Na, Kristanv oxem kortale mhunn Bible-ant vo itihasachea pustokamnim sangona.

Punn hem vers zaitea Bible bhaxantoramnim ami vachtat tednam, Pauluchea disamnim, Kristanv meloleam pasot bautizm ghetale oxem disonk xokta. Udharonnak, thoddea bhaxantoramnim oxem sanglam: “Mel’lim khorench jivont zainant zalear, tanche khatir kiteak mhonn snan ghetat?”

Punn don Bible-ache zannar, hea vixim kitem mhunnttat tacher dhean diat. Dr. Gregory Lockwood sangta, “mel’leam khatir bautizm gheunchea vixim Bible-ant vo itihasant koslech purave nant.” Toxench, Professor Gordon D. Fee-an boroilem, “oslea torechea bautizma vixim Bible-ant vo itihasant khoinch sangona. Hea bhaxechea bautizma vixim Novea Korar-ant khoinch sangona ani adlea Kristanvamnim vo apostl melea uprant khoincheach igorzamnim oxem kel’lea vixim purave nant.”

Jezun aplea pattlavdarank oxem sanglem mhunn Bible sangta: “Povitr atmeache nanvim tankam povitr-snan diun, ani Hanvem tumkam adnea dileat titleo-i tankam xikoun sogleam deslokank mhoje xis korat.” (Mt. 28:19, 20 Povitr Pustok - Novo Korar) Tor ek munis bautizm gheun Jezucho xis zaunchea poilim, tannem Jehova Deva vixim ani tachea Puta vixim xikon, tancher bhavarth dovrun tanchem utor pallunk zai. Ek mel’lo munis vo fonddant aslolo munis hem korunk xokona; vo jivont aslolo ek Kristanv tachea pasot hem korunk xokona.—Up. 9:5, 10; Juanv 4:1; 1 Kor. 1:14-16.

Tor Paulu kitem mhunnonk sodhtalo?

Melolim porot jivont zaunchimnant mhunn thodde Korintkar sangtale. (1 Kor. 15:12) Tor tanchem chintop chukichem aslem mhunn Paulun koxem dakhoilem? Tannem oxem sanglem, ‘Dor disa apunn mornnachea sonkoxttant asam.’ Him utram mhunnttlim tednam to jivont aslo mhunn kainch dubhav na. Punn tachea jivak dhoko asa zalear pasun, melea uprant to Jezu bhaxen ek bollixtt otmik jiv zaun porot jivont zatolo mhunn taka khatri asli.—1 Kor. 15:30-32, 42-44.

Korintkarank somzonk zai aslem ki tim obhixikt asat hacho orth, punorjivont zaunchea poilim tankam dor disa trasancho fuddo korcho poddttolo ani tankam moronn soschem poddttolem. Tankam Jezu Kristant ‘buddoun kaddleant vo bautizm ghetla’ mhunnche ‘tachea mornnant buddoileant vo bautizm ghetla.’ (Rom. 6:3) Hacho orth, punorjivont zaunk zai zalear tankam Jezu bhaxen tras ani moronn soschem poddttolem.

Udkant bautizm gheun don vorsam uprant Jezun aplea don xisank sanglem: “Hanvem gheunchem asa tem snan tumi ghetoleat.” (Marku 10:38, 39) Hanga, Jezu apnnem udkant ghetlolea bautizma vixim uloinaslo. Punn, to Devak visvaxi ravlolean taka moronn soschem poddttolem tea vixim sangtalo. Obhixikt Kristanvamnim Jezuchea ‘mhoimechim bhagidaram zatolim zalear, tannim tachea koxttanchim-i bhagidaram zaunk zai’ mhunn Paulun boroilem. (Rom. 8:16, 17; 2 Kor. 4:17) Tor tankam porot jivont zaun sorgar vochonk zai zalear tankam pasun morchem poddttolem.

Toxem zalear, Pauluchim utram hea toren mhunnttlear sarkem zatolem: “Melolim porot jivont zainant zalear, mornnant bautizm ghetoleam vixim kitem? Tim porot jivont zaunchimnant zalear tankam hea torecho bautizm kiteak ditat?”