1, 2. Бо статьяга чүнү сайгарар бис?

ЧУРТТАЛГАВЫСТЫҢ кысказын болгаш хилинчек-биле долганын бодап кээривиске, муңгаранчыг апаар (Иов 14:1). Бурунгу үеде Иегованың хөй бараалгакчылары база ындыг минниишкиннерни миннип, чамдыызы безин өлүрүн күзеп чораан (3 Хн. 19:2—4; Иов 3:1—3, 11; 7:15, 16). Ынчалза-даа оларның идегеп чорааны Иегова Бурган оларны оожургадып, быжыглап турган. Оларның төөгүлери бисти оожургадыр база бир-ле чүүлге өөредир дээш, Библияда бижиттинген (Рим. 15:4).

² Бо статьяга бергелерге таварышкаш, ундарап чораан Иегованың бараалгакчыларының дугайында көөр бис. Оларга Иаковтуң оглу Иосиф, дулгуяк Ноемин болгаш ооң керни Руф, 72-ги Ырны бижээн левит база Пётр элчин хамааржыр. Иегова оларга күштү канчаар берип турган? Оларның үлегеринден чүнү өөренип ап болур бис? Бо айтырыгларның харыызы Иегова «аажок муңгараан улуска чоок; сагыш-сеткили бастырган улусту камгалап турар» деп бисти бүзүредип турар (Ыд. ыр. 33:19).

3, 4. Иосиф аныяк турда, чүү болганыл?

³ Иосиф 17 хире харлыг тургаш, Бургандан ийи дүш көрген. Ол дүштеринден Иосиф бедик эрге-дужаал ээлээриниң дугайында база ооң кады-төрээннери ону хүндүлээр болур деп билип алган (Э. д. 37:5—10). Ынчалза-даа ол дүштерниң соонда Иосифтиң чуртталгазы долузу-биле өскерли берген. Ооң акылары ону көрбестей бергеш, Египетке кул болур кылдыр садыпкан  (Э. д. 37:21—28). Чоокта чаа-ла ачазының эрге-чассыг турган оглу ам кээп, Египетке дүрзү-бурганнарга чүдүүр Потифар деп дүжүметтиң кулу апарган (Э. д. 39:1).

⁴ Ооң-биле Иосифтиң бергелери төнмээн. Потифарның кадайы «Иосиф мени күштээр деп турду» деп нүгүлдээн (Э. д. 39:14—20; Ыд. ыр. 104:17, 18). Ооң ашаа ол херекти сайгарбайн-даа, Иосифти кинчилээш, кара-бажыңче киир октапкан. Бодап көрүңер даан, ындыг кончуг үүлгедигге буруудаттырган аныяк оол чүнү миннип турганыл? Ол болуушкуннуң соонда Иосифтиң Бурганы Иегованың дугайында кандыг чугаалар чоруп турганыл? Ол бүгү чүүл Иосифтиң сеткилин аартып турган.

5. Ундаралга алыспазынга Иосифке чүү дузалап турган?

⁵ Иосиф кул-даа тургаш, кара-бажыңга-даа олургаш, байдалды өскертип шыдавас турган. Ынчалза-даа ол кылып шыдавас чүүлүн эвес, а кылып шыдаар чүүлүнче кичээнгей салып турганы аңаа ундаралче кирбезинге дузалап турган. А эң чугула чүүл дээрге, Иегова Иосифтиң чуртталгазында кол черни ээлеп турган. А Иегова «Иосиф-биле кады болгаш, ол чүнү-даа кылырга, шупту чүве чогуп бүдүп турган» (Э. д. 39:21—23).

6. Иосифти Бургандан көрген дүштери канчаар оожургадып турган?

⁶ Оон ыңай Бургандан көргени ийи дүжү Иосифке күштү берип турган. Оларның дугайында боданып тургаш, кажан-бир өг-бүлези-биле катап ужуражып, байдал экижип кээр деп, Иосиф идегеп турган. Шак-ла ынчаар болган. Иосиф 37 хире харлыг турда, ооң дүштери кайгамчык арга-биле күүсеттинип эгелээн! (Э. д. 37:7, 9, 10; 42:6, 9).

7. 1 Пётр 5:10-дан алырга, шенелделерге быжыг туруштуг артарынга биске чүү дузалаар?

⁷ Моон чүнү өөренип ап болур бис? Бо делегей каржы болгаш кижилер биске хамаарыштыр чөптүг эвес алдынар деп, Иосифтиң дугайында төөгү биске сагындырып турар.  Чыышта акы-угбаларывыс безин биске аарышкыны чедирип болур. Бир эвес Иегова бистиң Чалым-Хаявыс болгаш Хоргадалывыс болза, бис ундаралга алыспайн, Аңаа бараалгаарын соксатпас бис (Ыд. ыр. 61:7, 8; номчуптуңар: 1 Пётр 5:10). Иосиф 17 харлыг тургаш, Бургандан дүштерни көрген деп утпаалыңар. Оон алырга, аныяндан тура Аңаа бараалгап чоруур улустарга Иегова бүзүреп турар деп көскү. Бөгүн база дыка хөй аныяк оолдар-кыстар, Иосиф ышкаш, Иеговага бүзүреп чоруур. Оларның чамдыызы, Бурганга шынчы болуп турары дээш, кара-бажыңда олуруп чоруур (Ыд. ыр. 109:3).

8. Ноемин биле Руфтуң чуртталгазында чүү болган?

⁸ Коргунчуг аш-чут болурга, Ноемин бодунуң өг-бүлези-биле Иудада бажыңын каапкаш, Моавче чорупкан. Аңаа Ноеминниң ашаа Элимелех чок апарган. Ол ийи оглу Махлон болгаш Хилеон-биле кады артып калган. Үе эрткенде, ооң оолдары моав чурттуг Руф биле Орфага өгленип алган. Он хире чыл эрткенде, ажы-төлденип четтикпейн чыткаш, Махлон биле Хилеон база чок апарган (Руф 1:1—5). Бодап көрүңер даан, кайы хире коргунчуг ажыг-шүжүгнү ол үш херээжен чурттап эрткен-дир! Руф биле Орфа катап база ашакка барып ап болур турган. Ынчалза-даа назылай берген Ноеминниң дугайында кым сагыш човаарыл? Ол болза-даа ундарап, ажыг-шүжүгге алзып турган, ол безин мынча дээн: «Мени Ноемин деп адаваңар, а Мара деп адаңар, Күчүлүг Бурган мээң салым-чолумну ажыг-човалаңныг, аар-берге кылдыр чаяаган». Ажыг-шүжүгге алыскан Ноемин Вифлеемче чоруур деп шиитпирлеп алган, Руф база ооң-биле кады чорупкан (Руф 1:7, 18—20).

9. Руф Ноеминниң дугайында канчаар сагыш човааныл? (Руф 1:16, 17, 22).

⁹ Ноеминге чүү дузалаан? Иегованың болгаш Руфтуң бердинген ынакшылы. Чижээ, Руф бодунуң кунчуузун чааскаандырзын кагбаан. (Номчуптуңар: Руф 1:16, 17, 22.) Вифлеемге баргаш, Руф кызымаккай ажылдап турган — бодунга база Ноеминге арбайның артынчызын шөлден чыып ап турган. Түңнелинде ол улустуң мурнунга бүдүштүг херээжен кылдыр көстүп, эки атты чаалап алган (Руф 3:11; 4:15).

10. Иегова чединмес улуска, ооң санында Ноемин биле Руфка, Бодунуң ынакшылын канчаар көргүскенил?

¹⁰ Иегова чединмес улусту бодап, чонунга мындыг хоойлуну берген: «Бодуңарның чериңерге дүжүт ажаап тура, шөлүңерниң кыдыын чедир ажаавайн, арттырып калыңар база ажаап турар тарааңар черже кээп дүжер болза, чыгбаңар» (Лев. 19:9, 10). Ооң ачызында Ноемин биле Руф боттарынга хүндүткелди чидирбейн, аъш-чемни тып ап болур аргалыг турган.

11, 12. Ноемин биле Руф Воозтуң ачызында өөрүшкүнү канчаар алганыл?

¹¹ Руфтуң арбай чыып ап турган шөлүнүң ээзи Вооз дээр бай кижи болган. Ол Руфтуң Ноеминге көргүскен бердинген ынакшылын көргеш, дыка магадаан. Вооз оларның бүгү хуу-өнчүзүн садып алгаш, Руфту кадай кылдыр ап алган (Руф 4:9—13). Олар Овид дээр оолдуг болган. Ол болза Давид хаанның кырган-ачазы бооп турар (Руф 4:17).

¹² Бичии чаш Овидти Ноемин холунга тудуп алгаш өөрүп, сеткилиниң ханызындан Иеговага четтиргенин илередип турганын сагыштаалап болур бис! Ынчалза-даа Ноемин биле Руфту оон-даа улуг аас-кежик манап турар. Олар дирлип келгеш, Овид аазаттынган Мессияның, Иисус Христостуң, ада-өгбези болган деп чүүлдү билип каарлар!

13. Ноемин биле Руфтуң дугайында төөгүден чүнү өөренип алыр бис?

¹³ Моон чүнү өөренип ап болур бис? Шенелделерге таварышкаш, хей-аъдывыс кудулап,  ундаралче кире берип болур бис. Тургустунуп келген байдал шиитпирлеттинмес ышкаш кылдыр сагындырып болур. Ындыг таварылгаларда дээрде Адавыска долузу-биле идегеп, акы-угбалар-биле аралажыр болзувусса эки. Иегова чамдыкта шупту бергелерни шиитпирлевес. Чижээ, Ноеминге ооң ашаан база оолдарын Ол дедир эгидип бербээн. Ынчалза-даа Иегова биске буянныг ажыл-херектерни кылып турар акы-угбалар таварыштыр дузалап турар (У. ч. 17:17).

14. Бир левит чүү дээш ундарап эгелээнил?

¹⁴ 72-ги Ырны левиттерниң бирээзи бижээн. Ол Бурганның өргээзинге бараалгаар улуг алдар-хүндүлүг болган. Ынчалза-даа ол ундарап эгелээн. Чүге? Ол бузуттуг улустуң аянныг амыдыралын көргеш, оларга адааргап эгелээн. Оларның шупту чүүлү бар ышкаш кылдыр сагындырган. Оларның каас-коя чуртталгазын көргеш, ыр күүседикчизи ундараанындан безин «чүрээмни хей-ле арыглап ап, холдарымны кем-буруу чок чоруумга хей-ле чуп ап чораан мен» деп чугаалаан (Ыд. ыр. 72:2—9, 11—14). Ооң Бурган-биле найыралы кошкай берген деп бо сөстерден илдең.

15. Ундаралды ажып эртип алырынга левитке чүү дузалаан? (Ырлар 72:16—19, 22—25).

¹⁵ Номчуптуңар: Ырлар 72:16—19, 22—25. Левит «Бурганның ыдыктыг өргээзинче кире бергеш», аңаа Бурганның бараалгакчыларның аразынга оожургап, бүгү сагыш-сеткилин Бурганга ажыдып болур турган. Ол шын эвес боданып, буттары бичии-ле болза тендирий бээр часканын билип каан. Оон аңгыда, бузуттуглар тайгыр орукта турар, а сөөлүнде барып, буурап дүжүп каар деп, ол билип каан. Оларга адааргавайн, ундаралдан адырлып алырда, левит шупту чүвеже Иегованың караа-биле көөр ужурлуг турган. Ол шак ынчаар кылгаш, катап база өөрүшкүлүг болгаш аас-кежиктиг апарган. Оон ол Иеговага мынча дээн: «Сээң-биле кады тургаш, чер-делегейниң чүзүн-даа күзевес мен».

16. Левиттиң чижээ бисти чүү чүвеге өөредип турарыл?

¹⁶ Моон чүнү өөренип ап болур бис? Бузуттугларның магалыг амыдыралынга кажан-даа адааргаваалыңар. Чүге дизе оларның аас-кежии түр када база оларның келир үези чок  (Эккл. 8:12, 13). Оларга адааргап эгелээр болзувусса, ундарааш, безин Иегова-биле найыралывысты чидирип ап болур бис. Ынчангаш бузуттуг улустуң «чедиишкиннеринге» адааргап эгелээр болзувусса, левит ышкаш алдынар болза эки. Дээрде Адавыстың сүмезин үргүлчү дыңнап, Ооң күзел-соруун күүседип чоруур улус-биле аралажып чоруңар. Бир эвес Иеговага чүүден-даа артык ынак боор болзуңарза, силер ёзулуг аас-кежиктиг бооп, «алыс шын амыдыралдың» оруундан өскээр барбас силер (1 Тим. 6:19).

17. Пётр чүү дээш ундарап болур турган?

¹⁷ Пётр элчин дыка идепкейлиг кижи чораан. Ынчалза-даа ол алыс боду дүрген кижи болгаш, чамдыкта шын эвес чүүлдерни азы херектерни кылыптар турган. Чижээ, кажан Иисус хөй хилинчекти көрүп эртер ужурлуун база өлүртүп каарын элчиннерге чугаалаарга, Пётр: «Дээрги! Канчап ындыг боорул! Ындыг чүве Силер-биле болбас ужурлуг!» — деп аңаа чөрүже берген (Мф. 16:21—23). Ол дээш Иисус Пётрну чемелээн. А кажан мөөң чон Иисусту тудуп алыр дээш халып кээрге, Пётр бичии-даа боданмайн, хылышты ушта тырткаш, Бурганның дээди бараалгакчызының чалчазының оң талакы кулаан одура шаапкан (Ин. 18:10, 11). Иисус база катап элчинни чемелээн. А бир катап Пётр Иисуска: «Улус Силерден шупту-даа ойталаар болза, мен кажан-даа ынчанмас мен!» — деп мактанган (Мф. 26:33). А соонда барып, Пётр улустан корткаш, Иисустан үш катап ойталаан. Ол муңгараанындан ишкирнип ыглай берген (Мф. 26:69—75). «Иисус мени кажан-бир өршээр ирги бе?» дээш ол сагышсырап турган боор.

18. Иисус Пётрга ундаралды ажып эртеринге канчаар дузалаан?

¹⁸ Пётр ундарап-даа турган болза, Иеговага бараалгаарын соксатпаан. Ол частырыгларны кылып чораан-даа болза, алыс шынның оруундан чандыр баспайн, өске элчиннер-биле кады бараалгаарын уламчылаан (Ин. 21:1—3; Аж.-ч. 1:15, 16). Аңаа чүү дузалаан? Пётр Иисустуң сөстерин дыка эки сактып турган: «Ынчалза-даа  Мен сен дээш, бүзүрелиң читпези дээш, мөргүп турдум. А сен ооң соонда, Менче катап эглип келгеш, ха-дуңмаң быжыктырып көр». Соонда Иисус дирлип келгеш, Пётрнуң хей-аъдын көдүрер дээш, аңаа көзүлген (Лк. 22:32; 24:33, 34; 1 Кор. 15:5). А ооң соонда Иисус хондур балыкты тудуп чадап каан каш элчиннеринге көзүлген. Бо удаада Иисус Пётрга ол аңаа кайы хире күштүг ынаан чугаалаар арганы берген. Иисус бодунуң бердинген эжин өршээп, аңаа оон-даа хөй ажылдарны дагзып каан (Ин. 21:15—17).

19. Боттарывыстың бачыттарывысче Иегованың көрүжү-биле көрүп өөренип алырынга Ырлар 102:13, 14-те сөстер канчаар дузалаар?

¹⁹ Моон чүнү өөренип ап болур бис? Иисус Пётрга энерелин көргүскен. Иисус тергиини-биле Адазының чараш шынарларын илередип чораан деп билир бис. Ынчангаш частырыгны кылыпкаш: «Иегова мени кажан-даа өршээвес» деп бодавас болзувусса эки. Ынчаар бодаар болзувусса, Эрлик амыраар. Бодувусче база биске удур бачыт кылган улусче дээрде ынакшылдыг, кээргээчел Адавыс ышкаш көрүп өөренип алыылыңар. (Номчуптуңар: Ырлар 102:13, 14).

20. Дараазында статьяда чүнү сайгарып көөр бис?

²⁰ Ноеминниң, Руфтуң, Иосифтиң, 72-ги Ырны бижээн левиттиң болгаш Пётр элчинниң чижээ «Иегова аажок муңгараан улуска чоок» деп бисти бүзүредип турар (Ыд. ыр. 33:19). Бистиң таваржып турар бергелеривисти Бурган чайлатпайн турар, ынчангаш чамдыкта муңгарай берип болур бис. Ынчалза-даа бис ол аар-бергени Иегованың дузазы-биле ажып эртип алыр болзувусса, ынчан бистиң бүзүреливис быжыг боор (1 Пет. 1:6, 7). Бодунуң бачыттыг бүдүжүнден болгаш бергелерге таварышкаш, муңгарап чоруур шынчы бараалгакчыларынга Иегова канчаар дузалап чоруурун дараазында статьядан көөр бис.