Ingaha. Tihine omuri Bibuli ninga shi omu bindi bitabo ahari kwereka ku cabireho.

Oburyo obu Bibuli zimwe ziri kugambamu orwo runyiriri nibutuma abantu bamwe batekateka ngu oko kubatizibwa kukaba nikubaho omu bwire bwa Paulo. Ecokureberaho: Bibuli emwe negira eti: ‘Ku kirabe kiri kisyoya, ababatizibwa aha bw’abafire baryaba bata?’—New International Version.

Konka, yetegereze ebi abanyabwenge babiri bagambire. Dr. Gregory Lockwood akagamba ku hatariho ekihamya omuri Bibuli ninga shi ekindi kitabo ekiri kwereka ku hine omuntu owabatizibwe omu mwanya g’owafire. Nambwenu, omunyabwenge Gordon D. Fee akahandika ati: “Tihine omuri Bibuli ninga shi omu kindi kitabo ahari kwereka ku oko kubatizibwa kwabireho. Endagano ensya terakigambireho kandi tihariho ekihamya ekiri kwereka ku Abakristo b’omu bwire bwa kare bakikozire, ninga amakanisa agatandikireho entumwa zamara kufa.”

Bibuli yo negamba ku abakurasi ba Yesu babire ‘barahindure abantu abegi bakababatiza, bakabegesa korobera byona’ ebi yaragire. (Mat 28:19, 20) Mbere y’omuntu kubatizibwa akaba ashemerire kwega ebiri kukwata ahari Yehova n’Omwana weye, akabikiriza kandi akaborobera. Omuntu owabire afire akaba atari kubasa kukikora kandi n’owabire ahurire akaba atari kubasa kukimukorera.—Mub 9:5, 10; Yoh 4:1; 1 Kor 1:14-16.

Mbwenu shi obwe, Paulo akaba namanyisa ki?

Abakorinso abamwe bakaba nibagamba ku hataribaho okuzoka. (1 Kor 15:12) Paulo akahakanisa eyo mitekatecere. N’obu yabire ahurire, akagamba ku ‘burizoba yabire ari ow’okufa.’ Konka n’obu yabugine ebizibu byingi akaba nayesiga ku n’obu yakufa yabire arije kuzoka ayine omubiri g’omwika, nka Yesu.—1 Kor 15:30-32, 42-44.

Abakristo b’omuri Korinso bakaba bashemerire kumanya ku mbere y’okuzoka babire bashemerire kuraba omu bigezo kandi bakafa. Obwe rero, ‘ababatizibwe omuri Kristo Yesu’ ‘bakabatizibwa n’omu kufa kweye.’ (Rom 6:3) Eco nikimanyisa ku na bo babire barije kubugana ebizibu bakafa kugira ngu bazocere kutura omu iguru, nka Yesu.

Hahwire emyaka eri kukira ahari ibiri Yesu abatizibwe omu mizi mingi, akagambira entumwa zeye ibiri ngu: ‘N’okubatizibwa oku ndi kubatizibwamu, muryakubatizibwamu.’ (Mak 10:38, 39) Hanuya, Yesu akaba atari kubatizibwa. Akaba namanyisa ku kuguma ari omwesigwa ahari Ruhanga cabire kiratume yafa. Paulo na we akahandika ku abashukirweho omwika babire ‘barashashe hamwe na we, ngu babone kuhebwa ekitinisa hamwe na we.’ (Rom 8:16, 17; 2 Kor 4:17) Na bo bakaba bashemerire kubanza bafa kugira ngu bazocere kutura omu iguru.

Obwe rero, ebigambo bya Paulo nibibasa kugambwa omu buryo obuhikire ngu: “Abafire ku barabe batari kuzoka, ahabw’enki bari kubatizibwa omu kufa?”