1-2. Wanem nao bae iumi storyim lo disfala article?

SAMFALA taem, maet iumi ting abaotem hao laef hem short tumas and “garem staka hadtaem.” (Job 14:1) Dastawe iumi savve feel discourage samfala taem. Samfala servant blo Jehovah lo bifor olketa feel olsem tu. Samfala laek for dae nomoa. (Fas Kings 19:2-4; Job 3:1-3, 11; 7:15, 16) Bat evritaem, Jehovah, God wea olketa trustim, hem comfortim and strongim olketa. Story blo olketa hia hem stap insaed Bible for teachim and comfortim iumi.—Rome 15:4.

² Lo disfala article, bae iumi storyim samfala servant blo Jehovah, wea winim olketa hard samting wea mekem olketa discourage, olketa nao Joseph son blo Jacob, Naomi datfala widow and dota in-law blo hem Ruth, datfala Levite wea raetem Sams 73, and aposol Peter. Hao nao Jehovah strongim olketa? And wanem leson nao iumiseleva savve lanem from example blo olketa? Ansa blo olketa kwestin hia bae helpem iumi for savve “Jehovah hemi stap kolsap long olketa pipol wea i sore tumas,” and hem “gohed fo sevem olketa pipol wea tingting blong olketa hemi [wikdaon].”—Sams 34:18.

3-4. Wanem nao happen lo Joseph taem hem young?

³ Joseph hem samting olsem 17 years old taem hem kasem tufala dream wea kam from God. Tufala dream hia showimaot hao hem bae kasem wanfala position wea olketa lo famili blo hem bae respectim hem. (Jenesis 37:5-10) Bat no longtaem bihaen Joseph kasem tufala dream hia, laef blo hem barava change. Winim wei for olketa brata blo hem respectim hem, olketa salem hem for kamap slave. Gogo, hem slave lo haos blo wanfala bigman lo Egypt wea nem blo hem Potiphar.  (Jenesis 37:21-28) Insaed short taem nomoa, situation blo Joseph change. Lo firstaem, hem fevaret son blo dadi blo hem, bat then hem kamap slave blo wanfala bigman lo Egypt wea no worshipim Jehovah.—Jenesis 39:1.

⁴ Then situation blo Joseph kamap worse. Waef blo Potiphar accusim hem and sei Joseph laek for reipim hem. Potiphar no faendaot moa sapos datfala story hem tru, bat hem putim Joseph lo prison, and olketa chainim hem. (Jenesis 39:14-20; Sams 105:17, 18) Masbi Joseph barava feel nogud bikos olketa sei hem laek for reip. And tingim hao datwan maet mekem pipol tok spoelem nem blo God blo hem, Jehovah. Tru nao, hem fitim nomoa for Joseph discourage!

5. Hao nao Joseph winim wei for discourage?

⁵ Taem Joseph kamap slave and then olketa putim hem lo prison, Joseph no free for duim staka samting. Wanem nao helpem hem for garem positive tingting? Winim wei for ting abaotem olketa samting wea hem no fit for duim, hem traem best for duim waka wea olketa givim hem. Winim evri samting hia, Joseph putim Jehovah olsem barava important samting lo laef blo hem. From datwan, Jehovah blessim evri samting wea Joseph duim.—Jenesis 39:21-23.

6. Hao nao maet tufala dream blo Joseph comfortim hem?

⁶ Joseph kasem encouragement taem hem tingim tufala dream wea Jehovah givim hem bifor. Datwan remindim hem dat bae hem lukim moa famili blo hem and situation blo hem bae kamap gud. And hem nao samting wea happen. Taem Joseph samting olsem 37 years, tufala dream blo hem start for fulfill lo barava spesol wei!—Jenesis 37:7, 9, 10; 42:6, 9.

7. Olsem 1 Peter 5:10 storyim, wanem nao savve helpem iumi for winim olketa hard taem?

⁷ Olketa Leson for iumi. Story blo Joseph remindim iumi hao world hem nogud tumas, and pipol savve treatim iumi nogud. Nomata olketa brata and sista tu maet treatim iumi nogud. Bat  sapos iumi ting lo Jehovah olsem sef ples blo iumi for haed, bae iumi no discourage or stop for servem hem. (Sams 62:6, 7; readim 1 Peter 5:10.) Tingim tu, hao maet Joseph hem samting olsem 17 year nomoa taem Jehovah showim hem tufala spesol dream. Diswan showimaot Jehovah trustim olketa young servant blo hem. Distaem, staka young wan olketa olsem Joseph. Olketa garem strong faith lo Jehovah tu. Samfala olketa putim olketa lo prison bikos olketa gohed faithful lo Jehovah.—Sams 110:3.

8. Wanem nao happen lo Naomi and Ruth?

⁸ Bikos lo bigfala hangre, Naomi and famili blo hem mas lusim Judah and muv go lo Moab. Lo there, hasband blo Naomi, Elimelech, hem dae, and Naomi and tufala son blo hem nomoa stap. Gogo tufala hia maritim tufala woman lo Moab, Ruth and Orpah. Samting olsem tenfala year bihaen, tufala son hia tu dae and tufala no garem eni pikinini. (Rut 1:1-5) Tingim hao thrifala woman hia mas barava sorre tumas. Hem tru, Ruth and Orpah savve marit moa bat hu nao bae lukaftarem Naomi wea olo? Naomi sorre tumas, gogo hem sei: ‘Yufala no kolem mi moa long Naomi, Hemi moabeta fo yufala kolem mi ‘Mara’ wea hemi minim ‘Sore’. Bikos Jehovah hu hemi garem evri paoa, hemi mekem mi sore fogud.’ Naomi sorre tumas so hem disaed for go bak lo Bethlehem, and Ruth go witim hem.—Rut 1:7, 18-20.

9. Olsem Rut 1:16, 17, 22 storyim, hao nao Ruth encouragem Naomi?

⁹ Wanem nao helpem Naomi for no sorre tumas? Ruth hem showimaot love for Naomi. Olsem example, Ruth disaed strong for no lusim Naomi. (Readim Rut 1:16, 17, 22.) Lo Bethlehem, Ruth hem waka hard for kolektem kaikai for hem and Naomi. From datwan, pipol tinghae lo gudfala wei blo Ruth.—Rut 3:11; 4:15.

10. Lo olketa wanem wei nao Jehovah showimaot hem lovem olketa wea garem need olsem Naomi and Ruth?

¹⁰ Jehovah givim wanfala law wea showimaot hem kaen lo olketa wea garem need olsem Naomi and Ruth. Hem talem pipol blo hem hao taem olketa harvestim kaikai, olketa mas leavim olketa ples saed lo field for olketa wea poor for kam harvestim. (Levitikas 19:9, 10) So Naomi and Ruth no need for go askem eniwan for kaikai, tufala savve go and harvestim kaikai seleva.

11-12. Hao nao Boaz mekem Naomi and Ruth for hapi?

¹¹ Wanfala rich man wea nem blo hem Boaz nao ownim datfala field wea Ruth savve go for kolektem kaikai lo hem. Hem barava tinghae lo wei wea Ruth faithful lo Naomi and love wea hem showimaot lo mami in-law blo hem, datwan mekem Boaz for baem bak land wea hem blo famili blo Naomi, and hem tekem Ruth for kamap waef blo hem. (Rut 4:9-13) Tufala garem wanfala pikinini, nem blo hem Obed wea gogo hem kamap grandadi blo King David.—Rut 4:17.

¹² Tingim hapi blo Naomi taem hem holem baby Obed and prea lo Jehovah for talem thankiu! Bat nambawan samting stap yet lo future for Naomi and Ruth. Taem tufala resurrect, bae tufala savve hao Obed hem laen blo datfala Promis Messiah, Jesus Christ!

13. Wanem important leson nao iumi lanem from story blo Naomi and Ruth?

¹³ Olketa Leson for iumi. Taem iumi go thru lo olketa hard taem, iumi maet feel discourage or barava sorre. Iumi maet tingse iumi no fit for stretem problem wea kasem iumi. Lo olketa taem olsem, iumi shud barava trustim Dadi blo iumi lo heven and fren klos witim olketa brata and sista lo kongregeson. Hem tru, maet Jehovah no finisim olketa hard taem blo iumi. Olsem example, Jehovah no mekem hasband and tufala son blo Naomi for laef bak. Bat hem savve helpem iumi for deal witim olketa hard  taem, maet thru lo love wea olketa brata and sista blo iumi showimaot.—Provebs 17:17.

14. Why nao wanfala Levite hem barava discourage?

¹⁴ Man wea raetem Sams 73 hem wanfala Levite. So hem garem spesol privilege for waka lo haos blo Jehovah. Nomata olsem, lo wanfala taem hem feel discourage. Why nao olsem? Hem start for jealous lo laef blo olketa nogud pipol, no bikos lo nogud samting wea olketa duim, bat bikos lo gudfala laef wea olketa garem. (Sams 73:2-9, 11-14) Olketa luk olsem olketa rich, garem gud laef, and olketa no garem eni samting for wari abaotem. Olketa samting hia hem mekem man wea raetem Sams for discourage. Hem sei: “Hemi yusles nomoa fo mi kipim tingting blong mi klin, an fo no mekem sin.” Tru nao, datwan mekem hem for klosap stop for servem Jehovah.

15. Olsem Sams 73:16-19, 22-25 storyim, hao nao datfala Levite wea raetem disfala psalm hem winim wei for discourage?

¹⁵ Readim Sams 73:16-19, 22-25. Datfala Levite go lo temple blo Jehovah. Lo there, luk olsem hem stap witim olketa narawan wea worshipim Jehovah, datwan mekem hem savve garem mind wea kwaet, garem klia tingting, and hem savve prea abaotem situation blo hem. From datwan, hem start for luksavve hao tingting blo hem no stret and hem luksavve hem start for followim wanfala gogo wea bae mekem hem lusim Jehovah. And tu, hem luksavve hao laef blo olketa nogud pipol hem olsem olketa standap lo ples wea ‘slippery’ and gogo olketa bae kasem nogud samting. For hem winim feeling for jealous and discourage, datfala Levite wea raetem disfala psalm hem need for garem tingting blo Jehovah abaotem olketa samting. Taem hem duim datwan, hem garem peace moa and hem hapi. Hem sei: “An bikos yu nao God blong mi [Jehovah], mi no laekem enisamting moa long disfala wol.”

16. Olketa wanem leson nao iumi savve lanem from datfala Levite?

¹⁶ Olketa Leson for iumi. Iumi shud no jealous taem iumi lukim olketa gud pipol wea luk olsem olketa garem gudfala laef. Wei wea olketa hapi hem for lelebet taem nomoa and hem  bae no stap for olowe. (Eklesiastes 8:12, 13) For jealous lo olketa hem olsem iumi invaetem wei for discourage for spoelem wei wea iumi fren witim Jehovah. So sapos iumi luksavve iumi start for jealous lo olketa nogud pipol wea luk olsem olketa garem gud laef, iumi shud duim wanem datfala Levite hem duim. Followim olketa advaes wea kam from God, and associate witim olketa narawan wea duim wanem God laekem. Taem iumi lovem Jehovah winim eni nara samting moa, iumi bae barava hapi and iumi bae stap lo datfala road wea leadim iumi for laef wea hem barava “tru laef.”—1 Tim. 6:19.

17. Olketa wanem reason nao Peter garem for discourage?

¹⁷ Aposol Peter hem wanfala faithful man; bat samfala taem hem no tingting gud firstaem bifor hem talem or duim samting. From datwan, samfala taem hem duim samting wea mekem hem regret bihaen. Olsem example, taem Jesus talem olketa aposol blo hem hao hem bae safa and dae, Peter tok lo hem and sei: “Bae olketa samting hia no kasem iu nomoa.” (Matt. 16:21-23) Then, Jesus stretem Peter. Taem wanfala grup kam for arrestim Jesus, Peter hem kwiktaem duim samting, and hem katemaot ear blo wanfala slave blo hae priest. (John 18:10, 11) Jesus stretem datfala aposol blo hem moa. And tu, Peter hem tok praod and sei sapos olketa aposol bae lusim Christ, hem bae no duim datwan! (Matt. 26:33) Bat datfala wei wea Peter trustim hemseleva hem change and gogo hem fraetem man nomoa, thrifala taem nao Peter talem hao hem no savve lo Masta blo hem. Datwan mekem Peter for barava feel discourage, so hem “go aotsaed and hem krae fogud.” (Matt. 26:69-75) Masbi, Peter gohed ting raonem sapos Jesus bae forgivim hem.

18. Hao nao Jesus helpem Peter for winim wei for discourage?

¹⁸ Bat Peter no letem wei for discourage for  spoelem hem. Nomata hem wikdaon for lelebet taem, hem kamap strong moa, and gohed for servem Jehovah and waka tugeta witim olketa nara aposol. (John 21:1-3; Acts 1:15, 16) Wanem nao helpem hem? Wanfala samting nao, Peter hem tingim hao Jesus hem bin prea for hem no wikdaon, and Jesus encouragem Peter for go bak and strongim olketa brata blo hem. Jehovah ansarem prea blo hem. Bihaen, Jesus showaot moa lo Peter seleva, masbi hem encouragem hem. (Luke 22:32; 24:33, 34; 1 Cor. 15:5) Bihaen datfala naet wea olketa aposol fishing and olketa no kasem eni fish, Jesus hem kam lo olketa. Lo datfala taem, Jesus givim chance lo Peter for talem moa love blo hem. Hem forgivim fren blo hem Peter, and givim hem staka waka.—John 21:15-17.

19. Hao nao Sams 103:13, 14 helpem iumi for savve lo tingting blo Jehovah abaotem iumi taem iumi sin?

¹⁹ Olketa leson for iumi. Wei wea Jesus hem treatim Peter hem showimaot mercy blo Jesus, and Jesus barava showimaot wei blo Dadi blo hem. So taem iumi mekem mistek, iumi shud no judgem iumiseleva and tingse iumi no fit nao. Tingim, Satan nao laekem iumi for garem datkaen tingting. Bat iumi shud garem sem tingting olsem Jehovah abaotem iumiseleva and olketa narawan. Dadi blo iumi lo heven hem kaen and lovem iumi.—Readim Sams 103:13, 14.

20. Wanem nao bae iumi storyim lo next article?

²⁰ Example blo Joseph, Naomi and Ruth, datfala Levite, and Peter hem encouragem iumi hao “Jehovah hemi stap kolsap long olketa pipol wea i sore tumas.” (Sams 34:18) Hem letem iumi for safa lo olketa hard taem and for feel discourage samfala taem. Nomata olsem, taem Jehovah helpem iumi for winim olketa hard taem, faith blo iumi hem kamap strong. (1 Pet. 1:6, 7) Lo next article, iumi bae lukim moa hao Jehovah sapotim olketa faithful wan blo hem wea discourage, maet bikos lo wei wea olketa no perfect or bikos lo olketa hard samting wea olketa feisim.