1-2. Nnaasuze ddi ni yohudhera ela?

MALABO mamodha nnowona wi egumi yehu kinalegela teto ‘ehidhala makathamiho.’ (Jó 14:1) Bumwahaya, nnowonelamo mwahaya bwaddi malabo mamodha nigakala owuukuwene. Adhaari owinjhiva a Yehova akale yowukuwa. Amodha yofuna egakwile. (1 Reis 19:2-4; Jó 3:1-3, 11; 7:15, 16) Mbwenye Yehova — Mulugu nnamuroromelihu — owalibiha malabo owinjhivene. Dhopadduwa dhewa dhihilebiwa mBibliyani wi dhinlibihe. — Rom. 15:4.

² Ohudhera wula nnere woona yopadduwa ya Juze mwana a Jako, Nowemi ni nzaliyaye Ruti; ya mulevita alembe livuru na Salmos 73; ni ya murumiwi Peduru. Adhaari ala atene a Yehova yahifwanyiwa makathamiho owukula. Yehova alibihe avi? Dhithu baani nnahudherihu naliwa? Dhowakula dha makoho ala dhinere onivaha nroromelo wi ‘Yehova ohawaddamela ale enna murima wowukuwene, ni wi ‘oliye onowavulusa ale ekwerebenye.’ — Sal. 34:18, nota.

3-4. Yampadduwele Juze agali muzombwe ddi?

³ Aganna yaka 17, Mulugu ahimweriha Juze oroha dila bili. Dhoroha ndha dhoniha wi Juze ere okala muthu munlubale ni amudhaaye yerege omuriha. (Gén. 37:5-10) Mbwenye nuumala oroha egumi ya Juze osadduwa. Ohiya othithimihiwa, addibile omuguliha ofiyedha Juze okala mudhaari vaade va namasogolela oWijipitu ithaniwa Potifare. (Gén. 37:21-28) Mohulegela Juze ohiya okala mwana ofuneya vano okala mudhaari oogomihera amulabelaga mulobwana ahamunonne Yehova. — Gén. 39:1.

 ⁴ Vano egumi ya Juze othabwa. Mwadha Potifare omwinkedha Juze wi afuna agigonihe. Potifare newene kasayele onona akala yaari ebaribari. Oliye omuthukula Juze ommaga onvokera mukambura. (Gén. 39:14-20; Sal. 105:17, 18) Juze aali muzombwe. Wubuwele dhithu ubuweliye mudhidhi inkedhiwiye wi afuna amugonihe mwadha mwinnya. Ohiya eyo, athu yubuwele ddi wodhela Yehova yahere enona muselu oyo? Mwebaribarene, Juze ahikanna dhithu dhowinjhiva dhamukula!

5. Juze andile avi ogonjhiha okwerebeya?

⁵ Vobajha okala mudhaari, vasogolova, ovokedhiwa mukambura, Juze kanna makalelo orugunusa makathamiho ale yanfwanya. Ki vano, andile avi okanna mubuwelo wapama? Ohiya wubuwelelaga dhego ahandiye werana, oliye owilibihera wapara pamadhene mabasa athomeliwiye. Enlubaleya, Juze owilibihera omuhagalasa Yehova, Muthu athima mwigumini mwaaye. Bumwahaya, Yehova omureeliha Juze mwa dhatedhene apariye. — Gén. 39:21-23.

6. Dhoroha dha Juze dhimukavihere avi?

⁶ Ethu emodha emukavihere Juze ohukwerebeya, waali wubuwela dhithu aarohiliye. Dhoroha ndhe dhonvaha ebaribari wihina ere wawona amudhaaye teto goyi ele yere omala. Siyeyo yereye. Juze aganna yaka 37, dhoroha dhaye wambela wakwanela mwa makalelo ootikiniha. — Gén. 37:7, 9, 10; 42:6, 9.

7. Ninga munawogela 1 Pedro 5:10, naafwanyiwaga makathamiho enaanikavihere ddi?

⁷ Dhithu nnahudherihu. Thalako ya Juze enonubusedha wihina elabo ela sabure ni athu enoneddiha ni makalelo abure. Malabo mamodha ddibila amunroromeloni podi onuukula. Mbwenye namusugwaga Yehova ninga Nibwe nehu obe Nikungu nehu nothawelawo, kannakwerebeye newene kannahiye  omulabela. (Sal. 62:6, 7; omwileri 1 Pedro 5:10.) Wubuwele wihina Juze anna yaka 17 Yehova vamurohinhiye. Eyo enonivaha ebaribari wihina Yehova anowaroromela azombwe enamulabela. Peeno azombwe owinjhiva boororomeleya wa Yehova ninga Juze, amodha enovolosihiwa mukambura mwaha wa nroromelo enniwana wa Mulugu. — Sal. 110:3.

8. Ethu baani yampadduwele Nowemi ni Ruti?

⁸ Mwaha wa dala yathanyunwe elabo yo Juda, Nowemi vamodha ni emudhaye otamela elabo yo Mowabe. Vano mamune Nowemi, Elimeleki okwa, oliye ohala ni anaaye abili. Ogavinre mudhidhi anaaye watela ahiyana abili o Mowabe: mmodha ithaniwa Ruti mmodhaya ithaniwa Orpa. Dhigavinre yaka kumi, ahima ale a Nowemi okwa ehinna ahima. (Rute 1:1-5) Mwebaribarene ahiyana ala araru yahithabwa wukuuwa! Ebaribari wihina Ruti ni Orpa yaari ayebele yojheha oteliwa, mbwenye Nowemi ahuluvala, ohowela osamaleliwa. Labo nimodha Nowemi othabwa wukuuwa owoga egi: ‘Kamugithanege Nowemi. Mugithanege Mara, mwaha wihina Mulugu akopolo dhatedhene ohusaddula egumi yaga ofiyedha okala yowawa.’ Agaali owuukuwene, Nowemi ohogolowela oBele, Ruti omuhara. — Rute 1:7, 18-20.

9. Ninga munawogela Rute 1:16, 17, 22, Ruti amulibihe avi Nowemi?

⁹ Yamukavihere Nowemi mudhidhi yole ddi? Odhivela ohunamala. Motajhiha, Ruti ahimoniha Nowemi odhivela ohunamala mwaha ohumunyanyala. (Omwileri Rute 1:16, 17, 22.) Agaali elabo yo Bele, Ruti ahilibihera vanlubale oddoddela mmunddani wihina ajhe vamodha ni Nowemi. Mwaha wa ekalelo ela yapama, Ruti woniwaga ninga muthu apama. — Rute 3:11; 4:15.

10. Yehova awonihe avi odhivela athu ohawa ninga Nowemi ni Ruti?

¹⁰ Yehova ahavaha amwaana Ezarayeli nlamulo na oddoddela dhoojha, nna naari nlamulo napama naakavihera athu ohawa, ninga Nowemi ni Ruti. Nlamulo nna nawoga negi, athu yahaddaga dhoojha dhewa, ehiyege mwanakokombwa wihina athu ohawa eddoddelege. (Lev. 19:9, 10) Mwaha wa yeyo, Nowemi vamodha ni Ruti yahanda okanna yoojha mwamakalelo apama ehihowenle oloba.

11-12. Bowaji amukavihere avi Nowemi vamodha ni Ruti?

¹¹ Mundda Ruti addoddeliyemo dhoojha, mwinnyaya ithaniwa Bowaji. Odhivela ni ororomeleya wa Ruti wahimuthikiniha Bowaji. Bumwahaya oobolege mundda wa Nowemi nuumala omutela Ruti. (Rute 4:9-13) Nuuvira mudhidhi Bowaji ni Ruti yahikanna mwana ithaniwa Obedi, nuwindo okala avwaye Davidi. — Rute 4:17.

¹² Nowemi ahihagalala vamlubale mwaha omuthukula Obedi waali nvaho wa Mulugu! Mbwenye muselu dhixa dhiri osogolo. Nowemi vamodha ni Ruti yavenyihiwa muukwani enere woona wihina Obedi aali nikolo na Mesiya, Yesu Kiristu!

13. Dhithu baani dhapama nnahudherihu ni thalako ya Nowemi ni Ruti?

¹³ Dhithu nnahudherihu. Makathamiho mamodha podi onuukula ofiyedha onyenya murima wehu. Makathamiho mamodha enothabwa orusa. Mudhidhi yoyo, nimuroromele babihu odhulu vamodha naaddibilihu. Ebaribari wihina Mulugu kanamarihe makathamiho ehu. Emodhave yampadduwele Nowemi. Yehova kamuhogolosele mamune  newene anaaye. Yehova podi onikavihera alabihedhaga dhowera dha addibilihu amunroromeloni. — Pro. 17:17.

14. Ethu baani yamukula Salmista ola?

¹⁴ Mudhaari alembe livuru na Salmos 73 aali mulevita. Ahikanna gari yunlubale yokavihera mutempulu mwa Yehova. Mbwenye wahifiya mudhidhi dhithu dhamwigumini omuukulaga. Mwaha wa ddi? Oliye ahibajha wakalela nrima athu owithukula ni abure — kakalela nrima obure yeriwana, mbwenye makalelo dhithu dhaweddeliwa pama. (Sal. 73:2-9, 11-14) Wakala ninga yahikanna dhithu dhatedhene dhinahoweleya ninga: korowa, egumi yapama ni kiyafwanyiwa makathamiho. Salmista ole owukuwa vanlubale mwaha wawona athu abure dhewa dhaweeddelaga pama ofiyedha owoga: “Mwebaribarene gelihedhe ebewene murima waaga ni mada aaga.” Enowoneya wihina epaddi yomuzimuni ya Salmista ola yahiridha.

15. Ninga munawogela Salmos 73:16-19, 22-25, mulevita agonjhihe addi wukuuwa waye?

¹⁵ Omwileri Salmos 73:16-19, 22-25. Mulevita ole ‘ovolowa mburo munlubale wotxena wa Mulugu’. Agaari vaari vaathu amodha yamwebedha Yehova, mulevita ole olobela mwaha wa makathamiho yanfwanya ni wubuwelaga dhithudha mwa makalelo apama. Oliye woona wi mubuwelo waye waali wozimola ni were omuthukulela omwalana ni Yehova. Teto oliye wonelamo wihina athu ale abure yaali “mburo wosereneya” ni “omakuthulo wewa wakale wabure.” Wihina ahiye mubuwelo ole wa nrima vamodha ni okwerebeya, mulevita ole ohowela osayela woona dhithu ninga Yehova anoneliyemo. Nurugunusa mubuwelo waye, ohogolowela murenddele ni ohagalala anniyena. Oliye wera: ‘Omuhiya [Yehova], kaginahowela ethu emodha mwilaboni yavati.’

16. Dhithu baani nnahudherihu ni mulevita?

¹⁶ Dhithu nnahudherihu. Kanixixewene wakalela nrima athu abure dhewa dhaweeddelaga pama. Ohagalala wewa kahi webaribari  teto kawinalegela, aliwa kinakele egumi yohimala. (Ecl. 8:12, 13) Wakalela nrima nnafugulela musiwo wowukuwa teto onere oniyeleliha wandana wehu ni Yehova. Akala onakala ninga onowakalela nrima athu abure werena ethu emodhave enrena mulevita: ovuruwane dholaga dhapama dha Mulugu ni wandane ni ale enamudhivela Yehova. Omudhivela wawo Yehova wathabwaga wunnuwa onere ofwanya ohagalala. Teto onere odidelave okala mudila mwa ‘egumi yohimala.’ — 1 Tim. 6:19.

17. Dhithu dhamukula Peduru sivi?

¹⁷ Murumiwi Peduru aali muthu oxaga, mbwenye malabo mamodha owoga dhithu ahubuwenle. Mwaha wa yeyo malabo owinjhiva owukuwa mwaha dhithu awogiye obe eriyena. Motajhiha, Yesu awogiliye ni arumiwi aye wi ere wonihiwa goyi ofiyedha opiwa, Peduru omuthukulela okwibi wera: ‘Dhithu ndha kadhinupadduwele.’ (Mat. 16:21-23) Nuwindo Yesu omusumulula Peduru. Dila emodha muthithi wadhonwiwa ommaga Yesu, Peduru othukula supadda ogwaddanya nibaru na mudhaari anamakutha. (João 18:10, 11) Vano, Yesu omusumululave. Ohiya eyo Peduru olibela wihina naari amodha yuhiyaga miyo kagidha guhiya. (Mat. 26:33) Nuumala kuvinre mudhidhi wowinjhivene. Peduru omukodda Yesu dila tharu. Oliye wukuuwa vanlubale, ‘okuma otomola kutho.’ (Mat. 26:69-75) Podi wihina Peduru ubuwela wi Yesu kamulevelele.

18. Yesu amukavihere avi Peduru ogonjhiha wukuuwa waye?

¹⁸ Mbwenye Peduru kahiyile wi wukuuwa omuhihe omwebedha Yehova. Nuuvira mudhidhi, oliye wiwomihedha omulabelaga Yehova vamodha ni arumiwi amodha. (João 21:1-3; At. 1:15, 16) Yamukavihere Peduru ddi? Yesu ahilobela wi nroromelo na Peduru nnaridhe, teto, omukongomedha wihina  alibihe addibile. Yehova ahahawakula malobelo ala. Nuuvira malabo, Yesu omuthanyuwedha Peduru wihina amulibihe. (Luc. 22:32; 24:33, 34; 1 Cor. 15:5) Mahiyo arumiwi egadhonwe otota oba Yesu wathanyuwedha. Mudhidhi yoyo, Yesu onvaha ofuru Peduru wihina onihe odhivela anniyena nuliye. Hee Yesu ahimulevelela mukwaye, teto onvaha mabasa owapara. — João 21:15-17.

19. Livuru na Salmos 103:13, 14 nnanikavihera avi okanna monelo mmodhave wa Yehova wodhela dhothega dhehu?

¹⁹ Dhithu nnahudherihu. Yesu ahimweddela thagaraga Peduru, mwaha otajhiha pamadhene dhikalelo dha ababe. Bumwahaya naviriganiha, kanubuwelege wihina kaninna mabasa vamentoni va Yehova — Saddana dinadhiveliwa nubuwelaga ndo. Mbwenye nilibihere okanna monelo wa odhivela ni olevelela wa Yehova. Naviriganiha niwonege ninga Yehova ananoneliye, teto amodha yanithegela nawonege nimakalelo mamodhave. — Omwileri Salmos 103:13, 14.

20. Sumaneyo nnahudhere ddi?

²⁰ Yotajhiha ya Juze, Nowemi ni Ruti, ya mulevita ni Peduru enonivaha ebaribari wihina ‘Yehova ohawaddamela ale enna murima wowukuwene.’ (Sal. 34:18) Ebaribari wihina Mulugu anowenya wi nifwanyiwe makathamiho enanuukula. Mbwenye, navilelaga nagonjhihaga makathamihoya, nnikavihero na Yehova nroromelo nehu nnakala nolibanene. (1 Ped. 1:6, 7) Ohudhera winadha, nnere woona makalelo Yehova anakaviheriye adhaari aye oororomeleya eli ookwerebeyene mwaha wa dhoviriganiha obe makathamiho orusa.