1-2. Wetin we go talk about for this article?

SOMETIMES, we fit de think about how our life dey short and how our days full with “so-so trouble.” (Job 14:1) This one de make life tire us sometimes. Many servants of Jehovah for Bible feel like that too. Some of them even want die. (1 Ki. 19:2-4; Job 3:1-3, 11; 7:15, 16) But Jehovah, the God wey they trust, always give them comfort and make them strong. Their story dey for Bible so that as we de read about them, we go fit get comfort and learn from them.​—Rom. 15:4.

² For this topic, we go talk about some servants of Jehovah wey endure many things wey fit make life tire them. People like, Joseph wey be Jacob son, Naomi wey e husband die and e pikin wife wey e name na Ruth, the Levite wey write Psalm 73, and apostle Peter. How Jehovah make them strong? And wetin their story teach us? The answer to this questions go make us dey sure say, “Jehovah dey near people wey de feel say their own don finish,” and “e de save people wey life don tire.”​—Ps. 34:18, ftn.

3-4. Wetin happen to Joseph when e dey young?

³ Joseph dey around 17 years when e dream two dreams, and the two dreams na from God. This dreams show say one day Joseph go be important man wey e family go respect. (Gen. 37:5-10) But small time after e dream, e life change for bad way. Instead wey e brothers go respect-am, they sell-am as slave. After some time, e come be slave to one Egypt man wey e name na Potiphar. (Gen. 37:21-28) Just for small time, Joseph life change complete. E no dey with e papa wey love-am again. E turn to slave for Egypt, and de work  for one man wey no de serve Jehovah.​—Gen. 39:1.

⁴ No be only that one, Joseph still suffer more things. The wife of Potiphar lie say Joseph try to sleep with-am by force. And Potiphar no even ask whether na true, e just put Joseph for prison, and they tie-am with chain. (Gen. 39:14-20; Ps. 105:17, 18) As Joseph still dey young that time, just think of how e go don feel when they talk say e try to sleep with person by force. Just think of the kind bad things wey people go don talk about Jehovah, the God wey Joseph de serve, as they hear wetin happen. True-true, Joseph really get reason to tire for life!

5. Wetin Joseph do so that e condition no go too tire-am?

⁵ As Joseph be slave for Egypt and from there enter prison, e no fit do anything about e condition. Wetin help Joseph make e condition no too tire-am? Instead of Joseph to put e mind for the things wey e no fit do again, e do e best for the work wey they give-am to do. The number one thing wey Joseph do be say, e continue to see Jehovah as the Person wey dey important pass for e life. Because of that one, Jehovah bless everything wey Joseph do.​—Gen. 39:21-23.

6. How the things wey Joseph see for e dreams fit don give-am comfort?

⁶ Another thing wey fit don help Joseph be say, e fit don de think about the things wey Jehovah don make-am see for dream. The things wey e see for dream show say e go see e family again, and e condition go better. And na wetin happen be that. When Joseph dey around 37 years, the things wey e see for e dreams begin happen for wonderful way!​—Gen. 37:7, 9, 10; 42:6, 9.

7. As e dey for 1 Peter 5:10, wetin go help us endure when we de face problem?

⁷ Wetin we learn? The story of Joseph de remind us say this world wicked, and say people go treat us for bad way. Our  brothers or sisters fit even treat us for bad way. But if we see Jehovah as our Rock, or Place wey we fit run enter and get protection, we no go allow life tire us or stop to serve Jehovah. (Ps. 62:6, 7; read 1 Peter 5:10.) Remember say, Joseph fit dey around 17 years when Jehovah show-am those things for dream. This one show clear say, Jehovah trust e servants wey dey young. Today, we get plenty young people wey be like Joseph. They get faith for Jehovah just like Joseph. They don even treat some of them for bad way sotey they put them for prison because they no gree stop to obey God.​—Ps. 110:3.

8. Wetin happen to Naomi and Ruth?

⁸ Because of serious hunger, Naomi and e family comot for the place wey them de live for Judah and move go another land wey the name na Moab. Elimelech wey be Naomi husband die for there, and leave Naomi with their two sons. As time de go, the two sons marry women from Moab. The women wey they marry na Ruth and Orpah. About ten years after, the two sons still die, and they no born any pikin. (Ruth 1:1-5) Just think about the kind pain wey this three women go don feel! Ruth and Orpah fit marry again. But who go take care of Naomi as e don de old? Naomi dey sad sotey one time e talk say: “Make wuna no call me Naomi. Make wuna call me Mara, because the Almighty God don make life really bitter for me.” After all the problem wey Naomi face, e decide to go back to Bethlehem, and Ruth go with-am.​—Ruth 1:7, 18-20.

9. As e dey for Ruth 1:16, 17, 22, how Ruth encourage Naomi?

⁹ Na love wey no de fail help Naomi. For example, Ruth show Naomi love wey no de fail as e no gree leave-am. (Read Ruth 1:16, 17, 22.) For Bethlehem, Ruth work hard to gather grain for e self and Naomi. Because of this one, everybody see-am clear say Ruth na better woman wey de work hard.​—Ruth 3:11; 4:15.

10. How Jehovah show love to people wey need help, like Naomi and Ruth?

¹⁰ One law wey Jehovah give the people of Israel show say e care about poor people, like Naomi and Ruth. E tell e people say when them de harvest the things wey they plant, make they leave some for the corner of the farm for poor people. (Lev. 19:9, 10) Because of this one, Naomi and Ruth no beg for food. They get the food wey they need for correct way.

11-12. Wetin Boaz do to make Ruth and Naomi dey happy again?

¹¹ The man wey get the farm wey Ruth de gather grain from na one rich man wey e name na Boaz. The way Ruth show Naomi love wey no de fail touch Boaz sotey e marry Ruth, and e buy the family land of Naomi back so that Ruth children go fit claim-am for future. (Ruth 4:9-13) Boaz and Ruth born pikin wey e name na Obed. After, na this pikin come be King David grandpapa.​—Ruth 4:⁠17.

¹² Just think of how Naomi go don really dey happy as e carry the pikin for e hand, and pour e heart as e de thank Jehovah for prayer! But Naomi and Ruth go happy more when they go come back to life. That time they go know say na from Obed family the Messiah, wey be Jesus Christ come from!

13. Which important things we fit learn from the story of Naomi and Ruth?

¹³ Wetin we learn? When we de face problem, life fit tire us, and we fit even feel say  our own don finish. Maybe because we no get hope say our condition go better. For that time, make we trust Jehovah our Papa for heaven with all our heart, and near our brothers and sisters for congregation. Na true say Jehovah no de always comot our problem. For example, e no bring back Naomi husband and e sons wey die. But e de use our brothers and sisters to help us cope with our problems. This our brothers de do fine-fine things for us to help us.​—Prov. 17:17.

14. Wetin make one Levite dey sad sotey life tire-am?

¹⁴ The person wey write Psalm 73 na Levite. Because of this one, e get the chance to worship Jehovah for the house of worship. Even with this one, one time for e life, e condition make life tire-am. Why? E begin jealous wicked and proud people, no be because of the bad things wey them de do, but na because e be like say things de go well for them. (Ps. 73:2-9, 11-14) They think say they don get everything​—they get money, better life, and e be like say they no get any worry-worry for life. So as this Levite see as things be for this people, e begin dey sad sotey e talk say: “True-true, as I don keep my heart pure, and wash my hand clean to show say I no know anything, na for nothing.” E dey clear say, this kind thing fit don make-am stop to serve Jehovah.

15. As e dey for Psalm 73:16-19, 22-25, wetin help the Levite wey write this psalm to dey happy again?

¹⁵ Read Psalm 73:16-19, 22-25. The Levite “enter the holy place of God.” For there, maybe as e dey with other people wey de worship God, this one make e mind come down, e think well, and sofri pray to Jehovah about e condition. So, this one make-am see say the way e de think dey foolish, and e fit even no be friend of Jehovah again. E still understand say wicked people dey ontop “ground wey fit draw person fall” and their life go “end for bad way.” The Levite try to see things the way Jehovah de see things so that e go stop to jealous wicked people. Because of  this one, e come dey happy again and e mind come down. E talk say: “Apart from [Jehovah] I no want any other thing for this earth.”

16. Wetin we fit learn from one Levite?

¹⁶ Wetin we learn? Make we no ever jealous wicked people wey be like say them de do well. Their happiness no de last, and they no get hope to live forever for future. (Eccl. 8:12, 13) If we jealous them, this one fit make us dey sad sotey life go tire us, and e fit even spoil our friendship with Jehovah. So if you notice say you don de jealous wicked people wey be like say things de go well for them, make you do wetin that Levite do. Obey the advice wey Jehovah de give us because of the love wey e get for us, and near our brothers and sisters wey de do wetin Jehovah want. When you love Jehovah pass any other thing for this life, you go really dey happy. And you go remain for that road wey go make you get “the real life.”​—1 Tim. 6:19.

17. Which things make Peter tire?

¹⁷ Apostle Peter na person wey de put e heart for work and give e best. But sometimes, e no de think well first before e talk or do some things. And this one make-am regret after. For example, when Jesus tell e apostles say e go suffer and die, Peter tell-am say: “This kind thing no go happen to you at all.” (Matt. 16:21-23) But Jesus correct Peter. Another time na when people come arrest Jesus, Peter no think before e do wetin e do, e just cut the ear of the slave of the high priest. (John 18:10, 11) Jesus still correct Peter again. Another one na when Peter de make mouth say e no go ever leave Jesus even if other apostles leave Jesus! (Matt. 26:33) But even as Peter trust e self reach, e allow fear of man to make-am deny Jesus three times. This one pain Peter reach bone, and “e go outside and really cry.” (Matt. 26:69-75) E  fit don de think whether Jesus go fit ever forgive-am.

18. How Jesus help Peter to dey happy again?

¹⁸ But even with that one, Peter no let life tire-am sotey e stop to serve Jehovah. After the mistake wey e make, e continue to serve Jehovah with the other apostles. (John 21:1-3; Acts 1:15, 16) Wetin help-am dey happy again? Peter remember say Jesus don pray say make e faith no die, and Jesus encourage-am make e go back and encourage e brothers. Jehovah answer that prayer wey Jesus pray. After, Jesus appear to Peter, maybe to encourage-am. (Luke 22:32; 24:33, 34; 1 Cor. 15:5) Jesus still appear to all other apostles after they don suffer for the whole night de find fish, but they no see. So, that time Jesus give Peter the chance to tell-am how e love-am reach. Jesus don forgive e dear friend and give-am more work.​—John 21:15-17.

19. As e dey for Psalm 103:13, 14, how Jehovah de see us when we sin?

¹⁹ Wetin we learn? The way Jesus treat Peter show say Jesus really get pity just like e Father. So when we make mistake, make we no think say Jehovah no go ever forgive us. Make we remember say na Satan want make we de think like that. Instead, make we sofri think about how Jehovah love us, e understand say we fit make mistake and e dey ready to forgive us. Make we do like Jehovah when other people do wetin pain us.​—Read Psalm 103:13, 14.

20. Wetin we go talk about for the next topic?

²⁰ The example of Joseph, Naomi and Ruth, the Levite, and Peter make us dey sure say “Jehovah dey near people wey de feel say their own don finish.” (Ps. 34:18) Sometimes, Jehovah de allow us to suffer some things and our condition fit tire us. But, when we succeed to endure problems with the help wey Jehovah de give, our faith de strong. (1 Pet. 1:6, 7) For the next topic, we go still see how Jehovah de support the people wey hold-am tight even though say life fit tire them, maybe because of their own mistake or because of hard condition.