Aapw. Esap mwo fán eú án ewe Paipel me ekkewe puken uruwo fós usun án ekkewe Chón Kraist papatais fán ásengesin ekkewe mi máló.

Chiyakúún ena wokisin lón chómmóng Paipel, a efisi án ekkóch repwe ekieki pwe papatais lón konik fán ásengesin ekkewe mi máló a fis lón fansoun Paulus we. Áwewe chék, iei met New International Version a apasa: “Nge ika ese wor manawsefál, met chókkana mi papatais fán ásengesin ekkewe mi máló repwe féri?”

Iwe nge, nengeni meefien ekkeei rúúemén soukáé usun Paipel. Dr. Gregory Lockwood a erá pwe ewe Paipel me ekkewe puken uruwo rese fós usun ena sókkun papatais, ina án emén papatais fán ásengesin chókkewe mi fen máló. Pwal emén soukáé usun Paipel, Professor Gordon D. Fee, a pwal tipeeú ngeni ena. A makkeei pwe ese wor pwóróus lón ewe Paipel are uruwo usun ena sókkun papatais. A erá pwe esap fán eú an mak lón ewe Testament Sefé. Me ese wor pisekin ánnet pwe ekkewe popun Chón Kraist are chón ekkewe mwichefel mi fférútá ekiseló mwirin málóón ekkewe aposel ra féri ena sókkun papatais.

Ewe Paipel a erá pwe néún Jesus kewe chón káé repwe ‘asoulängala chon ekewe mwü meinisin, repwe papataisiir . . . , repwe afalafaleer pwe repwe aleasochisi meinisin’ minne Jesus a allúkú. (Mat. 28:19, 20) Me mwen án emén epwe wiliti néún Jesus chón káé mi papatais, mi lamot an epwe káé usun Jiowa me Néún we, lúkúúr me álleasochisiir. Emén mi fen máló me nóm lón peias esap tongeni féri ena, are emén Chón Kraist mi manaw ese tongeni féri ena fán itan.​—SalAf. 9:5, 10; Joh. 4:1; 1 Kor. 1:14-16.

Iwe ika ina, met weween minne Paulus a fós usun?

Ekkóch chón Korint ra erá pwe ekkewe mi máló resap manawsefál. (1 Kor. 15:12) Paulus a áiti ngeniir pwe ese pwúng ena. A áweweei pwe iteiten rán máló a nóm lesopwun mesan. Pwúngún pwe a chúen manaw. Inaamwo ika a chék chuchchuuri feiengaw, nge a lúkúlúk pwe lupwen epwe máló epwe manawsefál ngeni manaw lón láng usun chék Jesus.​—1 Kor. 15:30-32, 42-44.

Mi lamot án ekkewe chón Korint repwe mirititi pwe pokiten iir Chón Kraist mi kepit, iwe repwe kúna sóssót iteitan me máló me mwen repwe tongeni manawsefál. Ar “papatais lon Kraist Jesus” a wewe ngeni ar “papatais lon an we mäla.” (Rom 6:3) A wewe ngeni pwe repwe usun Jesus, repwe kúna sókkopaten sóssót, me mwirin repwe máló me manawsefál ngeni láng.

Lap seni ruu ier mwirin án Jesus papatais lón konik, a ereni rúúemén néún kewe aposel: “Oupwe pwal fokun papatais ngeni ewe papatais ngang üpwe papatais ngeni.” (Mark. 10:38, 39) Ese fós usun án Jesus papatais lón konik. Nge weween alon Jesus na pwe an tuppwél ngeni Kot epwe emmwen ngeni an máló. Paulus a makkeei pwe ekkewe mi kepit repwe “eti Kraist lon an riaföü, [repwe] pwal eti i lon an ling.” (Rom 8:16, 17; 2 Kor. 4:17) Iwe a lamot repwe pwal máló pwe repwe tongeni manawsefál ngeni eú manaw lón láng.

Ina popun, minne Paulus a apasa epwe tongeni iei pwúngún chiyakúún: “Ika ekkewe mi máló resap manawetá, iwe ifa usun chókkewe mi eáni ewe papatais ngeni máló? Ika ekkewe mi máló resap manawetá, iwe pwata ra eáni ena sókkun papatais?”