1-2. Iha lisaun neʼe, ita sei aprende saida?

DALA RUMA, ita hanoin barak tanba moris mak badak deʼit no “nakonu ho susar”. (Job 14:1) No ida-neʼe bele halo ita laran-kraik ka neon-susar. Iha tempu uluk, Jeová nia atan sira mós sente hanesan neʼe. Sira balu hakarak atu mate deʼit. (1 Reis 19:2-4; Job 3:1-3, 11; 7:15, 16) Maibé sira tau fiar ba Jeová no Jeová sempre fó kmaan no hametin sira. Sira-nia istória hakerek iha Bíblia atu bele hanorin ita no fó kmaan mai ita.​—Rom 15:4.

² Iha lisaun neʼe, ita sei aprende kona-ba Jeová nia atan balu neʼebé laran-kraik tanba hasoru susar. Sira mak Jacob nia oan-mane José, feto-faluk Noemi no ninia feto-foun Rute, ema Levi neʼebé hakerek Salmo 73, no mós apóstolu Pedro. Oinsá Jeová hametin sira? Lisaun saida mak ita bele aprende husi sira-nia ezemplu? Resposta ba pergunta sira-neʼe sei hametin ita-nia fiar katak “Jeová besik ema sira neʼebé laran-kanek” no nia “salva sira neʼebé neon-susar”.​—Sal 34:18, nota.

3-4. Saida mak akontese ba José bainhira nia joven?

³ Bainhira José tinan 17, nia hetan mehi rua husi Maromak. Mehi sira-neʼe fó sai katak loron ida José sei sai ema importante no ninia família tenke respeitu nia. (Gén 37:5-10) Lakleur depois José hetan mehi sira-neʼe, buat aat oioin akontese ba nia. Duké hatudu respeitu ba nia, ninia maun sira faʼan nia hodi sai atan. Ikusmai nia sai atan ba ema-boot ida iha Ejitu naran Potifar. (Gén 37:21-28) José nia moris troka derrepente deʼit. Nia la hela tan hamutuk  ho ninia aman neʼebé hadomi nia. Nia sai atan iha Ejitu, no halo serbisu ba ema neʼebé la hatene Jeová.​—Gén 39:1.

⁴ Tuirmai José nia situasaun sai aat liután. Potifar nia feen duun matak katak José koko atu estraga nia. Potifar la buka-hatene uluk, maibé hatama kedas José ba komarka no ema kesi José ho korrente. (Gén 39:14-20; Sal 105:17, 18) Imajina toʼok José sente oinsá bainhira ema duun matak katak nia koko atu estraga feto. No hanoin mós oinsá akontesimentu neʼe karik bele hafoʼer Jeová nia naran. José iha razaun oioin atu sente laran-kraik.

5. José halo saida atu la laran-kraik demais?

⁵ Bainhira José sai atan no mós tama komarka, nia labele troka ninia situasaun. Oinsá nia bele nafatin iha hanoin pozitivu? Duké tau fokus ba buat neʼebé nia labele halo, nia hakaʼas an atu halo ninia serbisu ho didiʼak. Importante liu mak nia sempre tau uluk Jeová iha ninia moris. Tan neʼe, Jeová haraik bensaun ba buat hotu neʼebé José halo.​—Gén 39:21-23.

6. Oinsá mak José hetan anima hodi hanoin kona-ba ninia mehi?

⁶ Karik José mós hetan anima hodi hanoin kona-ba mehi neʼebé uluk nia hetan husi Jeová. Mehi sira-neʼe hatudu katak nia sei haree fali ninia família no ninia situasaun sei sai diʼak liu. Neʼe akontese duni. Bainhira José maizumenus tinan 37, ninia mehi sira-neʼe sai loos.​—Gén 37:7, 9, 10; 42:6, 9.

7. Tuir 1 Pedro 5:10, saida mak bele ajuda ita atu tahan susar sira?

⁷ Lisaun ba ita. José nia istória fó-hanoin ita katak mundu neʼe aat no ema bele trata ita la ho justisa. Ita-nia maluk fiar-naʼin mós bele hakanek ita-nia laran. Maibé se ita haree Jeová nuʼudar ita-nia Fatuk Boot ka Fatin Protesaun,  ita sei la laran-kraik demais ka para atu serbí nia. (Sal 62:6, 7; lee 1 Pedro 5:10.) Hanoin-hetan katak José maizumenus tinan 17 bainhira Jeová fó mehi sira-neʼe ba nia. Neʼe hatudu katak Jeová konfia ninia atan sira neʼebé joven hela. Ohin loron, joven barak hatudu hahalok hanesan José. Sira mós fiar Jeová. Maski sira la halo sala, maibé ema hatama sira balu ba komarka tanba sira lakohi para atu halo tuir Maromak.​—Sal 110:3.

8. Saida mak akontese ba Noemi no Rute?

⁸ Noemi no ninia família husik rai-Judá no hela iha rai-Moab tanba mosu rai-hamlaha boot. Tuirmai Noemi nia laʼen Elimelec mate, no hela deʼit Noemi ho ninia oan-mane naʼin-rua. Liutiha tempu balu, ninia oan sira kaben ho feto Moab, Rute no Orpa. Maizumenus tinan sanulu liutiha, Noemi nia oan-mane sira mós mate, no sira la iha oan. (Rute 1:1-5) Klaru katak situasaun neʼe halo feto naʼin-tolu neʼe triste tebes. Rute no Orpa bele kaben fali. Maibé sé mak sei tau matan ba Noemi neʼebé ferik? Noemi sai laran-kraik tebes toʼo nia dehan: “Keta bolu haʼu Noemi. Bolu haʼu Mara, tanba Maromak neʼebé Kbiit Boot Liu Hotu halo haʼu-nia moris susar tebes.” Ikusmai, Noemi deside atu fila fali ba Belein, no Rute hamaluk nia.​—Rute 1:7, 18-20.

9. Tuir Rute 1:16, 17, 22, oinsá Rute ajuda Noemi?

⁹ Saida mak ajuda Noemi? Neʼe mak domin neʼebé laran-metin. Porezemplu, Rute hatudu domin neʼebé laran-metin ba Noemi hodi hamutuk nafatin ho Noemi. (Lee Rute 1:16, 17, 22.) Iha Belein, Rute serbisu makaʼas atu halibur sevada restu hodi nia no Noemi bele han. Tanba Rute halo ida-neʼe, ema hotu bele haree katak nia mak laran-diʼak no serbisu makaʼas.​—Rute 3:11; 4:15.

10. Oinsá Jeová hatudu katak nia hanoin ema kiak hanesan Noemi no Rute?

¹⁰ Jeová fó lei ba ema Izraél neʼebé hatudu katak nia hanoin ema kiak hanesan Noemi no Rute. Nia hatete ba ninia povu katak kuandu sira koʼa ai-han sira husi toʼos, sira tenke husik ai-han balu iha toʼos ninin atu ema kiak bele halibur. (Lev 19:9, 10) Tan neʼe, Noemi no Rute bele iha ai-han no la presiza husu ezmola.

11-12. Oinsá Boaz halo Noemi no Rute kontente?

¹¹ Rute halibur sevada husi ema riku ida naran Boaz nia toʼos. Boaz admira Rute nia laran-metin no domin neʼebé Rute hatudu ba Noemi. Tan neʼe, Boaz kaben ho Rute no sosa fali Noemi nia família nia rai, hodi nuneʼe Rute nia oan sira bele simu rai neʼe nuʼudar liman-rohan. (Rute 4:9-13) Boaz no Rute iha oan naran Obed, no Obed nia bei-oan mak Liurai David.​—Rute 4:17.

¹² Imajina toʼok Noemi nia ksolok bainhira koʼus Obed no fó agradese ba Jeová husi laran. Maibé iha futuru bainhira Noemi no Rute hetan moris-hiʼas, sira sei kontente liután kuandu hatene katak Mesias neʼebé promete nanis ona, katak Jesus Kristu, mai liuhusi Obed nia jerasaun.

13. Lisaun importante saida deʼit mak ita bele aprende husi Noemi no Rute?

¹³ Lisaun ba ita. Bainhira ita hasoru daudaun susar, karik ita sente laran-kraik no mós triste. Karik ita hanoin katak ita labele rezolve ita-nia problema. Iha tempu hanesan neʼe, ita presiza tau  konfiansa tomak ba Jeová no hakbesik nafatin ba irmaun-irmán sira. Klaru katak, karik Jeová sei la halakon ita-nia problema. Porezemplu, iha Noemi nia tempu, Jeová la fó moris-hiʼas ba Noemi nia laʼen no oan-mane sira, maibé ajuda Noemi tahan. Jeová mós bele ajuda ita tahan. Karik nia sei halo nuneʼe liuhusi irmaun-irmán neʼebé hatudu laran-diʼak.​—Prov 17:17.

14. Tanbasá ema Levi ida sai laran-kraik?

¹⁴ Ema neʼebé hakerek Salmo kapítulu 73 mak ema Levi ida. Tan neʼe, nia iha priviléjiu furak atu serbí iha Jeová nia fatin adorasaun. Maski nuneʼe, iha tempu ida, nia sente laran-kraik. Tanbasá? Nia komesa sente laran-moras ba ema aat no ema foti an. Nia la laran-moras ba sira-nia hahalok aat, maibé nia sente katak ema aat sira-nia moris diʼak liu fali ninian. (Sal 73:2-9, 11-14) Tuir ninia haree, ema sira-neʼe iha buat hotu, hanesan rikusoin, moris diʼak no la hanoin barak. Ida-neʼe halo ema Levi neʼe sente laran-kraik toʼo nia dehan: “Haʼu hatudu laran-moos nafatin no haʼu fase liman hodi hatudu katak haʼu la iha sala, maibé loloos neʼe saugati deʼit.” Neʼe bele hanetik nia atu kontinua serbí Jeová.

15. Tuir Salmo 73:16-19, 22-25, oinsá mak ema Levi ida manán hasoru laran-kraik?

¹⁵ Lee Salmo 73:16-19, 22-25. Ema Levi neʼe “tama ba Maromak nia fatin sagradu neʼebé kmanek”. Iha neʼebá mak nia halibur hamutuk ho maluk fiar-naʼin sira, nia sente kalma, hanoin didiʼak no mós halo orasaun kona-ba ninia situasaun. Rezultadu mak nia komesa rekoñese katak ninia hanoin mak sala, no nia komprende katak nia bele lakon ninia relasaun diʼak ho Jeová. Nia mós komprende katak ema aat laʼo “iha rai neʼebé namdoras” no ikusmai sira sei lakon mohu. Ema Levi neʼe tenkesér iha hanoin hanesan Jeová nian atu nuneʼe nia la sai laran-kraik no la laran-moras tan ba ema aat. Hodi halo nuneʼe, nia sente fali dame no kontente. Nia hatete: “Haʼu lakohi buat seluk tan iha rai, só [Jeová] deʼit.”

16. Saida mak ita bele aprende husi ema Levi ida?

 ¹⁶ Lisaun ba ita. Keta sai laran-moras ba ema aat sira neʼebé haree hanesan moris diʼak. Sira-nia ksolok mak falsu no temporáriu deʼit, no sira mós la iha esperansa ba futuru. (Ecle 8:12, 13) Se ita laran-moras ba sira, ita sei laran-kraik no mós bele lakon ita-nia relasaun diʼak ho Jeová. Tan neʼe se ita komesa sente laran-moras hanesan ema Levi neʼe, ita presiza banati-tuir ninia ezemplu. Halo tuir Jeová nia matadalan no halibur ho maluk sira neʼebé mós halo tuir Jeová nia hakarak. Se Ita hadomi Jeová liu fali buat hotu, ita sei hetan ksolok neʼebé loos. Ita sei laʼo nafatin iha dalan neʼebé lori ita ba “moris neʼebé loloos”.​—1 Tim 6:19.

17. Saida deʼit mak halo Pedro sai laran-kraik?

¹⁷ Apóstolu Pedro mak mane neʼebé laran-manas. Maibé dala ruma nia hatete no halo buat ruma hodi la hanoin uluk no tuirmai nia arrepende ida-neʼe. Porezemplu, bainhira Jesus fó sai ba ninia apóstolu sira katak nia sei hetan terus no mate, Pedro korrije Jesus hodi dehan: “Susar sira-neʼe sei la kona Ita.” (Mt 16:21-23) No Jesus korrije Pedro. Bainhira ema-lubun mai atu kaer Jesus, Pedro foti desizaun ho ansi hodi sabir amlulik boot nia atan ida nia tilun. (João 18:10, 11) Dala ida tan, Jesus korrije Pedro. Pedro mós gaba an katak maski apóstolu sira seluk husik hela Jesus, maibé nia sei nunka halo ida-neʼe. (Mt 26:33) Maibé ikusmai Pedro sai taʼuk ba ema no nia nega ninia Naʼi dala tolu. Pedro sai laran-kraik tebes no nia “sai ba liʼur hodi tanis tanba laran-susar tebes”. (Mt 26:69-75) Karik nia hanoin barak katak Jesus sei la perdua nia.

18. Oinsá Jesus ajuda Pedro atu manán laran-kraik?

¹⁸ Maibé Pedro la sai laran-kraik demais toʼo para atu serbí Jeová. Depois  halo tiha sala, nia hadiʼa ninia hahalok no nafatin serbí Jeová hamutuk ho apóstolu sira seluk. (João 21:1-3; Após 1:15, 16) Saida mak ajuda nia? Nia hanoin-hetan katak antes neʼe Jesus halo orasaun atu nia la lakon fiar no Jesus anima nia atu fila fali no hametin ninia maluk fiar-naʼin sira. Jeová hatán Jesus nia orasaun neʼe. Depois neʼe, Jesus mosu ba Pedro, karik atu anima nia. (Lc 22:32; 24:33, 34; 1 Kor 15:5) Bainhira apóstolu sira kaer ikan ba kalan tomak no la hetan buat ida, Jesus mosu ba sira. Iha tempu neʼebá, Jesus fó oportunidade ba Pedro atu fó sai ninia domin ba Jesus. Jesus perdua ona Pedro no fó serbisu barak ba nia.​—João 21:15-17.

19. Oinsá Salmo 103:13, 14 ajuda ita atu hatene Jeová nia hanoin kona-ba ita-nia sala?

¹⁹ Lisaun ba ita. Jesus nia hahalok hatudu katak nia mak laran-sadiʼa hanesan ninia Aman Jeová. Tan neʼe, bainhira ita halo sala, ita labele hanoin katak Jeová sei nunka perdua ita. Hanoin-hetan katak Satanás hakarak ita atu hanoin hanesan neʼe. Duké halo nuneʼe, mai ita hanoin kona-ba oinsá Jeová hadomi ita, komprende ita-nia limitasaun no mós prontu atu perdua ita. Ita mós presiza banati-tuir Jeová nia hahalok neʼe bainhira ema ruma hakanek ita-nia laran.​—Lee Salmo 103:13, 14.

20. Iha lisaun tuirmai, saida mak ita sei aprende?

²⁰ Ezemplu husi José, Noemi, Rute, ema Levi ida no Pedro hametin ita-nia fiar katak “Jeová besik ema sira neʼebé laran-kanek”. (Sal 34:18) Dala ruma, Jeová husik ita atu hetan terus no sente laran-kraik. Maski nuneʼe, bainhira nia ajuda ita atu tahan terus sira-neʼe ho susesu, ida-neʼe hametin ita-nia fiar. (1 Ped 1:6, 7) Iha lisaun tuirmai, Ita sei aprende liután oinsá Jeová apoia ninia atan sira neʼebé laran-kraik, karik tanba sira-nia fraku ruma ka situasaun susar.