1-2. Ngozvapi zvatinozovona pa jijo iyi?

NGUVA jimweni itusu tingatorangarira ngo manera akagara upenyu, iwona wakafupika. Cimwenizve, njiku jedu ‘jakazara ngo matambujiko.’ (Jobe 14:1) Nguva jimweni tingatocamwa. Vashandiri vazinji va Jehovha vo munguva jokare vakajizwavo kudaro. Vamweni vaitoda kufa. (1 Majimambo 19:2-4; Jobe 3:1-3, 11; 7:15, 16) Asi Jehovha nguva jese waivavangisa. Zvakavaitikira zvakatahwa. Patinonga tecizviverenga, tinovangiswa no kujija zviri zvese ngo pamusoro pavo.—VaRoma 15:4.

² Pa musoro uwu tinozovona vashandiri va Jehovha vakakwanisa kucungirira pavakasongana no zvineso. Vakadari inga Josefa mwana wa Jakobe, Naomi no nyamwana yake Rute, Murevhi wakatara bhuku ra Nduyo 73 no mupostori Pedhru. Jehovha wakavavangisa kudini? Ngozvapi zvatingajija ngo pamusoro po muezaniso wavo? Mupinguro wakona unozothembesa kuti “Tenji Mwari ari phedo no mwoyo yakakhuvazwa” cimwenizve iyena “anoponesa vese vakapera simba.”—Nduyo 34:19.

3-4. Zvicinyi zvakaitikira Josefa paainga ari mujaha?

³ Josefa wainga ano 17 o makore paakarota hope mbiri jecivha ka Mwari. Hope ijo jaikhombija kuti Josefa waizoguma pa kuva mundhu anosisira maningi waizoreremejwa ngo mbhuri yake. (Genesi 37:5-10) Asi pacito papera mukuvo muzinji naapera kurota hope iji, upenyu hwake hwakacinja mu njira inonyangajisa. Kusiyapo kureremejwa ngo hama jake, ivona vakamutengesa. Woguma pa kuva muranda wo mutungamiriri wo ku Ejipita waidanwa Potifari. (Genesi 37:21-28) Upenyu hwa Josefa hwakacinja mu kuperera pa mukuvo mushoma basi. Iyena wainga acina mukuvo wakareba maningi ari kumuzi ka baba wake vaimudaya maningi. Iyena wakaguma pa kuva muranda ku Ejipita, woshandira mundhu wainga acikazivi Jehovha.—Genesi 39:1.

 ⁴ Asi upenyu hwa Josefa wakaenderera mberi hwecishatisisa. Mukaji wa Potifari wakapumbha Josefa kuti waida kumujipa. Asi Potifari aazivi kueja kupsaka kuziva kuti dangani zvainangwaro zvainga zvokadi. Kunja ko kuita kudaro iyena wakadira Josefa mukadheya. Mondhomo iyena wainga akasungwa ngo magaragajero o simbi. (Genesi 39:14-20; Nduyo 105:17, 18) Amborangariranyi basi mazwiro akava no mujaha uwu Josefa, paakapumbhwa kuti wakaeja kujipa mukaji wa Potifari. Pavaizozwa masoko aya, izvo zvaizoitisa kuti vandhu varangarire zviro zvakashata ngo pamusoro pa Jehovha, Mwari wa Josefa. Zvokadi kamare Josefa wainga no thangwe ro kuti iyena acamwe!

5. Zvicinyi zvakaita Josefa kuti iyena atame kugara akacamwa?

⁵ Josefa paainga ari mu uranda no mukadheya apana caaizokwanisa kuita kuti acinje upenyu hwake. Waro zvicinyi zvakamubesera kuti ave no mavonero akanaka? Iyena aazivi kubatikana ngo zviro zvaainga acikakwanisi kuita. Asi wakashanda ngo simba kuti aite basa raakagajwa. Zvinosisira pa zvese izvi ngo zvokuti, Josefa wakaenderera mberi eciita kuti Jehovha ave mundhu anosisira maningi mu upenyu hwake. Ngo ndava yazvo Jehovha wakakomborera zvese zvaiita Josefa.—Genesi 39:21-23.

6. Ngenyi hope ja Josefa jakamutondhoja?

⁶ Josefa kangaije wakavangiswa maningi ngo kurangarira ngo pamusoro po hope jaakava najo pa makore akapera. Hope jake jaivonesa kuti iyena waizokwanisa kuzovonazve mbhuri yake. Jaivonesazve kuti mugariro wake waizocinja. Izvi ndizvona zvakaitikadi kamare. Josefa paainga no 37 o makore, hope jaakarotaya jakatanga kukwanirisika ngo njira inoshamaisa maningi!—Genesi 37:7, 9, 10; 42:6, 9.

7. Mukuzwirana no 1 Pedru 5:10, zvicinyi zvinozotibesera kuti ticungirire zvineso?

⁷ Zvatinojija. Zvakaitikari ja Josefa zvinoticeuja kuti nyika iyi yakashata. Zvinotijijisazve kuti vandhu vanozotitaja mu njira icizivi kurungama. Pikija hama no hambzaji jedu jingatotitaja  mu njira icizivi kurungama. Asi kudari tikavona Jehovha inga buwe redu, kana inga citiziro cedu, itusu atizocamwi kana atizosiyi kumushandira. (Nduyo 62:7, 8; verenganyi 1 Pedru 5:10.) Tinodikana kuceujazve kuti Josefa wakava no hope jiya paainga no 17 o makore, Jehovha paakamutaja mu njira inosisira. Ngo kudaro Jehovha anothemba vashandiri vake vaciri majaha. Nyamasi uno kuno majaha no vasikane vakadari inga ndi Josefa. Ivona vanahovo rutendo hwakadaro kuna Jehovha. Vamweni vavo vari kutajwa mu njira icizivi kurungama ngo kudihwa mu kadheya ngokuti ivona avazivi kuregera kuzwira Mwari.—Nduyo 110:3.

8. Zvicinyi zvakaitika kuna Naomi na Rute?

⁸ Ngo ndava yo urombo hwakanyanyisa, Naomi no mbhuri yake vakasiya kugara mu Judheya voenda ku nyika iciripi yavo yaidanwa Mowabhi. Kondhoyo, mwamuna wa Naomi waidanwa Erimereki, wakatamika, wosara iyena no vana vake vaviri. Pakufamba ko nguva vana vakasarari vakarovora vanakaji vo Mowabhi: Rute na Orpa. Nopapera gumi ro makore, vana va Naomi vakatamikavo. Ivona vakasiya vakaji vavo vacina vana. (Rute 1:1-5) Amborangariranyi kucamwa kwakava no vanakaji vaviri ava! Pacina kukana-kana Rute na Orpa vaizokwanisazve kurovohwazve. Asi Ndiyani waizokwanisavo kukorondha Naomi, waingari waamusharuka? Naomi wainga akacamwa maningi zvokuti wakaguma pa kungana kudari: “Mucandidanijabze Naomi, ndidanijenyi Mara (bzinoti kuxaxa), ngokuti Nyakukwanisa bzese wakandizaja ngo uxaxi.” Nozvapera kuitika zvese izvi zvinocamwisari, Naomi wakasunga kuhwirira ku Bheterehema. Asi Rute wakada kwendavo naye.—Rute 1:7, 18-20.

9. Mukuzwirana na Rute 1:16, 17, 22, Rute wakavangisa kudini Naomi?

⁹ Waro zvicinyi zvaizobesera Naomi? Hwainga rudo hwokadi. Inga muezaniso, Rute wakakhombija rudo uhu ngo kugara na Naomi. (Verenganyi Rute 1:16, 17, 22.) Ku Bheterehema Rute wakashanda ngo simba kuti akwanise kuwana zviri zvese kuitira iyena na Naomi. Inga muviyo vandhu vese vakakwanisa kuvona kuti Rute, wainga mundhu waushoni waikwanisa kushanda ngo simba.—Rute 3:11; 4:15.

10. Jehovha wakakhombijisa kudini rudo ku vandhu vaida besero vakadari inga Naomi na Rute?

¹⁰ Jehovha wakapa Vaiziraeri mupango waikhombija usizi ku varombo. Iwona wakakwanisa kubesera Naomi na Rute. Iyena wakavhunja vandhu vake kuti pavaizokotora avacaidikanepi kubojera zvese zvaizosarira. Vakadaro vaizobesera varombo pavaizoviyavo ngo sure kuti vawane zviri zvese. (VaLevi 19:9, 10) Ngokudaro Naomi na Rute avacaizodikanepi kwenda ko pembha kuti vawane zvokuha. Ivona vaizohwana zvokuha munjira yakanaka kamare.

11-12. Bhoazi wakaitenyi kuti Naomi na Rute vavezve no mudakaro?

¹¹ Munda wakaendari Rute koopsaka zvokuha wainga wo mukhupuki umweni waidanwa Bhoazi. Iyena wakapsaswa maningi ngo kugondeka kwa Rute kuna Naomi pomwe no rudo hwaaikhombija kwaari. Pakufamba ko nguva, Bhoazi wakazorovora Rute, woitazve kuti zvese zvainga zvo mbhuri ya Naomi zvive utaka ku vana va Rute. (Rute 4:9-13) Ivona vakava no Mwana vomudura zina ro kuti Obhedhe. Obhedhe ndiyena wakazova cekuru wa Mambo Dhavhidhi.—Rute 4:17.

¹² Amborangariranyi mudakaro wakava na Naomi, paakabata mwana uwu Obhedhe, no kubonga kwaakaita Jehovha zvecivha pasi po mwoyo kamare! Asi zviro zvakanakisisa kupinda izvi, zvicada kuitika kuna Naomi na Rute. Pa rumuko ivona vanozoziva kuti Obhedhe wakava mubarihwana wa Mesiya wakagondeswa!

13. Ngozvapi zvatingajija ngo muezaniso wa Naomi na Rute?

¹³ Zvatinojija. Patinosongana no zvineso tingatocamwa kana kutama kutojizwa ushoni.  Tingatorangarira kuti zvineso zvedu azvizoperi. Patinojizwa kudaro tinodikana kuthemba kamare baba vedu vo mugore toramba tiri phedo no hama no hambzaji jedu jo muungano. Zvokadi kamare Jehovha aavhisi zvineso zvedu nguva jese. Inga muezaniso, iyena aazivi kumusa mwamuna wa Naomi no vana vake. Asi iyena anotibesera kangaije ngo kushandisa zviro zvaushoni zvinoithwa ngo hama no hambzaji jedu.—Mazwi Akangwara 17:17.

14. Ngenyi Murevhi wakaguma pa kunyangajwa maningi?

¹⁴ Mutari wo Nduyo 73 wainga Murevi. Ngokudaro iyena wainga no cidakajiso cikuru maningi co kushandira pa ndau yo kunamatira Jehovha. Asi mu upenyu hwake pakava no mukuvo waakajizwa akacamwa maningi. Ngenyi? Ngo kuti iyena wakatanga kuemura vandhu vakashata no vanojikuja. Iyena aacaiemurepi kuda kuita zviro zvakashata. Waiemura upenyu hwavo hwaivonekaya inga huri nane kupinda hwake. (Nduyo 73:2-9, 11-14) Ivona vaivoneka inga vano zviro zvese; upfumi, upenyu hwaushoni no kutama kuthimwa-thimwa. Murevhi uwu paaivona zvese izvi, iyena wakaguma pa kucamwa kamare, wonanga kudari: “Ngo bzokadi, ndakangwarira mwoyo wangu wakacena biresi, ndecisamba nyara jangu mu uceni!” Zvakajeka kuti izvi zvaizomuita kuti asiye kushandira Jehovha.

15. Mukuzwiranana na Nduyo 73:16-19, 22-25, Murevhi wakatarari bhuku iri ra Nduyo, wakanyisisa kudini kucamwa waainga anako?

¹⁵ Verenganyi Nduyo 73:16-19, 22-25. Murevhi ‘wakanghwina mu ngome ya Mwari.’ Mondhomo, iyena waikwanisa kuva pamwepo no vanamati vamweni va Jehovha, wokwanisa kuva no mwoyo wakathiva, wonasa kurangarira no kuita mukumbiro ngo pamusoro po shwiro yake. Inga muviyo iyena wakatanga kuvona kuti murangariro waaingaya nawo, wainga wo upenji. Wainga wootanga kujidira mungozi kamare. Ngozi yaizomuita kuti aruze ushamwari hwake na Jehovha. Iyena wakazwisisazve kuti vakashata vainga pa “ndau jokusejemuka,” zve ‘vanozofa ngo kuthya.’ Kuti atamezve kuva no thima kana kuemura kwaaingaya anako pomwe no kusuruvara, mutari wo Nduyo uwu wakadikana kuvona zviro manera azvaivoniwa ndi Jehovha. Ngokuita kudaro, waizovazve no runyararo pomwe  no mudakaro. Iyena wakananga kudari: “Komuri [Jehovha] apana ciro cinondidakaja munyika.”

16. Ngozvapi zvatingajija ngo Murevhi?

¹⁶ Zvatinojija. Atidikani kamare kuemura vandhu vakashata vanovoneka inga vano upenyu hwaushoni. Mudakaro wavo unozopera zve ivona, avazogari kwenda no kwenda. (Mucumaeri 8:12, 13) Kudari tikavaemura zvinozotiita kuti itusu tive vandhu vanocamwa, zvotiitazve kuti tiruze ushamwari hwatinahwo na Jehovha. Ngokudaro, kudari mukavona kuti muri kutanga kuva no mazwiro akavari no Murevhi, itanyi zvakaitaro. Zwiranyi ngwajo jo rudo ja Mwari. Cimwenizve batananyi pamwepo na vaya vanoita kuda kwa Jehovha. Pamunoda Jehovha kupinda ciri cese haco, munozova no mudakaro wokadi-kadi. Imwimwi munozova no “uhomi hwokadi-kadi.”—1 Timoti 6:19.

17. Zvicinyi kangaije zvaizoitisa kuti Pedhru acamwe?

¹⁷ Mupostori Pedhru wainga mundhu anovangisira maningi. Asi nguva jimweni iyena waida kuita zviro acizivi kurangarira ushoni. Inga muviyo, zvondhozvo zvaimuita kuti iyena ajidembe. Inga Muezaniso, Jesu paakavhunja vajiji vake kuti iyena waizotambujika no kufa, pedro wakakweva Jesu pamutivi womuvhunja kudari: ‘Mucatendera kuti izvi zvimuitikire.’ (Mateu 16:21-23) Ngokukasika Jesu wakabesera Pedhru kuti atame kurangarira kudaro. Mutungwa wo vandhu pawakaviya kuzobata Jesu, Pedhru ngo kukasika, wakatora banga rake woceka njeve yo muranda wo mupiri mukuru. (Johani 18:10, 11) Pa vhaza iyi Jesu wakabeserazve Pedhru. Mukuengejera Pedhru wakananga ngo kuthemba kwese kuti pikija vapostori vamweni vakazosiya Jesu, iyena aacaizoitepi zvondhozvo. (Mateu 26:33) Asi kujithemba kwaaingari nako, kwakamuita kuti iyena agumire pa kuthya vandhu. Ngokuti pa usiku wondhowo iyena wakananga kuti aacaizivepi Jesu. Iyena wakananga izvi vhaza ndhatu jese. Iyena wakaguma pakunyangajwa maningi, ‘wobuda kunja ecicema ngo kuhwajihwa mwoyo.’ (Mateu 26:69-75) Kangaije iyena wakaguma pa kuthimwa-thimwa ecirangarira kuti aacaizoregerehwepi ndi Jesu.

18. Jesu wakabeseresa kudini Pedhru kuti atamezve kucamwa?

 ¹⁸ Pedhru aazivi kuva wakacamwa zvo gumira pakumuita kuti iyena atamezve kushandira Jehovha. Pazvakapera kuitika izvi iyena wakaenderera mberi ecishandira Jehovha. (Johani 21:1-3; Maitiro o Vapostori 1:15, 16) Zvicinyi zvakamubesera kuti atamezve kuva mundhu wakacamwa? Iyena anoceuja kuti Jesu wakaita mukumbiro kuti Pedhru, atame kusiya rutendo hwake. Cimwenizve Jesu wakangwaja Pedhru kuti ahwirire, aende koovangisa hama jake. Jehovha wakadavira mukumbiro wakaithwari ndi Jesu. Nopakera mukuvo wakatikuti, Jesu wakabudira Pedhro. Pacina kukana-kana Jesu wakamuvangisa. (Luka 22:32; 24:33, 34; 1 VaKorinto 15:5) Jesu wakabudiravo vajiji vese pavakapeja usiku hwese vacizivi kubata ciri cese. Pa vhaza iyi Jesu wakapa Pedhru mukana wo kuti avonese dangani waimuda. Jesu wakaregerera shamwari yake iyi inodiwa, womupa mabasa akawanda.—Johani 21:15-17.

19. Nduyo 103:13, 14, inotijijisenyi ngopamusoro po zvinorangarira Jehovha patinoshaisha?

¹⁹ Zvatinojija. Manera akatajwa Pedhru ndi Jesu, anokhombija usizi hwake. Anokhombijazve matajire anoita Jehovha vandhu vake. Ngokudaro patinoita zviri zvese zvakashata, ticadorangarira kuti Jehovha azotiregereri. Tinodikana kuceukija kuti Sathana anoda kuti itusu tirangarire kudaro. Tinodikana kunasa kurangarira kuti Jehovha anotida. Iyena anozwisisa patinogumira. Ngo kudaro, anoda kutiregerera. Tinodikanavo kumutevejera, vamweni pavanotiitira zviro zvinotinyangajisa.—Verenganyi Nduyo 103:13, 14.

20. Zvicinyi zvatinozovona pa musoro unotevera?

²⁰ Muezaniso wa Josefa, Naomi, Rute, Murevhi na Pedhru, unotigondesa kuti “Tenji Mwari ari phedo no mwoyo yakakhuvazwa.” (Nduyo 34:19) Iyena anotendera kuti tisongane no zvineso no kujizwa takacamwa nguva jimweni. Pikija zvakadaro, patinocungirira zvineso ngo besero ra Jehovha, rutendo hwedu hunovangiswa. (1 Pedru 1:6, 7) Pa musoro unotevera, tinozovona kuti Jehovha anobeseresa kudini vashandiri vake vakagondeka, vanonga vakacamwa ngo ndava yo kutama kukwana kwavo kana ngo ndava yo zvineso zvavanosongana nazvo.