1-2. Itshi tuza mulonguga mu longo edi?

MATANGUA ako tuajiya gutangiza luholo lujingu luakhala luahihia nu ‘luazala pha nu malamba.’ (Yobo 14:1) Gishina giene, matangua ako tuana leba muila. Akombeledi avula a Yehowa a mutangua dikulu adivuile nji ngenyi. Ako mukatshi diawo atogele gufua. (1 Maf. 19:2-4; Yobo 3:1-3, 11; 7:15, 16) Uvi Yehowa Nzambi wawo akhalele mushila mutshima, waahanele ngolo nu gikhesa. Mene jiawo jiasonegewe ha gutukolesa nu gutuhana malongo.—Lomo 15:4.

² Mu longo edi tuza muzuelela akombeledi a Yehowa anyi alebele muila gifua Yozefe muna Yakobo, Naomi munu wakhalele mukhetu wa gafunda nu giwaji gienji Luta, muenya Levi munu wasonegele mukanda wa Ngimbo 73 nu mupostolo Phetelo. Luholo lutshi Yehowa waakolesele? Malongo atshi muthu wagasue mukatshi dietu wajiya guzula mu ifezegeselo yawo? Mvutu idi gutusuanguluisa idi egi: “Yehowa wakhala hehi gudi athu adi nu gikenene; wana huluisa athu ana leba muila.”—Ngi. 34:18, NWT, ftn.

3-4. Ndaga itshi yabuidile Yozefe ha khalele muene muvuala?

³ Yozefe wakhalele nu ivo 17 ha lotele muene nzoji (ndoji) mbadi jiakatugile gudi Nzambi. Nzoji jiene jiakhalele mukotelesa egi, Yozefe mbawubua muthu wa ndando nu mbawunemesewa gudi enya fami yenji. (Gis. 37:5-10) Uvi gungima dia gulota nzoji jiene, lujingu luenji luasombegesele mbala imoshi. Ha fundo dia gumunemesa, aphangi’enji amudigile mu uhiga, gudi fumu mumoshi wa gu Ejipitu wakhalele mutamegewa egi Potifale. (Gis. 37:21-28) Monyo wa Yozefe wa sombegesele mbala imoshi. Gakhalelego luko fundo dimoshi nu shenji wa guzumba. Uvi wabuile  muthu wa githuhu gu Ejipitu nu wakhalele mu uhiga gu mbodia muthu munu wakhalelego mujiya Yehowa.—Gis. 39:1.

⁴ Ndaga jiabolele luko gubalega mukunda nu Yozefe. Mukajia Potifale wamumbidile mambo egi watshiginyile gubungisa nenji muila gu ngolo. Potifale gakambelego gujiya gula ndaga ya muwambelele mukaji’enji yakhalele ya giamatshidia, uvi wambile Yozefe mu bologo amujitshigile malenge. (Gis. 39:14-20; Ngi. 105:17, 18) Tangiza luholo Yozefe adivile tangua amumbidile mambo egi wakambele gubungisa muila gu ngolo nu mukajia ngane. Tangiza nji luholo athu azuelele ndaga jiabola mukunda nu jina dia Yehowa tangua avuile ndaga eyi. Yadiago, ndaga eyi yatumine Yozefe ha guleba muila!

5. Itshi yakuatesele Yozefe ha gutuna guleba muila?

⁵ Yozefe gakhalelego nga nu gima gimoshi gia gukalagala ha gusombegesa ndaga hakhalele muene mu uhiga nu mu bologo. Itshi yamukuatesele ha gukhala nu matangi abonga? Ha fundo dia gutangiza phamba gu ndaga jinyi muene gajiyilego gusombegesa, wakhalele mutshita mudimo wamuhanewe mu bologo. Ndaga ya gubalega ndando idi egi Yozefe wakhalele musha Yehowa ha fundo dia thomo mu monyo wenji. Gungima Yehowa washimbigile midimo yagasue yakhalele mukalagala Yozefe.—Gis. 39:21-23.

6. Luholo lutshi nzoji jia Yozefe jia muhanele gikhesa?

⁶ Yajiya gukhala egi Yozefe wahetele gikhesa ha tangijile muene nzoji jienji jia thomo jia muwambelele Yehowa. Nzoji jiene jiakhalele mumonesa egi mbawudimona luko nu enya fami yenji nu ndaga jia lujingu luenji mbajisombegesa. Ndaga jiabalegele diago ngenyi. Tangua Yozefe wataganesele ivo 37, nzoji jienji jiasendesele gutagenesewa mu luholo lua gushimana!—Gis. 37:7, 9, 10; 42:6, 9.

7. Ha gutadila 1 Phetelo 5:10, itshi yajiya gutukuatesa ha gukolesela mu malamba?

⁷ Malongo tuajiya guzula. Lumene lua Yozefe ludi gutumonesa egi, mavu tudi mujinga, enya khuta adi avula nu mbaatukalegela ndaga  mu luholo luabola. Ikhale aphangi’etu a mala nga a akhetu ajiya gutukalegela ndaga jiabola. Gula tudi muzula Yehowa egi udi Mubambi wetu nu udi Fundo dietu dia gulengela, mbatulebigo muila nu mbatubembigo gumukombelela. (Ngi. 62:6, 7; tanga 1 Phetelo 5:10.) Jiya nji egi Yozefe wakhalele nu ivo 17 ha muwambelele Yehowa nzoji jia gushimana. Yehowa wakhalele mushila Yozefe mutshima ikhale muene wakhalele muvuala. Mangino, mavuala avula adi nji gifua Yozefe. Anakhala nji nu gutshigina gudi Yehowa. Ako mukatshi diawo ambiwe mu bologo handaga akhalele mutumagela Nzambi nu gutshigina guagasue.—Ngi. 110:3.

8. Ndaga itshi yabuidile Naomi nu Luta?

⁸ Naomi nu enya fami yenji abembele jinzo jiawo gu Yuda ha guya mujinga gu Moaba gifua ngenji mukunda nu nzala yakola. Tangua ahetele guene, mulumienji Elimeleke wafile nu wamubembele nu ana mbadi a mala. Gungima anenji ene mbadi azudile akhetu a gu moaba, Luta nu Orpa. Gungima dia ivo kumi ana ene a mala afile gawo, Naomi wasalele mago agithuhu. (Luta 1:1-5) Tangiza lamba diakola diavuile akhetu awa thathu! Idi yadiago egi gungima dia masugu, Luta nu Orpa ajiya guzudiwa luko mu ulo. Uvi nanyi wakhalele naye gukuatesa Naomi munu wakhalele udi gale mukola? Naomi walebele diago muila hene wazuelele egi: ‘Mungutamegago egi Naomi. Ngutamegenu egi Mara, handaga Nzambi wa ngolo jiagasue wabuisa lujingu luami bua.’ Gungima dia malamba awa agasue, Naomi wazudile desizio dia guvutuga gu Beteleheme, Luta nji wayile nenji.—Ruth 1:7, 18-20.

9. Ha gutadila Luta 1:16, 17, 22, luholo lutshi Luta wahanele Naomi gikhesa?

⁹ Guzumba gua giamatshidia guakuatesele Naomi ha gusala ya gujinginyina. Ha gufezegesa, Luta wamonesele guzumba gua giamatshidia gudi Naomi luholo gatunyile gumubemba. (Tanga Luta 1:16, 17, 22.) Luta wakhalele mukalagala mudimo wakola wa gunona mbuto mu ilanga gu Beteleheme ha gudikuatesa nu gukuatesa Naomi. Ngenyi, athu agasue akhalele mumona diago egi Luta wakhalele nu makalegelo abonga nu wakhalele nji mutshitshi wa midimo.—Luta 3:11; 4:15.

10. Luholo lutshi Yehowa wamonesele guzumba guenji gudi Naomi nu Luta?

¹⁰ Yehowa wahanele enya Isalele mukhuala egi, adi naye guvuila phuthu khenda. Mukatshi dia phuthu jiene tuajiya gutanga Naomi nu Luta. Wawambelele athu enji egi tangua adi mukatula mbuto, adi naye gubemba isusu ya mbuto jia mukhulo ya mahia mukunda nu jiphutu ha gunona. (Levi 19:9, 10) Ngenyi, Naomi nu Luta akhalele muheta ima ya gudia, hafundo dia guya mutoga gudi athu.

11-12. Luholo lutshi Boaze wasuanguluishile Naomi nu Luta?

¹¹ Luta wakhalele muya munona mbuto mu gilanga gia muthu mumoshi wakhalele nu umonyi mujina dia Boaze. Boaze wadihudile luholo Luta wakhalele wa gujinginyina gudi Naomi nu luholo gakhalele gumuzumba muavula. Gungima wamuzudile mu ulo nu wasumbile gilanga gia fami ya Naomi mukunda nu ana mbaavuala nu Luta. (Luta 4:9-13) Boaze nu Luta avualele Obede wago wabuile khakha wa Fumu Davidi.—Luta 4:17.

¹² Tangiza gusuanguluga guakhalele nago Naomi ha batele muene mujigulu wenji Obede nu luholo akalegele gisambu ha guhana Yehowa mersi! Ndaga jiabonga jidi munengena Naomi nu Luta mu masugu adi muza. Tangua mbaafuzumuga, mbaakhala nu gusuanguluga ha gujiya egi Obede wabuile khakha wa Masiya yonu watendelewe, Yesu Klisto!

13. Malongo atshi a ndando tuajiya guzula mu lumene lua Naomi nu Luta?

¹³ Malongo tuajiya guzula. Tangua tudi mutagana  nu malamba, tuajiya guleba muila nga guvua gikenene. Matangua ako, tuajiya gutangiza egi malamba etu ajiyilego guhua. Mu matangua a luholo elu tudi naye gusha mutshima wetu wagasue gudi Tata wetu wa mu dilu nu gusala ya gujinginyina gudi aphangi etu a Aklisto. Idi yadiago egi Yehowa ajiyilego gumanesela malamba etu mutangua dimoshi. Muene afuzumuinego mulumi’a Naomi nu anenji. Uvi wana kalegela aphangi’etu a mala nu a akhetu ha gutukuatesa.—Ish. 17:17.

14. Ndaga itshi yatumile muenya Levi ha guleba muila?

¹⁴ Muthu wasonegele mukanda wa Ngimbo 73 wakhalele muenya Levi. Wakhalele nu luendu lua gukalegela Yehowa mudimo mu gikombelelo gienji. Uvi, musungi imoshi ngenyi, walebele muila. Mukunda natshi? Wasendesele guvuila athu abola nu enya lulendo ginjiongo handaga akhalele nu umonyi wavula nu yajiya gukhala egi akhalele nu lujingu luabonga lua gumubalega. (Ngi. 73:2-9, 11-14) Akhalele mumonega gifua akhalele nu ima yagasue, umonyi, lujingu luabonga nu akhalelego mutagana nu malamba. Tangua muenya Levi wamonele ndaga eji jiagasue, walebele muila hene wazuelele egi: “Ngalabele gami gudikanda ha gukhala muthu wabonga nu ha gukhala nu mutshima ulaphe.” Yadiago, gutangiza luholo elu, guakhalele naye gumutuma ha gubemba Yehowa.

15. Ha gutadila Ngimbo 73:16-19, 22-25, luholo lutshi muenya Levi wabingile guleba gua muila?

¹⁵ Tanga Ngimbo 73:16-19, 22-25. Muenya Levi wakhalele ‘mungina ha fundo dia gijila dia Nzambi.’ Luholo wakhalele mubalegesa tangua hamoshi nu akombeledi a Yehowa, wakhalele tedie nu watangigijile ndaga jienji nu guhuiminyina guagasue gungima wakalegele gisambu. Ngenyi, wamonele egi luholo luenji lua gutangiza luakhalelego luabonga nu wakhalele hehi ha gubemba Yehowa. Wakotelesele egi athu abola adi mu ‘mavu adiadiama’ nu ‘mbaasuga mu luholo luabola.’ Ha gubinga ginjiongo nu guleba gua muila, muenya Levi wakhalele naye gutadila ndaga gifua Yehowa. Ha kalegele muene ngenyi, wahetele guhuima nu wahetele gusuanguluga. Wazuelele egi: ‘Khuta [Yehowa] ngushigo nga nu nzala ya gima giko ha mavu.’

16. Malongo atshi tuajiya guzula gudi muenya Levi?

 ¹⁶ Malongo tuajiya guzula. Tushigo naye guvuila athu abola anyi adi mumonega gifua adi nu lujingu luabonga ginjiongo. Gusuanguluga guawo gudi gua tangua diazonda; ashigo nu felela dia monyo wa mayilago. (Mulo. 8:12, 13) Gula tudi guaavuila ginjiongo, mbatuleba muila nu tuajiya gubemba gukombelela Yehowa. Gula wasendesa guvuila athu abola ginjiongo, kalagala gifua mua tshitshile muenya Levi. Khala mutumagela molongo a guzumba a Nzambi nu khala gudibungisa hamoshi nu athu anyi ana tshita gutshigina gua Yehowa. Mbawuheta gusuanguluga gula udi muzumba Yehowa gubalega ima yagasue. Nu mbawusala mu njila ya ‘monyo wa giamatshidia.’—1 Tim. 6:19.

17. Ndaga jitshi jialebesele Phetelo muila?

¹⁷ Mupostolo Phetelo wakhalele muenya gikhesa. Uvi matangua ako, wakhalele muzuela ndaga muphushi gutangiza ndo. Gungima, wakhalele gudibela mukunda nu ndaga gakhalele muzuela nga gukalagala. Ha gufezegesa, tangua Yesu wawambelele apostolo enji egi mbawumona lamba nu mbawufua, Phetelo wa mubalediele egi: “Ndaga eji mbajigubuilago nga hazonda.” (Mat. 16:21-23) Yesu wakuatesele Phetelo ha gusombegesa matangi enji. Uvi tangua hunji dia athu diajile mukuata Yesu, Phetelo wakalegele ndaga muphushi wabatuile kutshi dia muhiga wa nganga-nzambi wakoma. (Yone 18:10, 11) Yesu wakuatesele luko Phetelo ha gusombegesa matangi enji. Luko, Phetelo wazuelele nu lulendo luagasue egi, ngatshima apostolo ako atuna Yesu uvi, muene ajiyilego gumutuna nga hazonda! (Mat. 26:33) Uvi ndaga jiabalegelego luholo Phetelo wakhalele mutangiza. Mu phipha ya kuatewe Fumu wenji, muene wa mutunyine iphungu thathu. Phetelo walebele diago muila ‘wayile mukhala hanze nu wa didile mangololo.’ (Mat. 26:69-75) Wakhalele gudihula gula Yesu wajiya gumutotesela.

18. Luholo lutsthi Yesu wakuatesele Phetelo ha gudivua luko muabonga?

 ¹⁸ Uvi Phetelo alebelego muila ha gubemba gukombelela Yehowa. Gungima dia ndaga eji, walanduluile gukombelela Yehowa hamoshi nu apostolo ako. (Yone 21:1-3; Makal. 1:15, 16) Itshi yamukuatesele ha gudivua luko muabonga? Wawungulugile egi gutuama dia ndaga eji Yesu wakombelele hagula gutshigina guenji gulebigo nu wamuwambelele ha guvutuga mukunda nu guhana aphangi enji gikhesa. Yehowa wahanele mvutu gu isambu yenji ya giamatshidia. Gungima, Yesu wamonegele gudi Phetelo ha gumuhana gikhesa. (Luka 22:32; 24:33, 34; 1 Kol. 15:5) Yesu wamonegele nji gudi apostolo tangua akhalele mulowa jishui mu phipha, uvi akhalele khenji akuatago nga ishui imoshi. Mutangua diene, Yesu wahanele Phetelo luendu lua gumonesa gula wana gumuzumba diago. Yesu watotesele gubola gua futa dienji nu wamuhanele midimo yavula ya gukalagala.—Yone 21:15-17.

19. Luholo lutshi Ngimbo 103:13, 14 idi gutukuatesa ha gujiya luholo Yehowa wana gutukalegela ndaga gula tuatshita gubola?

¹⁹ Malongo tuajiya guzula. Luholo Yesu akalegele Phetelo ndaga ludi mu monesa egi walanduile khadilo dia khenda dia Sh’enji. Gula tuatshita ndaga imoshi yabola, tushigo naye gutangiza egi Yehowa mbaatutoteselago. Tujimbilago egi Satana udi mutshigina egi tukhale nu matangi a luholo elu. Tudi naye gujiya egi Yehowa wana gutuzumba nu wana gukotelesa egi tuakhalago athu atagana, hene wana khala hehi ha gututosela. Esue nji, tudi naye gulandula khadilo dienji diabonga gula athu ako atukalegela gubola.—Tanga Ngimbo 103:13, 14.

20. Itshi mbatumona mu longo dialandula?

²⁰ Gifezegeselo gia Yozefe, Naomi nu Luta, muenya Levi nu Phetelo idi mumonesa egi ‘Yehowa wakhala hehi gudi athu adi nu gikenene.’ (Ngi. 34:18) Matangua ako, wana gubemba egi malamba atubuile nu muila utulebe. Uvi, tangua tuana binga malamba ene mu ukuateshi wa Yehowa, gutshigina guetu guana kola. (1 Phet. 1:6, 7) Mu longo dialandula, mbatumona luholo Yehowa akuatesele akombeledi enji alebele muila mukunda nu gubola guawo nu mukunda nu malamba ataganele nawo.