တၢ်မၤလိ ၅၁
ယဟိဝၤယွၤမၤပူၤဖျဲး ပှၤလၢအသးဂံၢ်ဘါလီၤစၢ်တဖၣ်
“ယွၤအိၣ်ဘူးဒီး ပှၤလၢအသူၣ်ကၢ်အသးလီၤ ဒီးပှၤလၢအပီၢ်ယၢ်လီၤက့ၤအသးန့ၣ်, အုၣ်က့ၤခီၣ်က့ၤဝဲလီၤ.”—စံးထီၣ်ပတြၢၤ ၃၄:၁၈.
တၢ်သးဝံၣ် ၃၀ ယသကိး, ယပၢ်, ယယွၤ
တၢ်မၤလိအံၤ အတၢ်တိာ်ပာ် *
၁-၂. လၢတၢ်မၤလိအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.
ပသ့ၣ်ညါလၢ ပတၢ်အိၣ်မူန့ၣ်ဖုၣ်ဝဲ ဒီးပမုၢ်နံၤတဖၣ်ပှဲၤဝဲဒီး “တၢ်ကိၢ်တၢ်ဂီၤ” လီၤ. (ယိၤဘး ၁၄:၁) အဃိ တဘျီတခီၣ်န့ၣ် ပသးဂံၢ်ဘါကလီၤစၢ်ဝဲလီၤ. ဘၣ်ဆၣ် ယဟိဝၤယွၤအခ့အပှၤလၢညါ အါဂၤစ့ၢ်ကီး တူၢ်ဘၣ်ဝဲဒ်န့ၣ်လီၤ. တနီၤန့ၣ်အဲၣ်ဒိးသံဝဲလီၤ. (၁ စီၤပၤ ၁၉:၂-၄; ယိၤဘး ၃:၁-၃, ၁၁; ၇:၁၅, ၁၆) ဘၣ်ဆၣ် ယဟိဝၤယွၤမၤမုာ်ထီၣ်အဝဲသ့ၣ်အသး ဒီးဟ့ၣ်ဆူၣ်ထီၣ် အဝဲသ့ၣ်အဂံၢ်အဘါလီၤ. ဒီးအဝဲသ့ၣ်အဂ့ၢ်န့ၣ် ပထံၣ်ဘၣ်လၢလံာ်စီဆှံအပူၤအဃိ ပမၤလိန့ၢ်တၢ်လၢ အဝဲသ့ၣ်အအိၣ်သ့ဝဲလီၤ.—ရိမ့ၤ ၁၅:၄.
၂ လၢတၢ်မၤလိအံၤအပူၤ ပကတဲသကိး ယဟိဝၤယွၤအခ့အပှၤတနီၤလၢ အလဲၤခီဖျိဘၣ် တၢ်ကီတၢ်ခဲတဖၣ်အဂ့ၢ်လီၤ. အဝဲသ့ၣ်တနီၤန့ၣ် မ့ၢ်ဝဲစီၤယၤကိာ်အဖိခွါ စီၤယိၤသး, မုၣ်ကမဲနီၢ်နၤဧမံ ဒီးအဒဲၣ်မုၣ်နီၢ်ရူၤသး, ပှၤလ့ၤဝံဖိလၢအကွဲးထါ စံးထီၣ်ပတြၢၤ ၇၃ ဒီးတၢ်မၢဖိပ့းတရူးလီၤ. ယဟိဝၤယွၤမၤမုာ်ထီၣ် အဝဲသ့ၣ်အသးလၢကျဲဒ်လဲၣ်. ဒီးအဝဲသ့ၣ်အတၢ်လဲၤခီဖျိတဖၣ်န့ၣ် ပမၤလိန့ၢ်ဘၣ် တၢ်မနုၤလဲၣ်. တၢ်သံကွၢ်တဖၣ်အံၤအတၢ်စံးဆၢန့ၣ် ကမၤမုာ်ထီၣ်ပသးလီၤ. မ့ၢ်လၢလံာ်စီဆှံတဲဝဲလၢ “ယွၤအိၣ်ဘူးဒီးပှၤလၢ အသူၣ်ကၢ်အသးလီၤ, ဒီးပှၤလၢအပီၢ်ယၢ်လီၤက့ၤအသးန့ၣ် အုၣ်က့ၤခီၣ်က့ၤဝဲလီၤ.”—စံးထီၣ်ပတြၢၤ ၃၄:၁၈.
စီၤယိၤသးထံၣ်ဘၣ်ဒီး တၢ်တတီတလိၤဘၣ်
၃-၄. ဖဲစီၤယိၤသးအသးစၢ်အခါ တၢ်ကဲထီၣ်အသးဒီးအီၤဒ်လဲၣ်.
၃ ဖဲစီၤယိၤသးအိၣ် ၁၇ နံၣ်အခါ အဝဲမံမီၢ် တၢ်မံမီၢ်ခံခါလၢ အဟဲလၢကစၢ်ယွၤအအိၣ်လီၤ. အဝဲမံမီၢ်ဝဲလၢ မုၢ်ကအိၣ်ဝဲတနံၤန့ၣ် အဝဲကကဲထီၣ်ပှၤဒိၣ်ပှၤထီလၢ အဟံၣ်ဖိဃီဖိအကျါလီၤ. (၁ မိၤၡ့ ၃၇:၅-၁၀) ဘၣ်ဆၣ် ဖဲန့ၣ်ဝံၤအလီၢ်ခံ အတၢ်အိၣ်မူ ဆီတလဲအသးခဲလၢာ်လီၤ. လၢစီၤယိၤသးကဒိးန့ၢ်ဘၣ် တၢ်ပာ်ကဲအလီၢ် အဒီပုၢ်ဝဲၢ်ခွါတဖၣ်ဆါလီၤအီၤဒ်ကုၢ်အသိးလီၤ. ဒီးစီၤယိၤသးဘၣ်လဲၤအိၣ်လၢ စီၤပိၤတံၤဖၢ်အဟံၣ်လၢ ကီၢ်အဲၤကူပတူးအပူၤလီၤ. (၁ မိၤၡ့ ၃၇:၂၁-၂၈) ဖဲန့ၣ်အဆၢကတီၢ် အဝဲတအိၣ်ဘၣ်ဒီးအပၢ်လၢအအဲၣ်အီၤ ဒီးခီဖျိလၢအကဲကုၢ်အဃိ အဘၣ်မၤသကိးတၢ်ဒီး ပှၤလၢအတအဲၣ် ယဟိဝၤယွၤဘၣ်တဖၣ်လီၤ.—၁ မိၤၡ့ ၃၉:၁.
၄ စီၤယိၤသးအတၢ်အိၣ်သး နးထီၣ်ဒိၣ်န့ၢ်ဒံးအလီၢ်လီၤ. စီၤပိၤတံၤဖၢ်အမါတဲဝဲလၢ စီၤယိၤသးဂုာ်ကျဲးစၢးလၢ ကမံဃုာ်ဒီးအီၤလီၤ. စီၤပိၤတံၤဖၢ်တဃုသ့ၣ်ညါ တၢ်ဂ့ၢ်အံၤဘၣ်. လၢတၢ်န့ၣ်အလီၢ် အဝဲမၢပှၤထၢနုာ်လီၤ စီၤယိၤသးလၢဃိာ်ပူၤ ဒီးမၢပှၤခးတံၢ်အီၤလၢထးသွဲလီၤ. (၁ မိၤၡ့ ၃၉:၁၄-၂၀; စံးထီၣ်ပတြၢၤ ၁၀၅:၁၇, ၁၈) ထံၣ်တမှံကွၢ် စီၤယိၤသးမ့ၢ်ပှၤသးစၢ်ဖိတဂၤဒီး ဖဲပှၤဆိကမိၣ်ကမၣ်အီၤလၢ အဖီၣ်ဆူၣ်ပှၤမါအခါ အကတူၢ်ဘၣ်ဝဲဒ်လဲၣ်. ဒီးဖဲပှၤနၢ်ဟူဘၣ်တၢ်ဂ့ၢ်အံၤအခါ ပှၤကဆိကမိၣ်ဘၣ်ဃးဒီး အကစၢ်ယွၤလၢအမ့ၢ် ယဟိဝၤယွၤတဂၤန့ၣ်အဂ့ၢ်ဒ်လဲၣ်. ခီဖျိလၢတၢ်ဂ့ၢ်အံၤအဃိ စီၤယိၤသးအသးကဘၣ်ဒိဝဲ သပှၢ်ကတၢၢ်လီၤ.
၅. စီၤယိၤသးလဲၤခီဖျိဝဲ အတၢ်ကီတၢ်ခဲန့ၢ်လၢကျဲဒ်လဲၣ်.
၅ ဖဲစီၤယိၤသးကဲကုၢ် ဒီးလၢခံအဘၣ်အိၣ်လၢ ဃိာ်ပူၤအဆၢကတီၢ် အတၢ်ခွဲးတၢ်ယာ်ဒီး တၢ်လၢအအဲၣ်ဒိးမၤဝဲန့ၣ် အမၤဝဲတသ့လၢၤဘၣ်. အဃိ အဝဲလဲၤခီဖျိဝဲ တၢ်ဂ့ၢ်အံၤကသ့ဒ်လဲၣ်. လၢအဝဲကသးစၢၢ်ဆၢအတၢ်ကီတၢ်ခဲအလီၢ် တၢ်မၤလၢအဒိးန့ၢ်ဘၣ်ဝဲန့ၣ် အဝဲဂုာ်ကျဲးစၢးမၤဝဲလၢအဂ့ၤကတၢၢ်လီၤ. စီၤယိၤသးထံၣ်ဝဲလၢ ယဟိဝၤယွၤမ့ၢ်ပှၤအရ့ဒိၣ်ကတၢၢ်လၢ အတၢ်အိၣ်မူအပူၤအဃိ ကယဲၢ်တၢ်လၢအမၤဝဲန့ၣ် ယဟိဝၤယွၤဆိၣ်ဂ့ၤအီၤလီၤ.—၁ မိၤၡ့ ၃၉:၂၁-၂၃.
၆. စီၤယိၤသးအတၢ်မံမီၢ်န့ၣ် မၤမုာ်ထီၣ်အသးဒ်လဲၣ်.
၆ ဖဲစီၤယိၤသးဆိကမိၣ်ထံက့ၤ အတၢ်မံမီၢ်အခီပညီအခါ အသးကမုာ်ထီၣ်က့ၤ ဒီးအတၢ်မံမီၢ်အံၤမၤစၢၤအီၤလၢ အသ့ၣ်ညါထီၣ်ဝဲလၢ အကထံၣ်ဘၣ်က့ၤအဟံၣ်ဖိဃီဖိ ဒီးအတၢ်အိၣ်သး ကဂ့ၤထီၣ်က့ၤဝဲလီၤ. တၢ်မၤအသးဒီးအီၤဒ်လဲၣ်. ဖဲစီၤယိၤသးအသးအိၣ် ၃၇ နံၣ်အခါ အတၢ်မံမီၢ် ဟဲလၢထီၣ်ပှဲၤထီၣ်ဝဲလီၤ.—၁ မိၤၡ့ ၃၇:၇, ၉, ၁၀; ၄၂:၆, ၉.
၇. ဒ် ၁ ပ့းတရူး ၅:၁၀ ပာ်ဖျါထီၣ်ဝဲအသိး ဖဲပထံၣ်ဘၣ်တၢ်ကီတၢ်ခဲအခါ တၢ်မနုၤကမၤစၢၤပှၤလဲၣ်.
၇ ပမၤလိန့ၢ်ဘၣ်တၢ်မနုၤလဲၣ်. ပအိၣ်မူဘၣ်ဟီၣ်ခိၣ်လၢအပှဲၤဒီး တၢ်အၢတၢ်သီ ဒီးတဘျီတခီၣ် ပှၤရ့ဒီးပှၤတတီတလိၤဘၣ်. ပဒီပုၢ်ဝဲၢ်မုၣ်ခွါတဖၣ်ဒၣ်လဲာ် ကမၤဆါဘၣ်ပသးလီၤ. ဘၣ်ဆၣ် ပမ့ၢ်ထံၣ်ယဟိဝၤယွၤဒ် ပလၢၢ် မ့တမ့ၢ် ပတၢ်အိၣ်သဒၢအလီၢ်န့ၣ် ပသးတဟးဂီၤဘၣ်. လၢတၢ်န့ၣ်အလီၢ် ပတပတုာ်မၤ ကစၢ်ယွၤအတၢ်မၤဘၣ်. (စံးထီၣ်ပတြၢၤ ၆၂:၆, ၇; ဖး ၁ ပ့းတရူး ၅:၁၀ တက့ၢ်.) ပကသ့ၣ်နီၣ်ထီၣ်က့ၤ ဖဲစီၤယိၤသးမံမီၢ်တၢ်အခါ အသးအိၣ်ဒၣ်ထဲ ၁၇ နံၣ်ဒံးလီၤ. အဃိ ပသ့ၣ်ညါဘၣ်လၢ ယဟိဝၤယွၤနာ်န့ၢ်ဝဲ အခ့အပှၤလၢအသးစၢ်အံၤလီၤ. မုၢ်မဆါတနံၤအံၤ ပှၤသးစၢ်အါဂၤ လီၤဂာ်ဒီးစီၤယိၤသးလီၤ. အဝဲသ့ၣ်စ့ၢ်ကီးအိၣ်ဒီးတၢ်နာ်ယဟိဝၤယွၤလီၤ. ခီဖျိလၢအဝဲသ့ၣ်အိၣ်ဒီး တၢ်သးတီလၢ ယဟိဝၤယွၤအဖီခိၣ်အဃိ အဝဲသ့ၣ်တနီၤန့ၣ် လီၤဘၣ်လၢဃိာ်ပူၤလီၤ.—စံးထီၣ်ပတြၢၤ ၁၁၀:၃.
ပိာ်မုၣ်ခံဂၤလၢအထံၣ်ဘၣ်ဒီး တၢ်သူၣ်ဘၣ်ဒိသးဘၣ်ဒိ
၈. တၢ်ကဲထီၣ်အသးဒီး နီၢ်နၤဧမံ ဒီးနီၢ်ရူၤသးဒ်လဲၣ်.
၈ ခီဖျိလၢ တၢ်သၣ်ဝံၤလီၤဒိအိၣ်ထီၣ်လၢ ကီၢ်ယူဒၤနးနးကလဲာ်အဃိ နီၢ်နၤဧမံ ဒီးအဟံၣ်ဖိဃီဖိ လဲၤသုးအလီၢ်လၢကီၢ်မိၤအးလီၤ. ဖဲန့ၣ် နီၢ်နၤဧမံအဝၤ စီၤအလံၤမ့လ့းသံဝဲ ဒီးအဘၣ်အိၣ်တ့ၢ်ဝဲဒီးအဖိခွါခံဂၤလီၤ. လၢခံအဖိခွါခံဂၤဆီဟံၣ်ဆီဃီဒီး ပှၤမိၤအးမုၣ်လၢအမ့ၢ်နီၢ်ရူၤသး ဒီးနီၢ်ဧိးရပၤ ဘၣ်ဆၣ်အနံၣ် ၁၀ ဝံၤအလီၢ်ခံ နီၢ်နၤဧမံအဖိခွါခံဂၤန့ၣ် သံဝဲစ့ၢ်ကီးလီၤ. ဒီးအဝဲသ့ၣ် အဖိအလံၤတအိၣ်နီတဂၤဘၣ်. (ရူၤသး ၁:၁-၅) ပိာ်မုၣ်သၢဂၤန့ၣ် ကသူၣ်အုးသးအုးထဲလဲၣ်န့ၣ် နထံၣ်တမှံကွၢ်ကသ့ဧါ. နီၢ်ရူၤသးဒီးနီၢ်ဧိးရပၤ ဆီဟံၣ်ဆီဃီလၢအသီသ့ သနာ်က့ မတၤတဂၤကကွၢ်ထွဲက့ၤ နီၢ်နၤဧမံလဲၣ်. အဃိ နီၢ်နၤဧမံအသူၣ်ဟးဂီၤသးဟးဂီၤ ဒီးဘၣ်တဘျီအတဲဝဲလၢ “ကိးယၤလၢ နီၢ်နၤဧမံတဂ့ၤ, ကိးယၤလၢ နီၢ်မၤရၤတက့ၢ်. အဂ့ၢ်ဒ်အံၤ, တၢ်သ့တၢ်လၢာ် မၤယၤနးနးကလဲာ်လီၤ.” နီၢ်နၤဧမံထံၣ်ဘၣ်ဒီး တၢ်သူၣ်အုးသးအုးတဖၣ်ဝံၤအလီၢ်ခံ အဝဲက့ၤက့ၤဝဲဆူဝ့ၢ်ဘ့ၤသလ့ဃ့ၣ် ဒီးနီၢ်ရူၤသးလဲၤပိာ်အခံလီၤ.—ရူၤသး ၁:၇, ၁၈-၂၀.
ယဟိဝၤယွၤမၤစၢၤ နီၢ်နၤဧမံဒီးနီၢ်ရူၤသးန့ၣ် အပာ်ဖျါထီၣ်ဝဲလၢ အမၤမုာ်ထီၣ်က့ၤ အခ့အပှၤ လၢအသးလီၤစၢ်ဒီး အသးဘၣ်ဒိတဖၣ်သ့လီၤ. နၤစ့ၢ်ကီး အမၤစၢၤနၤသ့လီၤ (ကွၢ်လံာ်အဆၢ ၈-၁၃) *
၉. ဒ် ရူၤသး ၁:၁၆, ၁၇, ၂၂ ပာ်ဖျါထီၣ်ဝဲအသိး နီၢ်ရူၤသးမၤမုာ်ထီၣ်က့ၤ နီၢ်နၤဧမံအသးဒ်လဲၣ်.
၉ တၢ်မနုၤမၤစၢၤ နီၢ်နၤဧမံလဲၣ်. ခီဖျိလၢ နီၢ်ရူၤသးပာ်ဖျါထီၣ် တၢ်အဲၣ်လၢအတီဒီး တပာ်တ့ၢ်အီၤဘၣ်အဃိ နီၢ်နၤဧမံအသးမုာ်ထီၣ်က့ၤဝဲလီၤ. (ဖး ရူၤသး ၁:၁၆, ၁၇, ၂၂ တက့ၢ်.) လၢဝ့ၢ်ဘ့ၤသလ့ဃ့ၣ်န့ၣ် နီၢ်ရူၤသးမၤတၢ်ဆူၣ်ဆူၣ် ဒီးထၢဝဲဘုစဲၤလၢ အနီၢ်ကစၢ်အဂီၢ်ဒီး နီၤနၤဧမံအဂီၢ်လီၤ. နီၢ်ရူၤသးမၤတၢ်ဆူၣ်အဃိ အဝဲအိၣ်ဒီးမံၤဂ့ၤသၣ်ဂ့ၤလီၤ.—ရူၤသး ၃:၁၁; ၄:၁၅.
၁၀. ယဟိဝၤယွၤပာ်ဖျါထီၣ် အတၢ်အဲၣ်လၢနီၢ်ရူၤသးဒီး နီၢ်နၤဧမံအဖီခိၣ်လၢကျဲဒ်လဲၣ်.
၁၀ ယဟိဝၤယွၤဟ့ၣ်လီၤ ပှၤအံၣ်စရ့လးဖိ တၢ်သိၣ်တၢ်သီတခါလၢ အဝဲသ့ၣ်ကဘၣ်ပာ်ဖျါထီၣ် တၢ်ဒိသူၣ်ဒိသးလၢပှၤဖှီၣ်ဖိယာ်ဖိ ဒ်သိးဒီးနီၢ်ရူၤသးဒီး နီၢ်နၤဧမံန့ၣ်လီၤ. ယဟိဝၤယွၤ တဲပာ်စၢၤအပှၤဂီၢ်မုၢ်လၢ အဝဲသ့ၣ်ကူးဘုအဆၢကတီၢ် ကဘၣ်ပာ်တ့ၢ်ဝဲဘုအစဲၤတနီၤလၢ ပှၤဖှီၣ်ဖိယာ်ဖိ ကထၢအီၣ်ဝဲအဂီၢ်လီၤ. (၃ မိၤၡ့ ၁၉:၉, ၁၀) အဃိ နီၢ်ရူၤသးဒီးနီၢ်နၤဧမံ ဒိးန့ၢ်ဘၣ်တၢ်အီၣ်အဃိ အဝဲသ့ၣ်တလိၣ်ဟးဃ့အီၣ် ပှၤဂၤအတၢ်အီၣ်ဘၣ်.
၁၁-၁၂. စီၤဘိၤဧးမၤသးခုဝဲ နီၢ်နၤဧမံဒီးနီၢ်ရူၤသး အသးလၢကျဲဒ်လဲၣ်.
၁၁ နီၢ်ရူၤသးလဲၤထၢဘုအစဲၤလၢ စီၤဘိၤဧးအစံာ်ပျီပူၤလီၤ. စီၤဘိၤဧးထံၣ်ဘၣ်ဝဲ နီၢ်ရူၤသးအတၢ်အဲၣ်လၢအတီ လၢအမံၤပှၢ်နီၢ်နၤဧမံအဖီခိၣ်အဃိ အဘၣ်သူၣ်ဘၣ်သးဝဲဒိၣ်မးလီၤ. လၢခံ အဝဲဖျီအသးဒီးနီၢ်ရူၤသး ဒီးအပှ့ၤက့ၤတၢ်လီၢ်တၢ်ကျဲလၢ နီၢ်နၤဧမံအဟံၣ်ဖိဃီဖိ အတၢ်န့ၢ်သါ ဒ်သိးနီၢ်ရူၤသးအဖိသ့ၣ်တဖၣ် ကဒိးန့ၢ်ဘၣ်က့ၤတၢ်န့ၢ်သါအဂီၢ်လီၤ. (ရူၤသး ၄:၉-၁၃) အဝဲသ့ၣ်ခံဂၤန့ၣ် အဖိအိၣ်ဝဲတဂၤ ဒီးကိးန့ၢ်ဝဲအမံၤလၢစီၤဧိၤဘ့းန့ၣ်လီၤ. ဒီးစီၤဧိၤဘ့းမ့ၢ်ဝဲ စီၤပၤဒၤဝံးအဖုလီၤ.—ရူၤသး ၄:၁၇.
၁၂ ထံၣ်တမှံကွၢ် ဖဲနီၢ်နၤဧမံစိာ်ဝဲအလံၤခွါ စီၤဧိၤဘ့းအခါန့ၣ်တက့ၢ်. ဒီးအဝဲစံးဘျုးစံးဖှိၣ် ယဟိဝၤယွၤလၢအသးဒီဖျၢၣ်ညါလီၤ. လၢခါဆူညါ ဖဲတၢ်ဂဲၤဆၢထၢၣ်သမူထီၣ်က့ၤအခါန့ၣ် နီၢ်နၤဧမံဒီးနီၢ်ရူၤသး ကသ့ၣ်ညါဘၣ်ဝဲယ့ၣ်ၡူးခရံာ်လၢ အမ့ၢ်တၢ်စံးပာ်မ့းၡံအၤအံၤ ဟဲလီၤစၢၤလီၤသွဲၣ်လၢ စီၤဧိၤဘ့းန့ၣ်လီၤ.
၁၃. ပမ့ၢ်ဆိကမိၣ်ထီၣ် နီၢ်ရူၤသးဒီးနီၢ်နၤဧမံ အတၢ်လဲၤခီဖျိန့ၣ် ပမၤလိန့ၢ်ဘၣ်တၢ်မနုၤလဲၣ်.
၁၃ ပမၤလိန့ၢ်ဘၣ်တၢ်မနုၤလဲၣ်. ဖဲပထံၣ်ဘၣ်တၢ်ကီတၢ်ခဲအခါ ပသးကလီၤစၢ် ဒီးတဘျီတခီၣ် ပသးကဘၣ်ဒိလီၤ. ဒီးပကဆိကမိၣ်ဘၣ်လၢ ပတၢ်ကီတၢ်ခဲအံၤ က့ၤဂ့ၤထီၣ်က့ၤတသ့ဘၣ်. ဘၣ်ဆၣ် ပကဘၣ်နာ်န့ၢ် ပပၢ်လၢမူခိၣ်လၢလၢပှဲၤပှဲၤ ဒီးအိၣ်ဘူးဒီးပဒီပုၢ်ဝဲၢ်မုၣ်ခွါတဖၣ်လီၤ. ပသ့ၣ်ညါလၢ ယဟိဝၤယွၤန့ၣ်တသုးကွံာ် ပတၢ်ကီတၢ်ခဲတဖၣ်ဘၣ်. အဒိ ယဟိဝၤယွၤတမၤသမူထီၣ်န့ၢ် နီၢ်နၤဧမံ အဝၤဒီးအဖိခွါ ခံဂၤန့ၣ်ဘၣ်. ဘၣ်ဆၣ် ယဟိဝၤယွၤမၤစၢၤပှၤဒ်သိး ပလဲၤခီဖျိပတၢ်ကီတၢ်ခဲ ကန့ၢ်အဂီၢ်န့ၣ်လီၤ. တဘျီတခီၣ် ပဒီပုၢ်ဝဲၢ်မုၣ်ခွါတဖၣ် မၤန့ၢ်တၢ်လၢပဂီၢ်န့ၣ်လီၤ.—ကတိၤဒိ ၁၇:၁၇.
ပှၤလ့ၤဝံဖိတဂၤ တအဲၣ်ဒိးမၤ ယဟိဝၤယွၤအတၢ်မၤလၢၤဘၣ်
ပှၤကွဲးထါ စံးထီၣ်ပတြၢၤ ၇၃ တဂၤန့ၣ် ထံၣ်ဘၣ်ဝဲပှၤအၢပှၤသီ တဖၣ် မၤတၢ်ကဲထီၣ်လိၣ်ထီၣ်အဃိ အဝဲတအဲၣ်ဒိးမၤ ယဟိဝၤယွၤ အတၢ်မၤလၢၤဘၣ်. တၢ်သ့ၣ် တဖၣ်န့ၣ် ကဲထီၣ်အသးဒီးပှၤသ့လီၤ (ကွၢ်လံာ်အဆၢ ၁၄-၁၆)
၁၄. ဘၣ်မနုၤအဃိ ပှၤလ့ၤဝံဖိတဂၤအံၤ အသးဂံၢ်ဘါလီၤစၢ်ဝဲဒိၣ်မးလဲၣ်.
၁၄ ပှၤလၢအကွဲး ထါစံးထီၣ်ပတြၢၤ ၇၃ တဂၤန့ၣ် မ့ၢ်ပှၤလ့ၤဝံဖိလီၤ. အဝဲအိၣ်ဒီးတၢ်ခွဲးတၢ်ယာ်လၢ အမၤဘၣ်ယဟိဝၤယွၤတၢ်မၤလၢ တၢ်ဘူၣ်ထီၣ်ဘါထီၣ်အလီၢ်န့ၣ်လီၤ. ဘၣ်ဆၣ် ဘၣ်တဘျီ အသးဂံၢ်ဘါလီၤစၢ်ဝဲလီၤ. ဘၣ်မနုၤအဃိလဲၣ်. အဝဲသးက့ၣ် ပှၤအၢပှၤသီဒီး ပှၤလၢအပာ်ထီၣ်ထီအသးတဖၣ်န့ၣ် တမ့ၢ်လၢအဝဲသ့ၣ်မၤတၢ်အၢအဃိဘၣ် မ့ၢ်လၢ အဝဲသ့ၣ်မၤတၢ်ကဲထီၣ်လိၣ်ထီၣ်အဃိလီၤ. (စံးထီၣ်ပတြၢၤ ၇၃:၂-၉, ၁၁-၁၄) အဝဲသ့ၣ်ထူးထီၣ်တီၤထီၣ် ဒီးအိၣ်ဘၣ်ဝဲမုာ်မုာ်ခုၣ်ခုၣ် ဒီးတအိၣ်ဒီးတၢ်ကိၢ်တၢ်ဂီၤတဖၣ်ဘၣ်. ပှၤအၢပှၤသီသ့ၣ်တဖၣ် အတၢ်ကဲထီၣ်လိၣ်ထီၣ်န့ၣ် မၤသးအုးဝဲ ပှၤလၢအကွဲးဝဲထါစံးထီၣ်ပတြၢၤတဂၤအံၤ အသးလီၤ. အဃိ အတဲဝဲလၢ “ယမၤကဆှီယသး ဒီးသ့စီကွံာ်ယစုလၢ တၢ်ဒဲးဘးတအိၣ်ဘၣ်အပူၤန့ၣ် ဟဲလၢတၢ်ကလီကလီ အဂီၢ်လီၤ.” အဃိ ဖျါတြၢၢ်ကလာ်လၢ အဝဲတအဲၣ်ဒိးဘူၣ်ထီၣ်ဘါထီၣ် ယဟိဝၤယွၤလၢၤဘၣ်.
၁၅. ဒ် စံးထီၣ်ပတြၢၤ ၇၃:၁၆-၁၉, ၂၂-၂၅ ပာ်ဖျါထီၣ်ဝဲအသိး ပှၤလ့ၤဝံဖိလၢအကွဲး ထါစံးထီၣ်ပတြၢၤတဂၤန့ၣ် အသးမုာ်ထီၣ်က့ၤဝဲလၢကျဲဒ်လဲၣ်.
၁၅ ဖး စံးထီၣ်ပတြၢၤ ၇၃:၁၆-၁၉, ၂၂-၂၅ တက့ၢ်. ပှၤလ့ၤဝံဖိတဂၤအံၤ “လဲၤနုာ်လၢ ယွၤအလီၢ်စီဆှံအပူၤလီၤ.” ဖဲအဝဲလဲၤလၢကစၢ်ယွၤအဟံၣ်အခါ အဝဲအိၣ်ဒီး ပှၤလၢအဘူၣ်ထီၣ်ဘါထီၣ် ယဟိဝၤယွၤအဃိ အသးမုာ်ထီၣ်ဝဲလီၤ. တကးဒံးဘၣ် အဆိကမိၣ်ထံတၢ်ဂ့ၢ်တၢ်ကျိၤ ဒီးအဃ့ဘါထုကဖၣ်တၢ် ဘၣ်ဃးဒီးအတၢ်အိၣ်သးလီၤ. လၢခံ အဝဲစးထီၣ်သ့ၣ်ညါဝဲလၢ အတၢ်ဆိကမိၣ်န့ၣ်ကမၣ်ဖးဒိၣ် ဒီးအတၢ်ရ့လိာ်သးဒီး ကစၢ်ယွၤန့ၣ် ဘူးကဟးဂီၤညါ. တကးဒံးဘၣ် အသ့ၣ်ညါစ့ၢ်ကီးဝဲ ပှၤအၢပှၤသီကဲထီၣ် “တၢ်လီၤတလ့ၣ်အလီၢ်” ဒီး အဝဲသ့ၣ်ကဟးဂီၤဝဲ “စီဖ့ကလ့ၤလၢ တၢ်ပျံၤတၢ်ဖုး” အပူၤလီၤ. ပှၤလ့ၤဝံဖိတဂၤအံၤ စးထီၣ်ထံၣ်တၢ်ဒ် ယဟိဝၤယွၤအသိးအဃိ အတသူၣ်အုးသးအုး ဒီးအတသးက့ၣ် ပှၤအၢပှၤသီတဖၣ်လၢၤဘၣ်. ဖဲအမၤဝဲဒ်န့ၣ်အခါ အဝဲက့ၤအိၣ်က့ၤဒီးတၢ်သးခု ဒီးတၢ်သူၣ်မံသးမုာ် ဒီးတဲဝဲလၢ “လၢယဟိဝၤယွၤအမဲာ်ညါန့ၣ် တဘၣ်ယသးလၢ ပှၤအိၣ်လၢဟီၣ်ခိၣ်ချၢ နီတဂၤဘၣ်.”
၁၆. ပမၤလိန့ၢ်တၢ်လၢ ပှၤလ့ၤဝံဖိတဂၤန့ၣ် အအိၣ်ကသ့ဒ်လဲၣ်.
၁၆ ပမၤလိန့ၢ်ဘၣ် တၢ်မနုၤလဲၣ်. မ်ပသုတသးက့ၣ် ပှၤအၢပှၤသီတဂ့ၤ. အဝဲသ့ၣ်အတၢ်သးခုန့ၣ် ကလီၤမၢ်ကွံာ်ဝဲ ဒီးအဝဲသ့ၣ်တအိၣ်မူဘၣ်ဝဲ လီၤထူလီၤယိာ်ဘၣ်. (စံၣ်တဲၤတဲလီၤတၢ် ၈:၁၂, ၁၃) ပမ့ၢ်သးက့ၣ်အဝဲသ့ၣ်န့ၣ် အိၣ်ဒၣ်ပသးကဟးဂီၤ တကးဒံးဘၣ် ပတၢ်ရ့လိာ်သးဒီး ယဟိဝၤယွၤစ့ၢ်ကီး ကဟးဂီၤဝဲလီၤ. အဃိ ပမ့ၢ်တူၢ်ဘၣ်တၢ်ဒ် ပှၤလ့ၤဝံဖိတဂၤအံၤအသိးန့ၣ် ပကဘၣ်ဃုထံၣ်န့ၢ်တၢ်မၤစၢၤလၢ ယဟိဝၤယွၤအကလုၢ်ကထါအပူၤ ဒီးပကဘၣ်ဆဲးရ့ဒီး ပဒီပုၢ်ဝဲၢ်မုၣ်ခွါတဖၣ် လၢအအဲၣ်ယဟိဝၤယွၤန့ၣ်လီၤ. ပမ့ၢ်အဲၣ်ယဟိဝၤယွၤ အါန့ၢ်ဒံးတၢ်ခဲလၢာ်န့ၣ် ပကအိၣ်ဒီးတၢ်သးခုနီၢ်ကီၢ် ဒီးပကဆဲးအိၣ်ဘၣ်လၢ “တၢ်မူနီၢ်ကီၢ်” အကျဲဖီခိၣ်န့ၣ်လီၤ.—၁ တံၤမသ့း ၆:၁၉.
စီၤပ့းတရူးအိၣ်ဒီး တၢ်ဂံၢ်စၢ်ဘါစၢ်အဃိ အသးလီၤစၢ်
ပမ့ၢ်ဆိကမိၣ်ထံဘၣ်ဃးဒီး စီၤပ့းတရူးအသးလီၤစၢ် ဘၣ်ဆၣ် အဝဲဆဲးမၤကစၢ်ယွၤအတၢ်မၤအဂ့ၢ်န့ၣ် အမၤစၢၤပှၤသ့ ဒီးပမၤစၢၤပှၤဂၤသ့စ့ၢ်ကီးလီၤ (ကွၢ်လံာ်အဆၢ ၁၇-၁၉)
၁၇. ဘၣ်မနုၤအဃိ စီၤပ့းတရူး အသးဂံၢ်ဘါလီၤစၢ်ဝဲလဲၣ်.
၁၇ တၢ်မၢဖိပ့းတရူးန့ၣ် မ့ၢ်ပှၤလၢအသူၣ်ဆူၣ်သးဆူၣ်တဂၤလီၤ. ဘၣ်ဆၣ် တဘျီတခီၣ် အဝဲတဆိကမိၣ်ထံဝဲ တၢ်လၢအမၤဝဲဒီး အတဲဝဲတဖၣ်ဘၣ်အဃိ လၢခံန့ၣ်အသးဘၣ်ဒိက့ၤဝဲလီၤ. အဒိ, ဖဲယ့ၣ်ၡူးတဲဘၣ် အတၢ်မၢဖိတဖၣ်လၢ အကဘၣ်တူၢ်ဘၣ်တၢ်နးတၢ်ဖှီၣ် ဒီးအကဘၣ်သံအခါ စီၤပ့းတရူးတဲအီၤလၢ “တၢ်သ့ၣ်တဖၣ်အံၤ တဘၣ်ကဲထီၣ် အသးဒီးနၤ နီတစဲးဘၣ်.” (မးသဲ ၁၆:၂၁-၂၃) ဖဲန့ၣ်အခါ ယ့ၣ်ၡူးဘှီဘၣ်ထီၣ်က့ၤအီၤလီၤ. ဖဲပှၤဟဲဖီၣ်ယ့ၣ်ၡူးအခါ ခီဖျိလၢစီၤပ့းတရူး တဆိကမိၣ်ထံတၢ်ဘၣ်အဃိ အကျီတဲာ်ကွံာ်ဝဲဒၣ် ပှၤလုၢ်တၢ်ဒိၣ်အခ့အပှၤတဂၤ အနၢ်ကုလီၤ. ဒီးယ့ၣ်ၡူး ဘှီဘၣ်ထီၣ်က့ၤကဒီးအီၤလီၤ. (ယိၤဟၣ် ၁၈:၁၀, ၁၁) တကးဒံးဘၣ် စီၤပ့းတရူးတဲဒိၣ်လီၤအသးလၢ တၢ်မၢဖိအဂၤတဖၣ် မ့ၢ်ပာ်တ့ၢ်ကွံာ်ယ့ၣ်ၡူးဒၣ်လဲာ် အဝဲတပာ်တ့ၢ်ကွံာ် ယ့ၣ်ၡူးနီတဘျီဘၣ်. (မးသဲ ၂၆:၃၃) ဘၣ်ဆၣ် မ့ၢ်လၢအဆိကမိၣ်ဒိၣ်လီၤအသးအဃိ အဝဲပျံၤပှၤကညီ ဒီးအဝဲဂ့ၢ်လိာ်ကွံာ် ယ့ၣ်ၡူးသၢဘျီလီၤ. ခီဖျိလၢ စီၤပ့းတရူးမၤဘၣ်ဝဲဒ်အံၤအဃိ အသူၣ်ဟးဂီၤအသးဟးဂီၤဒီး “အဝဲဟးထီၣ်လၢတၢ်ချၢဒီး ဟီၣ်ဝဲနးမးလီၤ.” (မးသဲ ၂၆:၆၉-၇၅) ဘၣ်သ့ၣ်သ့ၣ် အကဆိကမိၣ်ထီၣ်ဝဲလၢ မ့ၢ်ယ့ၣ်ၡူးပျၢ်အတၢ်ကမၣ်ကကဲဧါ.
၁၈. ယ့ၣ်ၡူးမၤစၢၤ စီၤပ့းတရူးဒ်သိး အကလဲၤခီဖျိ အတၢ်ဂံၢ်စၢ်ဘါစၢ်ဒ်လဲၣ်.
၁၈ ဘၣ်ဆၣ် စီၤပ့းတရူးအတသးဟးဂီၤ တုၤလၢအပတုာ်မၤဝဲ ယဟိဝၤယွၤအတၢ်မၤန့ၣ်ဘၣ်. အဝဲမၤကမၣ်တၢ်ဝံၤအလီၢ်ခံ ပထံၣ်ဘၣ်လၢ အမၤသကိးဃုာ်တၢ်ဒီး တၢ်မၢဖိအဂၤတဖၣ်ဒံးလီၤ. (ယိၤဟၣ် ၂၁:၁-၃; မၤတၢ် ၁:၁၅, ၁၆) တၢ်မနုၤမၤစၢၤ စီၤပ့းတရူးလဲၣ်. စီၤပ့းတရူး သ့ၣ်နီၣ်ထီၣ်က့ၤဝဲလၢ ယ့ၣ်ၡူးဃ့ဘါထုကဖၣ်န့ၢ်တၢ်ဒ်သိး အဝဲတၢ်နာ်သုတလီၤစၢ် တဂ့ၤအဂီၢ်လီၤ. ဒီးယ့ၣ်ၡူးဟ့ၣ်ဂံၢ်ဟ့ၣ်ဘါအီၤလၢ အကက့ၤဒီးအကမၤဆူၣ်ထီၣ် အဒီပုၢ်ဝဲတဖၣ်အသးလီၤ. ယဟိဝၤယွၤစံးဆၢဝဲ တၢ်ထုကဖၣ်အံၤလီၤ. လၢခံ ယ့ၣ်ၡူးလီၣ်ဖျါထီၣ်အသးလၢ စီၤပ့းတရူးအမဲာ်ညါ ဒ်သိးကဟ့ၣ်ဂံၢ်ဟ့ၣ်ဘါအီၤအဂီၢ်လီၤ. (လူၤကၣ် ၂၂:၃၂; ၂၄:၃၃, ၃၄; ၁ ကရံၣ်သူး ၁၅:၅) ဖဲတၢ်မၢဖိတဖၣ်မၤအီၣ်ညၣ် တန့ၢ်ဘၣ်အနၤန့ၣ် ယ့ၣ်ၡူးလီၣ်ဖျါထီၣ်အသးလၢ အဝဲသ့ၣ်အမဲာ်ညါလီၤ. ဖဲန့ၣ်အခါ ယ့ၣ်ၡူးသံကွၢ်စီၤပ့းတရူးလၢ မ့ၢ်စီၤပ့းတရူးအဲၣ်အီၤဧါ. ခီဖျိလၢ ယ့ၣ်ၡူးမၤဝဲဒ်န့ၣ်အဃိ ဖျါလၢယ့ၣ်ၡူးပျၢ်ကွံာ် အတၢ်ကမၣ်လံန့ၣ်လီၤ. ဒီးယ့ၣ်ၡူးဟ့ၣ်လီၤအါထီၣ်အီၤ တၢ်မၤလၢခါဆူညါအဂီၢ်လီၤ.—ယိၤဟၣ် ၂၁:၁၅-၁၇.
၁၉. စံးထီၣ်ပတြၢၤ ၁၀၃:၁၃, ၁၄ န့ၣ် သိၣ်လိပှၤဘၣ်ဃးဒီး ဖဲပမၤကမၣ်တၢ်အခါ ယဟိဝၤယွၤထံၣ်ပှၤဒ်လဲၣ်.
၁၉ ပမၤလိန့ၢ်ဘၣ် တၢ်မနုၤလဲၣ်. ယ့ၣ်ၡူးရ့ဒီးစီၤပ့းတရူးဒ်လဲၣ်. အဝဲပာ်ဖျါထီၣ် တၢ်သးကညီၤ ဒ်အပၢ်ယဟိဝၤယွၤအသိးလီၤ. အဃိ ဖဲပမၤကမၣ်တၢ်အခါ ပတဘၣ်ဆိကမိၣ်လၢ ယဟိဝၤယွၤပျၢ်ပတၢ်ကမၣ် တသ့ၣ်ဘၣ်န့ၣ်တဂ့ၤ. သ့ၣ်နီၣ်ထီၣ်က့ၤလၢ မုၣ်ကီၤလံၢ်အဲၣ်ဒိးဝဲလၢ ပကတူၢ်ဘၣ်လၢ ပတၢ်ကမၣ်အိၣ်ဒံးလီၤ. လၢတၢ်န့ၣ်အဃိ ပကဘၣ်သ့ၣ်နီၣ်ထီၣ်လၢ ယဟိဝၤယွၤအဲၣ်ပှၤထဲလဲၣ် ဒီးနၢ်ပၢၢ်စၢၤ ပတၢ်ဂံၢ်စၢ်ဘါစၢ်ထဲလဲၣ်န့ၣ်လီၤ. ဒီးအဝဲသးအိၣ်ပျၢ်ကွံာ် ပတၢ်ကမၣ်လီၤ. ဖဲပဒီပုၢ်ဝဲၢ်မုၣ်ခွါတဖၣ် မၤဘၣ်ဒိပသးအခါ ပကဘၣ်ကွၢ်လိယဟိဝၤယွၤလီၤ.—ဖး စံးထီၣ်ပတြၢၤ ၁၀၃:၁၃, ၁၄ တက့ၢ်.
၂၀. တၢ်မၤလိလၢခံတခါအပူၤ ပကတဲသကိးတၢ်ဂ့ၢ်မနုၤလဲၣ်.
၂၀ စီၤယိၤသး, နီၢ်နၤဧမံဒီးနီၢ်ရူၤသး, ပှၤလ့ၤဝံဖိဒီးစီၤပ့းတရူး အတၢ်လဲၤခီဖျိန့ၣ် ဒုးသ့ၣ်ညါပှၤလၢ “ယွၤအိၣ်ဘူးဒီး ပှၤလၢအသူၣ်ကၢ် အသးလီၤ” တဖၣ်လီၤ. (စံးထီၣ်ပတြၢၤ ၃၄:၁၈) တဘျီတခီၣ် ယဟိဝၤယွၤပျဲဝဲလၢ ပကထံၣ်ဘၣ်တၢ်ကီတၢ်ခဲအဃိ ပသးဂံၢ်ဘါကလီၤစၢ်လီၤ. ဘၣ်ဆၣ် ခီဖျိလၢအဝဲမၤစၢၤပှၤ ဒီးပလဲၤခီဖျိတၢ်ကီတၢ်ခဲန့ၢ်ဝဲအခါ ပတၢ်နာ်ဟဲဂၢၢ်ကျၢၤထီၣ်ဝဲလီၤ. (၁ ပ့းတရူး ၁:၆, ၇) ဒီးတၢ်မၤလိလၢခံတခါအပူၤန့ၣ် ပကထံၣ်ဘၣ်လၢ ယဟိဝၤယွၤဆီၣ်ထွဲမၤစၢၤ အခ့အပှၤလၢ အထံၣ်ဘၣ်တၢ်ကီတၢ်ခဲ ဒီးအသးလီၤစၢ်တဖၣ်ဒ်လဲၣ်န့ၣ်လီၤ.
တၢ်သးဝံၣ် ၇ ယဟိဝၤယွၤ, မ့ၢ်ပဂံၢ်ဘါ
^ လံာ်အဆၢ. 5 စီၤယိၤသး, နီၢ်နၤဧမံ, နီၢ်ရူၤသး, ပှၤလ့ၤဝံဖိ ဒီးတၢ်မၢဖိပ့းတရူးန့ၣ် ဖဲအထံၣ်ဘၣ်တၢ်မၤကွၢ်အခါ အဝဲသ့ၣ်အသးဂံၢ်ဘါလီၤစၢ်ဝဲလီၤ. လၢတၢ်မၤလိအံၤအပူၤ ပကထံၣ်ဘၣ်လၢ ယဟိဝၤယွၤမၤမုာ်ထီၣ်အဝဲသ့ၣ်အသး ဒီးဟ့ၣ်ဂံၢ်ဟ့ၣ်ဘါအဝဲသ့ၣ်ဒ်လဲၣ်န့ၣ်လီၤ. ပကတဲသကိးစ့ၢ်ကီး ပမၤလိန့ၢ်တၢ်လၢ အဝဲသ့ၣ်အဒိအတဲာ်တဖၣ်ဒ်လဲၣ် ဒီးယဟိဝၤယွၤရ့ဒီးအဝဲသ့ၣ်လၢ တၢ်အဲၣ်တၢ်ကွံအပူၤဒ်လဲၣ်န့ၣ်လီၤ.
^ လံာ်အဆၢ. 56 တၢ်တဲဖျါထီၣ် တၢ်ဂီၤအခီပညီ– နီၢ်နၤဧမံ, နီၢ်ရူၤသး ဒီးနီၢ်ဧိးရပၤ သူၣ်အုးသးအုးဝဲ ခီဖျိလၢ အဝဲသ့ၣ်အသးသမူတံၤသကိး သံဝဲအဃိလီၤ. လၢခံ ခီဖျိလၢစီၤဘိၤဧးဒီးနီၢ်ရူၤသး အဖိခွါစီၤဧိၤဘ့းအိၣ်ဖျဲၣ်ထီၣ်ဝဲအဃိ နီၢ်နၤဧမံဒီးနီၢ်ရူၤသး သးခုထီၣ်ဝဲလီၤ.
