1-2. Ko e heigoa ka fakatutala a tautolu ki ai he vala tala nei?

KE HE falu magaaho, liga manamanatu a tautolu ke he kū he moui mo e ha tautolu a tau aho kua “puke ai ke he fakaatukehe.” (Iopu 14:1) Ti maama ka loto pehia a tautolu he falu magaaho. Tokologa e fekafekau ha Iehova he vahā i tuai ne logona hifo pihia. Falu ne manako foki ke mamate. (1 Patu. 19:2-4; Iopu 3:1-3, 11; 7:15, 16) Ka e fakamafana mo e fakamalolō tumau e Iehova ko e Atua ne falanaki a lautolu ki ai. Ne fakamau e tau tala ha lautolu ke fakamafana mo e fakaako a tautolu.​—Roma 15:4.

² He vala tala nei, to fakatutala a tautolu ke he falu fekafekau ha Iehova ne fakauka ke he tau kamatamata ne fakalolelole, tuga e tama ha Iakopo ko Iosefa, takape ko Naumi mo e figona haana ko Ruta, tagata Levi ne tohia e Salamo 73, mo e aposetolo ko Peteru. Fakamalolō fēfē e Iehova a lautolu? Ti ko e heigoa e tau fakaakoaga ka iloa e tautolu mai he tau fakafifitakiaga ha lautolu? To mafanatia a tautolu he tau tali “kua tata mai a Iehova kia lautolu kua loto malipilipi,” ti “kua fakamoui foki e ia a lautolu kua loto pehia.”​—Sala. 34:18.

3-4. Ko e heigoa ne tupu ki a Iosefa he vahā fuata?

³ Kavi ke he 17 e tau ha Iosefa he magaaho ne ua e miti haana mai he Atua. Fakakite he tau miti nei to hoko ke he taha aho ti moua e Iosefa e kotofaaga lilifu i loto he magafaoa. (Kene. 37:5-10) Ka e nakai leva he mole e tau miti ha Iosefa, hiki lahi mahaki e moui haana. He nakai fakalilifu ki a ia, fakafua he lafu haana a ia ke eke mo tupa. Ti nofo a ia ke he kaina he fekafekau  pule Aikupito ko Potifara. (Kene. 37:21-28) He magaaho kū, hiki a Iosefa mai he tama taane fakahele he matua haana ke he tupa fakateaga he fekafekau pule pouliuli i Aikupito.​—Kene. 39:1.

⁴ Ka e holo ki mua e kelea he tuaga ha Iosefa. Tukupau fakavai he hoana ha Potifara ne lali a Iosefa ke fakapilo pulenoa a ia. He nakai kumikumi e tala mooli, tuku e Potifara a Iosefa he fale puipui ti līlī ke he tau toua lapatoa. (Kene. 39:14-20; Sala. 105:17, 18) Manamanatu la ke he logonaaga he fuata ko Iosefa he tukupau fakavai he lali ke fakapilo pulenoa. Manamanatu foki ke he lauia kelea he tukupau ia ke he higoa ha Iehova. Fai kakano mooli a Iosefa ke loto pehia!

5. Kautū fēfē a Iosefa he loto pehia?

⁵ He fakatupa a Iosefa mo e tuku he fale puipui he magaaho fakamui, ne nakai maeke a ia ke hiki e tuaga haana. Fakatumau fēfē e ia e onoonoaga mitaki haana? He nakai hagaaki a ia ke he tau mena kua nakai maeke ke taute, fakamalolō a ia ke taute e gahua ne tuku age ki a ia. Ka e mua atu, ne tuku fakamua tumau e Iosefa a Iehova ko e Atua he moui haana. Ko e fua, fakamonuina e Iehova e tau mena oti ne taute e Iosefa.​—Kene. 39:21-23.

6. Liga moua fēfē e Iosefa e mafanatia mai he tau miti haana?

⁶ Liga moua foki e Iosefa e fakamafanaaga he manamanatu ke he tau miti fakaperofeta he magaaho fakamua. Fakakite ai to liu a ia ke kitia e magafaoa haana mo e to mitaki e tuaga haana. Ti pihia e mena ne tupu. Kavi ke 37 e tau moui ha Iosefa, kamata e tau miti fakaperofeta haana ke fakamooli he puhala ofoofogia!​—Kene. 37:7, 9, 10; 42:6, 9.

7. Ia 1 Peteru 5:10, ko e heigoa ka lagomatai a tautolu ke fakauka ke he tau kamatamata?

⁷ Tau fakaakoaga ma tautolu. Fakamanatu ki a tautolu kua favale e lalolagi nei ti taute fakakelea he tau tagata a tautolu. Maeke foki he matakainaga ke fakahukia a tautolu. Kaeke  ke onoono a tautolu ki a Iehova ko e ha tautolu a Maka Tumau, po ke Taue to nakai loto lolelole a tautolu po ke fakaoti e fekafekau ki a ia. (Sala. 62:6, 7; totou 1 Peteru 5:10.) Manatu foki na liga kavi ke 17 e tau ha Iosefa he mogo ne fehagai a Iehova mo ia he puhala pauaki. Ti mauokafua a Iehova he tau fekafekau fuata haana. Tokologa foki e tau fuata he vahā nei ne tuga a Iosefa. Ha ha foki ia lautolu e tua ki a Iehova. Falu ia lautolu ne tuku fakakelea he fale puipui ha kua nakai fakahui e mahani fakamooli ha lautolu ke he Atua.​—Sala. 110:3.

8. Ko e heigoa e mena ne tupu ki a Naumi mo Ruta?

⁸ He tō e hoge lahi, toka e Naumi mo e magafaoa haana e kaina ha lautolu i Iuta mo e nonofo ko e tau tagata motu kehe i Moapi. Matakavi ia ne mate ai e taane ha Naumi ko Elimeleka ti toe hifo a ia mo e tau fanau taane tokoua ha laua. Fakamui, hoana e laua e tau fifine Moapi ko Ruta mo Orepa. Kavi ke he hogofulu e tau he mole, mamate foki e fanau taane ha Naumi ka e nakai fai fanau. (Ruta 1:1-5) Manamanatu la ke he momoko lahi mahaki he tau fifine tokotolu nei! Na maeke a Ruta mo Orepa ke liu faitaane. Ka ko hai ka leveki a Naumi kua motua? Fakaatukehe lahi a Naumi ti pehē a ia he taha magaaho: “Ua ui e mutolu au ko Naumi, ka e ui e mutolu au ko Mara; ha kua kona lahi ni e tau mena kua eke kia au e ia hana e malolo oti kana.” Ne loto malipilipi a Naumi ti fifili ke liu ki Petelehema ti fano a Ruta mo ia.​—Ruta 1:7, 18-20.

9. Ia Ruta 1:16, 17, 22, fakamalolō fēfē e Ruta a Naumi?

⁹ Ko e lagomatai ke he fakaatukehe ha Naumi ko e fakaalofa fakamooli. Ma e fakatai, fakakite e Ruta e fakaalofa fakamooli ki a Naumi he pipiki tumau ki a ia. (Totou Ruta 1:16, 17, 22.) I Petelehema, gahua malolō a Ruta ke oko e tau fua karite ma haana mo Naumi. Nakai leva ti moua he fifine fuata nei e higoa mitaki.​—Ruta 3:11; 4:15.

10. He tau puhala fe ne fakakite e Iehova e fakaalofa ki a lautolu ne nonofogati tuga a Naumi mo Ruta?

¹⁰ Foaki e Iehova ke he tau tagata Isaraela e matafakatufono ne fakakite e fakaalofa hofihofi noa haana ma lautolu ne nonofogati tuga a Naumi mo Ruta. Tala age a ia ke he tau tagata haana, ka helehele e tau saito ha lautolu ti toka e tau kalakala he kaina ke oko he tau tagata nonofogati. (Levi. 19:9, 10) Ti nakai lata a Naumi mo Ruta ke ole mena kai. Maeke a laua ke moua e tau mena kai he puhala lilifu.

11-12. Fakafiafia fēfē e Poasa a Naumi mo Ruta?

¹¹ Ko e pule he fonua ne oko saito a Ruta ko e tagata taane monuina ko Poasa. Nava lahi a ia ke he mahani fakamooli ha Ruta ki a Naumi mo e fakaalofa ne fakakite e ia ke he matua fugavai haana, ti fakatau e tufaaga he magafaoa ha laua ti eke a Ruta mo hoana haana. (Ruta 4:9-13) Fanau e laua e tama ko Opeta; ti eke a ia mo matua tupuna he Patuiki ko Tavita.​—Ruta 4:17.

¹² Manamanatu ke he fiafia ha Naumi he totō e mukemuke ko Opeta mo e liligi haana loto fakaaue ki a Iehova! Ka e fai mena mitaki lahi agaia ma Naumi mo Ruta. Ka liu tutū mai a laua to iloa e laua ko Opeta e tupuna he Mesia ne Mavehe ko Iesu Keriso!

13. Ko e heigoa e tau fakaakoaga uho lahi ka ako e tautolu mai he tala ki a Naumi mo Ruta?

¹³ Tau fakaakoaga ma tautolu. Ka fehagai a tautolu mo e tau kamatamata to liga logona hifo e tautolu e loto pehia mo e loto malipilipi foki. Liga manatu a tautolu to nakai maeke ke utakehe e tau lekua ha tautolu. He tau magaaho pihia, lata a tautolu ke falanaki katoatoa ke he ha tautolu a Matua he lagi mo e nonofo fakatata ke he tau matakainaga ha tautolu.  Mooli, to nakai utakehe e Iehova e kamatamata. Tuga anei, nakai fakamomoui e ia e taane mo e tau tama taane ha Naumi he mamate. Ka e to lagomatai e ia a tautolu ke fahia, liga puhala he tau gahua fakaalofa fakamooli ne fakakite he magafaoa fakaagaaga ha tautolu.​—Fakatai 17:17.

14. Ko e ha ne loto pehia lahi e taha tagata Levi?

¹⁴ Ko e tohia he Salamo 73 ko e tagata Levi. Moua e ia e lilifu lahi mahaki he fekafekau ke he faituga ha Iehova. Ka e he taha magaaho he moui haana ne loto pehia foki a ia. Ko e ha? Kamata a ia ke mahekeheke he tau tagata mahani kelea mo e goagoa. Nakai ha ko e mahani kelea ha lautolu ka ko e tau monuina loga ne moua e lautolu. (Sala. 73:2-9, 11-14) Tuga kua moua e lautolu e tau mena oti​—monuina, moui mitaki, mo e nakai fai fakaatukehe. Mogo ne kitia he salamo e tau monuina ha lautolu ti loto pehia a ia mo e pehē: “Ko e moli ni kua fakameā teao e au haku loto; ti kua holoholo e au haku tau lima neke hala au, ka e teao ni.” Maaliali ai, kua fakaohooho he mena nei a ia ke fakahagahagakelea e moui fakaagaaga haana.

15. Ia Salamo 73:16-19, 22-25, kautū fēfē e tagata Levi ne tohi e salamo nei he loto pehia?

¹⁵ Totou Salamo 73:16-19, 22-25. Ko e tagata Levi “ne fina atu . . . ke he faituga he Atua.” Liga he fakalataha mo e tau matakainaga i ai kua maeke a ia ke fakatotoka, manamanatu fakamitaki, mo e liogi hagaao ke he tuaga haana. Ti ko e fua, kamata a ia ke kitia kua goagoa e manatu haana mo e kua kamata a ia ke fano he puhala hagahagakelea ka vevehe kehe a ia mai ia Iehova. Maama foki e ia ko e tau tagata mahani kelea kua ha ha he “tau mena momole” mo e to “mahaikava” a lautolu. Ke nakai mahekeheke mo e loto pehia, lata e salamo ko e Levi ke kitia e tau mena mai he onoonoaga ha Iehova. He taute pihia kua liu a ia logona hifo e mafola, ti fiafia a ia. Pehē a ia: “Hoko [Iehova] foki ne fiafia ki ai au ke he lalolagi.”

16. Ko e heigoa e tau fakaakoaga ka ako e tautolu mai he taha tagata Levi?

¹⁶ Tau fakaakoaga ma tautolu. Nakai lata a tautolu ke mahekeheke ke he tau tagata  mahani kelea ne tuga kua monuina. To galo e fiafia ha lautolu mo e to nakai moua e lautolu e moui tukulagi anoiha. (Fakama. 8:12, 13) Ke mahekeheke ki a lautolu to fakalolelole mo e moumou e tuaga fakaagaaga. Ti ka moua e koe a koe kua mahekeheke ke he tau tagata mahani kelea ne tuga kua monuina, taute e mena ne taute he tagata Levi. Omaoma ke he fakatonuaga totonu he Atua mo e lafi mo lautolu ne taute e finagalo ha Iehova. Kaeke ko Iehova e fakaalofa mua ue atu haau, to moua e koe e fiafia mooli. Mo e to tumau a koe he puhala “ke he moui tukulagi.”​—1 Timo. 6:19.

17. Ko e heigoa e tau kakano ne loto pehia a Peteru?

¹⁷ Ko e aposetolo ko Peteru ko e tagata loto malolō; ka e maeke foki a ia ke ohooho mo e falu magaaho mafiti ke talahau haana tau logonaaga. Ti ko e fua, talahau po ke taute e ia e tau mena he falu mogo ne tokihala a ia he mogo fakamui. Tuga anei, tala age a Iesu ke he tau aposetolo haana to hoko e matematekelea mo e mate ki a ia. Hataki e Peteru a Iesu he pehē: “Nakai ni hoko e mena ia kia koe.” (Mata. 16:21-23) Ati fakatonu e Iesu a Peteru. He o mai e tau tagata ke tapaki a Iesu, mafiti a Peteru ke hio e teliga he fekafekau he ekepoa ne mua. (Ioane 18:10, 11) Liu a Iesu fakatonu e aposetolo. Lafi ki ai, tala fakatokoluga a Peteru to liga tupetupe e falu aposetolo ki a Keriso, ka e nakai pihia a ia! (Mata. 26:33) Ha ko e molea e mauokafua ati mahala a Peteru ke he matakutaku tagata, ti fakatikai lagatolu e ia e Iki haana. He loto pehia lahi a Peteru, ne “hu atu a ia ki fafo, kua tagi lahi.” (Mata. 26:69-75) Liga manatu a ia to fakamagalo nakai e Iesu a ia.

18. Lagomatai fēfē e Iesu a Peteru ke kautū he loto pehia?

¹⁸ Ka e nakai fakaatā e Peteru a ia ke molea e loto pehia. He mole e hehē, liu a ia manamanatu mitaki ti fakalataha a ia mo e falu aposetolo he mogo fakamui. (Ioane 21:1-3;  Gahua 1:15, 16) Ko e heigoa ne lagomatai a ia ke liu manamanatu mitaki? Taha e mena, liogi a Iesu he mogo fakamua to nakai mahala e tua ha Peteru, ti tomatoma e ia a Peteru ke liu mo e fakamalolō e tau matakainaga haana. Tali e Iehova e liogi fakamooli ia. Fakamui, ne fina atu a Iesu ki a Peteru, liga ke fakamalolō a ia. (Luka 22:32; 24:33, 34; 1 Kori. 15:5) Fina atu foki a Iesu ke he tau aposetolo he mole e futi ika a lautolu he pō katoa ka e nakai fai ika ne moua. Mogoia ne foaki e Iesu ki a Peteru e magaaho ke fakakite e fakaalofa mooli haana ki a Iesu. Kua fakamagalo e Iesu e kapitiga uho haana mo e lahi foki e gahua ne tuku age ki a ia.​—Ioane 21:15-17.

19. Lagomatai fēfē he Salamo 103:13, 14 a tautolu ke kitia e manatu ha Iehova hagaao ke he tau agahala ha tautolu?

¹⁹ Tau fakaakoaga ma tautolu. Ko e puhala ne fehagai a Iesu mo Peteru kua fakamaama e fakaalofa noa ha Iesu, ti fakaata katoatoa e Iesu e Matua haana. Ka taute e tautolu e tau hepehepe, nakai lata ke manatu to nakai fakamagalo a tautolu. Lata a tautolu ke tokaloto kua manako a Satani ki a tautolu ke manamanatu pihia. Ka e eketaha fakalahi a tautolu mo lautolu kua agahala ki a tautolu ke kitia e puhala fakaalofa hofihofi noa mo e totonu he ha tautolu a Matua he lagi.​—Totou Salamo 103:13, 14.

20. Ko e heigoa ka fakatutala a tautolu ki ai he vala tala ka mui mai?

²⁰ Ko e tau fakafifitakiaga ha Iosefa, Naumi mo Ruta, tagata Levi, mo Peteru ne fakakite mooli ki a tautolu “kua tata mai a Iehova kia lautolu kua loto malipilipi.” (Sala. 34:18) Fakaatā e ia a tautolu ke matematekelea ke he tau kamatamata mo e loto pehia he falu magaaho. Pete ia ka kautū a tautolu he fakauka ke he tau kamatamata mo e lagomatai ha Iehova to fakamalolō e tua ha tautolu. (1 Pete. 1:6, 7) He vala tala ka mui mai, to kitia foki e tautolu e puhala kua lalago e Iehova a lautolu kua fakamooli ne loto pehia liga ha ko e tau nakai mitaki katoatoa po ke tau tutūaga uka ha lautolu.