A si lo, Baibal asiloah minung tuanbia ah cutin tipil an ing timi kong a um lo.

Mah Baibal caang an leh ning a phunphun ruangah mi cheukhat nih mithi hna caah a hmasa Khrihfa hna nih tipil an ing tiah an ruah. Tahchunhnak ah, Baibal cheukhat nih hitin an ti: “Thawhṭhannak a um lo ahcun mithi hna caah tipil a ingmi hna nih zeidah an tuah awk a si?”—New International Version.

Asinian Baibal lei mifim pahnih nih an chimmi bia kha i cinken. Baibal lei mifim pakhat a simi Dr.  Gregory Lockwood nih Baibal asiloah minung tuanbia ah mithi hna caah tipil an innak hmun kong he aa tlaiin an ṭialmi a um lo tiah a ti. Cu bantukin a dang Baibal lei mifim pakhat a simi Professor Gordon D. Fee zong nih Baibal asiloah minung tuanbia ah mah bantuk tipil innak phun a um lo tiah a ti ve. Cun Biakam Thar Baibal ah mah kong kha zeitikhmanh ah a langhter bal lo, cun a hmasa Khrihfa asiloah lamkaltu pawl an thih hnu tlawmpal ah dirh a simi church ah mah bantuk tipil innak a um tiah a langhtermi a um lo tiah a ti.

Baibal nih Jesuh zultu pawl kha ‘miphun vialte kha zultu ah va ser hna u . . . , tipilnak va pe hna u law aan fialmi vialte hna hi an zulh nakhnga va cawnpiak hna u’ tiah a ti hna. (Matt. 28:19, 20) Mi pakhat nih zultu pakhat in tipil a in hlanah a cawn i a zumh a hau, cun Jehovah le a Fapa nawl kha a ngaih hna a hau. A thi cangmi le thlan ah a ummi nih cutin a tuah kho lo i a nungmi zong nih amah canah cutin an tuahpiak kho ve lo.—Pct. 9:5, 10; Johan 4:1; 1 Kor. 1:14-16.

A si ahcun Paul nih zeidah a chim duhmi a si?

Cheukhat Khrihfa hna nih mithi cu an tho ṭhan lai lo tiah an ti. (1 Kor. 15:12) Paul nih mah ruahnak a palh kha a langhter. Zeitin in dah? Paul nih ‘nifatin thihnak ral ka tong’ tiah a rak ti. Asinain a rak nung rih ko. Nifatin thihnak ral a tong ko nain a thih hnuah Jesuh bantukin thlarau pum in ka tho ṭhan lai ti kha a rak zumh.—1 Kor. 15:30-32, 42-44.

Korin Khrihfa hna nih chiti thuhmi Khrihfa hna cu nifatin harnak tampi an tong i thawhter an si hlanah an thi hmasa ti kha an hngalh a hau. Cucaah ‘Khrih Jesuh he an i pehtlaihnak chung i an i hnim’ tikah ‘a thihnak he an i pehtlaihnak chung ah an i hnimmi’ zong a si. (Rom 6:3) Mah cu Jesuh bantukin harnak an tong lai i an thi lai, cun van ah an tho ṭhan lai a ti duhnak a si.

Jesuh nih tipil a in hnu kum hnih leng a rauh hnuah a zultu pahnih kha “tipil ka in ding ning hin nan in khawh ve lai maw” tiah a ti hna. (Mar. 10:38, 39) Jesuh nih ti in tipil innak kong kha a chim duhmi a si lo. A chim duhmi cu Pathian cungah zumhfek tein umnak nih thihnak a chuahter timi kha a si. Paul nih chiti thuhmi hna kong he aa tlaiin hitin a chim: “Khrih temh-innak kha kan i hrawm ahcun a sunparnak zong kan i hrawm ve lai.” (Rom 8:16, 17; 2 Kor. 4:17) Cucaah annih zong vancung nunnak ah an thawhṭhan nakhnga an thih hmasa a hau ve.

Cucaah Paul chimmi bia kha hitin fiang tein kan langhter khawh: “Mithi cu an thawh ṭhan lo ahcun thihnak ah tipil a ingmi hna kha tah, zeitin? Mithi cu thawhter an si lo ahcun cu bantuk tipil innak phun cu zeicah pek an si kun?”