Heni. Bibel to miñañ mi kôba bi ñunda bé hala.

I ngéda ba ñañ nlôñ u i bi Bibel bipe, bahogi ba nhoñol le bikristen bi hiai hi bisu bi bé sôblana inyu bawoga. Kiki hihéga, Kaat Nyambe i nkal ha homa nu le: “I ba toi le bawoga ba ntuglana bé, inyuki ni bôt ba nsôblana inyu yap?”

Di tehe i yom bayimam ba Bibel ba nkal inyu jam li. Dokta Gregory Lockwood a nkal le: “Jam to jada ikété Bibel, to miñañ mi kôba li ñunda bé le mut a bi sôblana inyu bawoga.” Malét nkeñi le Gordon D. Fee a tila le: “Yom yo ki yo i miñañ mi kôba tole i Bibel i mpôdôl bé i nya sôble i. To malômbla ma yondo ma nsima bé i jam li. Jam jo ki jo li ñunda bé le bikristen bi hiai hi bisu, to bibase bi bi lo i mbus nyemb yap bi bé sôble bôt inyu bawoga.”

Bibel i nkal le banigil ba Yésu ba bé “yilha bôt ba biloñ gwobisôna banigil, ba sôblege bo . . . , ba niigaga bo i nôgôl mam momasôna” a bi ti bo oda le ba boñ. (Matéô 28:19, 20) Ilole mut a nsôblana inyu yila nnigil Yésu, a nlama ndugi nigil, a hémle i mam a nigil, a nôgôl Yéhôva ni Man wé. Mut a bi wo ba jô, a nla bé boñ i mam ma; to kristen i i niñ i nla bé bôñôl nye mo.​—Ñañal 9:5, 10; Yôhanes 4:1; 1 Korintô 1:14-16.

Kii Paul a bé sômbôl ni kal?

Bôt bahogi ba Korintô ba bé neebe bé le bawoga ba ga tuge. (1 Korintô 15:12) Paul a bi unda bo le mahoñol map ma téé bé. A bi toñle bo le hiki kel a bé boma mandutu kayéle ‘nyemb i bé i téé nye bisu.’ Ndi, a bé nkwoog nkaa le to ibale a nwo, a ga tuge inyu niñ i ngii kiki Yésu.​—1 Korintô 15:30-32, 42-44.

Lôk kéé i Korintô i bé lama nok le, kii ba bi yila minhook mi bikristen, ba bé lama boma mandutu hiki kel, ba wo ilole ba ntuge. Jon, i “kôhna sôble i Kristô Yésu” i bé kobla le ba ‘nkôhna sôble i nyemb yé.’ (Rôma 6:3) I sôble i, i bé kobla le kiki Yésu, ba mpohol niñ i mandutu i i ga kena bo i nyemb, i mbus ba loo bitugne inyu niñ i ngii.

Nwii ima i mbus sôble yé, Yésu a bi kal baôma bé iba le: “N’a kôhna ki i sôble me yé i kôhna.” (Markô 10:38, 39) Hana nlôñ unu, Yésu a mpôdôl bé sôble i malép, ndi a bé sômbôl kal le makidik a bi yoñ i téñbe ni Djob letee ni lisuk ma bé lama kena nye letee ni nyemb. Paul a tila le minhook mi mi “nok ndutu kiki nye mi ga kôhna nlélém lipém.” (Rôma 8:16, 17; 2 Korintô 4:17) Inyu hala nyen ba bé lama wo, i mbus ba tuge inyu niñ i ngii.

Jon Paul a bé sômbôl kal toi le: “Ibale hala bé, ki i bôt ba yé kôhna sôble inyu yila bawoga ba ga boñ lelaa? Ibale bawoga ba nlama yaga bé tuge, inyuki ba yé kôhna sôble inyu ba bawoga?”