1-2. Mu fundo ino ticafundei?

PA NGUWA dzimweni, tingakwanisa kurangarira kuti upenyu wakadodoka uye mazuwa edu ‘akadzara nge matambudziko.’ (Djo. 14:1) Nge kudaro, zvinozwisisika kuti nguwa dzimweni tinozwa takaora mwoyo. Akawanda e aseenzi a Djehovha e nguwa ye kare, aizwawo kudaro. Amweni akhona akatokumbira kufa. (1Mad. 19:2-4; Djo. 3:1-3, 11; 7:15, 16) Asi nguwa no nguwa, Djehovha—Mwari waaigonda—akaanyaradza uye akaabambisa. Zviito zvawo zvakatotarhwa kuti zvitibambise uye zvitifundise.—Aro. 15:4.

² Mu fundo ino, ticafunda nge zve aseenzi a Djehovha anganani akabatana no miedzo inoodza mwoyo, yakadai hingana Zuzee mwana wa Djakobo, mufirhwa kadzi Noemi, uye no nyamwana yake Rute, muRevhi wakatara Pisarema 73 uye mu phostori Pauro. Djehovha akaabambisa kudini? Uye munhu umwe na umwe ungafundei pa miezaniso yawo? Mhinduro dze mibvinzo iyi inotigondesa kuti “Djehovha ari dhuze na aya akaora mwoyo” uye ayena “anoponesa aya akatsukwara.”—Pis. 34:18, masoko e pasi.

3-4. Zvii Zvakaitika kuna Zuzee paainga ari djaha?

³ Zuzee wainga ano makore anokwana kuita 17 paakarota hope mbiri, dzese dzaibva kuna Mwari. Hope idzi dzaipangidza kuti zuwa rimweni Zuzee waizobathwa zvisina unatsi mukati me mhuri yake. (Ge. 37:5-10) Mumasure mekuti Zuzee warota hope, upenyu wake wakacinja ciriporipoco. Pane kuti amureremedze, madzikoma ake akamutengesa hingana muranda. Iyena wakauya kuti agare pa nyumba pe mukuru-mukuru  we Edjipitu unozwi Potifari. (Ge. 37:21-28) Pa nguwa doko, Zuzee wakabva pa mwana anodiwa maningi na baba ake kuti agare museenzi unosiririsa we mukuru-mukuru usikanamati Mwari we ku Edjipitu.—Ge. 39:1.

⁴ Matambudziko a Zuzee ainga ari dhuze kuti atunhudzirike. Mukadzi wa Potifari wakapumha Zuzee manyepo ekuti waida kumudzipa. Pane kuti apsvakisise ndaa yakhona, Potifari wakakanda Zuzee mukaraboso uye wakasungwa no ngema dze simbi. (Ge. 39:14-20; Pis. 105:17, 18) Rangarirai kuti djaha iri rakazwa kudini nge kupumhwa kaakaizwa kuti waida kudzipa mukadzi wa Potifari. Uye rangariraiwo kuti manyepo aya akaswipisa kudini zina ra Djehovha. Zvezvirokwazvo, Zuzee wainga ano cikonzero cekuti aore mwoyo!

5. Zuzee wakakunda kudini kudzirhya mwoyo?

⁵ Zuzee paainga aciri museenzi uye nge kuhamba ke nguwa okandwa mu karaboso, rusudzunuko rake rekuhamba-hamba rainga padoko. Zvinyi zvakamubetsera kuti ashingirire? Pane kuti akande ndangariro dzake pano zviya zvaainga asikakwanisi kuita, iyena wakakanda ndangariro dzake pa basa raainga apaswa kuti aite. Kupinda izvi, Zuzee wakakanda Djehovha hingana munhu unokosha maningi mu upenyu wake. Ndiyo ndaa, Djehovha aikomborera zvese zvaiizwa na Zuzee.—Ge. 39:21-23.

6. Zuzee wakabambiswa kudini nge hope dzaakarota?

⁶ Zuzee wakabambiswawo nge kurangarira hope dze uphorofiti dzaainga arota. Hope idzi dzaipangidza kuti iyena waizoonazve hama dzake uye kuti mugariro wake waizocinja. Uye ndizvonadi zvakaitika. Zuzee paainga ano makore 37, zvaakorota zvakatanga kudzadzika nge mushobo unoshamisa!—Ge. 37:7, 9, 10; 42:6, 9.

7. Maererano na 1 Pedru 5:10, cinyi cicatibetsera kushingirira miedzo?

⁷ Zvatinofunda. Tinozviziya kuti nyika ino ine utsinye uye anhu anotibata zvisikazi  kunaka. Kunyazi hama kana hanzvadzi dzingakwanisa kutishaishira. Asi kana tikaona Djehovha hingana buwe uye citiziro cedu, atizoori mwoyo kana kusiya kumuseenzera. (Pis. 62:6, 7; erengai 1 Pedru 5:10.) Edzuriraiwo kuti Zuzee wainga ano makore 17 Djehovha paakamubata zvakanaka. Zviri pamhene kuti Djehovha anogonda aseenzi ake ecidjaha. Nyamasi uno, ana adoko akaita hingana Zuzee. Aona anotendawo muna Djehovha. Amweni awo akasungwa zvisikazi kusisira nge ndaa ye kugondeka kawo kuna Mwari.—Pis. 110:3.

8. Cinyi cakaitika kuna Noemi na Rute?

⁸ Nge ndaa ye nzara yakakura, Noemi no mhuri yake akasiya nyumba yawo ku Djudha akaenda koraramira ku Moabhi. Mwamuna wa Noemi Erimereki wakafa uye wakasiya Noemi no ana airi. Ngo kuhamba ke nguwa, aona akazoroora anakadzi e ku Moabhi, Rute na Orpa. Paa padarika makore gumi, ana a Noemi akafawo, uye iyena wakasara asina ana. (Rut. 1:1-5) Rangarirai kurhwadziwa kakaita anakadzi atatu aya! Zvezvirokwazvo Rute na Orpa akazowakwazve. Ngekudaro, ndiyani waizozwira usisi Noemi? Noemi wakaora mwoyo zvekuti pa nguwa imweni iyena wakati: “Musandidaidze kuti Noemi. Asi ndidaidzei kuti Mara, ngekuti Wemasimbaese akaita kuti ndirhwadziwe maningi nge upenyu.” Zvineso izvi zvaa zvapera, Noemi wakasanangura kuhwirira ku Bheterehema, uye Rute wakaendawo naye.—Rut. 1:7, 18-20.

9. Maererano no tsamba ya Rute 1:16, 17, 22, Rute wakabetsera kudini Noemi?

⁹ Cinyi cakabetsera Noemi? I rudo rakagondeka. Ngo muezaniso, Rute wakapangidza rudo rakagondeka kuna Noemi, nge kumucengeta. (Erengai Rute 1:16, 17, 22.) Ku Bheterehema, Rute wakaseenza no simba pakupsvaka tsangwa kuitira kuti iyena na Noemi aone zvokurhya. Migumisiro yakhona, Rute wakaona makomborero.—Rut. 3:11; 4:15.

10. Djehovha akapangidza kudini rudo kune anhu aikonerhwa zvekurhya hingana Noemi na Rute?

¹⁰ Djehovha akapasa aIsraeri mutemo we usisi kune aya ainga arombo hingana Noemi na Rute. Djehovha akati kune anhu ake, kana akakorora zvainga zvarimwa, aidikana kusiira tsangwa kuitira kuti arombo azooenda koopsvaka tsamgwa. (Re. 19:9, 10) Hino Noemi na Rute aazi kudikana kuti akumbire zvekurhya. Aona aikwanisa kuona zvekurhya nge mushobo inokudzwa.

11-12. Bhoazi wakapasa kudini Noemi na Rute cikonzero cekuti apfare?

¹¹ Muridzi we munda waitsangudzwa ndi Rute, waizwi Bhoazi. Iyena wakabaiwa mwoyo nge kugondeka ka Rute kuna Noemi nge rudo raakapangidzira cezana wake, zvekuti wakahwirinza nhaka yawo ye mhuri uye wakatora Rute kuti agare mukadzi wake. (Rut. 4:9-13) Kazado ii yakabara mwana uye zina rake raizwi Obhedhi, iyena wakagara tsekuru wa Mambo Dhavhidhi.—Rut. 4:17.

¹² Rangarirai mupfaro wa Noemi paakabata Obhedhi ecidurura kutenda kake kuna Djehovha! Asi zviciri kuuya zviro zvakanakisisa kuna Noemi na Rute. Pa rumuko, acafunda kuti Obhedhi wainga tsekuru wa Mesiya Akapikirhwa Djesu Kristu!

13. Ngazvipi zvatinofunda pa zviro zvakaitika kuna Noemi na Rute?

¹³ Zvatinofunda. Patinosongana no miedzo, tingakwanisa kuzwa tisina simba. Pamweni tinorangarira kuti matambudziko edu aakwanisiki kupera. Pa nguwa ii, tinodikana kunyasa kugonda Baba edu e kudenga, uye torumbwa tiri dhuze no hama dzedu dzatinonamata nadzo. Zviri pamhene kuti Djehovha aadusi matambudziko  edu, asi anotipasa gwanza rekubuda naro. Ngo muezaniso, Djehovha aazi kuunzisa mwamuna wa Noemi, uye ana ake ainga akafa. Asi ayena acabetsa, pamweni nge zviito zve rudo zvecipangidzirhwa nge hama dzedu dzatinonamata nadzo.—Zvi. 17:17.

14. Ngazvipi zvakaita kuti muRevhita aore mwoyo?

¹⁴ Mutari we Pisarema 73 wainga muRevhita. Iyena wakaona makomborero ekuseenzera pa mbuto ye kunamatira Djehovha. Kunyazi zvakadaro, pano nguwa imweni yaakaora mwoyo mu upenyu wake. Ngei? Iyena wakatanga kuzonda anhu aiita zviro zvakashata uye aidzikudza, haiwa nge zviro zvakashata zvaiita, asi nge kuda ke kubudirira kawo. (Pis. 73:2-9, 11-14) Anhu awona aiita hingana ano zviro zvese—upfumi, upenyu wakanaka, uye pasina zvineso. Zviro izvi zvakaodza mwoyo mutari we Pisarema uye wakazoguma pakuti: “Zvezvirokwazvo apana zvazvinobetsera kurumbwa ndakaperera mu mwoyo uye kucenesa kandakaita nyara dzangu dzakacena.” Zviri pamhene kuti wainga ari pa ngozi yakakura maningi.

15. Maererano na Pisarema 73:16-19, 22-25, mutari we pisarema iri wakakunda kudini kuora mwoyo?

¹⁵ Erengai Pisarema 73:16-19, 22-25. Mu Revhita “wakapinda mu tempro ya Mwari.” Pamweni imona ari pakati pe anhu aainamata nawo, wakakwanisa kuongorora migariro yake zvakadjeka eciseenzesa munamato. Iyena wakazokwanisa kuona kuti murangariro wake wainga we upenzi, zvokutoti wainga ootora gwanza rino ngozi raimuendesa kure na Djehovha. Asi iyena wakazoona kuti anhu akashata ari “pa mbuto inoteedza” uye acaguma pa “magumo anothyisa.” Kuti asie sure shanje uye kuora mwoyo, mutari we pisarema waidikana kuona zviro nge maonero a Djehovha. Nge kuita izvona, iyena wainga ano runyararo hingana kare uye waipfara. Iyena wakati: “Kusiya [Djehovha] apana candinoda pa nyika.”

16. Ngazvipi zvatinofunda kubva pa muRevhita?

¹⁶ Zvatinofunda. Ngatisamboitire shanje anhu akashata paanonga eciita hingana kuti  arikubudirira. Mupfaro wawo nge we cinguwa cidoko basi, awona aazorarami nokusikaperi. (Mup. 8:12, 13) Kana tikaitira shanje tinonga tecipika kuora mwoyo uye kudziparadzanisa na Djehovha. Hino, kana mecitira shanje anhu akashata anoita hingana arikubudirira, teedzerai zvakaizwa nge mu Revhita. Zwirai Djehovha uye shamwaridzanai no anhu anoita kuda ka Djehovha. Kana Djehovha ari mupfaro wenyu, imwimwi mucagumira mupfaro wezvirokwazvo. Uye mucarumbwa muri mu gwanza re “upenyu kamare.”—1Ti. 6:19.

17. Zviro zvipi zvakaita kuti Pedru aore mwoyo?

¹⁷ Mu phostori Pedru wainga mwanarume wakabamba, asi nguwa dzimweni waikasika kureketa mazwiro ake. Migumisiro yakhona, iyena wakazoreketa kana kuita zviro zvaaizotsumba. Ngo muezaniso, Djesu paakabhuya kune aphostori ake kuti ayena aizoshupwa uye ouraiwa, Pedru wakamubata muromo eciti: “Azvingamboitiki kamuri.” (Mt. 16:21-23) Djesu akagadzirisa marangariro a Pedru. Anhu paakauya kuzosunga Djesu, Pedru wakaita zviro zvekudjambwaika, zvokuti wakagura nzee ye museenzi we mudiri. (Ju. 18:10, 11) Aponazve, Djesu akagadzirisa mu phostori uu. Mukutunhudzira Pedru wainga adzikudza kuti kunyazi aaphostori amweni karamba Kristu, iyena wainga asikazomurambi! (Mt. 26:33) Asi kunyanya kudzigonda uku, kakaita kuti atye anhu, uye Pedru wakaramba Tenzi wake katatu. Izvi zvakamuodza mwoyo uye “wakabuda ocema zvinosiririsa.” (Mt. 26:69-75) Pamweni iyena wakadzibvunzisa kuti Djesu aizondirekerera here.

18. Djesu akabetsera kudini Pedru paainga akaora mwoyo?

¹⁸ Kunyazi zvakadaro, Pedru aazi kusiya kuti kuora mwoyo kumurembese pa kuseenzera Djehovha. Uye masure mekuita izvi, Pedru wakazoenderera mberi pa kuseenzera Djehovha pamwepo no aphostori amweni. (Ju. 21: 1-3; Zvi. 1:15, 16) Cinyi cakaita kuti adaro? Nge dii rimweni, Djesu ainga aita munamato kuitira kuti kutenda ka Pedru kusapere, uye Djesu akakohomedzesa Pedru kuti awhirire koobambisa hama dzake. Djehovha akadaira munamato uu we pa mwoyo. Nge kuhamba ke nguwa, Djesu akaenda kuna Pedru, kuti amubambise. (Ru. 22:32; 24:33, 34; 1Ako. 15:5) Mu masure mekuti aphostori apedza usiku wese eciedza howe uye asikazi kubata ciro, Djesu akadzipangidza paainga ari. Pa nguwa iyona Djesu akapasa mukana Pedru kuti abambisa rudo rake kaari. Djesu akarekerera shamwari yake yaaida uye akamupasa basa rakakura.—Ju. 21:15-17.

19. Pisarema 103:13, 14 inotibetsera kudini kuona zvishaishi zvedu nge maonero a Djehovha?

¹⁹ Zvatinofunda. Mushobo waakabata nawo Pedru, zvinopangidza usisi wa Djesu, uye zvinopangidza pamhene zvakaita Baba ake. Hino kana tikashaisha, atidikani kudzitonga isusu pacedu kupinda kariro. Tinodikana kuedzurira kuti Sathani unoda kuti titendere mazwiro akadaro. Panokuita izvona, ngatidziongorore kuti tidzione—pamwepo no aya anotishaishira—kuti tiabate teciteedzera rudo ra Baba edu e kudenga Djehovha.—Erengai Pisarema 103:13, 14.

20. Ngazvipi zvaticaona mu fundo inoteera?

²⁰ Miezaniso ya Zuzee, Noemi na Rute, mu Revhita, uye Pedru, inotibambisa kuti “Djehovha ari dhuze no aya akaora mwoyo.” (Pis. 34:18) Nguwa dzimweni anotendera kuti tisongane no miedzo uye kuti tizwe kuora mwoyo. Kunyazi zvakadaro, tinoshingirira miedzo no rubetso ra Djehovha, uye kutenda kedu kunobambiswa. (1Pe. 1:6, 7) Mu fundo inoteera, ticaonazve kuti Djehovha anotsigira kudini anhu ake akagondeka akaora mwoyo, pamweni nge kushaisha kawo kana kuti nge migariro ye zviro yakashata.