Ayi, o tɛ. Bibulu wala tariki gafe si t’a fɔ ko kerecɛnw tun b’o kɛ.

O vɛrise bayɛlɛmana cogo minw na Bibulu caaman kɔnɔ, o lo y’a to mɔgɔ caaman b’a miiri ko Pol ka wagati la, kerecɛn dɔw tun be batize jii kɔnɔ mɔgɔ saninw ye. Ɲɛyirali fɛ, a fɔra julakan Bibulu kɔnɔ ko: “Ni suuw tena kunun fewu, mun na olu b’u yɛrɛ di u k’u batize suuw tɔgɔ la?”—Alliance Biblique du Burkina Faso.

Nka, a filɛ Bibulu sɛgɛsɛgɛla fila ye min fɔ. Gregory Lockwood y’a fɔ ko dalilu si tɛ yen Bibulu wala tariki gafew kɔnɔ min b’a yira ko mɔgɔw tun be batize mɔgɔ saninw ye. Profesɛri Gordon Donald Fee fana y’a sɛbɛ ko: “Ɲɛyirali si tɛ yen Bibulu wala tariki gafew kɔnɔ min b’a yira k’o batɛmu sugu tun be kɛ. O koo ɲɔgɔn ma fɔ yɔrɔ si Layidu Kura (Nouveau Testament) kɔnɔ. Dalilu si t’a yira ko kerecɛn fɔlɔw tun b’o koo kɛ. Legilizi minw sigira sen kan dɔɔni cidenw sanin kɔ, dalilu si t’a yira fana k’o koo ɲɔgɔn tun be kɛ yen.”

Bibulu kɔnɔ, Yezu y’a fɔ a ka kalandenw ye ko: “Aw ye taga siyaw bɛɛ kɛ ne ka kalandenw ye k’u batize . . . , k’u kalan, waasa u ka ne ka kuma bato.” (Mat. 28:19, 20). Walisa mɔgɔ ka batize ka kɛ Yezu ka kalanden ye, a ka ɲi k’a ɲini ka Jehova n’a Dencɛ lɔn, ka la u la ani ka mɛnni kɛ u fɛ fɔlɔ. Mɔgɔ sanin tɛ se k’o kɛ ani mɔgɔ min be niin na, o tigi tɛ se k’o kɛ mɔgɔ sanin ye.—Waaj. 9:5, 10; Zan 4:1; 1 Kor. 1:14-16.

N’o lo, Pol ka kumaw kɔrɔ ko di?

Korɛntika dɔw tun b’a fɔ ko suuw tɛna kunu (1 Kor. 15:12). Pol y’a fɔ u ye k’o tɛ tiɲɛn ye. A ko ‘loon bɛɛ ale be saya sira kan.’ Tiɲɛn lo ko Pol bele tun be niin na. A y’a ɲɛfɔ ko ale niin tun be farati la loon o loon. Nka a tun lanin b’a la ko n’ale sara, Ala tun bena a lakunu a be taga sankolo la i ko Yezu.—1 Kor. 15:30-32, 42-44.

Korɛnti balimaw tun ka ɲi k’a faamu ko u tun ye kerecɛn mɔlenw ye minkɛ, u tun bena gwɛlɛyaw sɔrɔ, u tun bena sa ani o kɔ le, u suu tun bena kunu. O la, tuma min na u “batizera Yezu Krista tɔgɔ la,” u “batizera ka jɛn n’a ye a ka saya la fana.” (Ɔrɔm. 6:3). O kɔrɔ ko u tun bena gwɛlɛyaw sɔrɔ ani u tun bena sa walisa ka lakunu ka taga sankolo la i ko Yezu.

Saan fila ni kɔ Yezu batizenin kɔ jii la, a y’a fɔ a ka kalanden fila ye ko: “Ne bɛna batize cogo min na, aw bɛna batize o cogo ra.” (Mariki 10:38, 39, Biblu Ala ta Kuma). Yezu tun b’a fɔra le ko ale bena sa a ka kantigiya kosɔn. Pol y’a sɛbɛ ko kerecɛn mɔlenw tun bena Krista ka “tɔɔrɔ ɲɔgɔn sɔrɔ” ani ko u tun “ben’a ka boɲa ɲɔgɔn sɔrɔ” fana (Ɔrɔm. 8:16, 17; 2 Kor. 4:17). O la, olu fana ka ɲi ka sa walisa ka lakunu ka taga sankolo la.

Ka kɛɲɛ n’o ye, Pol ka kumaw bayɛlɛmacogo ɲuman ye ko: “O la, minw be batizera walisa ka sa, olu bena kɛ di? Ni suuw tɛna kunu fewu, mun na olu do be batizera walisa ka sa?”