1, 2. Ndiéjunʼ guʼyáá náa artículo rígi̱ rá.

NGUÁNÁ marigá má mbiʼi rí makáguabáanʼ ga̱jma̱a̱ numuu rí nundxa̱ʼwa̱míjna̱ rí ‹na̱nguá kuwáánʼ mbayuuʼ ga̱jma̱a̱ rí naguáʼdáá wéñuʼ xkujndu› (Job 14:1). Mbaʼin xa̱bi̱i̱ Jeobá bi̱ nikúwá nákha wájyúuʼ mangiin nikumu̱ún xúʼko̱. Tikhun asndu nindúún makhañún (1 Rey. 19:2-4; Job 3:1-3, 11; 7:15, 16). Mú Jeobá, nixnúún tsiakii ga̱jma̱a̱ niʼni̱i̱ a̱jkiu̱ún. Ma̱ngaa niʼni rí magumaraʼmáʼ náa Biblia dí ikhiin niguaʼníí, mu xúʼko̱ ma̱ndoo maʼsngulúʼ ga̱jma̱a̱ rí maʼni̱i̱ a̱jkiu̱lú (Rom. 15:4).

² Náa artículo rígi̱, muʼthá ga̱jma̱a̱ numún tikhun xa̱bi̱i̱ Jeobá bi̱ niraʼníí gaʼkhu rí niʼni makaguabiinʼ: José a̱ʼdióo Jacob, a̱ʼgú xuáʼa̱ Noemí ga̱jma̱a̱ guʼgiúunʼ Rut, Levita bi̱ niʼnirámáʼ Salmo 73 ga̱jma̱a̱ apóstol Pedro. Xú káʼnii niʼni Jeobá mu maʼni̱i̱ a̱jkiu̱ún xá. Ndiéjunʼ gándoo gajmañulú ga̱jma̱a̱ numún ikhiin xá. Rí xóo naxtiʼña̱a̱ graxe̱ rígi̱ nasngájmulú dí “Jeobá xtáa mijngii náa xa̱bu̱ bi̱ nagawúunʼ a̱jkiu̱ún” ga̱jma̱a̱ “naʼni káwíin bi̱ nikáguabiinʼ” (Sal. 34:18).

3, 4. Ndiéjunʼ nigíʼnuu José nákha ninindxu̱u̱ dxámá rá.

³ Índo̱ José nigiʼdoo 17 tsiguuʼ, Dios niʼni rí magiʼdoo a̱jma̱ xnuʼndaa náa nisngájmuu mbaʼyoo rí ikhaa mbuyamajkuíí bi̱ kúwá náa goʼwóo (Gén. 37:5-10). Mú, na̱nguá nguáthá mbiʼi nda̱wa̱á dí nigiʼdoo xnuʼndaa rúʼko̱, ni̱jkha̱nú nixtiʼkhuu mbá kayuuʼ xóo nixtáa. A̱ngui̱i̱n na̱nguá nindúún kuyáá, rí phú nini nigujua̱a̱ xóo mbáa yumbáá ga̱jma̱a̱ ni̱jkha̱nú ninindxu̱u̱ bi̱ niʼni mbaʼwi̱i̱ bi̱ nambáyúu Xa̱bu̱ Ñajunʼ bi̱ xtáa náa Egipto bi̱ mbiʼyuu Potifar (Gén. 37:21-28). Na̱nguá má nijngoo mbayuuʼ mbiʼi dí José, ni̱jkha̱nú ninindxu̱u̱ yumbáá ndrígóo mbáa xa̱bu̱ bi̱ na̱nguá eʼni ñajuunʼ Jeobá ga̱jma̱a̱ xúʼko̱ nánguá ninindxu̱u̱ mbáa ada̱ bi̱ nandoo kaʼyoo anu̱u̱ (Gén. 39:1).

 ⁴ Mú raʼkháa i̱ndó rúʼko̱ nigíʼnuu, a̱ʼgiu̱u̱ Potifar niʼninduwaʼ dí José niguguaa ga̱jma̱a̱ tsiakii mu mabóoʼ ga̱jma̱a̱. Maski ajndu nda̱a̱ rí nisngajma á mu gajkhun o na̱nguá, mú Potifar nikudaaʼ guʼwá ejua̱a̱nʼ José náa niruʼwa̱a̱ ga̱jma̱a̱ cadena (Gén. 39:14-20; Sal. 105:17, 18). Lá nandoo nundxa̱ʼwa̱míjna̱ xú káʼnii nikumu̱u̱ José índo̱ nini tsu̱di̱i̱ xáʼ. Ga̱jma̱a̱ xú káʼnii nithi xa̱bu̱ bi̱ kúwá ikhí numuu mbiʼyuu Jeobá rá. Ga̱jma̱a̱ numuu rígi̱, José niʼni rí majmúu.

5. Ndiéjunʼ niʼni José mu xakáguabaaʼ rá.

⁵ José nándáa dí káʼni maʼni índo̱ ninindxu̱u̱ yumbáá ga̱jma̱a̱ índo̱ ni̱jkha̱ náa guʼwá ejua̱a̱nʼ. Ndiéjunʼ niʼni mu xakáguabaaʼ xá. Na̱nguá ndiʼyoo náa rí tséʼngo̱o̱ gáʼni, ikhaa niʼni tsiakimínáʼ maʼni májánʼ ñajunʼ rí nakhánáá. Mú, nigíʼ niʼni itháan ñajuunʼ Jeobá náa vida ndrígóo, ikhaa jngó niʼni tsajkurámuuʼ xúgíʼ ñajunʼ rí naʼni José (Gén. 39:21-23).

6. Xú káʼnii nixnúú tsiakii José xnuʼndaa rí nigiʼdoo rá.

⁶ Mbáa ma̱ngaa nixnúu tsiakii José rí nindxa̱ʼwáminaʼ náa xnuʼndaa rí nigiʼdoo, náa rí mata̱nga̱a̱ maxtáa gajmíi̱n mbu̱júu̱ bi̱ kúwá náa goʼwóo ga̱jma̱a̱ rí xóo xtáa maʼni̱i̱ itháán májánʼ. Ga̱jma̱a̱ xúʼko̱ má nirígá. Índo̱ ikhaa nigiʼdoo 37 tsiguuʼ nigi̱ʼdu̱u̱ nimbánuu xnuʼndaa ndrígóo rí asndu tagiʼtu̱u̱n xóo mambanúu (Gén. 37:7, 9, 10; 42:6, 9).

7. Xó má naʼthí náa 1 Pedro 5:10, ndiéjunʼ gambáyulú mu maʼngulú muraʼníí tsáʼkhá rá.

⁷ Ndiéjunʼ ejmañulú rá. Rí nigíʼnuu José, naʼni marmáʼáan a̱jkiu̱lú dí náa numbaaʼ rí kúwáanʼ makuwíin xa̱bu̱ bi̱ muniulúʼ dí raʼkhí. O asndu mbáa ndxájulú maʼni gawúnlú. Mú, á mu nduʼyáá Jeobá xóo mbáa bi̱ mambáyulú, xakaguabáanʼlú ga̱jma̱a̱ xuniʼñáá ru̱ʼni̱ ñajuunʼ (Sal. 62:6, 7; atraxnuu 1 Pedro 5:10). * Índo̱ Jeobá niʼni rí José magundaaʼ káʼnii xóo dxámá nindxu̱u̱. Rígi̱ nasngájma kaʼwu rí Jeobá naku̱mu̱u̱ kaʼñún xa̱bi̱i̱ bi̱ ni̱ndxu̱ún jiámá. Ma̱ngaa rí  mbiʼi xúgi̱ kúwi̱i̱n mbaʼin a̱ngiu̱lú jiámá bi̱ guaʼdáá mbá fe gujkhuʼ xó má nigiʼdoo José ga̱jma̱a̱ tikhun rí ikhiin kúwi̱i̱n náa guʼwá e̱jua̱nʼ numuu rí naguájun jmbu náa Jeobá (Sal. 110:3).

8. Ndiéjunʼ dí nigíʼnuu Rut ga̱jma̱a̱ Noemí rá.

⁸ Noemí ga̱jma̱a̱ ajmbio̱o̱ Elimélec bi̱ nikúwá náa Judá, niguáʼdiin a̱jmi̱i̱n e̱jñún, mú índo̱ nirígá wéñuʼ ewiʼ ndiyóoʼ rí magún náa imbo̱o̱ país rí mbiʼyuu Moab. Mú índo̱ kúwá má ikhí, ajmbio̱o̱ Noemí nikháñuu ga̱jma̱a̱ ikhaa niguanúu mbáwíi gajmíi̱n a̱jmi̱i̱n e̱ji̱i̱n. Nda̱wa̱á ikhiin nidiin gu̱ʼu̱ bi̱ ni̱ndxu̱ún moabitas, mbáa dí ikhaa mbiʼyuu Rut imba̱a̱ mbiʼyuu Orpá. Ninújngoo xóo mbá guwáʼ tsiguʼ ikhiin nikháñúún ga̱jma̱a̱ na̱nguá niguáʼdiin e̱jñún (Rut 1:1-5). Nájtsíin gu̱ʼú xuáʼa̱ bugi̱, ra̱ʼkhá tháán nimíniiʼ. Mú xú káʼnii gakúwi̱i̱n xúgi̱ xá. Rut ga̱jma̱a̱ Orpá ma̱ndoo matangi̱ín munuju̱nʼ mbu̱júu̱, mú Noemí nánguá numuu rí nikhi̱i̱ má. Mú tsáa lá gáñewu̱u̱n ikhaa xá. Nixtáa gíná wéñuʼ rí asndu ni̱jkha̱nú niʼthí: “Xúthu̱n Noemí. Guthu̱nʼ Mara, numuu rí bi̱ gíʼdoo xúgíʼ tsiakii niʼni rí maxtáa gíná wéñuʼ”. Maski má Noemí nixtáa gíná wéñuʼ, mu nitanga̱a̱ náa Belén ga̱jma̱a̱ Rut (Rut 1:7, 18-20).

9. Xó má naʼthí náa Rut 1:16, 17, 22, xú káʼni nixnúu tsiakii Rut Noemí rá.

⁹ Índo̱ Noemí nixtáa gíná, ndiyóo rí musngajmáá rí nandún kuyáá. Rut nisngájma rúʼko̱ índo̱ niʼthúu̱n dí maʼga̱a̱ ga̱jma̱a̱ (atraxnuu Rut 1:16, 17 *, 22 *). Náa Belén, Rut niñajunʼ gakhii wéñuʼ náa xanáá mu mbayá trigo rí naguanáa mu mikhu ga̱jma̱a̱ Noemí. Núma̱a̱ má ga̱jma̱a̱ numuu dí niñajunʼ gakhi̱i̱, Rut nijuiʼthá rí májánʼ ga̱jma̱a̱ numuu (Rut 3:11; 4:15).

10. Xú káʼnii nisngájma Jeobá rí nindoo kaʼñún bi̱ gíníi rá.

¹⁰ Jeobá nixnúún xtángoo israelita, náa nasngájma dí ikhaa nagáwiinʼ a̱jkiu̱u̱n kaʼñún bi̱ gíníi xó má Noemí ga̱jma̱a̱ Rut. Niʼthúún rí índo̱ gágun gúda̱a̱ʼ rí nidu, xúya̱a̱ xúgíʼ rí nidu, mu xúʼko̱ bi̱ gíníi ma̱ndoo magún gúya̱a̱ rí naguanáa (Lev. 19:9, 10). Ga̱jma̱a̱ xúʼko̱ Noemí ma̱ngaa Rut ma̱ndoo magún gúya̱a̱ ganitsu rí asndu xáʼyóoʼ magún runda̱ʼa̱.

11, 12. Ndiéjunʼ niʼni Boaz mu Noemí ga̱jma̱a̱ Rut makuwá gagi rá.

¹¹ Boaz nindxu̱u̱ mbáa xa̱bu̱ bi̱ gíʼdoo ga̱jma̱a̱ Rut niñajunʼ náa ku̱ba̱ʼ ndrígóo ikhaa. Nigáwi̱i̱nʼ a̱jkiu̱u̱n kaʼyoo Rut, numuu dí ikhaa ra̱ʼkhá tháán nindoo kaʼyoo dxa̱giu̱u̱ Noemí, ikha jngó rí asndu niʼtsi̱i̱ jmbañún bi̱ kaʼñún Noemí ga̱jma̱a̱ ikhaa ndiyáa Rut (Rut 4:9-13). Ga̱jma̱a̱ nda̱wa̱á niguáʼdaa mbáa ada̱ bi̱ nixná mbiʼí Obed, bi̱ ninindxu̱u̱ xiʼñúu rey David (Rut 4:17).

¹² Gundxaʼwamíjna̱ índo̱ Noemí kayaraʼa Obed ga̱jma̱a̱ nadxuu wéñuʼ ma̱ngaa naxnáa núma̱a̱ Jeobá ga̱jma̱a̱ xúgíʼ a̱jkiu̱u̱n. Mú dí itháán gaʼni maʼdxuu a̱jkiu̱ún. Índo̱ Noemí ga̱jma̱a̱ Rut gatujxiín, mudxawíin dí náa Obed ninindxu̱u̱ bi̱ náa ni̱ʼkha̱ Mesías, bi̱ nindxu̱u̱ Jesús.

13. Ndiéjunʼ rí gíʼdoo wéñuʼ numuu ma̱ndoo majmañulúʼ dí nigíʼnuu Rut ga̱jma̱a̱ Noemí rá.

¹³ Ndiéjunʼ ejmañulú rá. Rí índo̱ ganújngulú náa gaʼkhu, mbáa makáguabáanʼlu o makumulúʼ rí asndu xóo chílú fraʼa náa a̱jkiu̱lú. Mbáa makumulúʼ rí nándáa rí muʼni. Índo̱ gakumulú xúʼko̱ ikhú phú gáʼyóoʼ makumulúʼ kuʼyáá Jeobá ga̱jma̱a̱ guʼñíínʼ a̱ngiu̱lú mu mumbayulúʼ. Gajkhun má, nguáná Jeobá xárígúu  gaʼkhu náa ikháanʼlu, xó má niʼni ga̱jma̱a̱ Noemí, na̱nguá nirtanga̱a̱ ajmbio̱o̱ ní má e̱ji̱i̱n. Mú ikhaa xtáa má xúʼko̱ mambáyulú, o mbáa majmiuu a̱ngiu̱lú mu mumbayulúʼ (Prov. 17:17).

14. Náá numuu rí nikáguabaaʼ wéñuʼ mbáa Levita rá.

¹⁴ Bi̱ niʼnirámáʼ Salmo 73 ninindxu̱u̱ mbáa Levita. Bi̱ levitas nikhánún mbá ñajunʼ kiejunʼ rí muñambáá náa guʼwá rí najuixnáá gamajkhu Jeobá. Maski ajndu xúʼko̱ levita bugi̱ ni̱jkha̱nú mbá mbiʼi rí ikhaa nikáguabaaʼ numuu rí nixígu̱u̱ kaʼñún xa̱bu̱ xkawiinʼ ga̱jma̱a̱ bi̱ nuni mbaʼumíjna̱, raʼkháa má ga̱jma̱a̱ numuu rí nandoo maʼni dí raʼkhí, numuu dí ninigu̱u̱ʼ xóo májánʼ dí nakujmáán rí kúwá ikhiin (Sal. 73:2-9, 11-14). Numuu rí nakujmaa dí guaʼdáá má xúgíʼ: Mbújkha̱a̱, nuni gagimijná ga̱jma̱a̱ tsixmiéjunʼ nditháan. Rígi̱ niʼni rí makáguabaaʼ wéñuʼ bi̱ niʼnirámáʼ Salmo bi̱ niʼthí: “Nakujmaa kaʼwu rí na̱nguá nigiʼdoo numuu rí nigúʼdoʼ mbá a̱jkiu̱nʼ kaʼwu ga̱jma̱a̱ rí nijñaa ñawúnʼ náa taguʼdoʼ aʼkhúnʼ”. Mú rígi̱ gamíi maʼni rí xambájxu̱u̱ májánʼ ga̱jma̱a̱ Dios.

15. Xó má naʼthí náa Salmo 73:16-19, 22-25, ndiéjunʼ niʼni Levita mu xakáguabaaʼ rá.

¹⁵ (Atraxnuu Salmo 73:16-19, * 22-25). * Levita nito̱ʼo̱o̱ “náa templo ndrígóo Dios rí mitsaanʼ wéñuʼ”, náa kúwá eʼwíinʼ israelita rutakháñíi Jeobá. Ikhí índo̱ niʼtájkháan nindoo nindxa̱ʼwáminaʼ májánʼ. Ga̱jma̱a̱ índo̱ nimbaʼta̱a̱ iduu ikhú ndiʼyoo dí tsendxaʼóo májánʼ edxu̱u̱ ga̱jma̱a̱, á mu tsiriʼkuminaaʼ maʼni tsínguminaʼ náa Jeobá. Ma̱ngaa nikro̱ʼo̱o̱ dí xa̱bu̱ bi̱ nuni dí raʼkhí kúwi̱i̱n ‹náa ku̱ba̱ʼ rí minunduʼ› ga̱jma̱a̱ rí kuáʼti̱i̱n ikhiin ‹nindxu̱u̱ mbiiʼ  wéñuʼ›. Mú, ndiéjunʼ nimbáyúu levita mu xáxigu̱u̱ ga̱jma̱a̱ rí xakáguabaaʼ rá. Ikhaa ni̱jkha̱nú nikro̱ʼo̱o̱ xó má Jeobá eʼyoo. Índo̱ ndiʼyoo xúʼko̱, nixtáa gagi ga̱jma̱a̱ tsímáá. Niʼtákáñuu Jeobá, niʼthúu̱n: “Ga̱jma̱a̱ náa tsu̱du̱u̱ ku̱ba̱ʼ, nda̱a̱ imbo̱o̱ dí e̱nda̱ʼa̱”.

16. Ndiéjunʼ ejmañulú náa xkridoo levita bi̱ niʼnirámáʼ Salmo 73 rá.

¹⁶ Ndiéjunʼ ejmañalú rá. Dí ragíʼmaa maxígulú kuʼñúún bi̱ nuni dí raʼkhí, índo̱ nakujmáá dí kúwá májánʼ. Numuu rí xóo nuni gagimijná nindxu̱u̱ mbá xngaa ga̱jma̱a̱ rí xákúwá kámuu mbiʼi (Ecl. 8:12, 13). Á mu naxígulú kuʼñúún makáguabáanʼlú ga̱jma̱a̱ xambáxulú májánʼ gajmiúlú Dios. Ikha jngó, á mu na̱jkua̱nú nakumulú xóo nikumu̱u̱ levita, guʼni rí ikhaa niʼni: Guʼdxawíín consejo ndrígóo Dios ma̱ngaa guʼyáʼ mambáxulu gajmiúlú bi̱ nuni ñajuunʼ ikhaa. Jeobá naʼni rí makuwáanʼ gagi ga̱jma̱a̱ rí mu̱ʼgua̱ má xúʼko̱ náa kamba̱a̱ rí na̱jkha̱ kaguáanʼ muxkamaa ‹vida rí phú nindxu̱u̱ gajkhun› (1 Tim. 6:19).

17. Ndiéjunʼ dí niʼni makáguabaaʼ Pedro rá.

¹⁷ Apóstol Pedro ninindxu̱u̱ mbáa xa̱bu̱ bi̱ nañajunʼ, mú ma̱ngaa tséʼni gaʼduunʼ nditháan, nguáná asndu tsegiʼthu̱u̱n dí maʼthí. Ikha jngó nguáná nagáwiinʼ a̱jkiu̱u̱n. Mbá xkri̱da índo̱ Jesús niʼthúún apóstoles ndrígio̱o̱ rí ikhaa mamínuuʼ ga̱jma̱a̱ makhañúu, Pedro nirikhoo ga̱jma̱a̱ niʼthúu̱n: “Ikháán na̱nguá kaʼyaʼ matraʼníí rígi̱” (Mat. 16:21-23). Jesús nixprígúu. Ma̱ngaa índo̱ niguwáʼ mbaʼin xa̱bu̱ gúrugua̱a̱ Jesús, ikhú mbá nacha̱ Pedro nirujthu rígú cháʼun yumbáá ndrígóo bi̱ kayá edxu̱u̱ náa ndxajkun (Juan 18:10, 11). Jesús nixprígúu mbu̱júu̱. Pedro ma̱ngaa niʼnimbamínáʼ índo̱ niʼthí rí ikhaa nditháan xániñuuʼ Jesús maski ajndu eʼwíinʼ apóstol muni̱ña̱a̱ (Mat. 26:33). Ga̱jma̱a̱ numuu rí nikumu̱u̱ kaʼyaminaʼ wéñuʼ rúʼko̱ niʼniuu rí mamiñúu kaʼñún xa̱bu̱, rí asndu ajtsú nuthu niʼthí rí na̱nguá eʼni nuwiinʼ Jesús. Ga̱jma̱a̱ nigawíin wéñuʼ a̱jkiu̱u̱n, rí  asndu nigájnuu ‹rixa̱a̱ ga̱jma̱a̱ nimbiyaʼ gakhii wéñuʼ› (Mat. 26:69-75). Mbáa ikhaa nirajximínáʼ á mu Jesús maʼni mba̱a̱ a̱jkiu̱u̱n kaʼyoo.

18. Xú káʼnii nimbáyúu Jesús Pedro mu xakáguabaaʼ rá.

¹⁸ Maski ajndu xúʼko̱, Pedro tániñaminaʼ rí makáguabaaʼ. Maski ajndu nijngawa̱a̱n, mú ndiyáa tsiakii mbu̱júu̱ numuu rí nduʼyáá dí niʼni má xúʼko̱ ñajuunʼ Dios gajmíi̱nʼ eʼwíinʼ apóstoles (Juan 21:1-3; Hech. 1:15, 16). Mú ndiéjunʼ nimbáyúu xá. Nirmáʼáan a̱jkiu̱u̱n dí niʼthúu̱n Jesús dí ikhaa niʼtájkháan ga̱jma̱a̱ numuu fe ndrígóo mu xakáguabaaʼ ma̱ngaa niʼthúu̱n dí mata̱nga̱a̱ mu maxnún tsiakii a̱ngui̱i̱n. Jeobá niriʼña̱a̱ rí niʼtájkháan. Numuu rí nda̱wa̱á, Jesús nisngájmaminaʼ náa ikhiin mu maxnún tsiakii (Luc. 22:32; 24:33, 34; 1 Cor. 15:5). Imbo̱ʼ mbiʼi Jesús nisngájmaminaʼ náa apóstoles ndrígio̱o̱, nda̱wa̱á rí ikhiin ndiñii e̱gi̱ʼ kañiʼ mbruʼun mú na̱nguá nirugua̱a̱ nimbáa. Ikhí Jesús nisngájmuu Pedro rí nandoo kaʼyoo ga̱jma̱a̱ rí nindxu̱u̱ mbáa bi̱ nambájxu̱u̱ májánʼ ma̱ngaa rí niʼni mba̱a̱ a̱jkiu̱u̱n kaʼyoo numuu rí nixnúu itháán ñajunʼ maʼni (Juan 21:15-17).

19. Xó má eʼthí náa Salmo 103:13, 14, xú káʼnii eʼyoo Jeobá aʼkhúlú ga̱jma̱a̱ xú káʼnii gándoo guʼyaridáá xá.

¹⁹ Ndiéjunʼ ejmañulú rá. Rí xóo Jesús niʼniuu Pedro nasngájma rí nindxu̱u̱ mbáa bi̱ nagáwiinʼ a̱jkiu̱u̱n xó má Anu̱u̱. Ikha jngó, á mu nakiéʼkulu, xundxaʼwáá edxu̱lú rí Jeobá xáʼni mba̱a̱ a̱jkiu̱u̱n kaʼyulú. Mú Gixa̱a̱ nandoo rí mundxaʼwamíjna̱ xúʼko̱. Rí phú gíʼmaa muʼni, nindxu̱u̱ rí mbuʼyáá náa rí májánʼ rí nuʼni ga̱jma̱a̱ bi̱ nuniulú dí raʼkhí, gaʼndulúʼ kuʼñúún ma̱ngaa gagáwiinʼ a̱jkiu̱lú kuʼñúún xó má eʼniulú ikháanʼ Jeobá (atraxnuu Salmo 103:13, 14). *

20. Ndiéjunʼ guʼyáá náa imbo̱o̱ artículo rá.

²⁰ Rí nigíʼnuu José, Noemí ga̱jma̱a̱ Rut, Levita ma̱ngaa Pedro naʼni mbuʼyáá rí “Jeobá xtáa mijngii náa xa̱bu̱ bi̱ nagawúunʼ a̱jkiu̱ún” (Sal. 34:18). Gajkhun má dí Jeobá tsérikhoo xúgíʼ gaʼkhu dí nuraʼníí o rí nakáguabáanʼ. Mú naxnúlú tsiakii mu maʼngulú muraʼníí ga̱jma̱a̱ fe ndrígúlú naʼni itháán gujkhuʼ (1 Ped. 1:6, 7). Náa i̱mba̱ artículo mbuʼyáá xú káʼnii Jeobá nambáñun bi̱ naguájun jmbu náa ikhaa, índo̱ nakáguabiinʼ, mbáa ga̱jma̱a̱ numuu rí índo̱ nuni mbá dí raʼkhí o i̱ʼwáʼ.