1, 2. ¿Ambechi exea ini jorhenguarhikua jimbo?

ENGACHI eratsejka eskachi no ióni irekasïnga ka eskachi uánikua uandanhiatechani jatsiasïnga, kómu pʼikuarherasïngachi (Job 14:1). Ióntki anapu kʼuiripuecha engaksï Jeobani marhuakuenga ísïksï pʼikuarheraspti. Asta, máruksï nóteru uékasïrendia irekani (1 Rey. 19:2-4; Job 3:1-3, 11; 7:15, 16). Joperu Jeoba, imecheri Tata Diosï engaksï imecha mintsikenga, méntkisï sési pʼikuastantaaspti ka uinhaperantaani. Ístu, ústi eska ambe engaksï nitamakuarhipka imecha, Bibliarhu karakata pakarapiringa parajtsïni sési pʼikuastantani ka jorhendani (Rom. 15:4).

² Ini jorhenguarhikua jimbochi uandani jauaka máru Jeobaeri marhuaricheri engaksï kómu pʼikuarherapka jimbokaksï no sési ambe nitamakuarhispka: José, Jakobu uájpa, Noemi enga tsïndipka ka imeri tarhamba Ruti; lebita ma enga Salmo 73 karaka ka apostuli Pedru. ¿Néna uinhaperantaaspi Jeoba? ¿Ka ambechi jorhenguarhisïni imecheri ambe? Mókuntskua i kurhamarhikuecheri exeraatijtsïni eska “Jeoba imecha jingoni jarhas[ka] engaksï no sési pʼikuarhinhijka mintsitarhu ka pʼímutantaasïndi imechani engaksï kómu pʼikuarherajka” (Sal. 34:18).

3, 4. ¿Ambe nitamakuarhispti José enga tumbiipka?

³ Enga José ma 17 jatiripkia, Tata Diosï xarhatakuspti tsimani tsánharhikuecha jimbo eska ma jurhiani niárapiringa kʼéri ambeni imeri familiarhu (Gén. 37:5-10). Joperu, ísï no ióni tátsekua enga ini ambe tsánharhipka, imeri tsípikua mátirku mójtakuarhispti. Imeri ermanu jémbechaksï no janhanharhispti, atarantasptiksï ka tátsekua niáraspti Potifariri jántspirini enga  Ejiptu anapu ofisiali máepka (Gén. 37:21-28). Joséri tsípikua mátirku mójtakurhispti. Nóteru imesptia enga táti jémba sánderu uékenga, iásï jántspiri májkuesptia Ejiptu, acheetiri ma enga no mítepka Jeobani (Gén. 39:1).

⁴ Joperu tátsekua José sánderu no sési nitamakuarhispti, Potifariri témba chkuanderakua ambe uandaspti eska José uékasïrenga biolarini. Potifari, no kurhanguarhispti sini ísïspi inde ambe, ónhatarkuarhispti Joséni ka kadenecha jingoni jatsinhaspti (Gén. 39:14-20; Sal. 105:17, 18). ¿Úsïnchi eranhaskani na enga pʼikuarherapka inde tumbi engaksï ísï chkuanderakua ambe jauatakupka? ¿Ka ambe uandanhapirini Jeobaeri arhinhakueri ambe ini ambe jimbo? José meru jatsispti ambe enga jimbo kómu pʼikuarherani japiringa.

5. ¿Ambe úspi José para sési pʼikuarherantani?

⁵ Enga José jántspiri máepka ka enga ónhakuarhitini japka, no ma ambe úpirindi úni para sési peentani ambe ma. ¿Ambe jarhuataspi paraka ambakiti ambe eratsepiringa? Jánguarhintaspti sési úni imeri ánchikuarhitani enbesde eratseni jarhani imani ambe enga no uénga úni. Jánguarhintaspti méntkisï orheta peerani Tata Diosïri ambe imeri tsípikuarhu, ísï jimbo ima újchakurasïrendi iámindu ambe enga José uénga (Gén. 39:21-23).

6. ¿Nénaksï úpi uinhaperantani Joséni ambe enga ióntki tsánharhipka?

⁶ Jamberi ístu José sési pʼikuarherantendi enga eratseantauenga imani tsánharhikuechani enga ióntki tsánharhiapka, engaksï xarhatapka eska ménderu imeri familia jingoni japiringa ka eska niárapiringa sési jarhani. Ka ísï úkuarhispti. Enga José ma 37 jatiripkia, inde tsánharhikuechaksï uénaspti ísï úkuarhini (Gén. 37:7, 9, 10; 42:6, 9).

7. Eska na arhijka 1 Pedru 5:10, ¿ambejtsïni jarhuataa tekaantani tsʼéjkukuechani?

⁷ ¿Ambechi jorhenguarhisïni? Ambe enga nitamakuarhipka José, miátantasïndijtsïni eska ini parhakpini jimbo enga xáni no sési jánhaskuarhika, jauaka kʼuiripuecha engajtsïni no jurhimbikua jingoni kámaaka. Asta jamberijtsïni  juchari erachi ma úpirindi no sési kámani. Joperu engachi ísï exeska Jeobani komueska juchari kuájchakukua, nóchi no sési pʼikuarheraaka ka seguiriuakachi marhuakuni (Sal. 62:6, 7; arhinta je 1 Pedru 5:10). Ístu, ju je miáni eska José tumbi máespka enga Jeoba tsánharhitapka. Í ambe sési xarharasïndi eska Jeoba mintsikaasïnga uátsïchani ka tumbiichani engaksï imani marhuakujka. Ini jurhiatikuecha jimbo, uánikuechaksï jarhasti engaksï ónhakuarhitini jaka jimbokaksï no jurajkusïnga Tata Diosïni (Sal. 110:3).

8. ¿Ambeksï nitamakuarhispi Noemi ka Ruti?

⁸ Noemi ka Elimeleki tsimani uájpechanksï kaasïrendi ka Judaksï irekaspti, joperu kʼéri kʼarhingua ma jarhaspti ka mótsesptiksï máteru paisi jimbo enga arhinhenga Moabi. Engaksï jima japkia, Elimeleki uarhispti ka Noemi tsïndi pakaraspti imeri tsimani uájpecha jingoni. Ísï tátsekua uájpechaksï tembuchaspti Ruti ka Orpa jingoni engaksï Moabi anapuepka. Ma diesi uéxurhini ísï tátsekua, Noemi uájpechajtuksï uarhispti ka nóksï ma sapini kánguarhispti (Rut 1:1-5). Íksï tanimu uarhiiticha kánikua kómu pʼikuarherendi. ¿Ka iásïksï néna jámapirinia? Ruti ka Orpa úpirindiksï ménderu uambuchantani, joperu Noemi sánderu kʼérixaptia. ¿Né exepirinia? Niáraspti xáni kómu pʼikuarherani enga uandapka: “Asïjtsïni arhi je Noemi. Arhijtsïni je Mara, jimboka Tata Diosï enga Iámindu ambe Újka úni, ústi eska juchiti tsípikua kánikua kʼameriuaka” (Rut 1:20). Nájkiruka kánikua kómu pʼikuarherani japka, Noemi kʼuanhatsentaspti Beleni ka Ruti imani jingoni niraspti (Rut 1:7, 18-20).

9. Eska na arhijka Rut 1:16, 17, 22, ¿néna uinhaperantaspti Ruti, Noemini?

⁹ ¿Ambe uétarhinchaxapi Noemi? Ambakiti uékperakua ka Ruti inde jásï uékperakua xarhatakuspti enga imani jingoni pakarapka (arhinta je Rut 1:16, 17, 22). Jini Beleni, Ruti kánikua ánchikuarhispti sebada úksïmani para Noemi ka para ima. Ini ambe jimbo, i uarhiiti sapichu niáraspti ísï mítekateni eska ambakiti uarhiiti ma enga kánikua ánchikuarhienga (Rut 3:11; 4:15).

10. ¿Jeoba néna xarhatakuaspi uékperakua no jatsikuarherichani?

¹⁰ Jeoba íntsaaspti israelitechani juramukua ma enga xarhatenga eska ima pʼamojkuasïrenga imechani engaksï no jatsikuarheripka ísï eska Noemi ka Ruti. Jeoba juramukuspti imeri iretani, eska engaksï pʼikuntapiringa jurajkupiringaksï imani enga uanamukuni japiringa paraksï imecha úksïmani engaksï no jatsikuarheripka (Lev. 19:9, 10). Ísïksï, Noemi ka Ruti úpirindi tʼirekua ambe jatsikuarheni ka nóksï kurhajkuarhini jámani jarhani.

11, 12. ¿Ambe úspi Boasi paraksï Noemi ka Ruti tsípikua jingoni irekani?

¹¹ Jima enga Ruti úksïmenga kʼuiripu jatsikuarheri máerispti enga Boasi arhinhenga. Mintsitarhu niárakuspti enga Ruti ambakiti uékperakua xarhatakupka Noemini ka enga no méni jurajkupka. Tátsekua, Boasi tembuchaspti Ruti jingoni ka piántaspti imani echerini enga Noemiri familieri erensiepka (Rut 4:9-13). Ísï tátsekuaksï kánguarhispti sapini ma enga Obedi arhinhenga enga niárapka Dabidiri papa kʼérini (Rut 4:17).

¹² Ju je eranhaskani na enga xáni tsípini japka Noemi enga Obedini kamanharhitini japka ka enga iámu mintsita jingoni diosmaiamukua arhini japka Jeobani. Joperu, sánderu ambakiti ambe japirini para Noemi ka Ruti. Engaksï tsíntaaka, míteatiksï eska Obediri familia jimbo jurhaspka Mesiasi, tata Jesukristu.

13. ¿Ambechi ambakiti ambe uá jorhenguarhini ima amberi enga Noemi ka Ruti nitamakuarhipka?

¹³ ¿Ambechi jorhenguarhisïni? Engachi tsʼéjkukua ma jatsiaka úpiringachi kánikua  no sési pʼikuarherani. Jamberichi no jánhaskani ambe úni. Jiánchi jatsiaka para sánderu mintsikani juchari Táti auandarhu anapuni ka no jurajkuani juchari erachichani. Míteskachi eskajtsïni Jeoba no méntkisï kénditacheauaka tsʼéjkukuechani, ísï eska Noemini na no kʼuanhaskukuntapka uámbani ka uájpechani. Joperu ambe enga méntkisï uáka, jindesti eskajtsïni jarhuataaka tekaantani, jamberi erachichani úrapariani engajtsïni xarhatacheaka ambakiti uékperakua (Prov. 17:17).

14. ¿Andisï xáni kómu pʼikuarherapi lebita?

¹⁴ Ima enga Salmo 73 karaka lebita máespti. Lebitechaksï kʼéri kóntperata ma jatsispti jimbokaksï jima marhuasïrendi enga Jeoba kómarhinhenga. Joperu niáraspti kánikua kómu pʼikuarherani jimboka uénaspka exeni eska sési nikuasïrenga no sési úrichani ka imechani engaksï kʼéramakuarhenga. No jimboka uékasïrenga no sési jásï ambe úni, sino tsitisïrendi ísï irekani eska imecha (Sal. 73:2-9, 11-14). Ísïksï xarharasïrendi enajkiksï iámindu ambe jatsipi: jatsikuarhekua ambe, tsípikuarhita ambe ka nóksï jatsiani uandanhiatechani. I ambe xáni no sési pʼikuastaspti salmueri kararini enga uadapka: “Para no ma ambe marhuasti engani pímbinhajkuntaka juchiti mintsitani ni engani jupajkuntaka jurhimbikua ambe úparini”. Í ambe úpirindi úni eska jurajkupiringa Jeobani.

15. Eska na arhijka Salmo 73:16-19, 22-25, ¿ambe úspi lebita ma para nóteru kómu pʼikuarherania?

¹⁵ (Arhinta je Salmo 73:16-19, 22-25). Lebita inchaspti Tata Diosïri pímbinhasï templurhu, nani engaksï jápkia máteru israelitecha engaksï kʼéri ambe arhini japka Jeobani. Jima úspti sési eratsentani ka kómarhini Tata Diosïni indeni ambe jimbo enga nitamakuarhini japka. Úspti exeni eska ambe enga eratseni japka no sési jarhaspka ka eska enga seguiripiringa ísï eratseni niárapiringa jarharini Jeobani. Ístu, niáraspti exeni eskaksï no sési úricha jima jarhaska enga kánikua pitsipindika ka eskaksï kánikua no sési kʼamaraaka. Para lebita nóteru enbidiarpinia ni kómu pʼikuarherani, jatsispti para ísï exeni ambe ma eska Jeoba. Enga ísï úpka, niáraspti pínandikua jatsini ka tsípikua jingoni jámani. Enga Jeobani uandontskuarhekuni japka uandaspti: “Echerirhu, no ma ambe uékasïnga, solu tʼungintku”.

16. ¿Ambechi jorhenguarhisïni lebiteri ambe?

 ¹⁶ ¿Ambechi jorhenguarhisïni? Nóchi jatsiska para enbidiariuani no sési úrichani engaksï ísï xarharajka enajkiksï sési irekani jaki. Imecheri tsípikuarhita kʼamakurhiati ka nóksï irekaati para méntkisï (Ecl. 8:12, 13). Engachi enbidiariuaska, kómu pʼikuarheraakachi ka astachi jamberi tsïtani juchari pájperakua Jeobani jingoni. Jiájkani, engachi niáraaka ísï pʼikuarherani eska lebita, ju je ísï úni eska ima: ju je imani ambe úni engajtsïni juchari Tata Diosï uékpiti arhijka ka ju je imecha jingoni jarhani engaksï imani marhuakujka. Engachi xénchaska Jeobani sánderu eska máteru ambe, sésichi pʼíkuarheraaka ka imani xanharu jimbochi jámaaka enga pájpijka tsípikuarhu para méntkisï (1 Tim. 6:19).

17. ¿Andisï Pedru kómu pʼikuarherapi?

¹⁷ Apostuli Pedru tsípikua jingoni jámasïrendi, joperu ménisï no eratseparini uandasïrendi ka úni ambe ma ka tátsekua pʼamondakuarhini jarhasïrendia. Por ejemplu, jiáni enga Jesusi arhiapka imeri apostulichani eska no sési kánhapiringa ka uándikunhani, Pedru arhispti: “Nominduri ísï úkuarhinchaaka” (Mat. 16:21-23). Jesusi arhispti eska no ísï eratsepiringa. Engaksï uánikua kʼuiripuecha nípka Jesusini jupikani, Pedru no sáni eratseparini, kʼéri saserdotiri jántspirini ma kutsïkua pʼikuspti (Juanu 18:10, 11). Jesusi ménderu arhispti eska inde ambe no sési jarhaspka. Ístu, Pedru uandaspti eska ima no méni jurajkupiringa Jesusini nájkirukaksï máteruecha kʼóru jurajkupiringa (Mat. 26:33). Joperu Pedru jukari mintsinharhikuarhispti, imani chúrikua jimbo kánikua chéspti ka tanimu xanhari uandapti eska no mítespka Jesusini. No sési pʼikuarheraparini uéakuntaspti ka kánikua komu pʼikuarheraparini ueraspti (Mat. 26:69-75). Seguru eska kurhamarhikuarhipka sini Jesusi ménisï puákuntapirini.

18. ¿Jesusi néna jarhuataspi Pedruni paraka nóteru kómu pʼikuarherapingia?

¹⁸ Joperu Pedru seguirispti marhuakuni Jeobani nájkiruka inde ambe no sési pʼikuastapka.  Nájkiruka no sési úpka, sési pʼikuarherantaspti ka seguirispti orhepani uérani máteru apostulicha jingoni (Juanu 21:1-3; Uku. 1:15, 16). ¿Ambe jarhuataspi? Miántaspti eska Jesusi arhispka eska kómarhijpikuspka paraka ima seguiripiringa mintsikani Tata Diosïni ka ístu arhispti eska kʼuanhatsentapiringa ka uinhaperantaani imeri erachichani. Jeoba mókukuntaspti indeni kómarhikuani. Ísï tátsekua, Jesusi xarhakuspti, jamberi para uinhaperantani (Luk. 22:32; 24:33, 34; 1 Kor. 15:5). Máteru xanhari, Jesusi xarhakuaspti apostulichani jiáni engaksï imecha erantskutapkia ka nóksï ma kurucha pʼímani. Jima, Jesusi jurajkuspti eska Pedru xarhatakupiringa eska xénchasïrenga ka ístu xarhatakuspti imeri amigu jémbani eska puákuntaspkia jimboka sánderu ánchikuarhita íntskuspka (Juanu 21:15-17).

19. Eska na arhijka Salmo 103:13, 14, ¿na eratsesïni Jeoba engachi kʼamanharhintskua ambe újka, ka nénachi uá májkueni úni eska ima?

¹⁹ ¿Ambechi jorhenguarhisïni? Na enga Jesusi kámapka Pedruni xarhatasïndi eska pʼamojpitiska, ísï eska imeri Táti. Ísï jimbo, engachi niáraaka no sési ambe úni, nóchi jámaaka eratseni eskajtsïni Jeoba no méni puáchentaaka. Ju je no mirikurhini eska Noambakiti uékasïnga eskachi ísï eratseaka. Sánderu sési, ju je eratsentani na engajtsïni xáni xénchajka Jeoba ka eskajtsïni kurhanguchisïnga eskachi no úsïnga iámindu ambe sési úni ka eskajtsïni uékasïnga puáchentani. Juchajtuchi jatsiska para májkueni úni eska ima engaksï máteruecha újka ambe ma engajtsïni no sési pʼikuastajka (arhinta je Salmo 103:13, 14).

20. ¿Ambechi exea máteru jorhenguarhikua jimbo?

²⁰ Ambe enga José, Noemi ka Ruti, Lebita ma ka Pedru nitamakuarhipka, xarhatasïndi eska “Jeoba imecha jingoni jarhas[ka] engaksï no sési pʼikuarhinhejka mintsitarhu” (Sal. 34:18). Imajtsïni no méntkisï kénditachiauati tsʼéjkukuechani o parachi no no sési pʼikuarherani. Joperu, engachi tekaantajka imeri jarhuajperata jingoni, sánderuchi mintsikasïnga (1 Ped. 1:6, 7). Máteru jorhenguarhikua jimbo, exeakachi eska Jeoba úsïnga máteru ambe para jarhuataani imechani engaksï no méni jurajkujka jiáni engaksï no sési pʼikuarherani jarhajka imani ambe jimbo engaksï újka kʼamanharhintskua jimbo o máteru ambe jimbo.