No, no way eena di Baibl er eena eni hischri buk seh dat Kristyanz mi geh baptaiz eena di plays a peepl weh mi don ded.

Di way how difrent Baibl verzhan put dis vers mek sohn peepl tink dat joorin di apasl Paal taim, Kristyanz mi geh baptaiz eena di plays a peepl weh neva geh baptaiz bifoa dehn ded. Fi egzampl, wan verzhan seh: “Soh den, if di ded noh wahn rayz op bak fahn di ded, den weh sens ih mek fi peepl geh baptaiz eena di plays a dehn wan weh don ded?”—Di Nyoo Testiment eena Bileez Kriol.

Bot noatis weh too peepl weh stodi Baibl hischri seh. Dr. Gregory Lockwood mi seh dat no proof deh eena di Baibl er eena hischri dat enibadi mi geh baptaiz eena di plays a sohnbadi weh neva geh baptaiz bifoa dehn ded. Profesa Gordon D. Fee mi seh di saym ting. Hihn mi seh dat di Baibl ner hischri ga eni egzampl a dis kaina baptizm. Ih mi aalso seh dat no way eena di N[yoo] T[estiment] mi menshan dis kaina baptizm, ahn no proof deh dat eni a di Kristyanz eena di fers senchri mi du dis kaina baptizm eeda. Aalso, non a di peepl fahn di cherch dehn weh mi geh faam afta di apasl dehn mi ded mi praktis dis kaina baptizm.

Di Baibl seh dat Jeezas falowaz mi fi ‘teech peepl fahn aala di nayshan dehn fi bee ih disaipl ahn teech dehn fi obay aal di tingzʼ weh hihn mi koman dehn fi du. (Mach. 28:19, 20) Bifoa wahn persn kuda mi geh baptaiz ahn bee Jeezas disaipl, ih mi need fi laan bowt Jehoava an ih Son, bileev eena dehn, an obay dehn. Ahn wahn persn weh don ded kyaahn du dat, ahn wahn livin Kristyan kyaahn du dat far ahn needa.—Eccl. 9:5, 10; Jan 4:1; 1 Kor. 1:14-16.

Soh den, da weh Paal mi-di seh?

Som a di peepl fahn Korint mi-di seh dat di ded noh wahn geh rayz op bak tu laif. (1 Kor. 15:12) Paal mi proov tu dehn dat dehn mi rang. How? Hihn mi seh dat ‘evri day hihn fays det.ʼ Af koars, hihn mi stil alaiv. Soh hihn mi eksplayn dat evri day hihn kuda mi looz ih laif. Bot hihn mi noa fi shoar dat afta hihn mi ded, hihn mi wahn geh rayz op bak tu laif fi liv da hevn, jos laik Jeezas.—1 Kor. 15:30-32, 42-44.

Di bradaz ahn sistaz da Korint mi need fi andastan dat sins dehn da-mi anointid Kristyanz, dehn mi wahn haftu fays difrent chraiyalz evri day ahn dehn mi wahn haftu ded bifoa dehn kuda mi geh rayz op bak tu laif da hevn. Soh wen dehn “mi geh baptaiz intu Krais Jeezas,” dehn mi aalso “geh baptaiz intu ih det.” (Roam. 6:3) Dis mi meen dat dehn mi wahn haftu fays difrent chraiyalz ahn ded faytful soh dat dehn kuda mi geh rayz op bak tu laif fi liv da hevn, jos laik Jeezas.

Moa dan too yaaz afta Jan mi baptaiz Jeezas, Jeezas mi tel too a ih apasl dehn: “Di kaina baptizm weh Ai di geh baptaiz wid, unu wahn get tu.” (Maak 10:38, 39) Jeezas neva mi-di taak bowt waata baptizm. Hihn mi-di seh dat ih mi wahn ded bikaaz ih mi faytful tu Jehoava. Paal mi seh dat az lang az anointid Kristyanz ‘shayr wid Krais eena di saym kaina sofarin, dehn mi wahn shayr wid hihn eena ih gloari tu.ʼ (Roam. 8:16, 17; 2 Kor. 4:17) Soh dehn mi wahn aalso haftu ded soh dat dehn kuda mi geh rayz op bak tu laif fi liv da hevn.

Soh dat da wai wi ku chranslayt Paal werdz az: “Adawaiz, weh wahn hapm tu dehn peepl weh geh baptaiz fi mek dehn ded? If di ded noh wahn geh rayz op bak tu laif non ataal, den wai dehn peepl di geh baptaiz fi mek dehn ded?”