1-2. Yisinke natu ka lironga mosirongwa esi?

POYIRUWO YIMWE, kuvhura tu gazadare ko omu eparu lyetu lya supipa ntani lya zura ‘maudigu.’ (Joba 14:1) Yipo nye, ose pamwe kudompa mutjima. Vakareli vaJehova vanare nawo yimo va lizuvhire. Ano vamwe kwa here kufa. (1 Vah. 19:2-4; Joba 3:1-3, 11; 7:15, 16) Nye Jehova Karunga ogu va huguvarere, ga va hengagwidire nokuvankondopeka. Yihonena eyi kwa yi tjangera yipo tu lirongere ko ntani nokutuhengagwida.—Rom. 15:4.

² Mosirongwa esi, tatu ka lironga vakareli vamwe vaJehova ava va lididimikilire maudigu. Awo kuna kara Josefa munwaJakopo, naNaomi ogu ga kere mudike naRutu ngumweyi zendi, noMurevhi ogu ga tjenge Episarome 73 ntani mupositoli Peturusa. Ngapi omu Jehova ga va nkondopekere? Ntani yisinke natu lirongera ko koyihonena yawo? Malimbururo komapuro aga naga tu vatera tu dive asi “HOMPA kukara pepi nava vana dompo nomutjima; age kuparura ava lina pu ehuguvaro.”—Epis. 34:18.

3-4. Yisinke ya horokerere Josefa apa ga kere mudinkantu?

³ Josefa kwa kere nonomvhura 17 apa ga rotere nonzodi mbali dokutunda kwaKarunga. Nonzodi odo kwa likidire asi ezuva limwe Josefa nga kara muntu gomulyo ntani epata lyawo ngali mu fumadeka. (Gen. 37:5-10) Nye konyima tupu zapa Josefa ga rotere nonzodi odo eparu lyendi kwa litjindjire. Mevango lyokumufumadeka, vakuru vendi kwa mu randesere, ntani age kwa kere mupika gErenga Potifara goMuegipite. (Gen. 37:21-28) Josefa ogu va here unene oguhwe Jakopo, nye ngesi ana ya kara mupika gerenga  eli ngali dili kukarera Jehova.—Gen. 39:1.

⁴ Konyima ukaro waJosefa kwa ya didire unene. MukadaPotifara kwa rundilire Josefa asi nkare a mu kwatere kononkondo. Ga hana kugwana mauzera, Potifara kwa ninkire Josefa va mu mange nomalyenge nokumutura modorongo. (Gen. 39:14-20; Epis. 105:17, 18) Gazareni tupu omu ga lizuvhire mudinkantu Josefa apa va mu rundilire. Ntani gazadareni ko tupu omu ya nyatekesere edina lyaKarunga, Jehova. Yosili, Josefa ga kere nokonda zokudompa mutjima!

5. Yisinke ya vaterere Josefa a funde po edompo mutjima?

⁵ Apa Josefa ga kere mupika ntani modorongo, kwato eyi ga vhulire kurugana ko yipo a rundurure ukaro wendi. Yisinke ya mu vaterere a kare nomutaro gouhunga? Mevango lyokudemenena kweyi ga dilire kuvhura kurugana, age kwa rugene paapa ga hulira sirugana esi va mu pere. Somulyo po, age kwa tulire Jehova muhowo meparu lyendi. Ano ngoyitundwamo, Jehova kwa tungikire nayinye eyi nga rugana Josefa.—Gen. 39:21-23.

6. Ngapi omu Josefa da mu hengagwidire nonzodi edi ga rotere?

⁶ Nampo Josefa ya mu korangedere apa nga tede ko kononzodi edi ga rotere. Nonzodi dina kwa likidire asi ezuva limwe nga mona hena epata lyawo ntani ukaro wendi ngau runduruka. Ayo ya ya sikire mo. Apa Josefa ga kere nonomvhura 37, eyi ga rotere yipo ya tamekere kusika mo.—Gen. 37:7, 9, 10; 42:6, 9.

7. Kuliza na-1 Peturusa 5:10, yisinke nayi tu vatera tu lididimikire maudigu?

⁷ Eyi natu lirongera ko. Sihorokwa saJosefa kutudiworokesa asi uzuni ou udona ntani vantu ngava tu tekura momudona. Nampili vanavazinyetu nawo kuvhura va tu korese. Nye nsene tu tara Jehova  ngoMupopeli noSilikandwiso setu, ose kapi ngatu hageka kumukarera. (Epis. 62:6, 7; resa 1 Peturusa 5:10.) Diworoka asi Josefa kwa kere nonomvhura 17 apa Jehova ga mu pere nonzodi. Eyi kulikida asi Jehova ga huguvara vakareli vendi wovadinkantu. Naina, sinzi sovadinkantu kwa kara ngwendi Josefa. Nawo kwa kara nepuro mwaJehova ngwendi Josefa. Vamwe vawo kwava tura modorongo morwa kulimburukwa Jehova Karunga.—Epis. 110:3.

8. Yisinke ya horokerere Naomi naRutu?

⁸ Morwa erumbu lyenene, Naomi nepata lyendi kwa dirukire mo moJuda nokukakara vanayirongo moMowaba. Konyima Elimereki mugara gwaNaomi kwa ya fire, ano age kwa kere novana vavali wovagara. Vana vendi navenye kwa kwere vakadi woVamowaba, Rutu naOrupa. Ano konyima zonomvhura murongo vana vaNaomi tava ya fu, awo va hana kureta vana. (Rutu. 1:1-5) Gazareni tupu ruguwo oru va kere naro vakadi vena vatatu! Rutu naOrupa ngano va kwere hena. Nye yilye na pakera mbili Naomi ogu ga kurupire? Naomi kwa dompere unene mutjima dogoro ta uyungire mo asi: “Mwa ha tumbura nge Naomi, tumbureni nge Mara, morwaKarunga Munankondo nadinye ga ninka ukaro wange u kare woururu.” Ano konyima, Naomi yipo ga tokwere kutengura koBeterehema, Rutu nage ta mu kwama.—Rutu. 1:7, 18-20.

9. Kuliza naRutu 1:16, 17, 22, ngapi omu Rutu ga korangedere Naomi?

⁹ Eyi ya vaterere Naomi kuna kara eharo lyenene. Pasihonena, Rutu kwa likidire eharo lyenene Naomi pokutokora pokutunga kumwe nage. (Resa Rutu 1:16, 17, 22.) MoBeterehema, Rutu nga rugana unene mokutoragura yilya yipo va lirerese ko naNaomi. Ngoyitundwamo, Rutu kwa ya divikwire asi age mukadi gomuwa ntani kurugana unene.—Rutu 3:11; 4:15.

10. Mononkedi musinke Jehova ga likidire eharo kovahepwe ngwendi Naomi naRutu?

¹⁰ Jehova kwa geve mpangera koVaisraeli ezi za vaterere vahepwe ngwendi Naomi naRutu. Age kwa va tanterere asi nsene tava teza, va ha teza nombuto dokonontere domapya, nye va di sigire vahepwe. (Lev. 19:9, 10) Naomi naRutu kapi va hepere kuhundagera nondya. Awo va gwene nondya va hana kuhundagera.

11-12. Ngapi omu Bowasa ga hafesere Naomi naRutu?

¹¹ Rutu nga rugana mepya lyomugara gongawo Bowasa. Ulimburukwi waRutu neharo eli ga kere nalyo Rutu kwangumweyi zendi Naomi kwa kundamene Bowasa, ano eyi ya mu ninkisire a tengwide upingwa wepata lyaNaomi nokukwara Rutu. (Rutu. 4:9-13) Ano konyima tava ya reta munona tava mu ruku Obedi, ozinakuru wovagara vahompa Ndafita.—Rutu. 4:17.

¹² Gazara tupu ruhafo oru ga kere naro Naomi apa ga kwatererere mukeke Obedi, oku ta pandura Jehova kupitira mekanderero. Nye koyili yomulyo unene yina kundindira Rutu naNaomi. Apa ngava va vhumbura, awo ngava ka hafa pokukadiva asi mwaObedi yimo ga tundililire Mesiyasa gEtumbwidiro, Jesus Kristusa!

13. Yisinke natu lirongera ko kwaNaomi naRutu?

¹³ Eyi natu lirongera ko. Apa atu ligwanekere nomaudigu, ose kulizuvha kukora ntani kudompa mutjima. Nampo ose kugazara asi udigu wetu kapi ngau kohonoka po. Posiruwo oso, ngano tu huguvare unene mwaGuhyetu gemeguru ntani nokukara pepi novanavazinyetu. Yimo, Jehova  kapi ta gusa po udigu wetu. Pasihonena, age kapi ga vhumbwire mugara gwaNaomi ntani novana vendi. Nye age ngatu vatera, pamwe kupitira meharo lyenene eli ava tu likida vanavazinyetu.—Yis. 17:17.

14. Yisinke ya ninkisire Murevhi gumwe a dompe unene mutjima?

¹⁴ Mutjangi gEpisarome 73 kwa kere Murevhi. Age ga kere nositumbukira sokurugana monzugo zaJehova. Nye sikando simwe meparu lyendi, age kwa dompere mutjima. Morwasinke? Age kwa tamekere kufira mfudu vadinikarunga, kapisi asi morwa udona wawo nye morwa yeeyi ngayi va tompoka meparu. (Epis. 73:2-9, 11-14) Awo kwa monekere ngwendi va kara nanayinye, ungawo, eparu lyewa ntani kwato yinka. Eyi ya ninkisire muepisarome a dompe mutjima nokuuyunga asi: “Apa ngesi na zona sa nye kulizeresa nyaamwange, ni dire kuzonesa ko komawoko gange ndi?” Yosili, eyi ngano ya mu ninkisire a hageke kukarera Jehova.

15. Kuliza nEpisarome 73:16-19, 22-25, ngapi Murevhi ogu ga tjenge episarome eli ga fundire po edompo mutjima?

¹⁵ Resa Episarome 73:16-19, 22-25. Murevhi kwa ‘zire montembeli zaKarunga.’ Omo, age kwa ka kere novantu ava ngava karere Jehova, eyi ya mu vaterere a gazadare ko ntani nokukanderera. Ngoyitundwamo, age ga yi dimbwilire asi magazaro gendi kwa kere gougova ntani kuvhura a zumbanese elikwatakano lyendi naJehova. Age ga yi kwete egano asi vadinikarunga kwa kara “pomusenete” ntani asi “ehanauko lyawo lyohararasi.” Mokuhageka kukara nomfudu ntani nokudompa mutjima, muepisarome goMurevhi ga hepere kutara yininke nga moomu ayi tara Jehova. Apa ga yi rugene eyi, age kwa kere nombili zomomutjima ntani ga hefe. Age kwa tente asi nsene naJehova “na kara, yinke ko hena yange konauzuni?”

16. Yisinke natu lirongera ko koMurevhi ogo?

¹⁶ Eyi natu lirongera ko. Tu nyokereni po kufira mfudu vadinikarunga ava ava moneka ngwendi kuna kuvatompoka. Ruhafo  rwawo ropokaruwogona tupu, awo kapi ngava paruka narunye. (Muud. 8:12, 13) Nsene tu va fira mfudu, ose ngatu dompa mutjima ntani kuvhura ngatu zumbanese elikwatakano lyetu naJehova. Yipo nye, nsene nove kuna kutameka kufira mfudu vadinikarunga, rugana eyi ga rugene Murevhi. Limburukwa mavyukiso gaKarunga ntani kara kumwe nava ava rugana mpango zendi. Nsene o hara unene Jehova kupitakana nkenye eyi, ngo gwana ruhafo rosili. Ntani ove ngo genda monzira zokutwaredesa “komwenyo gwanarunye gosili.”—1 Tim. 6:19.

17. Yisinke ya ninkisire Peturusa a dompe mutjima?

¹⁷ Mupositoli Peturusa kwa kere muntu gomupampi, nye age nga tura po matokoro usimbu ntani nga pwagesa malizuvho gendi usimbu. Ngoyitundwamo, pamwe nga rugana yininke eyi ga ya liverere konyima. Pasihonena, apa Jesus ga tantere vapositoli vendi asi ngava mu hepeka nokumudipaga, Peturusa kwa mu keve asi: “Hompa, ya ha ku horekera ngano!” (Mat. 16:21-23) Jesus yipo ga vyukisire Peturusa. Apa mbunga za wizire zi ya kwate Jesus, Peturusa ga hana kugazadara ko kwa kamwine kutwi komukareli gomupristeli gomunene. (Joh. 18:10, 11) Simpe hena Jesus ga vyukisire Peturusa. Mokugwederera ko, Peturusa kwa likangangere asi nampili vapositoli vakwawo va sige Jesus age kapi nga mu siga! (Mat. 26:33) Nye Peturusa ogu ga lihuguvarere mwene pomuhowo ga ya tjilire vantu ntani ga ya patanene Jesus yikando yitatu. Peturusa kwa guvire unene “makura ta pwaga, ta ka lira makurulira.” (Mat. 26:69-75) Age nampo ga lipulire nsene asi Jesus nga mu gusira po.

18. Ngapi omu Jesus ga vaterere Peturusa a funde po edompo mutjima?

¹⁸ Peturusa kapi ga pulisilire edompo  mutjima li mu hagekese kukarera Jehova. Konyima zokupunduka, age ga ya lipakerere novapositoli vakwawo. (Joh. 21:1-3; Yirug. 1:15, 16) Yisinke ya mu vaterere? Komeho yi ka horoke oyo, Jesus kwa kanderere po Peturusa asi epuro lyendi lya ha pwa mo ntani Jesus kwa tanterere Peturusa a tengure nokukakorangeda vakwawo. Jehova ga limbwilire ekanderero lina. Konyima, Jesus kwa ya monekerere Peturusa pwagelike, nokumukorangeda. (Ruk. 22:32; 24:33, 34; 1 Kol. 15:5) Apa vapositoli va dilire kukwata nomfi esiku limwe, Jesus kwa va monekerere. Posikando esi, Jesus kwa pere mpito Peturusa a likide eharo lyendi kwendi. Jesus ga gusilire po kaume kendi nokumupa yirugana yoyinzi.—Joh. 21:15-17.

19. Ngapi omu Episarome 103:13, 14 nazi tu vatera tu tare nonzo detu ngamoomu adi tara Jehova?

¹⁹ Eyi natu lirongera ko. Monkedi omu Jesus ga tekwire Peturusa kulikida asi Jesus ga kara nonkenda ngwendi oGuhwe. Nsene tuna tura epuko kapisi tu lipangure nyamwetu nokugazara asi Jehova kapi nga tu gusira po. Diworokeni asi Satana yimo ana hara tu lizuvhe ngoso. Nye tu gazadareni ko omu Jehova ga tu hara nomu a kwata egano maupirakondo getu, ntani Jehova ana hara tu gusire po ava ava tu zonene ngamoomu nage a tu gusire po.—Resa Episarome 103:13, 14.

20. Yisinke ngatu ka lironga mosirongwa sokukwama ko?

²⁰ Sihonena saJosefa naNaomu naRutu, noMurevhi ntani Peturusa kutuvatera tu kare nehuguvaro asi: “HOMPA kukara pepi nava vana dompo nomutjima.” (Epis. 34:18) Age kuyipulisira tu ligwanekere nomaudigu ntani nokudompa mutjima. Nye apa atu lididimikire maudigu nevatero lyaJehova, epuro lyetu kunkondopara. (1 Pet. 1:6, 7) Mosirongwa sokukwama ko, ngatu ka zogera omu Jehova a vatere vakareli vendi wovalimburukwi, ava ava dompo mutjima morwa kudira kusikilira mo ndi nampo maukaro goudigu aga ava ligwanekere nago.