Daong, dang adong songon i disurat di Bibel jala dang adong bukti sejarah na patuduhon na masa songon i.

Godang do terjemahan ni Bibel na mambahen halak marpikkir molo di jaman ni si Paulus adong halak Kristen na tardidi humokkop halak na mate. Misalna Bibel bahasa Batak Toba terjemahan LAI mandok, “Aha do na niula ni angka na padidihon dirina humongkop angka na mate?”

Sahalak sarjana Alkitab na margoar Dr. Gregory Lockwood mandok, dang adong bukti di Bibel manang di sejarah na patuduhon adong halak tardidi lao manggattihon halak na mate. Dang holan i, Professor Gordon D. Fee pe mandok, “Dang adong di Bibel manang di sejarah na patuduhon na hea masa songon i. Dang hea i disurat di Perjanjian Baru. Jala dang adong bukti na hea i diulahon halak Kristen di abad na parjolo manang di akka gareja najolo na dipajongjong dung mate akka apostel.”

Disurat do di Bibel paretta ni Jesus tu akka siseanna, “Laho ma hamu, bahen ma saluhut halak sian nasa bangso gabe siseanku, didi hamu ma nasida . . . Ajari hamu ma nasida mangulahon sude naung huparentahon tu hamu.” (Mat. 28:19, 20) Andorang so tardidi sasahalak ikkon jolo marsiajar do ibana taringot Jahowa dohot Jesus, ikkon porsea, jala mangoloi nasida. Hape molo mate sasahalak dang boi diulahon ibana i. Jala dang adong halak Kristen na mangolu na boi manggattihon ibana.​—Pjm. 9:5, 10; Joh. 4:1; 1 Kor. 1:14-16.

Attong aha do maksud ni si Paulus?

Adong piga-piga halak di Korint na mandok, dang adong haheheon. (1 Kor. 15:12) Alai dipatudu si Paulus, sala do na didok ni nasida i. Jotjot do si Paulus mangadopi situasi na berbahaya. Alani i ma didok ibana, “Ganup ari do ahu mangadopi hamatean.” Alai molo mate pe ibana pos do rohana, paheheonna do ibana lao mangolu tu surgo songon Jesus.​—1 Kor. 15:30-32, 42-44.

Porlu do diingot halak Kristen na di Korint ikkon diadopi nasida do situasi na berbahaya jala ikkon jolo mate do nasida asa dipahehe. Jadi tikki tardidi nasida “di bagasan Kristus Jesus”, berarti nungnga tardidi nasida “di bagasan hamamatena”. (Rom 6:3) Alani i, tikki tardidi nasida berarti nungnga rade nasida marsitaonon jala mate songon Jesus. Dung i pe baru dipahehe tu surgo.

Dua taon dukkon tardidi Jesus, didok ibana ma tu dua siseanna, “Didionna do hamu songon pandidion na tu ahu i.” (Mrk. 10:38, 39) Dang na tardidi di bagasan aek na didok Jesus dison, alai tardidi di bagasan hamamatena. Ala setia do Jesus tu Debata, gabe mate ma ibana. Ikkon songon i do tong akka halak na lao tu surgo. Didok si Paulus do molo akka halak na miniahan, ikkon ‘marsitaonon rap dohot Kristus jala rap dipasangap dohot ibana’.​—Rom 8:16, 17; 2 Kor. 4:17.

Jadi terjemahan na pas tu hata ni si Paulus di 1 Korint 15:29, i ma “Molo ndang dipahehe na mate, aha ma na masa tu halak na tardidi na gabe mate? Boasa ma dididi nasida asa gabe halak na mate?”