1, 2. Cunanga ¿imatata yachajupashun?

HUAQUIMBICA tucuicunallatami ‘asha punllacunatalla causana cashpapash, llaquicunahuan’ causajuni yashpa llaquilla o desanimarishca sintirishcanchi (Job 14:1). Jehovata punda sirvijcunapashmi shina sintirishca. Huaquingunaca huañungapapashmi munashca (1 Rey. 19:2-4; Job 3:1-3, 11; 7:15, 16). Shinapash Jehová Diosmi paicunataca animashpa shinllichishca. Paicunata imashina ayudashcataca Bibliapimi yachachin. Caicunata yachajushpaca ñucanchicunapashmi animarishun (Rom. 15:4).

² Cunanga José jarigu, Noemí y Rut huarmigucuna, Salmo 73​ta escribij levita jarigu, apóstol Pedropash imamanda desanimarishcatami yachajupashun. Jehová Diosca ¿imashinata paicunataca ayudarca? Paicunamandaca ¿imatata yachajui ushapanchi? Bibliapica “Mandaj Diosca, shungupi ninanda llaquirishpa causajcunapa ladopimi. Shungupi ninanda llaquirishpa causajcunatami” ayudajun nin (Sal. 34:18).

3, 4. Josetaca ¿imata pasarca?

³ Jehová Diosca José 17 huatacunata charijpimi shuj muscuipi shuj punlla ashtaca autoridadta charijpi paipa familia paita respetana cashcata ricuchirca (Gén. 37:5-10). Chai muscuita charishca jipallami paipa huauquicunaca paita respetanapa randica Josetaca esclavotashna jatushpa cacharca. Chaimi Joseca Egipto llactapi Potifar jaripa huasipi esclavo tucurca (Gén. 37:21-28). Joseca Jacobpa juyashca churimi carca. Shinapash paipa causai cambiajpimi Jehová Diosta na sirvij jaripa esclavo tucurca (Gén. 39:1).

 ⁴ Chai jipapashmi Potifarpa huarmica Joseca violangapami munahuarca nishpa yangamanda juchachirca. Chaimi Potifar jarica Josetaca prezo churachun cacharca (Gén. 39:14-20; Sal. 105:17, 18). Yangamanda juchachijpica Joseca ¿imashinashi sintirishcanga? José yangamanda juchachi tucushpaca Jehovapa shutitami nalipi quidachishcani yashpami llaquilla, desanimado sintirishcanga.

5. Ama yapata llaquiyangapaca Joseca ¿imatata rurarca?

⁵ Joseca esclavo cashpa, carcelpi cashpaca paipa causaita cambiangapaca imatapash na rurai usharcachu. Shinapash ama llaquilla sintirichunga Josetaca ¿imata ayudarca? Paica paipa punda causaita yariashpa llaquiyajunapa randica esclavo cajpi o carcelpi cajpi paiman mingashca trabajocunata ali pactachingapami esforzarirca. Shinallata Jehovata sirvinataca nunca na saquircachu. Chaimi Jehová Diosca Josetaca bendiciarca (Gén. 39:21-23).

6. Josetaca pai charishca muscuicunapi pensarinaca ¿imashinata ayudashcanga?

⁶ Jehová Dios muscuipi ricuchishca profeciacunapi pensarinami Josetaca ama desanimarichun ayudashcanga. Chai muscuicunaca José paipa familiata cutin ricunata, paipa causai cambianatami ricuchijurca. José 37 huatacunata charijpimi pai charishca muscuicunaca pactari callarirca (Gén. 37:7, 9, 10; 42:6, 9).

7. Llaquicunata aguantachunga ¿imashinata 1 Pedro 5: 10​pi nishca shimicunaca ayudai ushan?

⁷ ¿Imatata yachajupanchi? Cai mundopi nali gentecunaca ñucanchicunataca Josetashnallatami yangamanda llaquichita ushan. Huaquinbicarin ñucanchi huauquipanicunallatami llaquichita ushan. Shinapash Jehová Dios ñucanchipa shuj jatun pacajuna rumishna cashcata ricushpaca na desanimarishpami paita sirvishpa catishun (Sal. 62:6, 7; 1 Pedro 5:10, liingui). José joven cajpillatami Jehová Diosca chai muscuicunata paimanga ricuchirca. Joven cajpillata chai muscuita  ricuchishpaca Jehová Dios jovengunapi confiashcatami ricuchin. Cunanbica ashtaca jovengunami Joseshnallata Jehová Diospica tucui shungu confian. Huaquingunaca paicunapa crishcacunamandami carcelpipash churai tucushca (Sal. 110:3).

8. Noemitapash, Ruttapash ¿imata pasarca?

⁸ Noemica paipa cusa Elimélec jarihuanga ishcai churicunatami charirca. Paicunaca Judapimi causanajurca. Shinapash chai llactapi ninan yarjai tiai callarijpimi Moabman causangapaj rirca. Shinapash paipa cusagu huañujpimi Noemica paipa ishcai churicunahuanlla quidarca. Tiempohuanga paipa ishcai churigucunaca chai llactamanda Rut y Orpá huarmigucunahuanmi cazararca. Chunga huatacuna jipaca Rut y Orpá huarmigucunapa cusacunapashmi huañurca (Rut 1:1-5). Chaimandami Noemipash, Rutpash, Orpá huarmigupash llaqui llaqui sintirinajurianga. Paicunaca ¿imatata ruragrinajurca? Rutpash, Orpá huarmigupash cutin cazaraita ushanallami carca. Shinapash Noemica ña payallagu cashcamandami paitaca pipash cuidana minishtirijurca. Shuj punllaca llaqui llaqui sintirijushcamandami: “Noemí nishpaca, na rimanachu cahuanguichi, Mara nishpa rimahuaichi. Tucui Ushaita Charij Diosca, jatun llaquitami ñucaman cuhuashca” nirca. Shina llaqui llaqui caimandami Noemica Belén llactaman tigranata dicidirca. Rut huarmigupashmi paita cumbashpa rirca (Rut 1:7, 18-20).

9. Rut 1: 16, 17, 22​pi nishcashnaca Noemita llaquishpa juyashcata Rutca ¿imashinata ricuchirca?

⁹ Noemitaca ¿imata ayudarca? Shina llaqui llaqui cajpipachami Rut huarmiguca paihuan quidashpa paita llaquishpa juyashcata ricuchirca. Chaimi paitaca ninanda ayudarca (Rut 1:16, 17, 22, liingui). Belén llactapica cebadata pallajushpa trabajangapami Rutca rirca. Shinami Noemipa, paipapash micunaguta charirca. Shina shinllita trabajashpa paipa suegrata cuidashcamandami gentecunaca paimandaca ali parlai callarirca (Rut 3:11; 4:15).

10. Jehová Diosca pobre gentegucunata llaquishpa juyashcataca ¿imashinata ricuchirca?

¹⁰ Jehová Diosca Noemí, Rutshna pobre gentegucunata llaquishpa juyashcata ricuchingapami israelitacunamanga shuj leyta curca. Chai leypica imaguta tarpushpa cosechanajushpapash pobrella gentegucuna pallajuchunmi na tucuita pallana canguichi nijurcami (Lev. 19:9, 10). Cashna ley tiashcamandami Noemipash, Rutpash pitapash limosnata na mañashpallata micunaguta chari usharca.

11, 12. Boazca Rutta, Noemita ayudangapaca¿imatata rurarca?

¹¹ Rut huarmigu trabajashca pambapa dueñoca Boazmi carca. Paica charij runami carca. Rut huarmigu paipa suegrata juyaimandami paita cuidangapaca shinllita trabajarca. Chaimi Rutca Boazpa ñaupapica ali ricurirca. Chaimandami Ruthuan cazarashpaca Noemipa cusa nara huañushpa charishca alpacunatapash cutin paicunapa cachun randirca (Rut 4:9-13). Tiempohuanga Rutca Boazhuanga shuj jari huahuagutami charirca. Chai huahuagutaca Obed nishpami shutichirca, paica rey Davidpa abuelomi tucurca (Rut 4:17).

¹² Noemica paipa nieto Obedta marcariajushpaca Jehová Diostaca tucui shungumi cushijushpa agradicijushcanga. Shinapash Jehová Diosca Noemita, Ruttapash ashtahuanmi bendiciagrijun. Paicuna causarishpaca Obedpa miraimanda Mesías shamushcatami yachaj chayanga.

13. Noemimanda, Rutmandapash ¿imatata yachajupanchi?

¹³ ¿Imatata yachajupanchi? Ñucanchi causaipi imapash llaquicuna o problemacuna japijpica desanimarishca, shungu faquirishcashnami  sintirita ushapanchi. Shinapash chaipimi Jehová Diospi tucui shunguhuan confiana capanchi. Shinallata ñucanchi huauquipanicunamandapash na caruyanachu capanchi. Ñucanchicunapa llaquicunatapash Noemipa llaquicunatashna Jehová Diosca na anchuchingachu. Noemipa cusagu, paipa churicunapash huañujpica na causachircachu. Shinapash chai llaquicunata aguantashpa catichunmi Jehová Diosca ayudanga. Huauquipanicunata utilizashpami ñucanchita llaquishpa juyashcata Jehová Diosca ricuchinga (Prov. 17:17).

14. Levita jariguca ¿imamandata desanimarirca?

¹⁴ Salmo 73​ta escribijca shuj levitami carca. Paica Jehová Diosta adorana templo huasipi sirvina bendiciondami charirca. Shinapash nali gentecunapa causaitara envidiai callarishpami desanimarirca. Paicunashna nali cosascunata rurangapaj na munashpapash paicuna alishnalla causanajujta ricushpami cai levitaca envidiai callarirca (Sal. 73:2-9, 11-14). Paicuna tucuita charinshna cushi cushi causanajunshnami ricurca. Chaita ricushpa desanimarimandami salmista jarica: “Ñucaca yangapachami mapa illaj shungu tucujushcani. Ñuca ali cashpa, maquita na mapayachishcapash yangallatami” can nircami. Shina yuyanaca Jehová Diosmandami caruyachigrijurca.

15. Salmo 73:16-19, 22-25​pi nishcashnaca levita jarigu ama desanimarichunga ¿imata ayudarca?

¹⁵ (Salmo 73:16-19, 22-25, liingui). Levita jariguca “Taita Diospa huasiman yaicushpami” shuj israelitacunapash Jehovata adoranajujta ricushcanga. Chaipimi Jehovata mañashpa aliguta pensari callarirca. Shina rurashpami pandata yuyashpa, nalicunata pensashpa catishpaca Jehová Diosmanda caruyai ushashcata cuenta japirca. Shinallata nalita ruraj gentecuna na unaicaman causashpa catina cashcata, paicuna llaquinaita tucuchi tucuna cashcatapashmi cuenta japirca. Ama desanimarichun, shujcunata ama envidiachunga nali gentecunata Jehová Dioshna ricuna cashcatami intindirca. Shinami levita jariguca tranquilo, cushilla sintirirca. Chaimi Jehovamanga cashna nirca:  “Cai pachapi, canhuan cashcamandaca imatapash na charingapaj munanichu”.

16. Salmo 73​ta escribij levita jarigumandaca ¿imatata yachajupanchi?

¹⁶ ¿Imatata yachajupanchi? Nali gentecuna cushilla causanajujta ricushpaca na envidianachu capanchi. Nali gentecunaca para siempre cushilla causaitaca na ushangachu (Ecl. 8:12, 13). Paicunapa causaita envidiashpa desanimarimandami Jehovata sirvinatapash saquita ushanchiman. Levita jarigushna llaquilla o desanimado sintirishpaca Jehová Diospa consejocunatami cazuna capanchi. Shinallata huauquipanicunahuanbashmi tiempota yalina capanchi. Jehová Diosta tucui shunguhuan sirvishpallami ciertopacha cushilla causashun. Ashtahuambash “causaita causanatami” japita ushashun (1 Tim. 6:19).

17. Pedroca ¿imacunamandallata desanimarirca?

¹⁷ Apóstol Pedroca na manllashpami ima yuyashcataca ninlla carca. Huaquinbica imatapash nishca o rurashca jiparami nali sintirin carca. Shuj punllaca Jesusca paipa apostolcunamanga ninanda llaquichi tucushpa huañuna cashcatami villajurca. Shinapimi Jesusta tacurishpa Pedroca: “Chai llaquica amapacha japichun ninimi” nirca (Mat. 16:21-23). Pedro pandata nijpimi Jesusca shinllita tacurirca. Jipaman contracuna Jesusta prezo japingapaj shamujpica Pedroca imatapash na pensashpami jaicata shuj esclavopa rinrita espadahuan muchurca (Juan 18:10, 11). Chaita rurashcamandaca Jesusca cutinmi shinllita tacurirca. Shinallata Pedroca jariyashpami, tucuicuna canda saquijpipash ñucaca nimamanda na saquishachu nijurca (Mat. 26:33). Paipillata confiarimandami Pedroca gentecunata manllai callarirca. Chaimi quimsa viajecaman Jesustaca na rijsinichu nishpa negarca. Jesusta negashca jipaca ‘canllaman llujshishpami ninandapacha llaquirishpa huacarca’ (Mat. 26:69-75). Jesusca perdonahuangacha nishpami Pedroca pensarijurianga.

18. Pedro ama llaquilla, desanimarishca sintirichunga Jesusca ¿imashinata ayudarca?

 ¹⁸ Pedro pandarishpapash na desanimarishpa quidarcachu. Ashtahuangarin chaishuj apostolcunandimi Jehovata sirvishpa catirca (Juan 21:1-3; Hech. 1:15, 16). Pedrotaca ¿imata ayudarca? Pedro ashtahuan crispa catichun Jehová Diosta Jesús mañajushcatami yarirca. Shinallata huauquicunata ayudachun Jesús mingashcatapashmi yarirca. Jesús mañashcataca Jehová Diosca uyarcami. Jesusca causarishca jipaca Pedrota animangapami paiman ricurirca (Luc. 22:32; 24:33, 34; 1 Cor. 15:5). Shuj viajeca Jesusca paipa apostolcuna tucui tuta pescadota japingapaj rishpa nimata na japi ushashcapimi paicunamanga ricurirca. Chaipimi Pedroca Jesusta tucui shunguhuan juyashcata ricuchi usharca. Jesús Pedroman ricurishpaca huauquipanicunata ayudana oportunidadta cushpami paita perdonashcata ricuchirca (Juan 21:15-17).

19. Salmo 103:13, 14​pica ¿imatata yachajupanchi?

¹⁹ ¿Imatata yachajupanchi? Jesusca Pedrota aliguman tratashpami paipash Jehovashnallata llaquishpa juyaj cashcata ricuchirca. Shinaca imapipash pandarishpaca Jehová Diosca ñucataca nunca na perdonahuangachu nishpaca na pensanachu capanchi. Satanasmi shina pensarichun munan. Jehová Dios ñucanchita llaquishpa juyajta, ali intindijta, perdonajtapash na cunganachu capanchi. Ñucanchicunata pipash llaquichijpica Jehová Dioshnami perdonana capanchi (Salmo 103:13, 14, liingui).

20. Cati yachajuipica ¿imatata yachajupashun?

²⁰ José, Noemí, Rut, levita jarimanda, Pedropa causaimandapash yachajunami Jehová Dios ‘shungupi ninanda llaquirishpa causajcunata’ ayudajujta ricuchin (Sal. 34:18). Jehová Diosca llaquicunata na anchuchishpapash llaquicunahuan cajpi o desanimado sintirijpica aguantashpa catichunmi ayudan. Jehová Dios ayudajpimi tucui shunguhuan crishpa shinlli tucushpa ñaupaman catinchi (1 Ped. 1:6, 7). Jehovata sirvijcunaca juchayucuna caimandami pandarishpa o imapash llaquicunahuan cashpaca llaquiyanchi o desanimarinchi. Cati yachajuipica Jehovata sirvijcuna desanimarishca cajpi imashina Jehová Dios ayudajtami ashtahuan yachajupashun.