1-2. So ka dikha ko akava članko?

DISAVO puti, šaj razmislinaja ando odova kobor tano kratko o đivdipe hem kobor tano „pherdo pharipa“ (Jov 14:1). Odolese tano normalno disavo puti te ova obeshrabrime. Ko purano vreme, but e Jehovase sluge hine obeshrabrime, a disave čak manglje hem te meren (1. Kralj. 19:2-4; Jov 3:1-3, 11; 7:15, 16). Ama, o Jehova – o Devel upro kova uzdajinđe pe –  uvek utešinđa len hem zorjaćerđa len. Olenge primerija tane pisime te šaj te utešinen amen hem te sikljova diso olendar (Rimlj. 15:4).

² Ko akava članko, ka vaćera ando disave e Jehovase sluge kola istrajinđe ko bare pharipa sebepi kola hine obeshrabrime. Odola tane e Jakoveso ćhavo o Josif, i udovica i Nojemina hem olaki bori i Ruta, o Leviti kova pisinđa o 73. psalam hem o apostol Petar. Sar o Jehova zorjaćerđa len hem so šaj amen te sikljova ando olenge primerija? O odgovor ko akala pućiba ka uverini amen so „o Jehova tano paše okolencar kola tane phage vileja hem spasini okolen kola tane obeshrabrime“ (Ps. 34:18).

3-4. So desinđa pe e Josifese ked hine terno?

³ O Josif hine le oko 17 berš ked dikhlja duj sune. Solduj sune hine ando Devel. On mothovđe so o Josif jekh dive ka ovel važno manuš kas olesi porodica ka poštujini (Post. 37:5-10). Ama, sigate palo odola sune, oleso đivdipe skroz menjinđa pe. Ko odova vreme, olese phralja hić na poštujinđe le hem bikinđe le te ovel robo. Ov alo ko ćher ando e faraoneso dvoranin, kova vićinđa pe Petefrije (Post. 37:21-28).  Aso kratko vreme, o Josif kova hine pe dadeso mezimco, ulo robo ando manuš kova na đanđa koj tano o Jehova (Post. 39:1).

⁴ Ama, ko e Josifeso đivdipe desinđe pe pana pološna buća. E Petefrijesi romni optužinđa e Josife so pokušinđa te silujini la. Bizo te pućel da li odova ćaće ulo, o Petefrije fordinđa e Josife ko phanlipe, kuri hine phanlo ko lancija (Post. 39:14-20; Ps. 105:17, 18). Zamislin samo sar osetinđa pe o terno Josif ked hine nepravedno optužimo aso silovanje. Isto ađahar, ked o manuša šunđe aso odova, šajinđe te mislinen lošno ando e Josifeso Devel, o Jehova. O Josif ćaće hine le razlog te obeshrabrini pe!

5. So ćerđa o Josif te na ovel but obeshrabrimo?

⁵ Ði hine robo hem palo odova đi hine phanlo, o Josif naštinđa nisar te menjini pi situacija. So pomožinđa lese te aćhol pozitivno? Umesto te razmislini ando odova so više naštinđa te ćerel, ov trudinđa pe o zadatkija kola dobinđa, te ćerel najšukar so šaj. Ama, soj tano najvažno, o Josif uvek dinđa sa pestar te ugodini e Jehovase. Sebepi odova, o Jehova blagoslovinđa sa so o Josif ćerđa (Post. 39:21-23).

6. Sar e Josife ohrabrinđe olese sune?

⁶ Isto ađahar, e Josife ohrabrinđa odova so razmislinđa ando sune kola o Jehova dinđa le beršencar angleder. Odola sune mothovđe so ov palem ka dikhel pe porodica hem so olesi situacija ka menjini pe ko pošukar. Hem ćaće ulo odova. Ked o Josif hine le oko 37 berš, olese sune počminđe te ispuninen pe ko jekh neverovatno način (Post. 37:7, 9, 10; 42:6, 9).

7. Premali 1. Petrova 5:10, so ka pomožini amen te istrajina ko phare situacije?

⁷ So sikljovaja? E Josifesi priča setinćeri amen so akava sveto tano okrutno hem so o manuša ka oven nepravedna premalo amende. Čak hem o phralja hem o phenja šaj te  povredinen amen. Ama, ako tano o Jehova amari stena ja amaro utočište, amen na ka obeshrabrina amen hem na ka ćhinava te služina lese. (Ps. 62:6, 7; čitin 1. Petrova 5:10.) Isto ađahar, setin tut so o Josif hine le oko 17 berš ked o Jehova dinđa le odola sune. Šaj te phena so o Jehova isi le poverenje upro pe sluge, čak iako tane on but terne. Avdije, but terne tane sar o Josif. Hem on isi len vera ko Jehova. Sebepi soj tane poslušna e Jehovase, disave olendar hine nepravedno osudime hem ćhivde ko phanlipe (Ps. 110:3).

8. So desinđa pe e Nojeminaće hem e Rutaće?

⁸ Sebepi so hine bari bokh, i Nojemina hem olaki porodica iklilje andi Juda hem preselinđe pe ko Moav. Odothe, e Nojeminako rom, o Elimeleh mulo hem mukhlja la kokri duje ćhavencar. Palo odova, olake ćhave ženinđe pe e ćhajencar ando Moav, e Rutaja hem e Orfaja. Oko deš berš palo odova, e Nojeminake ćhave mulje, a na hine len ćhave (Ruta 1:1-5). Šaj samo te zamislina kobor bari dukh hine len akala trin romnja! Naravno, i Ruta hem i Orfa šajinđe palem te len pese rome. Ama, ko bi tegani brinini pe andi Nojemina koja hine phuri? I Nojemina hine odobor tužno so jekh puti phenđa: „Ma vićinen man Nojemina! Vićinen man Mara, sose o Svemoćno mukhlja moklo đivdipe te ovel but ćerko.“ Palo sa akava so desinđa pe laće, ađahar dukhavdi, i Nojemina odlućinđa te irini pe ko Vitlejem, a i Ruta pođinđa olaja (Ruta 1:7, 18-20).

9. Premali Ruta 1:16, 17, 22, sar i Ruta ohrabrinđa e Nojemina?

⁹ Odova so pomožinđa e Nojeminaće hine o verno mangipe. I Ruta mothovđa laće odova mangipe ađahar so aćhilji olaja. (Čitin Ruta 1:16, 17, 22.) Ko Vitlejem, i Ruta hine but bućarni. Oj ćedinđa ječam pese hem e Nojeminaće. Sebepi odova, sarine šajinđe te dikhen so i Ruta hine šukar hem bućarni romni (Ruta 3:11; 4:15).

10. Ko kola načinija o Jehova mothovđa mangipe premalo ćorore sar so hine i Nojemina hem i Ruta?

¹⁰ O Jehova dinđa e Izraelcenđe zakon kova mothovđa oleso saosećanje premalo ćorore, sar so hine i Nojemina hem i Ruta. Ov phenđa pe narodose te na ćeden o plodija ko krajo andi njiva ked ka ovel i žetva, te šaj o ćorore te ćeden pese diso (Lev. 19:9, 10). Odolese, i Nojemina hem i Ruta šajinđe te ovel len so te han, bizo te đan te mangen maro averendar.

11-12. So ćerđa o Voz te šaj i Nojemina hem i Ruta te oven bahtale?

¹¹ I Ruta ćedinđa ječam ki njiva ando jekh barvalo manuš. Oleso anav hine Voz. Ov hine but oduševimo ked dikhlja kobor i Ruta hine verno e Nojeminaće hem kobor manglja la. Odolese, o Voz hari palo odova ženinđa pe e Rutaja hem otkupinđa i phuv koja pripadinđa e Nojeminake porodicaće, te šaj e Rutake ćhave te nasledinen la (Ruta 4:9-13). Olenđe bijandilo jekh ćhavo kova vićinđa pe Ovid, kova kasnije ulo o papo ando kralj David (Ruta 4:17).

¹² Zamislin kobor i Nojemina hine bahtali đi ićerđa e tikne Ovide ki pi angalja hem ki molitva zahvalinđa pe e Jehovase! Ama, i Nojemina hem i Ruta ka oven pana pobahtale ked ka uskrsninen hem ked ka šunen so prekalo Ovid alo o obećimo Mesija, o Isus Hrist.

13. Kola važna buća sikljovaja ando izveštaj kotar i Nojemina hem i Ruta?

¹³ So sikljovaja? Amare problemija šaj te obeshrabrinen amen ja čak šaj te peraven amen. Šaj te mislina so amare problemija  našti nisar te rešinen pe. Ked ađahar osetinaja amen, valjani potpuno te verujina amare nebesko Dadese hem te aćhova paše amare phralencar hem e phenjencar andi skupština. Naravno, o Jehova na ka rešini uvek svako amaro problemi. Na primer, ov na uskrsninđa e Nojeminake rome hem olake ćhaven. Ama, ov ka pomožini amen, disavo puti prekalo phralja hem phenja kola ka ćeren amenđe diso šukar (Posl. 17:17).

14. Sose jekh Leviti but obeshrabrinđa pe?

¹⁴ O pisco kotar 73. psalam hine Leviti. Sebepi odova, ov hine le čast te služini ano e Jehovaso svetilište. Ama, ko jekh trenutko ko po đivdipe, čak hem ov obeshrabrinđa pe. Sose? Ov počminđa te ovel zavidno e lošno hem e ponosno manušenđe, na sebepi so ov manglja te ćerel lošna buća, nego sebepi so on hine len pošukar đivdipe olestar (Ps. 73:2-9, 11-14). Dićhilo samći so on hine len sa – barvalipe, šukar đivdipe hem so nisose na brininena pe. Ked o Leviti dikhlja akava, ov but obeshrabrinđa pe hem phenđa: „Uzaludno trudinđum man mo vilo te aćhol čisto hem thovđum me vasta te mothovav so hijum nedužno.“ Ćaće akava šajinđa te ćhivel le te na služini više e Jehovase.

15. Premalo Psalam 73:16-19, 22-25, sar o Leviti kova pisinđa akava psalam pobedinđa o obeshrabrenje?

¹⁵ Čitin Psalam 73:16-19, 22-25. O Leviti đelo „ko e Devleso veličanstveno svetilište.“ Ði hine uduri, maškaro manuša kola služinena e Jehovase, ov šajinđa ki mira te razmislini hem te molini pe e Jehovase andi pi situacija. Sebepi odova, ov počminđa te haljol so oleso razmišljanje hine pogrešno hem so odova počminđa te legari le ko opasno drumo kova šajinđa te cidel le kotar o Jehova. Isto ađahar, ov haljilo so o lošna manuša tane ko „klizavo than“ hem so „ka meren.“ Te šaj te ikali i zavist kotar po vilo hem te pobedini o obeshrabrenje, o Leviti morandilo te dikhel ko buća ađahar sar so o Jehova dikhela. Ked odova ćerđa, ov na hine više uznemirimo, već hine bahtalo. Ov phenđa: „Ked tut isi man, ništa aver na valjani maje ki phuv.“

16. So šaj te sikljova ando jekh Leviti?

 ¹⁶ So sikljovaja? Amen niked na valjani te ova zavidna e lošno manušenđe kola šaj samo dićhona so isi len pošukar đivdipe. Olengo bahtalipe ka našalđol hem on na ka živinen večno (Prop. 8:12, 13). Ako hijam zavidna, amen ka obeshrabrina amen hem čak šaj te našala amaro amalipe e Jehovaja. Odolese ako iked ka osetine tut sar o Leviti, ćer odova so ov ćerđa. Šun e Devleso savet hem ov okolencar kola ćerena e Jehovasi volja. Ked mangeja e Jehova pobuter ando bilo so aver, tu ka ove bahtalo. Hem ka aćhove ko drumo kova legari ko „ćaćutno đivdipe“ (1. Tim. 6:19).

17. Kola razlogija o Petar hine le te ovel obeshrabrimo?

¹⁷ O apostol Petar hine but revno manuš. Ama, disavo puti, ov phenđa ja ćerđa disave buća bizo te razmislini hem palo odova pokajinđa pe sebepi odova. Na primer, ked o Isus phenđa pe učenikonenđe so ka patini hem so ka merel, o Petar ukorinđa le ađahar so phenđa lese: „Tuće odova na ka desini pe“ (Mat. 16:21-23). O Isus ispravinđa e Petare. Ked alji i rulja te phanel e Isuse, o Petar reagujinđa bizo te razmislini hem ćhinđa o kan ando e prvosveštenikoso robo (Jov. 18:10, 11). O Isus hem tegani ispravinđa le. Isto ađahar, o Petar hvalinđa pe odoleja so niked na ka aćhavi e Isuse, čak hem ako sa avera apostolija ka ćeren odova! (Mat. 26:33). Ama, o Petar na hine odobor zoralo kobor mislinđa. Hari palo odova, odija isto rat, ov but darandilo hem trin putija phenđa so na penđari e Isuse. O Petar but obeshrabrimo „ikljilo avrijal hem runđa sose hine but tužno“ (Mat. 26:69-75). Sigurno pućlja pe da li o Isus iked ka oprostini lese.

18. Sar o Isus pomožinđa e Petarese te na ovel više obeshrabrimo?

¹⁸ Ama, o Petar na ulo odobor obeshrabrimo so ćhinavđa te služini e Jehovase. Palo odova so ćerđa odija greška, ov hem ponodri  služinđa e Jehovase avere apostolencar (Jov. 21:1-3; Dela 1:15, 16). So pomožinđa lese palem te osetini pe pošukar? Jekh andi buti hine so o Isus angleder molinđa pe e Petaresi vera te na slaboni hem podstakninđa e Petare te irini pe hem te zorjaćeri pe phralen. O Jehova odgovorinđa ki odija usrdno molitva. Palo odova, o Isus lično pojavinđa pe e Petarese, verovatno te ohrabrini le (Luka 22:32; 24:33, 34; 1. Kor. 15:5). Isto ađahar, o Isus pojavinđa pe sa e apostolenđe ked on hine celo rat ko more, ama na astarđe nijekh maćho. Tegani o Isus dinđa šansa e Petarese te phenel lese kobor but mangela le. O Isus oprostinđa pe mangle amalese hem dinđa le pana odgovornostija (Jov. 21:15-17).

19. Sar o Psalam 103:13, 14, pomožini amen te haljova sar o Jehova dikhela upro amende ked grešinaja?

¹⁹ So sikljovaja? O način sar o Isus ponašinđa pe premalo Petar, mothovi amenđe kobor o Isus hine milosrdno, a o Isus, savršeno oponašinđa pe Dade. Odolese ked amen grešinaja, na valjani te mislina so o Jehova niked na ka oprostini amenđe. Ma bistri so o Beng tano okova kova mangela te mislina ađahar. Umesto odova, amen valjani hor te razmislina odolestar kobor o Jehova mangela amen, kobor haljola odova so amen šaj, a so našti te ćera hem soj tano spremno te oprostini amenđe. Isto ađahar, hem amen valjani te oponašina le ked avera povredinena amen. (Čitin Psalam 103:13, 14.)

20. So ka dikha ko aver članko?

²⁰ E Josifeso, e Nojeminako, e Rutako, e Leviteso hem e Petareso primer uverini amen so „o Jehova tano paše okolencar kola tane phage vileja“ (Ps. 34:18). Disavo puti, ov dozvolini te ovel amen pharipa hem te ova obeshrabrime. Ama, ked amen uzi e Jehovasi pomoć, istrajinaja ko kušnje, amari vera tani pozorali (1. Petr. 1:6, 7). Ko aver članko, ka dikha sar o Jehova podržini pe verno slugen kola tane obeshrabrime sebepi so isi len mane ja sebepi soj tane ko phare okolnostija.