1-2. Mwaha ola, ninrowa othokorerya exeeni?

OKATHI mukina ninnoona wira okumi ahu onnaakuva omala ni ‘onnisareya ohawa’. (Yobi 14:1) Nto ninniweha etthu enniiriha okhulumuwa okathi mukina. Arumeyi anceene a Yehova a khalai yaahikhalana muxankiho owo. Akina yaaniphavela okhwa. (1 Mam. 19:2-4; Yobi 3:1-3, 11; 7:15, 16) Masi hata vaari siiso, Yehova, Muluku yoowo yaamuroromela aya aanaamaaliha ni waalipiha. Nto sowiiraneya saya soolempwa mBiibiliyani wira siniixuttiheke.—aRom. 15:4.

² Mwaha ola, ninrowa woona ntakiheryo na mwaana Yakobe iihaniwa Yosefe, naamukhweli Nowemi, mwaara a mwanawe iihaniwa Ruthi, muLevi olempe Esalimo 73 ni murummwa Pedru. Arumeyi awo otheene a Yehova yaahikhalana mixankiho sookhulumula. Nto Yehova aalipinhe sai? Ntakiheryo naya ninniixuttiha exeeni? Waakhuliwa wa makoho awo onimuncererya omuroromela wahu Yehova yoowo onikhala ‘vakhiviru n’ale òtemwa: onniwòpola alipa-òwojeya’.—Esal. 34:19.

3-4. Etthu xeeni yaamwiiranenle Yosefe okathi aari awe mmiravo?

³ Okathi Yosefe aarina awe iyaakha 17, Muluku aahimwiiriha oloha ikwaha piili. Itthu iye Yosefe aalonhe awe saanooniherya wira owo aarowa okhala mutthu ootthuneya ni aamuttittimihiwa ni emusi awe. (Maph. 37:5-10) Masi moohipisa nuumala oloha, makhalelo a Yosefe yaahiturukeya moomalela. Ohiya omuttittimiha, axinnawe Yosefe yaahimutumiha. Nto aahikhala epottha etthoko ya mukhulupale a wExiitu iihaniwa Potifari. (Maph. 37:21-28) Moohipisa, Yosefe aahihiya okhala mwaana oophentiwa ni tiithi awe, khukhala epottha yahooneliwa vatthu wExiitu, onvarelaka muteko mulopwana ahaamusuwela Yehova.—Maph. 39:1.

 ⁴ Moottharelana, mikhalelo sa Yosefe saahitepa oxankiha. Mwaara a Potifari aahimootherya wira aaphavela omurupiha. Masi Potifari khaaphavenle osuwela akhala wira itthu Yosefe aahimyaniwa awe saari sekeekhai wala nnaari. Ohiya-vo, owo aahimurihela mukhatteya ni oruma otthukiwa ni ikwirinti. (Maph. 39:14-20; Esal. 105:17, 18) Yosefe aari mmiravo. Vano nkahaya muupuwele moota oonenle awe vaavo ootheriwa awe wira aaphavela omurupiha muthiyana ole. Ohiya-vo, atthu akina yaarowa omoonela sai Yehova nuumala osuwela wootheriwa iwo? Moohaanyiherya, saahikhala itthu sinceene saamukhulumula Yosefe.

5. Yosefe aawenrye sai oxintta okhulumuwa?

⁵ Okhala wira Yosefe aari epottha ni muhoolo mwaya aahiriheliwa mukhatteya, khiivo etthu aakhanle awe oopaka wira orukunuxe muxankiho awe. Nto etthu xeeni yaamukhalihenrye okhalana moonelo wooloka? Ohiya owehexexa mixankiho sawe ni itthu ahaawerya awe opaka, Yosefe aanivara saana miteko aavahiwa awe. Otepexa wene, Yosefe aaniimananiha omusiveliha Yehova, mutthu aari ootepexa otthuneya mookumini mwawe. Nto Yehova aahikhaliherya wira itthu sotheene Yosefe aapaka awe sikhumeleke saana.—Maph. 39:21-23.

6. Itthu Yosefe aalonhe awe saamukhalihenrye sai?

⁶ Etthu ekina yaamukhalihenrye Yosefe ohikhulumuwa waari wuupuwela itthu aalonhe awe iyaakha vakhaani saavinre. Itthu iye Yosefe aalonhe awe saanooniherya wira aamutthikela waaweha amusi awe ni makhalelo awe yaamuloka. Eyo ti etthu yiiraneyale. Okathi Yosefe aarina awe iyaakha 37, itthu aalonhe awe saahipacerya wiiraneya mwa enamuna yootikiniha!—Maph. 37:7, 9, 10; 42:6, 9.

7. Moovarihana ni 1 Pedru 5:10, exeeni enrowa onikhaliherya okathi ninkumana ahu mixankiho?

⁷ Itthu nniixutta ahu. Yowiiraneya ya Yosefe enninuupuxerya wira olumwenku ola ti wootakhala ni wira atthu akina pooti onithokorerya moohixariya. Nave munna wala murokora  pooti oniwereiha murima. Masi akhala wira nnonwehexexa Yehova okhala Mwala ahu wala Ntthyawelo nahu, khaninrowa okhulumuwa nnakhala ohiya omurumeela. (Esal. 62:7, 8; mmusome 1 Pedru 5:10.) Muupuweleke wira Yehova aahimwiiriha Yosefe oloha itthu sa vameekhaaya okathi aarina awe iyaakha 17. Vannooneya wira Yehova onnaaroromela oratteene amiravo animurumeela. Olelo-va, amiravo anceene khanihiya ororomeleya wa Muluku hata arowaka otthukweliwa mukhatteya ntoko Yosefe.—Esal. 110:3.

8. Etthu xeeni yaamukhumelenle Nowemi ni Ruthi?

⁸ Okhala wira khiyaareere ovola etala oYuda, Nowemi ni emusi awe yaahithaamela oMowabi. Akhalaka elapo ele, iyawe Nowemi iihaniwa Elimeleki aahikhwa. Vano Nowemi aahanle paahi ni anaawe anli axilopwana. Nuuvira okathi, anamwane ale anli a Nowemi yaahaathela athiyana a oMowabi, mmosa iihaniwa Ruthi mukina iihaniwa Orpa. Nuuvira iyaakha 10 muhoolo mwaya, anamwane oowanli a Nowemi yaahikhwaasa ahaayanre anamwane. (Ruth. 1:1-5) Nkahaya muupuwele moota yaariipiwe aya murima athiyana ale araru yaakhweliwe! Ekeekhai wira Ruthi ni Orpa yanwerya otthikela otheliwa. Masi Nowemi aahuuluvala, nto tani aarowa omukhapelelaka? Okathi omosa Nowemi aahiriipiwa murima mpakha ohimya wira: “Muhikìhané-tho Nowemi: mukìhaneke Mara, okhala wira Apwiya òweryexa kharere okihaxa”. Oriipiwe ene murima vanceene, Nowemi aahithanla otthikela oBethelehemu, nto Ruthi aahimutthara.—Ruth. 1:7, 18-20.

9. Moovarihana ni Ruthi 1:16, 17, 22, Ruthi aamulipinhe sai Nowemi?

⁹ Etthu xeeni yaamukhalihenrye Nowemi okathi ole wooriipiha murima? Ophenta wekeekhai. Mwa ntakiheryo, Ruthi aahooniherya wira aanimphenta Nowemi ni murima wotheene ohihiyaka omutthara. (Mmusome Ruthi 1:16, 17, 22.) Nuumala ophiya oBethelehemu, Ruthi aaniimananiha vanceene ovara muteko ottottaka yoolya wira ophwanyeke yoolya yena ni Nowemi. Mwaha wa mweettelo awe wooloka, Ruthi aanittittimihiwa vanceene.—Ruth. 3:11; 4:15.

10. Moota xeeni Yehova oonihenrye awe wira aanaaphenta atthu oohaawa ntoko Nowemi ni Ruthi?

¹⁰ Yehova aahaavaha aIsarayeli nlamulo na ottotta soolya saamora okathi woohepha, nlamulo nno noophenta naanaakhaliherya vanceene atthu oohaawa ntoko Nowemi ni Ruthi. Nlamulo nne naahimya wira khivaareerela ohepha soolya sotheene ni iye saamora yaahaana ohiya wira atthu oohaawa attotteke. (Onam. 19:9, 10) Okhala wira naahikumiheriwa nlamulo nne, Nowemi ni Ruthi yaaniphwanya yoolya mwa nttittimiho ohiya orowa oveka esimola.

11-12. Bowazi aamukhalihenrye sai Nowemi ni Ruthi?

¹¹ Ematta emosa Ruthi aattotta awe yoolya yaari ya mulopwana oothaaciri iihaniwa Bowazi. Nto Bowazi aahisiveliwa vanceene ni ophenta wekeekhai Ruthi aamoonihenrye awe Nowemi. Tivonto, muhoolo mwaya Bowazi aahithuma soohiyeriwa sa emusi ele ni aahimuthela Ruthi. (Ruth. 4:9-13) Moottharelana Bowazi ni Ruthi yaahimuyara mwaana iihaniwa Obedi, yoowo aari muhavinre awe Mwene Davidi.—Ruth. 4:17.

¹² Nkahaya muupuwele moota Nowemi aahakalanle awe vaavo aamukunxe awe Obedi, onamuxukhurela Muluku ni murima wotheene. Masi sookhala itthu soohakalaliha sinrowa wiiraneya muhoolo. Okathi Nowemi ni Ruthi anrowa aya ohihimuxiwa anoosuwela wira Obedi aari muhavinre awe Yesu Kristu, Mesiya aaleiheriwe.

13. Itthu xeeni sa faita nniixutta ahu ni yowiiraneya ya Nowemi ni Ruthi?

¹³ Itthu nniixutta ahu. Mixankiho sikina pooti onikhulumula vanceene mpakha onriipiha murima. Sikina pooti oniiriha wuupuwelaka wira khannoona yoopaka. Okathi owo nihaana omuroromela  moomalela Tiithi ahu a wiirimu ni waavarexexa anna ni arokora. Ekeekhai wira Yehova khonrowa omaliha mixankiho sahu. Nkahaya muupuwele ele yaamwiiranenle Nowemi. Yehova khaamuhihimunxe iyawe Nowemi, nnakhala anaawe ale anli aaxilopwana. Hata vari siiso, Yehova onoonikhaliherya aarumeelaka anna ni arokora ooreera murima.—Mir. 17:17.

14. Etthu xeeni yaamwiirinhe muLevi okhulumuwa?

¹⁴ Mulipa olepa Esaalimo 73 aari muLevi. Owo aahikhalana eparakha ya vameekhaaya ya orumeela Empa aakokhoreliwa Yehova. Masi, okathi omosa wa okumi awe aahikhulumuwa vanceene. Mwaha wa xeeni? Mwaha woowi, owo aahipacerya waakhalela nrima atthu ootakhala ni oowiixinnuwiha, owo khaakhalela nrima otakhala waya, masi aakhalela nrima mwaha woowi yaakhala ntoko wira yaanikhumela saana mookumini mwaya. (Esal. 73:2-9, 11-14) Vaakhala ntoko wira yaahikhalana itthu sotheene yaaphavela aya, ntoko musurukhu, okumi wooloka ni yaakhala ntoko wira khiyaaxanka. Okhala wira nasaalimo ole uupuwela wira atthu ootakhala yaanikhumela saana owo aahikhulumuwa vanceene mpakha ohimya so: “Vano-nto miyo kirènre murima mahalene? Kisunke siyo matat’aka òrera?” Vannooneya wira waamini wa nasaalimo ole waahivukuwa ni aahanle vakhaani ohiya omukokhorela Yehova.

15. Moovarihana ni Esalimo 73:16-19, 22-25, muLevi aaxinttale sai okhulumuwa?

¹⁵ Musome Esalimo 73:16-19, 22-25. Mulevi ole aahikela empa ya Muluku. Ori ene mpaani mwa Muluku ni atthu akina yaamukokhorela Yehova, muLevi ole aahinvekela Muluku omuleelaka muxankiho awe ni wuupuwela mwa enamuna yooloka ni moomaaleleya. Nto aahoona wira muupuwelo awe waari woololo ni aahipacerya weetta ephiro yootakhala yaarowa omurakameliha ni Yehova. Nave muLevi ole aahoona wira atakhali yeetta “ephiro y’okwattuliha” wala yoothererya, nave emalelo aya yaarowa okhala ‘ehasara yowopiha’. Wira muLevi ole oxintte nrima nawe ni okhulumuwa, aahaana okhalana moonelo wa Yehova. Okathi aapanke awe eyo, owo aahikhalana murettele ni ohakalala. Owo aahimmye so: “Vathí va nkimphavela-tho etthu ekina, kikhalaka ni nyuwo” Yehova.

16. Ntakiheryo na muLevi ninniixuttiha exeeni?

 ¹⁶ Itthu nniixutta ahu. Nihikhala-khale naakhalelaka nrima atthu ootakhala anikhala ntoko wira annikhumela saana. Ohakalala waya khahiyo wekeekhai, ti wa okathi vakhaani ni khanrowa ophwanya ekumi yoohimala. (Mus. 8:12, 13) Waakhalela nrima atthu ntoko awo, pooti oniiriha okhulumuwa ni ohonona waataana wahu ni Yehova. Akhala wira nyuwo munnaakhalela nrima atakhali anikhala ntoko wira annikhumela saana, mpakeke ele muLevi aapanke awe. Nwiriyaneke miruku soophenta sa Muluku ni apatthani anyu akhaleke ale animurumeela Yehova. Nto akhala wira omphenta wanyu Yehova ti wuulupale ovikana itthu sotheene, nyuwo munoophwanya ohakalala wekeekhai. Nave khamunrowa ohiya weetta ephiro eniphwanyiha “ekumi yekekhai”.—1 Tim. 6:19.

17. Itthu xeeni saamwiiriha Pedru okhulumuwa?

¹⁷ Murummwa Pedru aari mutthu a ikuru, masi okathi mukina owo aanilavula khula etthu uupuwela awe. Mwaha wookhalana mukhalelo owo, Pedru aanithanana mwaha wa itthu aahimya awe ni aapaka awe. Mwa ntakiheryo, okathi Yesu aalenle awe arummwa wira anviriha mixankiho, Pedru aahimpwapwela Yesu ohimyaka wira: “Etthu iyo ehokhumeleleni!” (Math. 16:21-23) Nto Yesu aahimukhaliherya Pedru. Muhoolo mwaya okathi ekrupu ya anakhotto yaarwiiye aya onvara Yesu, ohuupuwenle oratteene Pedru aahikwasa niyaru na epottha ya mukhulupale a anamukuttho. (Yoh. 18:10, 11) Nto Yesu aahitthikela omukhaliherya Pedru. Ohiya-vo aahihimya wira khaakhala-khala omuhiyaka Yesu hata arummwa akina yaarowa omuhiya! (Math. 26:33) Masi wiiroromela wawe khiwaavirinhe okathi munceene. Maana moohipisa Pedru aahimukhootta Pwiyawe ikwaha tthaaru. Nto oxankale ene vanceene, Pedru “ahikhumela otá, khunla aripiwene murima vanjene”. (Math. 26:69-75) Woonasa wene Pedru uupuwela wira Yesu khaarowa omulevelela.

18. Yesu aamukhalihenrye sai Pedru oxintta okhulumuwa?

¹⁸ Masi Pedru kheemerenrye wira okhulumuwa wawe omuhiihe omurumeela Yehova. Nuumala  ovonya, Pedru khaahiyale omurumeela Yehova ni arummwa akina. (Yoh. 21:1-3; Mit. 1:15, 16) Etthu xeeni yaamukhalihenrye Pedru oxintta okhulumuwa? Yesu aahivekela wira waamini wa Pedru ohivukuwe, nave aahimutumererya wira nuumala ohokolowa ahaana waalipiha axinnawe. Yehova aahaakhula nivekelo nne. Muhoolo mwaya, Yesu aahimukhumulela Pedru, woonasa wene wira omulipihe. (Luka 22:32; 24:33, 34; 1 aKor. 15:5) Nuumala arummwa oviriha ohiyu wotheene atothaka ihopa khuhivara etthu Yesu aahaakhumelela. Okathi ole, Yesu aahinvaha eparakha Pedru wira ooniherye ni murima awe wotheene wira aanimphenta Yesu. Nto Yesu aahimulevelela murummwa awe ole ni mpatthani awe ni aahinvaha miteko sikina wira ovareke.—Yoh. 21:15-17.

19. Ntoko enihimya aya Esalimo 103: 13, 14, etthu xeeni enrowa onikhaliherya okhalana moonelo wa Yehova voohimya sa soovonya sahu?

¹⁹ Itthu nniixutta ahu. Enamuna Yesu aamuthokorenrye awe Pedru ennooniherya wira aanimmorela ikharari. Nave Yesu aanitakiha mikhalelo sa Tiithi awe. Nto vaavo ninvonya ahu, nihuupuweleke wira noorimeela, maana Satana oniphavela wira nikhalaneke muupuwelo owo woohiloka. Ohiya-vo, nihaana wuupuwela wira Yehova onniniphenta, onnisuwela itthu nihinwerya ahu ni onniphavela onilevelela. Nto nihaana omutakiha yena vaavo nnaathokorerya ahu atthu anninyoonyiha.—Musome Esalimo 103:13, 14.

20. Mwaha onittharelana, ninrowa oweha exeeni?

²⁰ Yowiiraneya ya Yosefe, Nowemi, Ruthi, muLevi ni murummwa Pedru enninikupaliha wira “Apwiya [Yehova] ankhala vakhiviru n’ale òtemwa”. (Esal. 34:19) Ekeekhai wira Yehova onneemererya wira mixankiho sinikhumeleleke. Masi muhiliyale wira vaavo ninvilela ahu, ninnikhumela saana nikhaliheriwaka ni Yehova ni waamini wahu onnitepa olipa. (1 Ped. 1:6, 7) Mwaha onittharelana, ninrowa woona moota Yehova onaakhaliherya awe arumeyi awe oororomeleya yaawo akhulumunwe, woonasa wene mwaha wa soovonya saya wala mixankiho soovelaveliha sinaakhumelela.