Awe, tapaba nangu pamo mu Baibolo nelyo mu mabuuku ayalanda pa malyashi ya kale apo tubelenga ukuti Abena Kristu balebatishiwilwako abafwa.

Ifyo bapilibula ici cikomo mu maBaibolo ayengi filenga abantu bamo ukutontonkanya ukuti Abena Kristu bamo mu nshiku sha kwa Paulo balebatishiwilwako abafwa. Ku ca kumwenako, muli Baibolo imo ici cikomo bacipilibula ukuti: “[Abafwa nga tabakabuushiwe], ninshi bakacita shani ababatishiwa pa mulandu wa bafwa?”—Baibele wa Mushilo.

Nomba umfweni ifyo abantu babili abasambilila ifya mu Baibolo balandile. Ba Dr. Gregory Lockwood batile: “Tapaba nangu pamo mu Baibolo nangu mu fitabo ifilanda pa malyashi ya kale apo tubelenga ukuti kwali abantu abalebatishiwilwako abafwa.” Ifi fine e fyo na ba profesa Gordon D. Fee balembele. Batile: “Takwaba ilyashi lya kale nelyo ilyalembwa mu Baibolo ililanda ukuti kwali ulubatisho lwa musango uyu. Takwaba nangu pamo mu Cipingo Cipya apo balanda pali ulu ulubatisho. Kabili takwaba ifishinka ifilanga ukuti Abena Kristu ba kubalilapo nelyo abali mu macalici ayapangilwe ilyo abatumwa bafwile, balebatishiwilwako abafwa.”

Baibolo ilanda ukuti abasambi ba kwa Yesu balingile ‘ukulenga aba nko shonse ukuba abasambi, ukulababatisha, no kulabasambilisha ukulakonka fyonse ifyo abebele.’ (Mat. 28:19, 20) Ilyo umuntu ashilaba umusambi uwabatishiwa, alingile ukusambilila pali Yehova na pa Mwana wakwe, ukusumina muli bena, no kulabomfwila. Umuntu uwafwa kabili uwaba mu nshiishi te kuti acite ifi twalandapo, kabili Umwina Kristu te kuti amucitileko ifi.—Luk. Mil. 9:5, 10; Yoh. 4:1; 1 Kor. 1:14-16.

Nomba ni mwi Paulo aloseshe ilyo alandile amashiwi ayaba pali 1 Abena Korinti 15:29?

Abena Kristu bamo balelanda ukuti abafwa tabakabuushiwe. (1 Kor. 15:12) Paulo alilangile ukuti ifyo balelanda fyali fya bufi. Acitile shani? Nangu ca kuti ali uwa mweo, alandile ukuti ‘cila bushiku alelolenkana ne mfwa.’ Kabili nangu ca kuti alisakamene ukuti inshita iili yonse ali no kufwa, alicetekele ukuti nga afwa ali no kubuushiwa no kuba icibumbwa ca ku mupashi, nga fintu cali kuli Yesu.—1 Kor. 15:30-32, 42-44.

Abena Korinti balingile ukwishiba ukuti apo bali Bena Kristu basubwa, bali no kulakwata amesho cila bushiku, kabili bali no kufwa e lyo pa numa bakesebuushiwa. Kanshi ilyo ‘babatishiwe muli Kristu Yesu balibatishiwe na mu mfwa yakwe.’ (Rom. 6:3) Ici calolele mu kuti nga filya fine cali kuli Yesu, nabo bene bali no kukwata amesho kabili bali no kufwa pa kuti bakabuushiwilwe ku muulu.

Ilyo papitile imyaka ukucila pali ibili ukutula apo Yesu abatishiwilwe mu menshi, aebele abatumwa bakwe babili ukuti: “Ulubatisho ulo ndebatishiwako, na imwe mukabatishiwako.” (Marko 10:38, 39) Yesu talelanda pa kubatishiwa mu menshi. Ico alepilibula ca kuti, ukutwalilila ukuba uwa cishinka kuli Lesa kwali no kulenga bamwipaya. Paulo alembele ukuti Abena Kristu basubwa bali ‘no kuculila pamo na Kristu, pa kuti no kucindamikwa bakacindamikilwe pamo nankwe.’ (Rom. 8:16, 17; 2 Kor. 4:17) Kanshi nabo balingile ukufwa pa kuti bakabuushiwilwe ku muulu.

Kanshi amashiwi Paulo alandile kuti yapilibulwa no kuti: “Nga te ifyo, ninshi bakacita shani abalebatishiwilwa ukufwa? Abafwa nga tabakabuushiwe nakalya, nga cinshi balebatishiwilwa ukufwa?”