagainep ni Jehova. Nalawag nga agtaltalek ni Jehova kadagiti agtutubo nga adipenna. Ita, adu nga agtutubo ti kas ken Jose. Adda met pammatida ken Jehova. Dadduma kadakuada ti naibalud gapu iti di kinahustisia ken saanda a panangikompromiso iti kinamatalekda iti Dios.—Sal. 110:3.

8. Ania ti napasamak kada Noemi ken Ruth?

⁸ Gapu iti nakaro a bisin, pimmanaw ni Noemi ken ti pamiliana idiay Juda ket nagnaedda idiay Moab. Idiay a natay ni Elimelec nga asawa ni Noemi, isu a nabalo ket naulila iti ama ti dua nga annakda. Idi agangay, nangasawa ti dua nga annakna iti dua a Moabita a da Ruth ken Orpa. Agarup 10 a tawen kalpasanna, natay met dagiti annak ni Noemi nga awan putotda. (Ruth 1:1-5) Napalalo la ketdi ti ladingit dagitoy a tallo a babbai! Siempre, mabalin a makiasawa manen da Ruth ken Orpa. Ngem asino ngay ti mangaywan iti bumakbaketen a ni Noemi? Nadepres unay ni Noemi nga urayna la naibaga: “Saandakon nga awagan iti Noemi. Awagandak iti Mara, ta impalubos ti Mannakabalin-amin nga agrigat ti biagko.” Kalpasan dagitoy a naliday a kapadasan, inkeddeng ni Noemi ti agsubli idiay Betlehem, ket kimmuyog kenkuana ni Ruth.—Ruth 1:7, 18-20.

9. Sigun iti Ruth 1:16, 17, 22, kasano a ni Ruth pinaregtana ni Noemi?

⁹ Ti solusion iti pannakaupay ni Noemi ket napudno nga ayat. Kas pagarigan, impakita ni Ruth ti napudno nga ayatna ken Noemi ta dina pinampanawan. (Basaen ti Ruth 1:16, 17, 22.) Idiay Betlehem, inggaed ni Ruth ti nagadas iti sebada para iti bagina ken ni Noemi. Gapu iti dayta, nagdinamag ti nasayaat a reputasion ni Ruth.—Ruth 3:11; 4:15.

10. Kadagiti ania a pamay-an nga impakita ni Jehova ti ayat kadagiti napanglaw a kas kada Noemi ken Ruth?

¹⁰ Inikkan ni Jehova dagiti Israelita iti linteg a mangipakita iti asina kadagiti napanglaw a kas kada Noemi ken Ruth. Imbagana kadagiti Israelita a no aganida, saanda nga apiten ti adda iti igid ti talonda tapno adda adasen dagiti napanglaw. (Lev. 19:9, 10) Isu a saan a kasapulan nga agdawat da Noemi ken Ruth iti kanenda. Makaalada iti taraonda iti nadayaw a pamay-an.

11-12. Kasano a pinaragsak ni Boaz da Noemi ken Ruth?

¹¹ Ti nabaknang a lalaki nga agnagan iti Boaz ti makinkua iti talon a pagad-adasan ni Ruth. Natukay unay ti pusona iti kinamatalek ni Ruth ken ni Noemi ken iti ayat nga ipakpakitana iti katuganganna. Gapu iti dayta, sinakana ti tawid ti pamiliada ket inasawana ni Ruth. (Ruth 4:9-13) Naaddaanda ken Ruth iti anak a pinanagananda iti Obed, a nagbalin a lolo ni Ari David.—Ruth 4:17.

¹² Nakaragragsak la ketdi ni Noemi bayat nga ub-ubbaenna ti maladaga a ni Obed ken agyamyaman ken Jehova! Ngem naragragsak pay da Noemi ken Ruth inton mapagungarda ket maammuanda a ni Obed ti nagbalin nga inapo ti Naikari a Mesias, ni Jesu-Kristo!

13. Ania dagiti napateg a masursurotayo iti pakasaritaan da Noemi ken Ruth?

¹³ Dagiti masursurotayo. No maipasangotayo kadagiti pakasuotan, mabalin a maupay wenno masaktan ti pusotayo. Baka ipagaruptayo nga awanen ti solusion dagiti problematayo. Masapul a naan-anay nga agtalektayo iti nailangitan nga Amatayo ken agtalinaedtayo a nasinged kadagiti kapammatiantayo. Siempre, mabalin a saan nga ikkaten ni Jehova ti pakasuotan. Kas pagarigan, saan nga insubli  ni Jehova ken Noemi ti natay nga asawana ken dagiti annakna. Ngem tulongannatayo nga agibtur, nalabit babaen ti napudno nga ayat nga ipakita ti naespirituan a pamiliatayo.—Prov. 17:17.

14. Apay a naupay unay idi ti maysa a Levita?

¹⁴ Maysa a Levita ti nangisurat iti Salmo 73. No kasta, adda naisangsangayan a pribilehiona nga agserbi iti lugar a pagdaydayawan ken Jehova. Ngem adda idi tiempo iti biagna a naupay. Apay? Inapalanna ngamin dagiti managdakdakes ken napasindayag, saan a gapu iti kinadakesda, no di ket iti makitkitana a narang-ay a panagbiagda. (Sal. 73:2-9, 11-14) Kasla adda kadakuada ti amin—kinabaknang, nasayaat a biag, ken awan ti pagdandanaganda. Para iti salmista, makapaupay ti narang-ay a panagbiagda isu nga imbagana: “Sayang laeng a pinagbalinko a nadalus ti pusok ken binugguak dagiti imak tapno nadalusak.” Nalawag nga agpegpeggad ti espiritualidadna.

15. Sigun iti Salmo 73:16-19, 22-25, kasano a nalabanan ti Levita a nangisurat iti daytoy a salmo ti pannakaupay?

¹⁵ Basaen ti Salmo 73:16-19, 22-25. Ti Levita a salmista ket ‘simrek iti naindaklan a santuario ti Dios.’ Sadiay a kaduana ti dadduma pay nga agdaydayaw iti Dios isu a nagbalin a kalmado, nakapagpanunot a naimbag, ken inkararagna ti situasionna. Nabigbigna a minamaag ti pampanunotenna ken posible nga adda isunan iti napeggad a dana a mangisina kenkuana ken Jehova. Naawatanna met a dagiti managdakdakes ket adda “iti nagalis a disso” ken agtungpalda iti ‘nakabutbuteng a pannakadadael.’ Tapno malabananna ti apal ken pannakaupay, masapul a kitaenna dagiti bambanag iti panangmatmat ni Jehova. Idi inaramidna dayta, saanen a nariribukan no di ket nagbalinen a naragsak. Imbagana: “Ditoy daga, awanen ti sabali pay a kasapulak [no di ni Jehova].”

16. Ania dagiti masursurotayo iti maysa a Levita?

¹⁶ Dagiti masursurotayo. Ditay koma pulos apalan dagiti managdakdakes a kasla narang-ay ti panagbiagda. Peke ken temporario ti  kinaragsakda; saanda nga agbiag nga agnanayon. (Ecl. 8:12, 13) No apalantayo ida, maupaytayo ken mabalin a madadael ti espiritualidadtayo. Isu a no mariknam nga ap-apalam ti kasla narang-ay a panagbiag dagiti managdakdakes, tuladem ti inaramid ti Levita. Ipangagmo ti nadungngo a balakad ti Dios, ken makikaduaka kadagidiay mangar-aramid iti pagayatan ni Jehova. No ni Jehova ti kapatgan iti biagmo, masarakam ti pudno a kinaragsak ken agtalinaedka iti dalan ti “pudpudno a biag.”—1 Tim. 6:19.

17. Ania dagiti rason a naupay ni Pedro?

¹⁷ Naregta ni apostol Pedro ngem adda met dagiti gundaway a dagus nga ibagana ti rikriknana. Gapu iti dayta, adda dagiti tiempo a nakaibaga wenno nakaaramid kadagiti banag a nagbabbabawyanna. Kas pagarigan, idi imbaga ni Jesus kadagiti apostolna nga agsagaba ken matay, binabalaw ni Pedro ket imbagana: “Dinto pulos mapasamak kenka dayta.” (Mat. 16:21-23) Kinorehir ni Jesus ni Pedro. Idi immay ti grupo dagiti tattao a mangaresto ken Jesus, sidadarasudos a nagtignay ni Pedro ket piningasna ti lapayag ti adipen ti nangato a padi. (Juan 18:10, 11) Kinorehir manen ni Jesus ni Pedro. Impannakkel met ni Pedro nga uray maitibkol ti dadduma nga apostol mainaig iti Kristo, saanto a pulos maitibkol! (Mat. 26:33) Ngem idi agangay, nagbuteng ni Pedro iti tao ket namitlo nga inlibakna ti Apona. Naupay unay ni Pedro isu a “rimmuar ket nagsangit gapu iti napalalo a ladingitna.” (Mat. 26:69-75) Pinampanunotna la ketdi no mapakawan pay isuna ni Jesus.

18. Kasano a tinulongan ni Jesus ni Pedro a manglaban iti pannakaupay?

¹⁸ Nupay kasta, saan a nagpaabak ni Pedro iti pannakaupay. Idi naitibkol, bimmangon, ken intultuloyna ti nagserbi ken Jehova a kadua  ti dadduma pay nga apostol. (Juan 21:1-3; Ara. 1:15, 16) Ania ti nakatulong kenkuana? Nalagipna nga inkararagan isuna ni Jesus a saan koma a kumapuy ti pammatina, ken pinaregta isuna ni Jesus nga inton makasubli, pabilgenna dagiti kakabsatna. Sinungbatan ni Jehova dayta a naimpusuan a kararag. Idi agangay, nagparang ni Jesus ken Pedro tapno paregtaenna. (Luc. 22:32; 24:33, 34; 1 Cor. 15:5) Kalpasan ti agpatnag nga awan ti nakalapan dagiti apostol, nagparang kadakuada ni Jesus. Iti dayta a kanito, ni Jesus inikkanna ni Pedro iti gundaway a mangpatalged manen iti ayatna kenkuana. Pinakawan ni Jesus ti patpatgenna a gayyem ken intalekna kenkuana ti ad-adu a trabaho.—Juan 21:15-17.

19. Ania ti isuro ti Salmo 103:13, 14 maipapan iti pampanunoten ni Jehova no makabasoltayo?

¹⁹ Dagiti masursurotayo. Naasi ti panangtrato ni Jesus ken Pedro ket naan-anay a tinuladna ni Amana. Isu a no agkamalitayo, saantayo koma a panunoten a dinatayon mapakawan ni Jehova. Laglagipentayo a kayat ni Satanas a kasta ti mariknatayo. Ikagumaantayo ketdi a kitaen ti bagitayo—ken dagidiay nakabasol kadatayo—sigun iti naasi ken nadungngo a panangmatmat ti nailangitan nga Amatayo.—Basaen ti Salmo 103:13, 14.

20. Ania ti usigentayo iti sumaruno nga artikulo?

²⁰ Ti ulidan ni Jose, da Noemi ken Ruth, ti maysa a Levita, ken ni Pedro ipasiguradona kadatayo nga “asideg ni Jehova kadagiti nasaktan ti pusoda.” (Sal. 34:18) No dadduma, ipalpalubosna a masuot ken maupaytayo. Nupay kasta, no ibturantayo a sibaballigi dagiti pakasuotan babaen ti tulong ni Jehova, bumileg ti pammatitayo. (1 Ped. 1:6, 7) Iti sumaruno nga artikulo, usigentayo pay no kasano a tultulongan ni Jehova dagiti matalek nga adipenna a maup-upay, nalabit gapu iti kinaimperpektoda wenno gapu iti narigat a kasasaadda.