Sega, e sega ni bau tukuni qori ena iVolatabu se me laurai ena ivolatukutuku makawa.

Na kena vakadewataki na tikinivolatabu qori ena levu na iVolatabu, era lai nanuma kina eso ni dau caka na papitaiso ena vukudra na mate ena gauna i Paula. Kena ivakaraitaki: “Kevaka sa sega na tucake tale mai na mate, na cava era na cakava ko ira era papitaisotaki ena vukudra na mate?”—Veiyalayalati Vou.

Ia dikeva na ka erau tukuna e rua na vuku ni iVolatabu. E kaya o Dr. Gregory Lockwood, ni sega ni dua na ivakadinadina ena iVolatabu se na ivolatukutuku makawa ni a caka na papitaiso “ena vukudra na mate.” E tautauvata qori kei na ka e vola o Parofesa Gordon D. Fee: “E sega ni laurai ena iVolatabu se na ivolatukutuku makawa ni a caka e dua na mataqali papitaiso va qo. E sega ni bau tukuni ena Veiyalayalati Vou, e sega tale ga ni dua na ivakadinadina nira cakava qori na lotu vaKarisito taumada, se dua na isoqosoqo lotu vaKarisito (orthodox) e tauyavu ena veisenitiuri e tarava.”

E kaya na iVolatabu ni nodra itavi na imuri i Jisu ‘mera vakavulici ira na lewe ni veivanua kece ga mera tisaipeli, papitaisotaki ira qai vakavulici ira mera muria na ka kece e vakarota.’ (Maciu 28:19, 20) Me rawa gona ni dua e papitaiso me tisaipeli, ena vinakati me vulica na veika me baleti Jiova kei Luvena, me vakabauti rau, talairawarawa tale ga. Ena sega ni rawa ni cakava qori e dua sa mate, se sa davo tu ena ibulubulu, ena sega ni rawa ni cakava tale ga qori na lotu vaKarisito ena vukudra na mate.—Dauv. 9:5, 10; Joni 4:1; 1 Kor. 1:14-16.

Na cava gona e vakaibalebaletaka tiko o Paula?

Era kaya eso e Korinica nira na sega ni vakaturi na mate. (1 Kor. 15:12) E vakacala o Paula na rai qori. E kaya ni voleka ni mate e veisiga. E macala ni sega ni mate o Paula. A sotava e levu na ituvaki leqataki, ia e nuidei ni na vakaturi ena gauna e mate kina me vakataki Jisu, me dua na kabula vakayalo kaukaua.—1 Kor. 15:30-32, 42-44.

E bibi mera kila na lotu vaKarisito lumuti e Korinica nira na vakatovolei e veisiga, era na mate mada ni bera nira vakaturi. Nira “papitaiso vei Karisito Jisu,” e kena ibalebale tale ga nira na “papitaisotaki ina nona mate.” (Roma 6:3) Kena ibalebale era na vakatovolei tale ga me vakataki Jisu me yacova nira mate, era na qai vakaturi mera bula i lomalagi.

Oti e sivia ni rua na yabaki na nona papitaiso o Jisu ena wai, e kaya vei rau na nona yapositolo: “Drau na papitaiso tale ga ena papitaiso au papitaiso kina.” (Mari. 10:38, 39) Qori e sega ni dusia nona papitaiso ena wai. E tukuna tiko o Jisu ni nona yalodina vua na Kalou ena lai tini sara ena nona mate. E vola o Paula nira na “rarawa vata” na lotu vaKarisito lumuti me rawa nira qai “vakalagilagi vata.” (Roma 8:16, 17; 2 Kor. 4:17) Kena ibalebale era na mate mada, me rawa nira qai vakaturi mera bula i lomalagi.

Qo gona na vakadewa donu ni ka e tukuna o Paula: “Ke sega, na cava era na cakava o ira na papitaisotaki mera mate? Ke ra sega sara ga ni vakaturi na mate, na cava mera papitaisotaki kina mera mate?”